Kanbiọ lẹ sọn Wehiatọ lẹ Dè

Naegbọn Jesu heyin finfọnsọnku lọ do basi oylọna Tọmasi nado doalọ e go to whenuena e ko hẹnalọdotena Malia Magdaleni nado wàmọ jẹnukọnna enẹ?

Lẹdogbedevomẹ Biblu tọn hoho delẹ na linlẹn lọ dọ Jesu dọna Malia Magdaleni dọ e ni ma doalọ emi go blo. Di apajlẹ, Biblu Wiwe—Gun Alada lilẹ́ hogbe Jesu tọn lẹ dole: “A doalọ go e blo; na yẹn ma ko hẹji yì Otọ́ ṣie dè gba.” (Johanu 20:17) Ṣigba hogbe Glẹki dowhenu tọn he nọ saba yin lilẹdogbedevomẹ dọ ‘doalọ mẹgo,’ sọ nọ zẹẹmẹdo “nado tẹdo mẹgo, plá do okọ̀ namẹ, wlemẹ hẹn, gbomẹfán, hẹnmẹ go gbanun-gbanun” ga. E sọgbe hẹ lẹnpọn dagbe nado dọ dọ Jesu ma to agọjẹdo alọdomẹgo Malia Magdaleni tọn poun gba, na e na dotẹnmẹ yọnnu devo he wá yọdò lọ kọ̀n lẹ nado “hẹn afọ etọn go.”—Matiu 28:9.

Lẹdogbedevomẹ egbezangbe tọn susu, taidi Les Saintes Écritures—Traduction du monde nouveau, The New Jerusalem Bible, po The New English Bible po gọalọna mí nado mọnukunnujẹ zẹẹmẹ he hogbe Jesu tọn lẹ tindo na taun tọn mẹ, na yé basi lẹdogbedevomẹ hogbe ehelẹ tọn dọmọ: “Gbọ titẹdo go e.” Naegbọn Jesu do dọ mọ na Malia Magdaleni he yin gbẹdohẹmẹtọ etọn pẹkipẹki de?—Luku 8:1-3.

E họnwun dọ Malia Magdaleni to budi dọ Jesu ko to awuwle nado jo yé do bo hẹji yì olọn mẹ. Na e yin whinwhàn gbọn ojlo vẹkuvẹku etọn nado tin hẹ Oklunọ etọn dali wutu, e hẹn Jesu go gligli, bo ma dike ewọ ni yì. Nado hẹn ẹn deji dọ emi ma ko to yìyì, Jesu dọna Malia dọ e ni gbọ titẹdo emi go, ṣigba bo yì do owẹ̀n fọnsọnku emitọn tọn na devi lẹ.—Johanu 20:17.

Enẹwutu, to whẹho Malia Magdaleni tọn mẹ, Jesu to agọjẹdo ojlo agọ̀ he ewọ tindo nado glọnalina yìyì etọn; to whẹho Tọmasi tọn mẹ, Jesu to alọgọna mẹde he tindo ayihaawe. To nujijọ awe lọ lẹ whenu, Jesu tindo whẹwhinwhẹ́n dagbe nado yinuwa dile e wà do.