Jesu Wà Azọ́njiawu Etọn Tintan

E ko yì azán atọ̀n todin he Natanaeli lẹzun dopo to devi tintan Jesu tọn lẹ mẹ. Jesu po delẹ to devi tintan enẹlẹ mẹ po dedo agewaji agbegbe Galili tọn, yèdọ lẹdo yetọn mẹ. Tòdaho Kana tọn mẹ wẹ yé jei, yèdọ fie Natanaeli wá sọn. Kana tin to lẹdo pópló tọn lẹ mẹ to agewaji Nazalẹti tọn, fihe Jesu lọsu whẹ́n te. Yé yin oylọ basina wá hùnwhẹ alọwle tọn de tẹnmẹ to Kana.

Onọ̀ Jesu tọn lọsu wá alọwle lọ tẹnmẹ. Na Malia yin họntọn whẹndo alọwlemẹ lẹ tọn de wutu, e taidi dọ ewọ tin to mẹhe to alọgọ nado penukundo jonọ susu he wá lẹ go mẹ. Enẹwutu, e yawu doayi e go dọ nude whè, bo dọna Jesu dọmọ: “Yé ma tindo ovẹn.”—Johanu 2:3.

Na taun tọn, nuhe biọ Malia te wẹ yindọ Jesu ni yí nude wà gando whèdomẹ ovẹn tọn lọ go. Hogbe yẹhiadonu tọn he Jesu yizan nado na gblọndo lẹ dohia dọ ewọ jẹagọdo obiọ lọ, e dọmọ: “Etẹwẹ dù yẹn po hiẹ po to enẹ mẹ?” (Johanu 2:4) Taidi Ahọlu dide Jiwheyẹwhe tọn, nuyiwa Jesu tọn lẹ dona nọ yin anadena gbọn Otọ́ olọn mẹ tọn etọn dali, e ma yin gbọn hagbẹ whẹndo tọn kavi họntọn lẹ dali. Malia gbọn nuyọnẹn dali jo whẹho lọ do alọmẹ na visunnu etọn, bo dọna lizọnyitọ lẹ poun dọ: “Nudepope he e dọna mì, mì wà ẹ.”—Johanu 2:5.

Osinzẹ́n zannu tọn ṣidopo wẹ tin to finẹ, ehe dopodopo yetọn sọgan hẹn hugan litli 40. Jesu degbena lizọnyitọ lọ lẹ dọmọ: “Mì kọ̀n osin do ozẹ́n lọ lẹ mẹ ni gọ́.” Enẹgodo, Jesu dọmọ: “Mì ba vude tọ́n todin bo hẹn ẹn yì anadenanutọ hùnwhẹ lọ tọn dè.”—Johanu 2:7, 8.

Ovẹn dagbedagbe enẹ yọ́n taun to nukun anadenanutọ hùnwhẹ lọ tọn tọn mẹ, ṣigba ewọ ma yọnẹn dọ e yin bibasi to azọ́njiawu-liho. E ylọ asisunọ yọyọ lọ bo dọna ẹn dọmọ: “Mẹlẹpo wẹ nọ de ovẹn dagbe tọ́n jẹnukọn, bọ to whenue gbẹtọ lẹ ko nùmú, yé nọ de dehe ma sinyẹn lọ tọ́n. Hiẹ ka whlá ovẹn dagbe lọ kakajẹ din.”—Johanu 2:10.

Ehe wẹ yin azọ́njiawu tintan he Jesu wà. To whenue devi yọyọ etọn lẹ mọ azọ́njiawu ehe, yise yetọn to ewọ mẹ lodo dogọ. To enẹgodo, Jesu, onọ̀ etọn po nọvisunnu daa etọn lẹ po zingbejizọnlin yì Kapẹlnaumi to agewaji Ohù Galili tọn.