Pọninọ Mẹmẹsunnu lẹ Tọn

NA NUDI owhe 1 500 wẹ Jehovah Jiwheyẹwhe yinuwa hẹ Islaeli taidi akọta he tindo oyín etọn to ota. Enẹgodo, Jehovah “lẹ́ ayidonugo etọn hlan akọta lẹ nado de gbẹtọ lẹ sọn yé mẹ na oyín etọn.” (Owalọ 15:14) Mẹhe yin dide na oyín Jehovah tọn lẹ na yin kunnudetọ etọn lẹ, bo na tin to kọndopọ mẹ to linlẹn po nuyiwa po mẹ mahopọnna fihe yé nọ nọ̀ to aigba ji. Kọndopọ ehe na yin kọdetọn gbedide he Jesu na hodotọ etọn lẹ tọn dọmọ: “Enẹwutu, mì yì bo hẹn gbẹtọ lẹ sọn akọta lẹpo mẹ zun devi lẹ, bosọ nọ baptizi yé to oyín Otọ́ tọn, Visunnu tọn, po gbigbọ wiwe tọn po mẹ, bo nọ plọn yé nado payi nuhe yẹn ko degbe etọn na mì lẹpo go.”—Mat. 28:19, 20.

² Gbọn klandowiwe towe hlan Jehovah po baptẹm yíyí po dali, hiẹ ko lẹzun devi Jesu Klisti tọn de. A yin dopo to pipli mẹmẹsunnu he tin lẹdo aihọn pé lẹ tọn de mẹ, yèdọ Klistiani he to pọninọ mẹ, bo ma nọ dike vogbingbọn akọ̀ tọn, hẹnnu tọn, kavi ninọmẹ akuẹzinzan tọn lẹ, ni hẹn kinklan wá ṣẹnṣẹn yetọn lẹ. (Salm. 133:1) Taidi kọdetọn de, hiẹ nọ yiwanna bo nọ na sisi Klistiani hatọ lẹ to agun mẹ. Delẹ to yé mẹ sọgan ko yin mẹhe hiẹ ma na ko yigbe nado dogbẹ́ hẹ dai lẹ, na sinmẹ agbasa tọn, akọ̀, kavi obá he mẹ yé plọnwe jẹ gbọnvona towe wutu. Ṣigba todin, hiẹ ko gbọn owanyi mẹmẹsunnu tọn dali wleawuna haṣinṣan pẹkipẹki de he lodo hú haṣinṣan devo depope, vlavo kọmẹnu tọn, sinsẹ̀n tọn, kavi whẹndo tọn.—Malku 10:29, 30; Kol. 3:14; 1 Pita 1:22.

³ Eyin e nọ vẹawuna mẹdelẹ nado duto nuvẹun he tonudidọ, vogbingbọn akọ̀ tọn kavi sinmẹ agbasa tọn nọ hẹnwa lẹ, kavi nuvẹun devo he ko doadọ̀do to ahun yetọn mẹ lẹ ji, yé sọgan lẹnnupọndo Klistiani Ju dowhenu tọn lẹ ji, he dona dovivẹnu nado sukúndona nuvẹun he sinsẹ̀n Ju lẹ tọn nọ tindo sọta mẹhe wá sọn akọta devo lẹpo mẹ lẹ. Whenue Pita yin didọna nado yì owhé Kọneliọsi, mẹkanwekowhàngán Lomu tọn de tọn gbè, Jehovah gbọn homẹdagbe dali wleawuna Pita jẹnukọnna azọ́ndenamẹ lọ.—Owalọ lẹ weta 10.

⁴ Pita yin didọna to numimọ de mẹ nado hù bo dù kanlin delẹ he yin mawé to aṣa Juvi lẹ tọn mẹ. Whenue Pita gbẹ́, ogbè de sọn olọn mẹ dọna ẹn dọmọ: “A sọ ylọ nuhe Jiwheyẹwhe ko klọ́we lẹ dọ mawé ba blo.” (Owalọ 10:15) Jiwheyẹwhe dademẹ to aliho ehe mẹ whẹpo Pita do vọ́ linlẹn ede tọn jlado na azọ́ndenamẹ he e na mọyi to madẹnmẹ lọ, enẹ wẹ nado yì dla dawe he yin Kosi de pọ́n. Dile Pita to tonusena anademẹ Jehovah tọn, e lá na mẹhe plidopọ to finẹ lẹ dọmọ: “Mìwlẹ yọnẹn ganji lehe e ma sọgbe hẹ osẹ́n na Ju de nado kọnawudopọ kavi dọnsẹpọ omẹ akọ̀ devo tọn do, ṣogan Jiwheyẹwhe ko dohia mi dọ yẹn ni masọ ylọ mẹdepope dọ hẹnflu kavi mawé ba blo. Enẹ wẹ zọ́n bọ yẹn do wá, na taun tọn, matin nudindọn depope, to whenue yè dowẹn hlan mi.” (Owalọ 10:28, 29) Enẹgodo, Pita mọ kunnudenu lọ dọ Jehovah kẹalọyi Kọneliọsi po whédo etọn po.

⁵ Saulu he wá sọn Talsu bo yin Falesi wesetọ akonka de dona whiwhẹ ede bo dogbẹ́ hẹ mẹhe e ma na ko yigbe nado dogbẹ́ hẹ dai lẹ. E tlẹ dona kẹalọyi anademẹ sọn yé dè. (Owalọ 4:13; Gal. 1:13-20; Flp. 3:4-11) Mí sọgan yí nukun homẹ tọn do pọ́n vọjlado he e biọ dọ omẹ mọnkọtọn lẹ ni basi gando pọndohlan yetọn go, yèdọ mẹdelẹ taidi Sọlgiu Paulu, Dionisiu, Damali, Filemọni, Onesimu po mẹdevo lẹ po to whenue yé kẹalọyi wẹndagbe lọ bo lẹzun devi Jesu Klisti tọn lẹ.—Owalọ 13:6-12; 17:22, 33, 34; File. 8-20.

⁶ Matin ayihaawe, owanyi mẹmẹsunnu tọn to agun towe mẹ ko gọalọ nado dọ̀n we sẹpọ Jehovah po titobasinanu etọn po. Hiẹ doayi ohia owanyi po pọninọ tọn po he nọ do devi nugbo Jesu Klisti tọn lẹ hia hezeheze go, dile Jesu dọ ẹ do dọmọ: “Gbedide yọyọ de wẹ yẹn to nina mì, dọ mì ni yiwanna ode awetọ; kẹdẹdile yẹn ko yiwanna mì do, dọ mìlọsu ni yiwanna ode awetọ. Gbọn ehe dali wẹ mẹlẹpo na yọnẹn dọ devi ṣie lẹ wẹ mì yin—eyin mì tindo owanyi to mìdelẹ ṣẹnṣẹn.” (Joh. 13:34, 35) Hiẹ ko sọ wá yọ́n pinpẹn Jehovah po titobasinanu etọn po tọn dogọ to whenuena a mọdọ owanyi he to agun mìtọn mẹ taidi kùnkùn osin tọn dopo tata eyin yè yí i jlẹdo owanyi he to mẹmẹsunnu he tin lẹdo aihọn pé lẹ ṣẹnṣẹn go. A yí nukun do to mimọ hẹndi dọdai Biblu tọn lọ tọn, gando gbẹtọ lẹ bibẹpli to azán godo tọn lẹ mẹ nado sẹ̀n Jehovah to jijọho po pọninọ po mẹ go.—Mika 4:1-5.

⁷ Na kinklan susu he tin to egbehe lẹ wutu, mẹnu wẹ na ko lẹn gbede dọ e sọgan yọnbasi nado kọ̀n gbẹtọ lẹ dopọ “sọn akọta lẹpo mẹ, sọn hẹnnu lẹpo mẹ, sọn gbẹtọ lẹpo mẹ podọ sọn ogbè lẹpo mẹ”? (Osọ. 7:9) Lẹnnupọndo vogbingbọn he nọ tin to pipli gbẹtọ lẹ tọn he yinukọn taun to azọ́n nuyọnẹn wintinwintin tọn mẹ lẹ po mẹhe tẹdo aṣa hohowhenu hẹnnu tọn go lẹ po ṣẹnṣẹn ji. Lẹnnupọndo kinklan sinsẹ̀n tọn he nọ tin to mẹhe tindo sinmẹ agbasa tọn dopolọ lẹ po akọta dopolọ lẹ po ṣẹnṣẹn ji. Na wanyina akọta mẹtọn ko wá doadọ̀do to ahun gbẹtọ lẹ tọn mẹ wutu, kinklan ko tin to gbẹtọ lẹ ṣẹnṣẹn to tonudidọ-liho hú gbede pọ́n. Humọ, eyin hiẹ lẹnnupọndo ninọmẹ gbẹtọ lẹ tọn he gbọnvo to akuẹzinzan-liho, gọna ninọmẹ madosọha devo lẹ he nọ hẹn kinklan wá ji, a na mọdọ gbẹtọ lẹ kinkọndopọ sọn otò lẹ, ogbè lẹ, ninọmẹ po akọ̀ voovo he tin lẹpo po mẹ bo hẹn yé nado tindo haṣinṣan owanyi po jijọho po tọn he lodo taun de yin nujiawu de, ehe Jiwheyẹwhe Nupojipetọ lọ kẹdẹ wẹ sọgan basi.—Zek. 4:6.

⁸ Ṣigba, pọninọ ehe ko yọnbasi, bọ whenue hiẹ lẹzun Kunnudetọ Jehovah tọn klandowiwe, he yí baptẹm de, hiẹ lẹzun apadewhe etọn. Todin he a ko to vivi pọninọ enẹ tọn dù, hiẹ lọsu dona gọalọ bo hẹn ẹn gbọṣi aimẹ. Ehe nọ yin wiwà gbọn tonusisena ohó apọsteli Paulu tọn lẹ he tin to Galatianu lẹ 6:10 mẹ dali dọmọ: “Dile mí na tindo dotẹnmẹ hundote etọn do, mì gbọ mí ni nọ wà nuhe yin dagbe hlan mẹlẹpo, ṣigba na taun tọn, hlan mẹhe gando mí go to yise mẹ lẹ.” Mí sọ nọ hodo ayinamẹ ehe dọmọ: “Mì yí wiwọ́ kavi glòlò-jijlá do wà nudepope blo, ṣigba mì nọ gbọn whiwhẹ dali pọ́n mẹdevo lẹ dọ yé yiaga hú mì, bo ma nọ ze ayidonugo do ale mẹdetiti tọn mìtọn lẹ kẹdẹ ji, ṣigba do ale mẹdevo lẹ tọn ji ga.” (Flp. 2:3, 4) Eyin mí plọn nado nọ yí nukun he Jehovah nọ yí do pọ́n mẹmẹsunnu po mẹmẹyọnnu mítọn lẹ po do pọ́n yé bo ma nọ pọ́n awusọhia gbonu tọn, mí na zindonukọn nado tindo haṣinṣan jijọho po ayajẹ po tọn hẹ yé.—Efe. 4:23, 24.

⁹ Dile apọsteli Paulu basi zẹẹmẹ etọn do, agun lọ ma klan, kakatimọ mẹhe to e mẹ lẹpo nọ tindo mẹtọnhopọn na ode awetọ. (1 Kọl. 12:14-26) Mí sọgan nọ nọ̀ fie dẹn taun do delẹ to mẹmẹsunnu mítọn he tin lẹdo aihọn pé lẹ mẹ, ṣigba dagbemẹninọ yetọn nọ duahunmẹna mí. Eyin delẹ to mẹmẹsunnu mítọn lẹ mẹ to homẹkẹn glọ, mí mẹhe pò lẹ nọ yin magbọjẹnọ taun. Eyin mẹdelẹ to yaji na ohẹ́n, nugbajẹmẹji, awhàn kavi hunyanhunyan otò tọn wutu, mẹhe pò lẹ nọ dovivẹnu tlala nado dín aliho lẹ nado gọalọ to gbigbọ-liho podọ to agbasa-liho.—2 Kọl. 1:8-11.

¹⁰ Mímẹpo wẹ dona nọ hodẹ̀ na mẹmẹsunnu mítọn lẹ to azán lẹpo gbè. Mẹmẹsunnu delẹ to yinyin whiwhlepọn nado wà nuhe ylan lẹ. Yajiji mẹmẹsunnu mítọn delẹ tọn sọgan yin yinyọnẹn to gbangba. Nukundiọsọmẹ he mẹdevo lẹ nọ pehẹ sọn azọ́nwatọgbẹ́ lẹ dè podọ to whẹndo he klan to sinsẹ̀n-liho lẹ mẹ ma nọ yin yinyọnẹn sọmọ. (Mat. 10:35, 36; 1 Tẹs. 2:14) Ehe dona nọ duahunmẹna mímẹpo, na mẹmẹsunnu lẹdo aihọn pé lẹ wẹ mí yin wutu. (1 Pita 5:9) Mẹhe to azọ́n sinsinyẹn wà to sinsẹ̀nzọn Jehovah tọn mẹ lẹ sọ tin to ṣẹnṣẹn mítọn, bo nọ yin nukọntọ to azọ́n yẹwhehodidọ tọn po nukunpipedo agun lẹ go po mẹ. Mẹdevo lẹ ko sọ yin azọ́ndena nado nọ penukundo azọ́n lẹdo aihọn pé tọn lọ go. Yemẹpo wẹ tindo nuhudo odẹ̀ mítọn lẹ tọn, podọ gbọn mọwiwà dali wẹ mí nọ do ojlo nujọnu tọn po owanyi he mí tindo na mẹmẹsunnu mítọn lẹ po hia, etlẹ yin to whenue nudevo de ma tin he mí sọgan wà tlọlọ nado gọalọna yé.—Efe. 1:16; 1 Tẹs. 1:2, 3; 5:25.

¹¹ Na hunyanhunyan he tin to aigba ji to azán godo tọn ehelẹ mẹ lẹpo wutu, omẹ Jehovah tọn lẹ dona wleawufo nado gọalọna ode awetọ. Whedelẹnu, nugbajẹmẹji lẹ taidi aigba sisọsisọ po singigọ lẹ po sọgan biọ dọ alọgọ kọgbọ tọn he gbloada lẹ po alọgọ nutindo agbasa tọn susugege lẹ po ni yin bibasi. Klistiani owhe kanweko tintan whenu tọn lẹ ze apajlẹ dagbe de dai to whẹho ehe mẹ. Na devi he to Antioku lẹ flin ayinamẹ Jesu tọn wutu, yé yí ayajẹ do dó nunina agbasa tọn lẹ hlan mẹmẹsunnu he tin to Jude lẹ to whenue huvẹ de tọ́n. (Owalọ 11:27-30; 20:35) Apọsteli Paulu wleawuna alọgọ kọgbọ tọn lọ bọ nulẹpo yin bibasi to kannukannu. (2 Kọl. 9:1-15) To egbehe, eyin nude jọ do mẹmẹsunnu mítọn lẹ go bọ yé tin to nuhudo alọgọ kọgbọ agbasanu lẹ tọn mẹ, titobasinanu lọ po dopodopo Klistiani lẹ tọn po nọ yawu yinuwa bo nọ wleawuna nuhe yé tindo nuhudo etọn lẹ.

¹² Pipli mẹmẹsunnu lẹ tọn mítọn he to kọndopọ mẹ lẹdo aihọn pé ko yin tito-basina nado wà ojlo Jehovah tọn. To alọnu, ojlo etọn wẹ yindọ wẹndagbe Ahọluduta lọ tọn ni yin lilá to aigba fininọ lẹpo ji taidi okunnu de na akọta lẹpo. (Mat. 24:14) Dile mí to azọ́n ehe wà, Jehovah jlo dọ mí ni nọ yinuwa sọgbe hẹ nujinọtedo yiaga walọ dagbe tọn etọn lẹ. (1 Pita 1:14-16) Mí dona nọ tindo ojlo nado yin mẹmẹglọ na ode awetọ podọ nado wazọ́n na nukọnyiyi wẹndagbe lọ tọn. (Efe. 5:21) E ma yin ojlẹ lọ die nado to ale mẹdetiti tọn lẹ dín gba, ṣigba nado nọ ze Ahọluduta Jiwheyẹwhe tọn do otẹn tintan mẹ to gbẹzan mítọn mẹ. (Mat. 6:33) Ehe hinhẹn do ayiha mẹ dile mí to azọ́nwa to pọmẹ na wẹndagbe lọ wutu nọ hẹn ayajẹ po pekọ po wá todin bo nasọ planmẹ jẹ dona madopodo lẹ kọ̀n.

¹³ Taidi Kunnudetọ Jehovah tọn lẹ, mí gbọnvo, podọ taidi akọta wiwe de, mí yin kinklandovo na pipotọ gbẹtọvi lẹ tọn, bosọ nọ yí zohunhun do sẹ̀n Jiwheyẹwhe mítọn. (Titu 2:14) Sinsẹ̀n-bibasi mítọn hlan Jehovah wẹ nọ hẹn mí gbọnvo. E ma yindọ mí nọ wazọ́n abọ́ to abọ́ go hẹ mẹmẹsunnu mítọn lẹ lẹdo aihọn pé kẹdẹ wẹ gba, ṣigba mí sọ nọ do ogbè nugbo tọn dopolọ bosọ nọ yinuwa sọgbe hẹ nugbo he mí nọ lá. Ehe ko yin didọdai to whenuena Jehovah dọ gbọn yẹwhegán etọn Zefania gblamẹ dọmọ: “Yẹn na diọ ogbè gbẹtọ lẹ tọn zun ogbè wiwe-ṣeke de, na yemẹpo nido sọgan nọ dawhá ylọ oyín Jehovah tọn, nado nọ sẹ̀n ẹn abọ́ to abọ́ go.”—Zef. 3:9.

¹⁴ Enẹgodo, Jehovah gbọdo Zefania nado basi zẹẹmẹ pọninọ he tin to pipli mẹmẹsunnu lẹ tọn ṣẹnṣẹn lẹdo aihọn pé to egbehe nugbonugbo lọ tọn dọmọ: “Mẹhe yin pipotọ Islaeli tọn lẹ ma na nọ yinuwa po mawadodo po ba; yé ma na nọ dolalo, mọjanwẹ odẹ́ oklọ tọn ma na yin mimọ to onù yetọn mẹ do niyẹn; yé na nọ dùnú bo mlọnai bọ mẹde ma na nọ dobuna yé.” (Zef. 3:13) Na mí ko mọnukunnujẹ Ohó nugbo Jehovah tọn mẹ bo ko hẹn ayiha mítọn jẹ yọyọ bo ko sọ hẹn aliho gbẹninọ tọn mítọn sọgbe hẹ nujinọtedo Jehovah tọn lẹ wutu, mí nọ penugo nado wazọ́n to kọndopọ mẹ. Mí ko wà nuhe mẹhe nọ pọ́n whẹho lẹ hlan to pọndohlan gbẹtọ tọn mẹ lẹ lẹndọ e ma yọnbasi. Na nugbo tọn, omẹ vonọtaun lẹ wẹ mí yin, yèdọ omẹ Jiwheyẹwhe tọn lẹ, he to gbégbò hẹnwa na ẹn to aigba lẹpo ji.—Mika 2:12.