“Nuflinmẹ Towe lẹ Wẹ Homẹhunhun Ṣie”

“Onú depope he yè ko wlan dai, yè wlan yé na oplọn mítọn.”—LOMUNU LẸ 15:4.

 1. Nawẹ Jehovah nọ na mí nuflinmẹ lẹ gbọn, podọ etẹwutu mí tindo nuhudo yetọn?

JEHOVAH nọ wleawu nuflinmẹ lẹ tọn na omẹ etọn lẹ nado sọgan gọalọna yé nado pehẹ kọgbidinamẹ ojlẹ awusinyẹn tọn ehelẹ tọn lẹ. Delẹ to nuflinmẹ ehelẹ mẹ nọ họnwun na mí to Biblu hihia mẹdetiti tọn whenu, to whenuena devo lẹ nọ sọawuhia gbọn nudọnamẹ kavi gblọndo he yin nina to opli Klistiani tọn ji lẹ gblamẹ. Susu nuhe mí hia kavi sè to nuwiwa ehelẹ whenu lẹ tọn ma nọ yin nuyọyọ na mí gba. Vlavo, mí ko sè nudọnamẹ mọnkọtọn lẹ pọ́n. Ṣigba, to whenuena e yindọ mí nọ yawu wọnnú, nuhudo tin nado nọ vọ́ nuflin mídelẹ gbọzangbọzan gando lẹndai, osẹ́n po anademẹ Jehovah tọn lẹ po go. Mí dona yọ́n pinpẹn nuflinmẹ Jiwheyẹwhe tọn lẹ tọn. Yé nọ na mí tuli gbọn alọgigọna mí nado hẹn nuhe whàn mí nado kẹalọyi gbẹzan jijọ-di-Jiwheyẹwhe tọn lẹ do ayiha mẹ dali. Abajọ, psalm-kàntọ lọ do jihàn hlan Jehovah dọmọ: “Nuflinmẹ towe lẹ wẹ homẹhunhun ṣie.”—Psalm 119:24, NW.

 2, 3. (a) Naegbọn Jehovah do whlá otàn gbẹzan mẹhe go Biblu donù lẹ tọn dai kakajẹ azán mítọn gbè? (b) Kandai Owe-wiwe tọn tẹlẹ wẹ na yin dogbapọnna to hosọ ehe mẹ?

² Mahopọnna dọ Ohó Jiwheyẹwhe tọn ko yin kinkàn sọn owhe kanweko susu die gbọ́n, e dohuhlọn taun. (Heblu lẹ 4:12) E wleawu kandai nugbo lẹ tọn na mí gando gbẹzan mẹhe yin nùdego to Biblu mẹ lẹ tọn go. Dile etlẹ yindọ aṣa lẹ po pọndohlan lẹ po ko diọ tlala sọn whenue gbọ́n Biblu yin kinkàn, avùnnukundiọsọmẹnu he mí dona pehẹ lẹ nọ saba taidi dehe gbẹtọ lẹ pehẹ to ojlẹ enẹ mẹ lẹ nkọtọn. Otàn susu he yin whiwhla do Biblu mẹ na ale mítọn nọ ze apajlẹ ojlofọndotenamẹ tọn lẹ donukọnna mí gando mẹhe yiwanna Jehovah bo sẹ̀n ẹn po nugbonọ-yinyin po mahopọnna ninọmẹ sinsinyẹn lẹ go. Kandai devo lẹ nọ dọ̀n ayidonugo wá walọyizan he Jiwheyẹwhe gbẹwanna lẹ ji. Jehovah hẹn ẹn diun dọ numimọ mẹdetiti tọn ehe lẹpo, yèdọ dagbe po ylankan po, yin kinkàndai do Biblu mẹ taidi nuflinmẹ lẹ. Ehe sọgbe hẹ nuhe apọsteli Paulu wlan dọmọ: “Onú depope he yè ko wlan dai, yè wlan yé na oplọn mítọn, dọ míwlẹ gbọn homẹfa po homẹmiọn Owe-wiwe lẹ tọn po dali nido tindo todo.”—Lomunu lẹ 15:4.

³ Mì gbọ mí ni gbadopọnna kandai atọ̀n sọn Owe-wiwe mẹ: kandai nuyiwa Davidi tọn hẹ Sauli, kandai Anania po Safila po tọn, gọna dehe gando walọyizan Josẹfu tọn hẹ asi Pọtifali tọn go. Dopodopo otàn ehelẹ tọn plọn nuhọakuẹ lẹ mí.

Nugbonọ-Yinyin Na Tito Jiwheyẹwhe Tọn Lẹ

 4, 5. (a) Ninọmẹ tẹwẹ tin to Ahọlu Sauli po Davidi po ṣẹnṣẹn? (b) Nawẹ Davidi yinuwa hlan wangbẹnamẹ Sauli tọn gbọn?

⁴ Ahọlu Sauli gboawupo nado yin nugbonọ na Jehovah bo masọ jẹ nado dugán do omẹ Etọn lẹ ji. Enẹwutu Jiwheyẹwhe gbẹ́ ẹ dai bo deanana yẹwhegán Samuẹli nado samisisana Davidi taidi ahọlu sọgodo tọn Islaeli tọn. To whenuena Davidi do nugopipe vonọtaun hia taidi awhànfuntọ de bo mọ pipà gbẹtọ lẹ tọn yí, Sauli jẹ Davidi pọnhlan ji taidi agbàwhlẹnhẹmẹtọ de. Sauli tẹnpọn whlasusu nado hù i. Davidi luntọ́n to nujijọ lọ lẹ dopodopo mẹ na Jehovah tin hẹ ẹ wutu.—1 Samuẹli 18:6-12, 25; 19:10, 11.

⁵ Na owhe susu, Davidi tin to dandannu glọ nado họ̀njẹgbé. To whenuena dotẹnmẹ hundote na ẹn nado hù Sauli, gbẹdohẹmẹtọ Davidi tọn lẹ dotuhomẹna ẹn nado wàmọ, bo dọ dọ Jehovah wẹ to kẹntọ Davidi tọn lẹ jodo alọ etọn mẹ. Ṣogan, Davidi gbẹ́. Nugbonọ-yinyin etọn na Jehovah po sisi he e tindo na otẹn he mẹ Sauli tin te taidi ahọlu yiamisisadode omẹ Jiwheyẹwhe tọn lẹ tọn po wẹ whàn ẹn nado yinuwa domọ. Be e ma yin Jehovah wẹ de Sauli taidi ahọlu Islaeli tọn ya? Jehovah nasọ de e sẹ̀ to ojlẹ sisọ etọn mẹ. Davidi dọ dọ e ma yin emitọn nado dádo whẹho lọ mẹ gba. To whenuena e ko wà nuhe go e pé lẹpo to ninọmẹ lọ mẹ nado de wangbẹna Sauli tọn pò godo, Davidi dotana dọmọ: “OKLUNỌ na hò e; kavi azán etọn na wá nado kú; kavi e na jẹte yì biọ awhànfuntẹn, bo dọ̀n. OKLUNỌ dike blo dọ yẹn nado de alọ ṣie jẹgbonu do mẹyiamisisadode OKLUNỌ tọn ji.”—1 Samuẹli 24:3-15; 26:7-20.

 6. Naegbọn otàn Davidi po Sauli po tọn do jẹna ayidonugo mítọn?

⁶ Kandai ehe bẹ nuplọnmẹ titengbe de hẹn. Be hiẹ ko kàn nuhe zọ́n bọ nuhahun delẹ nọ fọndote to agun Klistiani tọn mẹ sè dewe pọ́n ya? E sọgan yindọ mẹde to nuyiwa to aliho he ma sọgbe de mẹ. Walọyizan etọn sọgan nọma yin ylanwiwa sinsinyẹn de, ṣigba e nọ dotukla we. Nawẹ hiẹ dona yinuwa gbọn? Na hiẹ jlo na do mẹtọnhopọn Klistiani tọn hia bo yin nugbonọ na Jehovah wutu, hiẹ sọgan de nado dọho hẹ mẹlọ to aliho họntọnjihẹmẹ tọn mẹ, po yanwle lọ po nado duale mẹmẹsunnu towe tọn. Ṣigba, eyin nuhahun lọ gbẹsọ zindonukọn lo? To whenuena hiẹ ko wà nuhe go a pé lẹpo jẹ obá he sọgbe hẹ lẹnpọn dagbe mẹ, a sọgan jlo nado jo whẹho lọ do alọmẹ na Jehovah. Nuhe Davidi wà niyẹn.

 7. To apajlẹ Davidi tọn hihodo mẹ, nawẹ mí dona yinuwa gbọn eyin mí to oyà whẹdida mawadodo kavi nuvẹun tọn ji?

⁷ Kavi e sọgan yindọ nuhahun whẹdida mawadodo tọn kavi nuvẹun sinsẹ̀n tọn lẹ wẹ hiẹ to pipehẹ. Vlavo nude ma tin he hiẹ sọgan wà gando yé go to alọnu din. E sọgan vẹawu taun nado doakọnna ninọmẹ mọnkọtọn, ṣigba aliho he mẹ Davidi yinuwa hlan whẹdida mawadodo te plọn nude mí. Psalm he Davidi wlan lẹ yin kandai ojlofọndotenamẹ tọn de, e ma yin gando odẹ̀ ahundopo tọn he e hò na Jiwheyẹwhe nido whlẹn ẹn sọn alọ Sauli tọn mẹ lẹ kẹdẹ go gba, ṣigba gando nugbonọ-yinyin etọn hlan Jehovah po ojlo vẹkuvẹku he e tindo dọ oyín Jiwheyẹwhe tọn ni yin gigopana po go ga. (Psalm 18:1-6, 25-27, 30-32, 48-50; 57:1-11) Davidi gbọṣi nugbonọ-yinyin mẹ na Jehovah dile etlẹ yindọ Sauli zindonukọn nado yinuwa to aliho mawadodo tọn mẹ na owhe susu. Mílọsu dona gbọṣi nugbonọ-yinyin mẹ na Jehovah po titobasinanu etọn po mahopọnna whẹdida mawadodo he mí pehẹ lẹ podọ mahopọnna nuhe mẹdevo lẹ to wiwà. Mí sọgan deji dọ Jehovah yọ́n ninọmẹ lọ to gigọ́ mẹ.—Psalm 86:2.

 8. Nawẹ Kunnudetọ Jehovah tọn Mozambique tọn lẹ yinuwa gbọn to whenuena nugbonọ-yinyin yetọn na Jehovah yin whiwhlepọn?

⁸ Klistiani Mozambique tọn lẹ ze apajlẹ dagbe dai to azán mítọn gbè taidi mẹhe gbọn nugbonọ-yinyin dali tẹdo Jehovah go to ojlẹ whlepọn tọn mẹ lẹ. To 1984 gufọntọ lẹ sọ́ awhànnú biọ gbétatò yetọn lẹ mẹ pludopludo nado jajo, fiọ owhé lẹ, bo hùmẹ. E taidi dọ nudepope ma tin he Klistiani nugbo ehelẹ sọgan wà nado yiavunlọna yedelẹ. Mẹhe tin to lẹdo lọ mẹ lẹ yin kọgbidina nado kọnawudopọ hẹ pipli awhànfuntọ lẹ tọn de kavi yin hinhẹn po huhlọn po nado nọgodona pipli lọ to aliho devo lẹ mẹ. Kunnudetọ Jehovah tọn lẹ gbẹ́ nado wàmọ na e ma sọgbe hẹ teninọ kadaninọ Klistiani tọn yetọn wutu. Ehe hẹn adi gufọntọ lọ lẹ tọn jizò do yé ji. Kunnudetọ 30 wẹ yin hùhù to ojlẹ hunyanhunyan tọn enẹ mẹ, ṣigba budonamẹ okú tọn lọsu ma tlẹ penugo nado hẹn omẹ Jiwheyẹwhe tọn lẹ jogbe.a Taidi Davidi, yé doakọnna whẹdida mawadodo tọn lẹ ṣigba yé wá gbawhàn to godo mẹ.

Nuflinmẹ Avase Tọn De

 9, 10. (a) Nawẹ mí sọgan mọaleyi sọn apajlẹ Owe-wiwe tọn delẹ mẹ gbọn? (b) Etẹwẹ jẹdò to nuyiwa Anania po Safila po tọn lẹ mẹ?

⁹ Delẹ to mẹhe yin nùdego to Owe-wiwe mẹ lẹ na mí nuflinmẹ avase tọn lẹ gando walọyizan he mí dona dapana lẹ go. Na nugbo tọn, Biblu bẹ kandai mẹsusu tọn hẹn he waylan bosọ jiya kọdetọn ylankan lẹ tọn, etlẹ yin to devizọnwatọ Jiwheyẹwhe tọn lẹ ṣẹnṣẹn. (1 Kọlintinu lẹ 10:11) Dopo to kandai enẹlẹ mẹ wẹ Anania po Safila po tọn, yèdọ asu po asi po de he yin hagbẹ agun Klistiani owhe kanweko tintan tọn lẹ to Jelusalẹm.

¹⁰ To Pẹntikọsti 33 W.M. godo, e lẹzun dandannu nado gọalọna yisenọ yọyọ he gbọṣi Jelusalẹm lẹ to agbasa-liho na yé nido sọgan duvivi gbẹdido apọsteli lẹ tọn. Hagbẹ agun lọ tọn delẹ sà nutindo yetọn lẹ nado hẹn ẹn diun dọ mẹdepope ma tin to nuhudo mẹ. (Owalọ lẹ 2:41-45) Anania po Safila po sà ogle de bo hẹn apadewhe akuẹ lọ tọn poun wá apọsteli lẹ nukọn, bosọ sọalọakọ́n dọ akuẹ he yé sà aigba lọ yin lẹpo wẹ yé yí do basi nunina. Nugbo wẹ dọ, jlọjẹ Anania po Safila po tọn wẹ nado na akuẹ sọha he jlo yé, vlavo e sù kavi whè, ṣigba mẹwhinwhàn yetọn ma yọ́n, podọ nuyiwa yetọn do nugbomadọ hia. Yé jlo na jla mẹdagbe bo do yede hia taidi mẹhe to nususu wà hugan nuhe wà yé te nugbonugbo. To anademẹ gbigbọ wiwe tọn glọ, apọsteli Pita de nugbomadọ po yẹnuwiwa yetọn po gbà, bọ Jehovah hẹn okú wá yé ji.—Owalọ lẹ 5:1-10.

11, 12. (a) Etẹwẹ yin nuflinmẹ delẹ gando nugbodidọ go? (b) Ale tẹlẹ wẹ nọ wá sọn nugbodidọ mẹ?

¹¹ Eyin e wá jọ bọ mí yin whiwhlepọn nado sọtadona nugbo to vivẹnudido mẹ nado hẹn gbẹtọ lẹ lẹn dagbe mítọn, mì gbọ mí ni nọ flin otàn Anania po Safila po tọn taidi avase mẹhẹnlẹnnupọn tọn de. Mí sọgan penugo nado klọ gbẹtọvi hatọ mítọn lẹ, ṣigba mí ma sọgan blẹ Jehovah gba. (Heblu lẹ 4:13) Owe-wiwe dotuhomẹna mí pludopludo nado nọ dọ nugbo na mínọzo, na tẹnmẹ ma na tin na lalonọ lẹ to whenuena aigba na yin kiklọwé sọn mawadodo mẹ gba. (Howhinwhẹn lẹ 14:2; Osọhia 21:8; 22:15) Nuhe zọ́n bọ e do yinmọ dona họnwun. Satani Lẹgba wẹ dowatọ lalo lẹpo tọn.—Johanu 8:44.

¹² Nugbodidọ to gbẹzan mítọn lẹpo mẹ nọ hẹn ale susu wá. Delẹ to ale ehelẹ mẹ wẹ ayihadawhẹnamẹnu wiwe de po pekọ lọ po nado nọ yin jidedego gbọn mẹdevo lẹ dali. To nujijọ susu mẹ, Klistiani lẹ ko mọ agbasazọ́n kavi penugo nado hẹn agbasazọ́n yetọn lẹ go, na yé yin nugbodọtọ wutu. Ṣigba, ale daho hugan lọ wẹ yindọ nugbodidọ nọ hẹn mí duvivi họntọnjihẹmẹ Jiwheyẹwhe Ganhunupotọ lọ tọn.—Psalm 15:1, 2.

Hinhẹn Wiwejininọ Go

13. Ninọmẹ tẹ mẹ wẹ Josẹfu mọ ede te, podọ nawẹ e yinuwa gbọn?

¹³ Josẹfu, visunnu tọgbo Jakobu tọn, yin sisà do kanlinmọgbenu to owhe 17-mẹvi yinyin mẹ. To godo mẹ, e wá mọ ede to owhé Pọtifali he yin ogán họ̀nmẹ Egipti tọn de tọn gbè, fie Josẹfu jẹ nukunmẹ biọ na asi klunọ etọn tọn ji te. Yọnnu lọ jlo nado tindo kọndopọ zanhẹmẹ tọn hẹ Josẹfu, he yin dẹpẹ whanpẹnọ de, podọ egbesọegbesọ e nọ to tukladona ẹn dọmọ: “Mlọnai hẹ mi.” Josẹfu dẹ̀n do whẹndo etọn bo tin to otò de mẹ fie mẹdepope ma yọ́n ẹn te. E sọgan ko tindo kọndopọ hẹ yọnnu ehe po awubibọ po bọ mẹdepope ma tlẹ na yọnẹn. Ṣogan, to whenuena asi Pọtifali tọn wá tẹdo e go to godo mẹ, Josẹfu họ̀n.—Gẹnẹsisi 37:2, 18-28; 39:1-12.

14, 15. (a) Naegbọn otàn Josẹfu tọn do jẹna ayidonugo mítọn? (b) Naegbọn yọnnu Klistiani de dopẹ́ dọ emi setonuna nuflinmẹ Jiwheyẹwhe tọn lẹ?

¹⁴ Josẹfu yin pinplọn whẹ́n to whẹndo budisi Jiwheyẹwhe tọ́ de mẹ, podọ e yọnẹn dọ kọndopọ zanhẹmẹ tọn to mẹhe ma yin asu po asi po ṣẹnṣẹn ma sọgbe. “Na yẹn sọgan wà oylan daho he do, bo waylan do Jiwheyẹwhe?” wẹ e kanse. Tadona etọn sọgan ko yin anadena gbọn oyọnẹn etọn dali gando nujinọtedo Jiwheyẹwhe tọn na gbẹtọvi lẹ go dile e yin didohia to Edẹni mẹ do, enẹ wẹ tito asi dopo tintindo tọn. (Gẹnẹsisi 2:24) To egbehe, omẹ Jiwheyẹwhe tọn lẹ sọgan mọaleyi sọn nulinlẹnpọndo lehe Josẹfu yinuwa to ninọmẹ enẹ mẹ do ji. To lẹdo delẹ mẹ, pọndohlan numaylọdọnu tọn gbayipe gando kọndopọ zanhẹmẹ tọn go sọmọ bọ jọja he gbẹ́ nado doalọ to fẹnnuwiwa mẹ lẹ nọ yin ṣinṣanko gbọn hagbẹ yetọn lẹ dali. Kọndopọ zanhẹmẹ tọn tintindo to gbonu alọwle tọn gbayipe to mẹhe ko whẹ́n mẹho lẹ ṣẹnṣẹn. Enẹwutu, nuflinmẹ he wá do ganmẹ de wẹ otàn Josẹfu tọn yin na mí. Nujinọtedo Jiwheyẹwhe tọn wẹ gbẹsọ yindọ galilọ po ayọdide po yin ylando. (Heblu lẹ 13:4) Mẹsusu he ko joawuna kọgbidinamẹ nado doalọ to zanhẹmẹ he ma sọgbe mẹ lẹ yigbe dọ whẹwhinwhẹ́n sinsinyẹn lẹ tin ma nado wàmọ. Delẹ to kọdetọn ylankan lọ lẹ mẹ sọgan yin numọtolanmẹ winyan tọn, ayihadawhẹnamẹnu he hoapa, awuwhàn, hòmimọ, po asamẹzọ̀n lẹ po. Kẹdẹdile Owe-wiwe flinnu mí do, mẹhe lọga “waylando do agbasa etọn titi go.”—1 Kọlintinu lẹ 5:9-12; 6:18; Howhinwhẹn lẹ 6:23-29, 32.

¹⁵ Jenny,b he yin Kunnudetọ Jehovah tọn tlẹnnọ de, tindo whẹwhinwhẹ́n dagbe nado do pinpẹn-nutọn hia na nuflinmẹ Jiwheyẹwhe tọn lẹ. To azọ́nmẹ, azọ́nwatọgbẹ́ whanpẹnọ de yinuwa hẹ ẹ to aliho owanyi didohia tọn mẹ. To whenuena Jenny ma do numọtolanmẹ dopolọ hia, dẹpẹ lọ sọ vọ́ hẹn nuyiwa owanyi tọn etọn lẹ jideji. “Yẹn wá mọ dọ n’to ahidi taun nado gbọṣi wiweji,” wẹ Jenny yigbe dọ, “na ojlofọndotenamẹnu wẹ e nọ yin to whenuena omẹ vijinu awetọnọ de ze ayidonugo do jiwe.” Ṣogan, e wá mọ dọ nuhe dín dawe lọ te poun wẹ nado sọgan hia ẹ dogọ yọnnu sọha he e ko zanhẹ lẹ. To whenuena e doayi e go dọ gbemima etọn nado nọavunte to didepo, e vẹ̀ Jehovah nado gọalọna ẹn nado hẹn nugbonọ-yinyin etọn go. Jenny mọ dọ nuhe ewọ plọn to whenuena e basi dodinnanu to Biblu po owe Klistiani tọn lẹ po mẹ lẹ sọawuhia taidi nuflinmẹ lẹ he vọ́ zodolanmẹna ẹn nado gbọṣi nukle. Dopo to nuflinmẹ enẹlẹ mẹ wẹ otàn Josẹfu po asi Pọtifali tọn po tọn. “Dile e na dẹnsọ bọ yẹn gbẹ́ nọ flin obá he mẹ n’yiwanna Jehovah jẹ, n’ma dona dibu dọ yẹn na wà oylan daho ehe bo waylan do Jiwheyẹwhe go gba,” wẹ e dọ to tadona mẹ.

Setonuna Nuf linmẹ Jiwheyẹwhe Tọn Lẹ!

16. Nawẹ dogbigbapọnna gbẹzan mẹhe yin nùdego to Biblu mẹ lẹ tọn po ayihamẹlinlẹnpọn do yé ji po sọgan hẹn ale wá na mí gbọn?

¹⁶ Mímẹpo wẹ sọgan hẹn pinpẹn-nutọn-yinyọnẹn mítọn na nujinọtedo Jehovah tọn lẹ jideji gbọn vivẹnudido nado mọnukunnujẹ nuhewutu e do whlá kandai delẹ dai na mí to Owe-wiwe mẹ dali. Etẹwẹ kandai ehelẹ plọn mí? Jẹhẹnu kavi ayilinlẹn mẹhe yin nùdego to Biblu mẹ lẹ tọn tẹlẹ wẹ mí dona hodo apajlẹ etọn kavi dapana? Na nugbo tọn, gbẹtọ kanweko susu wẹ yin nùdego to Ohó Jiwheyẹwhe tọn mẹ. Mẹhe yiwanna anademẹ Jiwheyẹwhe tọn lẹpo na wà dagbe nado wleawuna ojlo vẹkuvẹku na nuyọnẹn gbẹnamẹ tọn, gọna nuplọnmẹ he mí sọgan mọyi sọn apajlẹ he Jehovah ko yí sọwhiwhe do whlá dai lẹ mẹ. Linlinnamẹwe ehe ko de hosọ lẹ tọ́n whlasusu do omẹ mọnkọtọn he otàn yetọn sọgan plọn nude mí lẹ ji. Naegbọn hiẹ ma na yí whenu zan nado gbadopọnna otàn ehelẹ?

17. Etẹwẹ yin numọtolanmẹ towe gando nuflinmẹ Jehovah tọn lẹ go, podọ etẹwutu?

¹⁷ Lehe mí dopẹ́ na mẹtọnhopọn owanyinọ he Jehovah nọ dohia mẹhe to vivẹnudo nado wà ojlo etọn lẹ do sọ! Na nugbo tọn, mí ma yin gbẹtọ pipé lẹ gba, yèdọ kẹdẹdile sunnu po yọnnu po he yin nùdego to Biblu mẹ lẹ ma yin mẹpipe lẹ do. Etomọṣo, kandai nuyiwa yetọn lẹ tọn nọ hẹn ale wá na mí tlala. Gbọn tonusisena nuflinmẹ Jehovah tọn lẹ dali, mí sọgan dapana nuṣiwa sinsinyẹn lẹ, podọ mí sọgan hodo apajlẹ dagbe mẹhe zinzọnlin to ali dodowiwa tọn ji lẹ tọn. Eyin mí wàmọ, mí na penugo nado jihàn hẹ psalm-kàntọ lọ dọmọ: “Donanọ wẹ yé he to [nuflinmẹ Jehovah tọn] lẹ yìn, he yí ayiha pete do to dindin in. Ayiha ṣie ko payi [nuflinmẹ, NW ] towe lẹ go; yẹn sọ yiwanna yé gbaugbau.”—Psalm 119:2, 167.

[Nudọnamẹ Odò Tọn]

Nawẹ Hiẹ Na Na Gblọndo Gbọn?

• Etẹwẹ mí sọgan plọn sọn aliho he mẹ Davidi yinuwa hẹ Sauli te mẹ?

• Etẹwẹ kandai Anania po Safila po tọn plọn mí?

• Naegbọn otàn gbẹzan Josẹfu tọn do jẹna ayidonugo mítọn taun to egbehe?

[Yẹdide to weda 26]

Naegbọn Davidi ma dike Sauli ni yin hùhù?

[Yẹdide to weda 27]

Etẹwẹ mí plọn sọn kandai Anania po Safila po tọn mẹ?

[Yẹdide to weda 28]

Etẹwẹ whàn Josẹfu nado gbẹ́ nuzedonukọnnamẹ fẹnnuwiwa tọn lẹ dai?