Stefani—E “Gọ́ Na Nukundagbe Jiwheyẹwhe Tọn po Huhlọn Po”

 1-3. (a) Ninọmẹ dobu tẹ mẹ wẹ Stefani mọ ede te, podọ nawẹ e yinuwa gbọn? (b) Kanbiọ tẹlẹ wẹ mí na gbadopọnna?

STEFANI tin to whẹdatọ lẹ nukọn. Sunnu 71 wẹ pli donukọnna ẹn to agbà daho de ji, he sọgan ko tin to lẹdo tẹmpli Jelusalẹm tọn mẹ. Hagbẹ whẹdatẹn daho lọ tọn ehelẹ pli nado dawhẹna Stefani. Whẹdatọ lọ lẹ diyin bosọ dohuhlọn podọ suhugan yetọn ma nọ yí devi Jesu tọn ehe do mọ nude. Na nugbo tọn, Yẹwhenọ Daho Kaifa he yin azinponọ to whenue Whẹdatẹn Daho Ju lẹ tọn lọ dá okú-whẹ̀ na Jesu Klisti to osun delẹ die wayi wẹ ylọ aisinsin ehe. Be obu di Stefani wẹ ya?

² Awusọhia nukunmẹ Stefani tọn jẹna ayidego taun to ojlẹ ehe mẹ. Whẹdatọ lọ lẹ pọ́n ẹn bo mọdọ nukunmẹ etọn “taidi nukunmẹ angẹli de tọn.” (Owalọ 6:15) Owẹ̀n Jehovah Jiwheyẹwhe tọn wẹ angẹli lẹ nọ do, enẹwutu yé ma nọ dibu podọ ayiha yetọn nọ jai. Numọtolanmẹ dopolọ wẹ Stefani tindo—podọ whẹdatọ kanylantọ enẹlẹ lọsu mọ domọ. Etẹwẹ zọ́n bọ ayiha etọn do jai sọmọ?

³ To egbehe, Klistiani lẹ sọgan plọn nususu sọn gblọndo kanbiọ enẹ tọn mẹ. Mí sọ dona yọ́n nuhe hẹn Stefani biọ ninọmẹ sinsinyẹn enẹ mẹ. Nawẹ e yiavùnlọna yise etọn to ojlẹ de mẹ wayi gbọn? Podọ aliho tẹlẹ mẹ wẹ mí sọgan hodo apajlẹ etọn te?

 4, 5. (a) Naegbọn Stefani do yọ́n-na-yizan na agun lọ taun? (b) Aliho tẹ mẹ wẹ Stefani “gọ́ na nukundagbe Jiwheyẹwhe tọn po huhlọn po” te?

⁴ Dile mí mọ do wayi, Stefani yọ́n-na-yizan na agun Klistiani tọn he ṣẹṣẹ yin didoai lọ taun. To weta he wayi mẹ, mí mọdọ ewọ tin to sunnu whiwhẹnọ ṣinawe he yin mẹdezejotọ bo yigbe nado gọalọna apọsteli lẹ to whenue yè basi oylọna yé nado wàmọ lẹ mẹ. Eyin mí lẹnnupọndo nunina he Jiwheyẹwhe na ẹn lẹ ji, mí na mọdọ ewọ tindo whiwhẹ taun. To Owalọ lẹ 6:8 mẹ, mí hia dọ Jiwheyẹwhe hẹn ẹn penugo nado basi “nujiawu po ohia daho lẹ po” dile apọsteli delẹ wà do. Wefọ lọ sọ dọ dọ e “gọ́ na nukundagbe Jiwheyẹwhe tọn po huhlọn po.” Etẹwẹ enẹ zẹẹmẹdo?

⁵ Hogbe Glẹkigbe tọn he yin lilẹdo “nukundagbe Jiwheyẹwhe tọn” sọgan sọ yin lilẹdo “ojọmiọn” kavi “lẹblanu.” E họnwun dọ Stefani yin gbẹtọ homẹdagbenọ, nọ jọmẹ, bosọ yọ́n dọnsẹpọ. Hodidọ etọn nọ duto hosetọ etọn lẹ ji bọ e nọ họnwun na yé dọ nugbo dọ wẹ e te, podọ yé nọ mọdọ nuhe plọn yé e te lẹ na hẹn ale wá na yé. E gọ́ na huhlọn na e gbọn whiwhẹ dali jo ede na anademẹ gbigbọ Jehovah tọn wutu. Kakati nado kla na nunina po nugopipe he e tindo lẹ po wutu, e nọ na pipà lẹpo Jehovah bo nọ do mẹtọnhopọn owanyinọ hia mẹhe e to hodọna lẹ. Abajọ bọ mẹhe to nukundiọsọ ẹ lẹ do to budina ẹn!

 6-8. (a) Owhẹ̀ awe tẹlẹ wẹ nukundiọsọmẹtọ Stefani tọn lẹ sadokọna ẹn, podọ etẹwutu? (b) Naegbọn Klistiani lẹ sọgan mọaleyi sọn apajlẹ Stefani tọn mẹ to egbehe?

⁶ Sunnu delẹ fọ́n nado dọnnu hẹ Stefani, ṣigba “yé ma sọgan jlẹ́te hẹ nuyọnẹn po gbigbọ he ewọ yí do to hodọ po.”a Na yé jẹflumẹ wutu, yé “diọlinlẹnna mẹdelẹ to nuglọ” nado sawhẹdokọna hodotọ Klisti tọn homẹvọnọ ehe. Yé “sọ hẹn gbẹtọ lẹ,” sunnu mẹho lẹ, po wekantọ lẹ po “nado fọnadán,” sọmọ bọ Stefani yin hinhẹn gánnugánnu wá Whẹdatẹn Daho Ju lẹ tọn nukọn. (Owalọ 6:9-12) Nukundiọsọmẹtọ lọ lẹ sà owhẹ̀ awe delẹ dokọna ẹn, dọ e to nùzan do Jiwheyẹwhe go, podọ do Mose go ga. Gbọnna?

⁷ Whẹsadokọnamẹtọ lalonọ lọ lẹ dọ dọ Stefani zánnu do Jiwheyẹwhe go na e dọho sọta “ofi wiwe ehe”—yèdọ tẹmpli Jelusalẹm tọn. (Owalọ 6:13) Yé dọ dọ e zánnu do Mose go na e dọho sọta Osẹ́n Mose tọn, bo gbọnmọ dali diọ aṣa he yin mimọyi gbọn Mose gblamẹ lẹ. Whẹsadokọnamẹ sinsinyẹn wẹ ehe yin, na to whenẹnu, Ju lẹ nọ yí nukun nujọnu tọn do pọ́n tẹmpli lọ, zẹẹmẹ Osẹ́n Mose tọn lẹ tọn, po otàn dọvọdọ madosọha he yé yidogọ Osẹ́n Mose tọn lẹ po. Enẹwutu, whẹsadokọnamẹ yetọn to didohia dọ Stefani yin mẹylankan he jẹna okú!

⁸ E blawu dọ sinsẹ̀nnọ lẹ nọ saba kàn ayiha gigẹdẹ mọnkọtọn lẹ nado sọgan hẹn devizọnwatọ Jiwheyẹwhe tọn lẹ biọ nuhahun mẹ. Kakajẹ egbehe, sinsẹ̀nnọ nukundiọsọmẹtọ lẹ nọ sisẹ́ aṣẹpatọ lẹ nado dohomẹkẹn Kunnudetọ Jehovah tọn lẹ. Nawẹ mí dona yinuwa gbọn eyin owhẹ̀ agọ̀ lẹ yin sisadokọna mí? Mí sọgan mọ nususu plọn sọn apajlẹ Stefani tọn mẹ.

 9, 10. Etẹwẹ homọdọdomẹgotọ lẹ dọ gando nuhe Stefani dọ to Whẹdatẹn Daho Ju lẹ tọn lọ nukọn lẹ go, podọ etẹwẹ mí dona hẹn do ayiha mẹ?

⁹ Dile e yin nùdego do to bẹjẹeji weta ehe tọn, ayiha Stefani tọn jai bọ nukunmẹ etọn taidi angẹli de tọn to whenue yé to owhẹ̀ lọ lẹ sadokọna ẹn. Todin Kaifa pannukọn Stefani bo kanse e dọ: “Be nugbo wẹ onú ehelẹ ya?” (Owalọ 7:1) Todin ohó jẹ Stefani ji podọ sisètọ ján agbọ́ na pé!

¹⁰ Homọdọdomẹgotọ delẹ ko jẹagọdo hodidọ Stefani tọn bo dọ dọ mahopọnna ohó gblẹlẹ he e dọ lẹ, gblọndo whẹsadokọnamẹ etọn tọn ma tọ́n. Ṣigba na nugbo tọn, Stefani ze apajlẹ dagbe de dai na mí gando lehe mí na nọ “yiavùnlọ” na wẹndagbe lọ do go. (1 Pita 3:15) Flindọ owhẹ̀ yin sisadokọna Stefani dọ e zánnu do Jiwheyẹwhe go gbọn hodidọ sọta tẹmpli lọ dali, podọ yé dọ dọ e zánnu do Mose go gbọn hodidọ sọta Osẹ́n Mose tọn dali. Gblọndo Stefani tọn dọ̀n ayidonugo wá ojlẹ voovo atọ̀n ji to whenuho Islaeli tọn mẹ podọ Stefani yí sọwhiwhe do zinnudo nuagokun delẹ ji. Mì gbọ mí ni gbadopọnna ojlẹ voovo atọ̀n ehelẹ debọdo-dego.

11, 12. (a) Nawẹ Stefani yí apajlẹ Ablaham tọn zan po kọdetọn dagbe po gbọn? (b) Naegbọn Stefani do donù Josẹfu go to hodidọ etọn mẹ?

¹¹ Ojlẹ tọgbo hohowhenu tọn lẹ tọn. (Owalọ lẹ 7:1-16) Stefani bẹjẹeji gbọn hodidọ do Ablaham ji dali, yèdọ mẹhe Ju lẹ nọ na sisi na yise he e tindo wutu. Po homẹbibiọ he sinai do nuhe ji yé kọngbedopọ do ehe po, Stefani dohia dọ Jehovah, “Jiwheyẹwhe gigonọ lọ,” do ede hia Ablaham jẹnukọn to Mẹsopotamia. (Owalọ 7:2) Na nugbo tọn, dawe enẹ nọ jonọ-gbéji to Aigba Pagbe tọn lọ ji podọ tẹmpli kavi Osẹ́n Mose tọn ma tin to ojlẹ enẹ mẹ. Enẹwutu, naegbọn mẹde na tẹkudeji dọ onú ehelẹ kẹdẹ ji wẹ nugbonọ-yinyin na Jiwheyẹwhe dona sinai do?

¹² Hosetọ Stefani tọn lẹ sọ nọ na sisi Josẹfu he wá sọn kúnkan Ablaham tọn mẹ taun, enẹwutu, Stefani flinnu yé dọ mẹdaho Josẹfu tọn lẹ, yèdọ mẹhe dokún hẹnnu voovo Islaeli tọn lẹ, dohomẹkẹn dawe dodonọ enẹ bo sà ẹ do kanlinmọgbenu. Etomọṣo, Jiwheyẹwhe yí i zan nado whlẹn Islaeli to huvẹ whenu. Ayihaawe ma tin dọ Stefani mọ nuhe mẹ e sọgan yí Jesu Klisti jlẹdo Josẹfu go te delẹ, ṣigba e ma dọhodo enẹlẹ ji, na hosetọ etọn lẹ nido dotoaina ẹn kakajẹ vivọnu.

13. Nawẹ hodidọ Stefani tọn gando Mose go na gblọndo owhẹ̀ he yin sisadokọna ẹn tọn gbọn, podọ nuagokun tẹ ji wẹ enẹ hùn dotẹnmẹ dotena ẹn nado dọhodo?

¹³ Ojlẹ Mose tọn. (Owalọ lẹ 7:17-43) Stefani dọ nususu gando Mose go—podọ nuyọnẹnnu wẹ enẹ yin, na suhugan hagbẹ Whẹdatẹn Daho Ju lẹ tọn lọ tọn lẹ wẹ yin Sadusi, he nọ gbẹ́ owe Biblu tọn lẹpo dai adavo dehe Mose kàn lẹ. Sọ flindọ owhẹ̀ yin sisadokọna Stefani dọ e zánnu do Mose go. Hodidọ Stefani tọn na gblọndo whẹsadokọnamẹ enẹ tọn tlọlọ, na e dohia dọ emi tindo sisi na Mose po Osẹ́n Mose tọn po taun. (Owalọ 7:38) E zinnudeji dọ mẹhe Mose lọsu tẹnpọn nado whlẹn lẹ gbẹ́ ẹ dai. Yé gbẹ́ ẹ dai to whenue e tindo owhe 40. Podọ to nuhe hugan owhe 40 godo, yé diọnukunsọ aṣẹpipa etọn whlasusu.b Gbọnmọ dali, Stefani dọhodo nuagokun titengbe de ji to aliho debọdo-dego tọn mẹ. Nuagokun lọ wẹ yindọ: Omẹ Jiwheyẹwhe tọn lẹ gbẹ́ mẹhe Jehovah ko de nado deanana yé lẹ dai pludopludo.

14. Nuagokun tẹlẹ wẹ Stefani nọgodona to apajlẹ Mose tọn he e na lọ mẹ?

¹⁴ Stefani flinnu hosetọ etọn lẹ dọ Mose ko dọ wayi dọ yẹwhegán he taidi Mose de na fọ́n to Islaeli. Mẹnu wẹ enẹ na yin, podọ nawẹ gbẹtọ lẹ na yí i gbọn? Stefani ma na gblọndo lọ kakajẹ tadonahó etọn whenu. E sọ hẹn nuagokun devo họnwun: Mose mọnukunnujẹemẹ dọ Jiwheyẹwhe sọgan hẹn aigba depope zun wiwe, taidi aigba he ji wùnkan de to miyọ́n ji te, fie Jehovah dọho hẹ ẹ te. Enẹwutu, be ohọ̀ tangan de, taidi tẹmpli he to Jelusalẹm mẹ kẹdẹ wẹ Jehovah sọgan yin sinsẹ̀n te ya? Mì gbọ mí ni pọ́n.

15, 16. (a) Naegbọn hodidọ gando gòhọ go do yin nujọnu to hodidọ Stefani tọn mẹ? (b) Nuagokun tẹwẹ Stefani detọ́n to apajlẹ tẹmpli Sọlomọni tọn he e na mẹ?

¹⁵ Gòhọ lọ po tẹmpli lọ po. (Owalọ lẹ 7:44-50) Stefani flinnu whẹdatọ lọ lẹ dọ whẹpo tẹmpli do yin gbigbá to Jelusalẹm, Jiwheyẹwhe degbena Mose nado gbá gòhọ—yèdọ ohọ̀ kleun sinsẹ̀n-bibasi tọn he yè nọ ze pé de. Mẹnu wẹ gán glá bo na dọ dọ gòhọ ma yọ́n sọ tẹmpli, to whenuena e yindọ gòhọ mẹ wẹ Mose lọsu na ede sẹ̀n Jiwheyẹwhe te?

¹⁶ To nukọn mẹ, to whenue Sọlomọni gbá tẹmpli he to Jelusalẹm, Jiwheyẹwhe gbọdo e nado do nuplọnmẹ titengbe de hia mí to odẹ̀ etọn mẹ. Dile Stefani dọ do, “Gigogán lọ ma nọ nọ̀ ohọ̀ he yin bibasi po alọ po lẹ mẹ gba.” (Owalọ 7:48; 2 Otàn. 6:18) Jehovah sọgan yí tẹmpli de zan nado hẹn lẹndai etọn lẹ di, ṣigba enẹ ma dohia dọ tẹmpli kẹdẹ wẹ e sọgan yizan gba. Eyin mọ wẹ, naegbọn sinsẹ̀n-basitọ etọn lẹ dona lẹndọ ohọ̀ he yin bibasi po alọ po mẹ kẹdẹ wẹ yè sọgan basi sinsẹ̀n wiwe-ṣeke te? Stefani hẹn nuhe dọ e te lẹ wá vivọnu to aliho he hẹnmẹ lẹnnupọn de mẹ gbọn hoyidọ sọn owe Isaia tọn mẹ dali dọmọ: “Olọn wẹ ofìn ṣie, podọ aigba wẹ tokloafọligbe ṣie. Ohọ̀ nankọ wẹ mìwlẹ na gbá na mi? wẹ Jehovah dọ. Kavi fie wẹ gbọjẹtẹn ṣie te? Alọ ṣie wẹ basi onú ehe lẹpo, kavi e ma yin mọ wẹ?”—Owalọ 7:49, 50; Isa. 66:1, 2.

17. (a) Nawẹ hodidọ Stefani tọn do gbẹtọ he nkọ hosetọ etọn lẹ yin hia gbọn? (b) Nawẹ hodidọ lọ sọ na gblọndo owhẹ̀ he yin sisadokọna ẹn lẹ tọn gbọn?

¹⁷ Po nuhe mí ko gbadopọnna to hodidọ he Stefani na to Whẹdatẹn Daho Ju lẹ tọn lọ nukọn ehelẹ po, be a ma mọdọ Stefani yí zinzin zan nado de gbẹtọ he nkọ whẹsadokọnamẹtọ etọn lẹ yin hia gblegede ya? Stefani dohia dọ Jehovah ma yin hẹngogonọ de, he nọ tẹdo nuyiwa aṣa tọn lẹ go poun gba, ṣigba e nọ diọalọ bosọ nọ diọ tito etọn nado sọgan hẹn lẹndai etọn di. Mẹhe nọ ze ayidonugo yetọn lẹpo do ohọ̀ whanpẹnọ he to Jelusalẹm lọ gọna aṣa po zẹẹmẹ flinflin he yin yiyidogọ Osẹ́n Mose tọn po ji lẹ ma mọnukunnujẹ lẹndai tangan Osẹ́n lọ po tẹmpli lọ po tọn mẹ! To hogbe devo mẹ, nuhe Stefani to didọna yé wẹ yindọ: Aliho dagbe hugan lọ nado na sisi Osẹ́n Mose tọn po tẹmpli lọ po wẹ nado setonuna Jehovah. Na nugbo tọn, nuhe Stefani dọ lẹ nọgodona nuyiwa etọn titi lẹ to aliho dagbe hugan mẹ, na e ko setonuna Jehovah jẹ obá godo tọn mẹ.

18. Aliho tẹlẹ mẹ wẹ mí dona tẹnpọn nado hodo apajlẹ Stefani tọn te?

¹⁸ Etẹwẹ mí sọgan plọn sọn hodidọ Stefani tọn mẹ? E jẹakọ hẹ Owe-wiwe ganji. Mọdopolọ, mí dona nọ plọn Ohó Jiwheyẹwhe tọn po sọwhiwhe po nado sọgan “yí ohó nugbo tọn lọ zan to aliho he sọgbe mẹ.” (2 Tim. 2:15) Mí sọgan sọ plọn nado nọ do lẹblanu po zinzin po hia dile Stefani wà do. Hosetọ etọn lẹ ylanhùn taun! Ṣogan, e wà nuhe go e pé lẹpo nado ze ayidonugo do nuhe ji yé kọngbedopọ do lẹ kẹdẹ ji bo dọhodo nuhe omẹ enẹlẹ nọ na sisi taun lẹ ji. E sọ dọhona yé po sisi po bo ylọ sunnu mẹho lọ lẹ dọ “otọ́ lẹ.” (Owalọ 7:2) Mílọsu dona nọ yí “walọmimiọn po sisi sisosiso po” do dó nugbo he to Ohó Jiwheyẹwhe tọn mẹ hia mẹlẹ.—1 Pita 3:15.

19. Nawẹ Stefani yí adọgbigbo do lá owẹ̀n whẹdida Jehovah tọn to Whẹdatẹn Daho Ju lẹ tọn lọ nukọn gbọn?

¹⁹ Ṣigba, mí ma nọ whleawu nado dọhodo Ohó Jiwheyẹwhe tọn ji kiki na mí ma jlo na hẹn homẹgble gbẹtọ lẹ wutu; mọjanwẹ mí ma nọ tẹnpọn nado de huhlọn pò na owẹ̀n whẹdida Jehovah tọn lẹ do niyẹn. Stefani ze apajlẹ dagbe dai to ehe mẹ. E họnwun na ẹn ganji dọ osin bado pápá nẹgbé wẹ kunnudenu he emi na whẹdatọ ahun sinsinyẹnnọ enẹlẹ to Whẹdatẹn Daho Ju lẹ tọn lọ nukọn lẹpo yin. Enẹwutu, gbigbọ wiwe whàn ẹn bọ e yí adọgbigbo do dotana hodidọ etọn dọ yé ma yí nude do gbọnvona tọgbo yetọn lẹ he gbẹ́ Josẹfu, Mose, po yẹwhegán he pò lẹpo po dai. (Owalọ 7:51-53) Na nugbo tọn, whẹdatọ ehelẹ dopolọ wẹ hù Mẹsia he Mose po yẹwhegán he pò lẹpo po dọ dọdai dọ e na wá lọ. E họnwun dọ yewlẹ wẹ gbà Osẹ́n Mose tọn to aliho he ylan hugan mẹ!

20, 21. Etẹwẹ hagbẹ Whẹdatẹn Daho Ju lẹ tọn lọ tọn lẹ wà to whenuena yé sè hodidọ Stefani tọn, podọ nawẹ Jehovah na huhlọn Stefani gbọn?

²⁰ Nugbo he mẹde ma sọgan mọ́n he Stefani dọ lẹ zọ́n bọ whẹdatọ enẹlẹ biọ adi sinsinyẹn mẹ. Matin winyan depope, yé jẹ adúkúnkún dù do Stefani go ji. E ko họnwun na dawe nugbonọ enẹ dọ yé ma na do lẹblanu depope hia ẹ, kẹdẹdile yé wà do na Klunọ etọn Jesu.

²¹ Stefani tindo nuhudo adọgbigbo tọn nado sọgan doakọnna nuhe e jlo na pehẹ, podọ ayihaawe ma tin dọ numimọ he Jehovah gbọn homẹdagbe dali hẹn ẹn penugo nado mọ lọ na ẹn tuli tlala. Stefani mọ gigo Jiwheyẹwhe tọn bosọ mọ Jesu to ote to adusilọ Jehovah tọn mẹ! Dile Stefani to nuhe e mọ to numimọ lọ mẹ lẹ dọ, whẹdatọ lọ lẹ yí alọ yetọn lẹ do sú otó yetọn lẹ. Etẹwutu? E ma ko dẹn din bọ Jesu dọ to whẹdatọ enẹlẹ dopolọ nukọn dọ emi wẹ Mẹsia lọ, podọ to madẹnmẹ emi na tin to adusilọ Otọ́ emitọn tọn mẹ. (Malku 14:62) Numimọ Stefani tọn dohia dọ nugbo wẹ Jesu dọ. Na nugbo tọn, hagbẹ Whẹdatẹn Daho Ju lẹ tọn lọ tọn enẹlẹ ko mọ́n Mẹsia lọ bo ko sọ hù i! Yemẹpo dogbepọ bo yinuwa to afọdopolọji na Stefani nido yin zannu yin dlan do hù.c

22, 23. Aliho tẹlẹ mẹ wẹ okú Stefani tọn taidi Klunọ etọn tọn te, podọ etẹwutu Klistiani egbezangbe tọn lẹ sọgan gboadọ taidi Stefani?

²² Diblayin aliho dopolọ mẹ wẹ Stefani po Klunọ etọn po kú te. Ayiha Stefani tọn jai, e dejido Jehovah go mlẹnmlẹn, bo biọ dọ Jiwheyẹwhe ni jona mẹhe jlo na hù i lẹ. E dọmọ: “Oklunọ Jesu, yí gbigbọ ṣie,” vlavo na e gbẹ́ to Visunnu gbẹtọ tọn lọ mọ to apá na Jehovah wutu. Ayihaawe ma tin dọ Stefani jẹakọ hẹ ohó tulinamẹ tọn Jesu tọn lẹ he dọmọ: “Yẹn wẹ fọnsọnku po ogbẹ̀ po.” (Joh. 11:25) To godo mẹ, Stefani hodẹ̀ po ogbè lélé po hlan Jiwheyẹwhe tlọlọ dọmọ: “Jehovah, a lẹn ylando ehe dokọna yé blo.” Podọ to ehe didọ godo, e damlọn to okú mẹ.—Owalọ 7:59, 60.

²³ Gbọnmọ dali, Stefani lẹzun omẹ tintan he dekunnu gando Jesu go jẹ kúdonu to hodotọ Klisti tọn lẹ mẹ. (Pọ́n apotin lọ “Stefani Dekunnu Gando Jesu Go Jẹ Kúdonu—Gbọnna?”) Ṣigba e blawu dọ ewọ ma na yin omẹ godo tọn. Kakajẹ azán mítọn gbè, devizọnwatọ nugbonọ Jehovah tọn delẹ ko yin hùhù gbọn sinsẹ̀nnọ zohunhun agọ̀nọ lẹ, tonudọtọ nuvẹunnọ lẹ, po nukundiọsọmẹtọ akonka lẹ po dali. Ṣogan, mí tindo whẹwhinwhẹ́n lẹpo nado gboadọ taidi Stefani. Jesu to gandu taidi Ahọlu todin, bo to huhlọn jiawu he Otọ́ etọn ko na ẹn zan. Nudepope ma na glọnalina ẹn nado fọ́n hodotọ nugbonọ etọn lẹ sọnku.—Joh. 5:28, 29.

24. Nawẹ Saulu doalọ to okú Stefani tọn mẹ gbọn, podọ kọdetọn dagbe he dẹn-to-aimẹ tẹlẹ wẹ okú dawe nugbonọ enẹ tọn hẹnwa?

²⁴ Dẹpẹ de he nọ yin Saulu to ote bo to nujijọ ehe lẹpo pọ́n. E kọngbedopọ hẹ mẹhe to zannu dlan do Stefani lẹ bo tlẹ sọ to awugbó yetọn lẹ ṣọ́. Ojlẹ vude to enẹgodo, e lẹzun homẹkẹndomẹtọ akonka de. Ṣigba okú Stefani tọn na hẹn kọdetọn dagbe he dẹn-to-aimẹ lẹ wá. Apajlẹ etọn na na huhlọn Klistiani devo lẹ nado yin nugbonọ kakajẹ opodo, bo gbawhàn dile e wà do. Humọ, e na wá vẹna Saulu, mẹhe wá yin yiylọ to godo mẹ dọ Paulu yì húmẹ dọ e doalọ to okú Stefani tọn mẹ. (Owalọ 22:20) E ko kọngbedopọ hẹ mẹhe hù Stefani lẹ, ṣigba e na wá mọnukunnujẹemẹ to godo mẹ dọ “nùzantọ, homẹkẹndomẹtọ po kanylantọ de po” wẹ emi yin dai. (1 Tim. 1:13) E họnwun dọ Paulu ma wọnji Stefani po hodidọ huhlọnnọ he e na to gbenẹgbe po go. Na nugbo tọn, hodidọ po wekinkan Paulu tọn delẹ po basi zẹẹmẹ yinukọn dogọ do nuagokun he go Stefani donù to hodidọ etọn mẹ delẹ ji. (Owalọ 7:48; 17:24; Heb. 9:24) To nukọn mẹ, Paulu wá plọn to gigọ́ mẹ nado hodo apajlẹ yise po adọgbigbo po tọn he Stefani, yèdọ dawe he gọ́ na nukundagbe Jiwheyẹwhe tọn po huhlọn po” lọ zedai. Kanbiọ he mí dona kanse mídelẹ todin wẹ yindọ, Be mílọsu na wà nudopolọ ya?