Nawẹ Gbigbọ Jiwheyẹwhe Tọn Nọ Yinuwa Gbọn to Egbehe?

EWỌ yin sẹkunọ sọn adọ̀ onọ̀ etọn tọn mẹ. Egbesọegbesọ, e nọ sinai do họngbó tẹmpli tọn he nọ yin yiylọdọ Whanpẹnọ ji nado sọgan biọ nunina lẹblanu tọn sọn mẹhe to tẹmpli lọ mẹ biọ lẹ dè. Ṣigba, to nujijọ dopo whenu, nubiọtọ sẹkunọ ehe mọ nunina de yí he họakuẹ tlala hugan gankuẹ kleun delẹ. E yin azọ̀nhẹngbọna!—Owalọ lẹ 3:2-8.

Dile etlẹ yindọ apọsteli Pita po Johanu po wẹ yin mẹhe ‘jlọ ẹ dote’ bọ ‘afọpahomẹ afọ etọn tọn lẹ do yin hinhẹn lodo,’ yé ma pà yede na azọ̀nhẹngbọ lọ gba. Naegbọn e do yinmọ? Pita lọsu basi zẹẹmẹ dọmọ: “Mì omẹ Islaeli tọn emi, etẹwutu wẹ awuji mì do onú he go? Kavi etẹwutu wẹ mì zínnukun do mí go, taidi gbọn huhlọn mítọn kavi wiwe mítọn dali wẹ mí basi bọ dawe he do to zọnlinzin?” Na nugbo tọn, Pita po Johanu po yọnẹn dọ, e mayin gbọn huhlọn yetọn dali wẹ gba, ṣigba gbọn gbigbọ wiwe Jiwheyẹwhe tọn dali wẹ onú mọnkọtọn sọgan yin wiwà.—Owalọ lẹ 3:7-16; 4:29-31.

To ojlẹ enẹ mẹ, ‘azọ́n huhlọnnọ’ mọnkọtọn lẹ yin awuwlena nado dohia dọ agun Klistiani tọn yọyọ lọ tindo godonọnamẹ Jiwheyẹwhe tọn. (Heblu lẹ 2:4) Ṣigba to whenuena yé ko basi lẹndai yetọn pó godo, yé na “doalọte,” wẹ apọsteli Paulu dọ.a (1 Kọlintinu lẹ 13:8) Enẹwutu, mí ma nọ mọ azọ̀nhẹngbọ po huhlọn Jiwheyẹwhe tọn po, owẹ̀n dọdai tọn lẹ, kavi aovi lẹ yinyàn jẹgbonu to agun nugbo Klistiani tọn mẹ todin ba gba.

Nalete, be ehe zẹẹmẹdo dọ gbigbọ wiwe Jiwheyẹwhe tọn ma to azọ́nwa ba wẹ ya? Paali! Mì gbọ mí ni gbadopọnna aliho devo delẹ he mẹ gbigbọ Jiwheyẹwhe tọn wazọ́n te to owhe kanweko tintan mẹ bosọ to azọ́nwa to azán mítọn gbè te.

“Gbigbọ Nugbo Tọn”

Dopo to aliho he mẹ gbigbọ wiwe Jiwheyẹwhe tọn nọ wazọ́n te wẹ nado na nudọnamẹ, nado namẹ nukunnumọjẹnumẹ, nado de nugbo lẹ hia. Ojlẹ vude jẹnukọnna okú etọn, Jesu dọna devi etọn lẹ dọmọ: “Yẹn gbẹsọ tindo onú susu nado dọ hlan mì, ṣigba mìwlẹ ma sọgan hẹn yé to dinvie gba. Ṣigba whenuena ewọ, [gbigbọ] nugbo tọn wá, ewọ na plan mì biọ nugbo lẹpo mẹ.”—Johanu 16:12, 13.

“Gbigbọ nugbo tọn” yin kinkọnjẹgbonu to Pẹntikọsti 33 W.M. to whenuena nudi devi 120 he plidopọ to abò aga tọn de mẹ to Jelusalẹm yin bibaptizi po gbigbọ wiwe po. (Owalọ lẹ 2:1-4) Apọsteli Pita tin to mẹhe wá hùnwhẹ whemẹwhemẹ tọn enẹ tẹnmẹ lẹ mẹ. Yin gigọ́ po gbigbọ wiwe po, Pita ‘fọntite’ bo gbloadana, kavi hẹn nugbo delẹ họnwun gando Jesu go. Di apajlẹ, e basi zẹẹmẹ to gigọ́mẹ do lehe “Jesu Nazalẹti tọn” yin zizedaga yì adusilọ Jiwheyẹwhe tọn mẹ do ji. (Owalọ lẹ 2:14, 22, 33) Gbigbọ Jiwheyẹwhe tọn sọ whàn Pita nado lá po adọgbigbo po hlan Juvi todoaitọ etọn lẹ dọmọ: “Na mẹhe to owhé Islaeli tọn gbè lẹpo ni yọnẹn hezeheze dọ, Jiwheyẹwhe ko yí Jesu dopo lọ, mẹhe mì whè do [yatin] go, do basi Oklunọ, Klisti.” (Owalọ lẹ 2:36) Taidi kọdetọn owẹ̀n gbọdo Pita tọn, nudi gbẹtọ fọtọ́n donu atọ̀n wẹ “yí homẹhunhun do yí ohó etọn lẹ” bosọ yin bibaptizi. To aliho ehe mẹ, gbigbọ wiwe Jiwheyẹwhe tọn gọalọ nado deanana yé biọ nugbo lọ mẹ.—Owalọ lẹ 2:37-41.

Gbigbọ wiwe Jiwheyẹwhe tọn sọ yinuwa taidi mẹplọntọ de po nuflinmẹtọ po. Jesu dọmọ: “[Alọgọtọ NW] lọ, he yin [gbigbọ wiwe], mẹhe Otọ́ na dohlan to oyín ṣie mẹ, ewọ na plọn onú lẹpo mì, bo nasọ hẹn onú he yẹn dọ hlan mì lẹpo wá oflin mìtọn mẹ.”—Johanu 14:26.

Nawẹ gbigbọ wiwe yinuwa taidi mẹplọntọ de gbọn? Gbigbọ Jiwheyẹwhe tọn hùn ayiha devi lẹ tọn hlan onú he yé ko sè sọn Jesu dè wayi ṣigba bo ma ko mọnukunnujẹemẹ to gigọ́mẹ lẹ. Di apajlẹ, apọsteli lẹ yọnẹn dọ to whẹdanamẹ etọn whenu, Jesu dọna togán Lomunu Judé tọn, Pọntiu Pilati dọmọ: “Ahọluduta ṣie mayin aihọn ehe tọn gba.” Ṣogan, to ojlẹ he mẹ Jesu yì olọn mẹ to nuhe hugan azán 40 to godo mẹ, apọsteli lẹ gbẹsọ tindo pọndohlan he ma sọgbe lọ dọ Ahọluduta lọ na yin didoai tofi to aigba ji. (Johanu 18:36; Owalọ lẹ 1:6) E họnwun dọ, apọsteli lẹ ma penugo nado mọnukunnujẹ zẹẹmẹ ohó Jesu tọn lẹ tọn mẹ to gigọ́mẹ kakajẹ kinkọnjẹgbonu gbigbọ wiwe Jiwheyẹwhe tọn to Pẹntikọsti 33 W.M. tọn godo gba.

Gbigbọ Jiwheyẹwhe tọn sọ yinuwa taidi nuflinmẹtọ gbọn hinhẹn nuplọnmẹ voovo Jesu tọn lẹ wá ayiha yetọn mẹ dali. Di dohia, dọdai lẹ gando okú po fọnsọnku Klisti tọn po go, biọ zẹẹmẹ yọyọ po alọgọ gbigbọ wiwe tọn po. (Matiu 16:21; Johanu 12:16) Finflin nuplọnmẹ Jesu tọn lẹ hẹn apọsteli lẹ penugo nado yí adọgbigbo do yiavunlọ na otẹn yetọn to ahọlu lẹ, whẹdatọ lẹ, po nukọntọ sinsẹ̀n tọn lẹ po nukọn.—Malku 13:9-11; Owalọ lẹ 4:5-20.

To yidogọmẹ, gbigbọ wiwe Jiwheyẹwhe tọn gọalọ nado deanana Klistiani fliflimẹ tọn lẹ hlan aigba-denamẹ he na de sinsẹ́n tọ́n to lizọnyizọn lọ mẹ ji. (Owalọ lẹ 16:6-10) Gbigbọ Jiwheyẹwhe tọn sọ whàn Klistiani fliflimẹ tọn lẹ nado tindo mahẹ to Ohó Jiwheyẹwhe tọn, Biblu lọ winwlan mẹ, na alemọyi gbẹtọvi lẹpo tọn. (2 Timoti 3:16) To whelọnu lo, e họnwun dọ gbigbọ wiwe wazọ́n to aliho voovo lẹ mẹ to owhe kanweko tintan mẹ. E ma yin awuwlena nado basi azọ́njiawu lẹ poun gba.

Gbigbọ Wiwe to Azán Mítọn Gbè

To aliho dopolọ mẹ gbigbọ wiwe to azọ́nwa do ota Klistiani nugbo lẹ tọn mẹ to azán mítọn gbè. Ehe họnwun hlan pipli pẹvi Biblu plọntọ lẹ tọn de to Allegheny, Pennsylvanie, États-Unis, to adà godo tọn owhe kanweko 19tọ tọn mẹ. Biblu plọntọ vivẹnunọ ehelẹ tindo ojlo zògbè nado yọ́n “nugbo lọ.”—Johanu 8:32; 16:13.

Dopo to hagbẹ pipli ehe tọn mẹ, Charles Taze Russell, dọ gando dodinnanu etọn na nugbo Owe-wiwe tọn go dọmọ: “Yẹn hodẹ̀ . . . na yẹn nido penugo nado basi hihọ́na ahun po ayiha ṣie po sọn nuvẹun depope he sọgan glọnalina mi mẹ bosọ yin anadena gbọn gbigbọ etọn dali hlan nukunnumọjẹnumẹ he sọgbe kọ̀n.” Jiwheyẹwhe dona odẹ̀ whiwhẹ tọn ehe.

Dile Russell po gbẹdohẹmẹtọ etọn lẹ po gbọn vivẹnudido dali gbadopọnna Owe-wiwe lẹ, onú susu họnwun dogọ. “Mí mọ dọ na owhe kanweko susu lẹ, hagbẹ klandovo po pipli voovo lẹ po ko vùn sinsẹ̀n-nuplọnmẹ Biblu tọn lẹ to yede mẹ, bo ṣaka yé dopọ hẹ hopàdọ po nuṣiwa gbẹtọvi tọn po,” wẹ Russell basi zẹẹmẹ dọ. Ehe dekọtọn do nuhe e ylọ dọ “nugbo lọ zizedo otẹn he ma sọgbe mẹ.” Na nugbo tọn, nugbo Owe-wiwe tọn lẹ yin didi do bẹplidopọ nuplọnmẹ kosi tọn lẹ he ko hẹn Mẹylọhodotọklisti flusọ́ to owhe kanweko susu lẹ gblamẹ mẹ. Ṣigba Russell magbe nado yọ́n nugbo lọ bosọ lá ẹ.

To weda Zion’s Watch Tower and Herald of Christ’s Presence (Le phare de la Tour de Sion et Messager de la présence de Christ) tọn lẹ mẹ, Russell po gbẹdohẹmẹtọ etọn lẹ po gbọn adọgbigbo dali gbẹ́ sinsẹ̀n-nuplọnmẹ lalo sinsẹ̀n tọn he do Jiwheyẹwhe hia to aliho agọ̀ mẹ lẹ dai. Yé mọnukunnujẹemẹ dọ—to vogbingbọnmẹ na linlẹn he gbayipe sinsẹ̀n tọn—alindọn nọ kú, dọ to okú whenu mí nọ yì yọdo mẹ, podọ dọ Jehovah wẹ yin Jiwheyẹwhe nugbo dopo lọ podọ enẹwutu mayin apadewhe Atọ̀n-to-dopomẹ tọn de gba.

Nalete, dile hiẹ sọgan lẹnnupọndeji do, gòhùnna nuplọnmẹ lalo tọn mọnkọtọn lẹ hẹn homẹgblena nukọntọ sinsẹ̀n Mẹylọhodotọklisti tọn lẹ. Na ojlo vẹkuvẹku nado hẹn otẹn nukundeji tọn yetọn lẹ go wutu, susu nukọntọ sinsẹ̀n Katoliki po Plọtẹstant tọn lẹ po basi titona nujijla lẹ po yanwle lọ po nado dowinyan Russell. Ṣigba ewọ po gbẹdohẹmẹtọ etọn lẹ po ma jogbe gba. Po adọgbigbo po, yé lẹhlan gbigbọ Jiwheyẹwhe tọn na anademẹ. “Jidenamẹ Oklunọ mítọn tọn, wẹ yindọ . . . gbigbọ wiwe Otọ́ tọn, heyin didohlan Jesu Mẹfligọtọ mítọn, Whẹgbọtọ po Tatọ mítọn po to niyaniya mẹ, na yin nuplọnmẹtọ mítọn,” wẹ Russell dọ. Na taun tọn gbigbọ wiwe lọ plọnnumẹ nugbo! Biblu Plọntọ ahundoponọ ehelẹ zindonukọn nado to alọkẹyi osin he wé ṣeke nugbo lọ tọn lẹ sọn Biblu mẹ bosọ basi nulila yetọn lẹdo aihọn pé.—Osọhia 22:17.

Titobasinanu egbezangbe Kunnudetọ Jehovah tọn lẹ tọn ko kẹalọyi anademẹ gbigbọ wiwe Jiwheyẹwhe tọn po awuyiya po na nuhe hugan owhe kanweko todin. Dile gbigbọ Jehovah tọn to numimọ gbigbọmẹ tọn yetọn hẹn họnwun vudevude, Kunnudetọ lẹ nọ basi vọjlado he nuhudo etọn tin lẹ sọn ojlo mẹ wá nado sọgbe hẹ nukunnumọjẹnumẹ agọe tọn lẹ.—Howhinwhẹn lẹ 4:18.

“Mìwlẹ Nasọ Yin Kunnudetọ na Mi”

Jesu gbẹsọ basi dohia awusọhia gbigbọ wiwe Jiwheyẹwhe tọn tọn devo to whenuena e dọna devi etọn lẹ dọmọ: “Mìwlẹ na mọ huhlọn yí whenuena [gbigbọ wiwe] wá mì ji: mìwlẹ nasọ yin kunnudetọ na mi . . . jẹ opodo aigba tọn.” (Owalọ lẹ 1:8) Opagbe Jesu tọn nado na devi etọn lẹ “huhlọn” po “gbigbọ wiwe” po nado sọgan hẹn azọ́n heyin didenamẹ gbọn Jiwheyẹwhe dali yetọn di gbẹsọ yọn-na-yizan to egbehe.

Taidi pipli de, Kunnudetọ Jehovah tọn lẹ yin yinyọnẹn ganji na nuwiwa yẹwhehodidọ tọn yetọn lẹ. (Pọ́n apotin.) Na nugbo tọn, Kunnudetọ Jehovah tọn lẹ to ohó owẹ̀n nugbo lọ tọn dọ to aigba po pipli lopo lẹ tọn hugan 230 lẹ ji. To ninọmẹ he yọ́n basi lẹpo mẹ, gọna ogbẹ̀ yetọn zizedo owù mẹ to lẹdo he awhàn ko hẹn tlẹ́n lẹ mẹ, yé nọ gbọn adọgbigbo dali ze ogbè yetọn daga to godoninọna Ahọluduta Jiwheyẹwhe tọn mẹ. Zohunhun yetọn na lizọnyizọn Klistiani tọn nọ na kunnudenu huhlọnnọ dọ gbigbọ wiwe to azọ́nwa to egbehe. Podọ e họnwun hezeheze dọ Jehovah Jiwheyẹwhe to didona vivẹnudido yetọn lẹ.

Di apajlẹ, to owhe he wayi mẹ nuhe hugan ganmẹ liva dopo wẹ yin yiyizan na yẹwhehodidọ wẹndagbe Ahọluduta Jiwheyẹwhe tọn tọn. Po kọdetọn tẹ po? Gbẹtọ 323 439 wẹ basi yẹhiadonu klandowiwe yetọn tọn hlan Jiwheyẹwhe gbọn yedelẹ zizejo na baptẹm osin tọn dali. To yidogọmẹ, plọnmẹ Biblu sẹmẹsẹmẹ whégbè tọn 4 433 884 wẹ yin anadena hẹ jlodotọ yọyọ lẹ. To popolẹpo mẹ, owe 24 607 741, linlinnamẹwe 631 162 309, po alọnuwe gọna alọnuwe apomẹ tọn 63 495 728 lẹ po wẹ yin didogbonu. Kunnudenu huhlọnnọ nankọtọn die dọ gbigbọ Jiwheyẹwhe tọn to azọ́nwa!

Gbigbọ Jiwheyẹwhe Tọn po Hiẹ Po

To whenuena mẹdopodopo yigbe to aliho dagbe mẹ hlan wẹndagbe lọ, hẹn gbẹzan etọn sọgbe hẹ nujinọtedo Jiwheyẹwhe tọn lẹ, bosọ do yise hia to awuwledainanu ofligọ tọn mẹ, aliho lọ nọ yin hunhundonuvo na teninọ wiwe ṣeke de hẹ Jiwheyẹwhe. Hlan omẹ mọnkọtọn lẹ apọsteli Paulu dọmọ: “Jiwheyẹwhe . . . yí [gbigbọ wiwe] etọn na mí.”—1 Tẹsalonikanu lẹ 4:7, 8; 1 Kọlintinu lẹ 6:9-11.

Gbigbọ Jiwheyẹwhe tọn tintindo nọ dekọtọn do dona dagbe susu lẹ mẹ. Dona wunmẹ tẹlẹ? Na onú dopo, Ohó gbọdo Jiwheyẹwhe tọn dọmọ: “Sinsẹ́n [gbigbọ] tọn wẹ, owanyi, ayajẹ, jijọho, linsinyẹn, homẹdagbe, dagbewà, nugbowa, [yise, NW], [podọ] mawazẹjlẹgo.” (Galatianu lẹ 5:22, 23) Enẹwutu, gbigbọ wiwe Jiwheyẹwhe tọn yin huhlọn hlọnhlọnnọ de na dagbe, he nọ hẹn mẹde penugo nado do jẹhẹnu jijọ-di-Jiwheyẹwhe tọn lẹ hia.

To yidogọmẹ, eyin hiẹ hia Biblu bo yí nuhe hiẹ plọn do yizan mẹ, gbigbọ Jiwheyẹwhe tọn sọgan gọalọna we nado whẹ́n to nuyọnẹn, oyọnẹn, zinzin, wuntuntun, po nugopipe nulẹnpọn tọn po mẹ. Ahọlu Sọlọmọni mọ “nuyọnẹn po wuntuntun po . . . gege gbọ̀pọ̀, po oklo ayiha tọn po” na e dín nado hẹn homẹ Jiwheyẹwhe tọn hùn kakati ni yin gbẹtọ tọn wutu. (1 Ahọlu lẹ 4:29) To whenuena e yindọ Jehovah na gbigbọ wiwe Sọlọmọni, na jide tọn e ma na glọnalina gbigbọ wiwe etọn sọn mẹhe to dindin nado hẹn homẹ etọn hùn to egbehe lẹ dè gba.

Gbigbọ wiwe Jiwheyẹwhe tọn sọ nọ gọalọna Klistiani lẹ nado diahi hẹ Satani po aovi lẹ po, titonu ylankan ehe, po ayilinlẹn ylando tọn heyin agbasa mape tọn yetọn lẹ po. Nawẹ enẹ yọnbasi gbọn? Apọsteli Paulu na gblọndo dọmọ: “Yẹn sọgan wà onú popo gbọn Klisti he to huhlọn na mi mẹ.” (Filippinu lẹ 4:13) Dile etlẹ yindọ, gbigbọ wiwe ma na de whlepọn lẹ kavi mẹtẹnpọn lẹ sẹ̀; e sọgan gọalọna we nado doakọnna yé. Gbọn ginganjẹ gbigbọ Jiwheyẹwhe tọn go dali, mí sọgan mọ ‘huhlọn hugan jọwamọ’ yí nado pehẹ tukla kavi ayimajai depope.—2 Kọlintinu lẹ 4:7; 1 Kọlintinu lẹ 10:13.

To whenuena hiẹ gbadopọnna kunnudenu lọ lẹpo, ayihaawe depope matin dọ gbigbọ wiwe Jiwheyẹwhe tọn to nuyiwa to egbehe. Gbigbọ Jehovah tọn nọ na huhlọn devizọnwatọ etọn lẹ nado dekunnu dogbọn lẹndai daho etọn lẹ dali. E zindonukọn nado to hinhọ́n gbigbọmẹ tọn hẹn họnwun, podọ e nọ hẹn yise mítọn lodo, bo nọ gọalọna mí nado gbọṣi nugbonọ-yinyin mẹ hlan Mẹdatọ mítọn. Lehe mí sọgan gọna pẹdido do sọ dọ Jiwheyẹwhe ko yin nugbonọ hlan opagbe etọn gbọn gbigbọ wiwe nina devizọnwatọ nugbonọ etọn lẹ to egbehe dali!

[Nudọnamẹ Odò Tọn]

[Apotin to weda 10]

Nuhe Mẹdevo lẹ Dọ Gando Kunnudetọ Jehovah Tọn lẹ Go

“To whenuena ṣọṣi devo lẹ haya azọ́nyọnẹntọ lẹ nado klọ gbẹtọ lẹ biọ sinsẹ̀nhọ lẹ mẹ kavi to ahidi hẹ whẹho egbezangbe tọn lẹ taidi zanhẹmẹ to omẹ vijinu dopolọ tọn lẹ ṣẹnṣẹn po hòdide po, Kunnudetọ lẹ ma nọ joawuna aihọn he to didiọ lọ gba. Yé gbẹ́ nọ basi nujijla yẹwhehodidọ tọn yetọn lẹdo Aihọn pé.”—The Orange County Register of Orange County, Californie, États-Unis.

“To whenuena e wá jẹ yise hinhẹn gbayipe ji, sinsẹ̀n vude wẹ na yin zohunhunnọ . . . taidi Kunnudetọ Jehovah tọn lẹ.”—The Republic of Columbus, Indiana, États-Unis.

“Yewlẹ kẹdẹ wẹ nọ yì sọn họndekọn jẹ họndekọn po ‘wẹndagbe’ lọ po, bo nọ yí nunọwhinnusẹ́n Biblu tọn lẹ do yizan mẹ.”—Życie Literackie, Pologne.

“To nujijla yẹwhehodidọ tọn he klohugan he ko yin yinyọnẹn pọ́n mẹ, Kunnudetọ Jehovah tọn lẹ ko hẹn owẹ̀n Jehovah tọn gbọn aihọn lẹpo mẹ”—News-Observer, Tamaqua, Pennsylvanie, États-Unis.

[Yẹdide to weda 9]

Gbigbọ wiwe Jiwheyẹwhe tọn nọ na mí nukunnumọjẹnumẹ to gbigbọ-liho,

. . . nọ yidogọna jẹhẹnu dagbe Klistiani tọn lẹ,

. . . bosọ nọ nọgodona mí to azọ́n yẹwhehodidọ lẹdo aihọn pé tọn lọ mẹ