Mẹdekannujẹ Gigonọ to Madẹnmẹ Na Ovi Jiwheyẹwhe Tọn Lẹ

“Yè hẹn nudida yin mẹmẹglọ hlan ovọ́ . . . to [dodonu todido tọn mẹ na, NW] yè na whlẹn nudida lọsu sọn mẹglọnọ hẹngble tọn mẹ do mẹdekannujẹ he do gigo ovi Jiwheyẹwhe tọn lẹ tọn mẹ.”—LOMUNU LẸ 8:20, 21.

 1. Nawẹ avọ́sinsan Jesu tọn yin yẹdena to Azán Ovẹsè Tọn gbè gbọn?

JEHOVAH na Visunnu dopo akàn etọn taidi avọ́sinsan ofligọ tọn he hùn aliho donuvo hlan ogbẹ̀ olọn mẹ tọn na 144 000 gbẹtọvi lẹ tọn po nukundido madopodo aigba ji tọn po na gbẹtọvi he pò lẹ. (1 Johanu 2:1, 2) Dile e yin ayidego to hosọ he wayi lọ mẹ do, avọ́sinsan Jesu tọn na Klistiani yí gbigbọ do jì lẹ yin yẹhiadonu to whenuena yẹwhenọ daho Islaeli tọn yí oyinvu de do sanvọ́ taidi avọnunina ylando tọn na ede, whédo etọn, po whẹndo Levi tọn po to Azán Ovẹsè tọn lọ gbè. To azán dopolọ gbè, e na yí gbọgbọẹ do sanvọ́ taidi avọnunina ylando tọn na Islaelivi devo lẹpo, yèdọ dile gbẹtọvi lẹ to paa mẹ na mọaleyi sọn avọ́sinsan Klisti tọn mẹ do. Gbọgbọẹ gbẹ̀te de to yẹhiadonu liho nọ de ylando owhe he wayi gbẹtọ lọ lẹ tọn sẹ̀ mlẹnmlẹn, bo nọ busẹ to zungbo lọ mẹ.a—Levitiku 16:7-15, 20-22, 26.

 2, 3. Etẹwẹ hodidọ Paulu tọn to Lomunu lẹ 8:20, 21 mẹ zẹẹmẹdo?

² To whenuena e ko basi todohukanji na todido gbẹtọvi he na lẹzun “ovi Jiwheyẹwhe tọn” olọn mẹ tọn lẹ godo, apọsteli Paulu dọmọ: “Nukundo nudida tọn nọtepọn osọhia ovi Jiwheyẹwhe tọn lẹ tọn. Na yè hẹn nudida yin mẹmẹglọ hlan ovọ́, e mayin po ojlo po gba, ṣigba gbọn linlẹn omẹ he yí dopolọ do mẹglọ to [dodonu todido tọn mẹ na, NW ] yè na whlẹn nudida lọsu sọn mẹglọnọ hẹngble tọn mẹ do mẹdekannujẹ he do gigo ovi Jiwheyẹwhe tọn lẹ tọn mẹ.” (Lomunu lẹ 8:14, 17, 19-21) Etẹwẹ yin zẹẹmẹ hodidọ ehe tọn?

³ To whenuena tọgbo mítọn Adam yin didá taidi gbẹtọ pipé de, ewọ yin “visunnu [kavi, ovi] Jiwheyẹwhe tọn.” (Luku 3:38) Na ylando wiwà wutu, ewọ lẹzun “mẹglọnọ hẹngble tọn” bo hẹn ninọmẹ ehe wá akọ̀ gbẹtọvi tọn lẹ ji. (Lomunu lẹ 5:12) Jiwheyẹwhe dikena gbẹtọvi lẹ ni yin jìjì po nukundido “ovọ́” tọn po na mapenọ-yinyin heyin ogú etọn dù yetọn wutu, ṣigba e na todido gbọn “okún” lọ, yèdọ Jesu Klisti gblamẹ. (Gẹnẹsisi 3:15; 22:18; Galatianu lẹ 3:16) Osọhia 21:1-4 dlẹnalọdo ojlẹ lọ whenuena ‘okú, awubla, avi, po awufiẹsa po ma na tin bà.’ To whenuena e yindọ opagbe de wẹ ehe yin hlan ‘gbẹtọvi’ lẹ, e na mí jide dọ ogbẹ́ yọyọ aigba ji gbẹtọvi lẹ tọn he to gbẹnọ to gandudu Ahọluduta lọ tọn glọ na tindo numimọ hẹngọwa linlẹn po agbasalan po tọn jẹ agbasalilo gigọ́ mẹ po ogbẹ̀ madopodo po taidi “ovi Jiwheyẹwhe tọn” aigba ji tọn lẹ. To Gandudu Owhe Fọtọ́n Klisti tọn whenu, gbẹtọvi tonusetọ lẹ ‘na yin whinwhlẹn sọn mẹglọnọ hẹngble tọn mẹ.’ To whenuena yé ko do yéde hia di nugbonọ hlan Jehovah to mẹtẹnpọn godo tọn whenu pó vọ̀, yé na yin hinhẹn jẹ mẹdekannu kakadoi sọn gududu ylando po okú po tọn mẹ. (Osọhia 20:7-10) Mẹhe to aigba ji lẹ to whelọnu lo ‘na tindo mẹdekannujẹ gigonọ ovi Jiwheyẹwhe tọn lẹ tọn.’

Yé to Didọmọ “Wá”

 4. Etẹwẹ e zẹẹmẹdo nado “yí osìn ogbẹ̀ tọn lọ vọnu”?

⁴ Todido jiawu tẹ die yin zizedonukọnna gbẹtọvi lẹ! Abajọ Klistiani jìjì gbọn gbigbọ dali he gbẹ́ pò to aigba ji lẹ yí zohunhun do to nukọntọ yin to didọna mẹdevo lẹ dogbọn dali etọn! Taidi mẹhe na lẹzun apadewhe “asi yọyọ” Lẹngbọvu pagigona lọ, yèdọ Jesu Klisti tọn lẹ, pipotọ mẹyiamisisadode lẹ tọn tindo mahẹ to hẹndi ohó dọdai tọn ehelẹ mẹ dọmọ: “Gbigbọ po asi yọyọ po dọmọ, Wá. Ewọ he to sisè ni dọmọ, Wá. Podọ mẹhe nugblahu gbọ e ni wá. Ewọ he jlo, gbọ e ni yí osìn ogbẹ̀ tọn lọ vọnu.” (Osọhia 21:2, 9; 22:1, 2, 17) Lala, alemọyi avọ́sinsan ofligọ Jesu tọn ma nọte do mẹyiamisisadode 144 000 lẹ ji gba. Gbigbọ Jiwheyẹwhe tọn gbẹ́ pò to azọ́nwa gbọn hagbẹ pipotọ asi yọyọ lọ tọn he tin to aigba ji lẹ gblamẹ to didọmọ “Wá.” Mẹdepope he to sisè he ovẹ́ dodowiwa tọn to húhú yin oylọ-basina nado dọ “Wá,” nado mọaleyi na ede to awuwledainanu susugege Jehovah tọn mẹ na whlẹngán.

 5. Mẹnu lẹ wẹ Kunnudetọ Jehovah Tọn lẹ hunhomẹ nado tindo to ṣẹnṣẹn yetọn?

⁵ Kunnudetọ Jehovah Tọn lẹ tindo yise to awuwledainanu Jiwheyẹwhe tọn na ogbẹ̀ gbọn Jesu Klisti gblamẹ mẹ. (Owalọ lẹ 4:12) Yé yin homẹhunnọ nado tindo to ṣẹnṣẹn yetọn gbẹtọ ahunjijlọnọ lẹ he jlo nado plọn dogbọn lẹndai Jiwheyẹwhe tọn lẹ dali bo wà ojlo etọn. Plitẹnhọ Ahọluduta lọ tọn yetọn yin hunhundonuvo hlan mẹlẹpo he jlo nado ‘wá yí osìn ogbẹ̀ tọn lọ vọnu’ to ‘ojlẹ opodo tọn’ ehe mẹ.—Daniẹli 12:4.

Diọdo lẹ to Jujuyi Ojlẹ lẹ Tọn Mẹ

 6. Nawẹ gbigbọ Jiwheyẹwhe tọn ko yinuwa do devizọnwatọ Jehovah tọn lẹ ji gbọn to ojlẹ voovo lẹ whenu?

⁶ Jiwheyẹwhe tindo ojlẹ de nado hẹn lẹndai etọn lẹ di, podọ ehe gando nuyiwa etọn lẹ hẹ gbẹtọvi lẹ go. (Yẹwhehodọtọ 3:1; Owalọ lẹ 1:7) Dile etlẹ yindọ gbigbọ Jiwheyẹwhe tọn wá devizọnwatọ etọn he jẹnukọnna ojlẹ Klistiani tọn lẹ ji, yé mayin jìjì taidi visunnu gbigbọmẹ tọn lẹ gba. Nalete, bẹjẹeji po Jesu po, ojlẹ Jehovah tọn ko wá nado yí gbigbọ wiwe lọ zan nado jì sunnu po yọnnu klandowiwe lẹ po hlan gududu olọn mẹ tọn de. Podọ etẹwẹ dogbọn azán mítọn gbè dali? Gbigbọ dopolọ to nuyiwa do “lẹngbọ devo” Jesu tọn lẹ ji, ṣigba e ma nọ whàn yé hlan todido po ojlo hlan ogbẹ̀ olọn mẹ tọn po gba. (Johanu 10:16) Po ogbẹ̀ mavọmavọ to aigba paladisi tọn de ji po taidi todido namẹ sọn Jiwheyẹwhe dè yetọn, po ayajijẹ po yé nọgodona pipotọ yiamisisadode lẹ tọn to kunnudide nina to ojlẹ diọdo sọn aihọn hoho lọ mẹ hlan aihọn yọyọ dodowiwa Jiwheyẹwhe tọn mẹ.—2 Pita 3:5-13.

 7. Azọ́n jibẹwawhé tọn tẹwẹ duahunmẹna Biblu Plọntọ lẹ, ṣigba etẹwẹ yé yọnẹn dogbọn paladisi dali?

⁷ Jiwheyẹwhe bẹjẹeji ‘nado hẹn ovi susu wá gigo mẹ’ po kinkọnjẹgbonu gbigbọ wiwe tọn po to Pẹntikọsti owhe 33 W.M., podọ e sọawuhia dọ e ze ojlẹ de dai nado hẹn sọha “Islaeli Jiwheyẹwhe tọn” 144 000 lẹ wá vivọnu. (Heblu lẹ 2:10; Galatianu lẹ 6:16; Osọhia 7:1-8) Bẹsọn 1879, azọ́n jibẹwawhé tọn he bẹ Klistiani yiamisisadode lẹ hẹn nọ saba yin nudego to linlinnamẹwe ehe mẹ. Ṣigba Biblu Plọntọ lẹ (he nọ yin yiylọdọ Kunnudetọ Jehovah Tọn lẹ todin) sọ yọnẹn dọ Owe wiwe lẹ ze todido ogbẹ̀ mavọmavọ to paladisi aigba tọn de ji donukọnnamẹ ga. Di apajlẹ, zinjẹgbonu Atọ̀họ̀-Nuhihọ́ Lọ Tọn [Glẹnsigbe] juillet 1883 tọn dọmọ: “To whenuena Jesu ko ze ahọluduta etọn dai, và ylanwiwa sudo, po mọmọ po sọyi, aigba ehe na lẹzun paladisi de, . . . podọ mẹhe tin to yọdo yetọn mẹ lẹpo na wá e ji. Podọ gbọn lilẹzun tonusetọ hlan osẹ́n etọn lẹ dali yé sọgan nọ e ji kakadoi.” Dile whenu to jujuyi, jibẹwawhé mẹyiamisisadode lẹ tọn depò, podọ mẹhe ma tindo todido olọn mẹ tọn lọ lẹ jẹ yinyin hinhẹnwa titobasinanu Jehovah tọn mẹ ji vudevude. To ojlẹ dopolọ mẹ, Jehovah na devizọnwatọ yiamisisadode, yèdọ Klistiani heyin vivọji etọn lẹ, nukunnumọjẹnumẹ he jẹ na ayidego.—Daniẹli 12:3; Filippinu lẹ 2:15; Osọhia 14:15, 16.

 8. Nawẹ nukunnumọjẹnumẹ todido aigba ji tọn wleawu to fliflimẹ 1930 tọn gbọn?

⁸ Na titengbe tọn sọn 1931 gbọ́n wẹ mẹhe tindo todido aigba ji tọn lẹ ko to gbẹdohẹ agun Klistiani tọn lọ. To owhe enẹ mẹ, Jehovah hẹn pipotọ Klistiani jìjì gbọn gbigbọ dali lẹ tindo nukunnumọjẹnumẹ nado mọ dọ Ezekiẹli weta 9 dlẹnalọdo hagbẹ aigba ji tọn ehe, mẹhe ko yin ohiadogona na whlẹngán biọ aihọn yọyọ Jiwheyẹwhe tọn mẹ lẹ. To 1932 e yin tadona etọn kọ̀n wá dọ omẹ taidi lẹngbọ egbezangbe tọn mọnkọtọn lẹ nọtena gbẹdohẹmẹtọ Jehu tọn Jonadabi (Jehonadabi). (2 Ahọlu lẹ 10:15-17) To 1934 e yin hinhẹn họnwun dọ “Jonadabi lẹ” dona ‘jó yede mlẹnmlẹn,’ kavi klan yede do wiwe hlan Jiwheyẹwhe. To 1935 “gbẹtọgun” lọ, kavi “gbẹtọ susugege”—he ko yin linlẹn dai nado yin hagbẹ awetọ gbigbọmẹ tọn lẹ he na yin ‘gbẹdohẹmẹtọ’ asi yọyọ Klisti tọn to olọn mẹ—yin yinyọnẹn taidi lẹngbọ devo he tindo todido aigba ji tọn de. (Osọhia 7:4-15; 21:2, 9; Psalm 45:14, 15) Podọ na titengbe tọn sọn 1935 gbọ́n wẹ mẹyiamisisadode lẹ ko to nukọntọ yin nado dín gbẹtọ ahunjijlọnọ lẹ he tindo ojlo vẹkuvẹku nado nọgbẹ̀ kakadoi to paladisi aigba tọn de ji.

 9. To 1935 godo, naegbọn Klistiani delẹ doalọte nado tindo mahẹ to yẹhiadonu Tenu-Núdùdù Oklunọ tọn mẹ?

⁹ To 1935 godo Klistiani delẹ he ko yin mahẹtọ akla po ovẹ́n po tọn to Tenu-Núdùdù Oklunọ tọn whenu lẹ doalọte nado tindo mahẹ to e mẹ. Etẹwutu? Na yé yọnẹn dọ todido yetọn yin aigba ji tọn, e mayin olọn mẹ tọn gba. Yọnnu de he ko yí baptẹm to 1930 dọmọ: “Dile etlẹ yindọ [mahẹ tintindo] yin pinpọn taidi nuhe sọgbe, na titengbe tọn na lizọnyizọnwatọ zohunhunnọ whenu-gigọ tọn lẹ, yẹn ma ko kudeji gbede dọ yẹn tindo todido olọn mẹ tọn de gba. Enẹgodo, to 1935, e yin hinhẹn họnwun na mí dọ bibẹpli gbẹtọ susugege de tọn po todido gbẹninọ kakadoi to aigba ji tọn po tin. Susu mítọn lẹ jaya nado mọnukunnujẹemẹ dọ mí yin apadewhe gbẹtọ susugege enẹ tọn, podọ mí doalọtena mahẹ tintindo to yẹhiadonu lọ mẹ.” Owe Klistiani tọn lẹ tlẹ diọ to nuplọnmẹ liho. To whenuena dehe yin owhe he wayi lẹ tọn yin awuwlena tintan na hodotọ jìjì gbọn gbigbọ dali Jesu tọn lẹ, sọn 1935 sọyi Atọ̀họ̀-Nuhihọ́ Lọ Tọn po owe ‘afanumẹ nugbonọ’ lọ tọn devo lẹ po wleawuna núdùdù gbigbọmẹ tọn he jẹna nuhudo mẹyiamisisadode lẹ tọn po gbẹdohẹmẹtọ yetọn lẹ he tindo todido aigba ji tọn po.—Matiu 24:45-47.

10. Nawẹ mẹyiamisisadode mawadodonọ de nọ yin tẹndiọna gbọn?

¹⁰ Mí ni dọdọ mẹyiamisisadode de lẹzun mawadodonọ. Be tẹnmẹdiọnamẹtọ de na tin ya? Paulu do onú susu hia to hodọdopọ etọn do atin olivie yẹhiadonu tọn lọ ji mẹ. (Lomunu lẹ 11:11-32) Eyin mẹhe yin jìjì gbọn gbigbọ dali de dona yin tẹnmẹdiọna, e yọnbasi dọ Jiwheyẹwhe ni na oylọ olọn mẹ tọn mẹde he yise etọn ko yin apajlẹ dagbe tọn to sinsẹ̀nzọn wiwe wiwà hlan ẹn na owhe susu lẹ mẹ.—Yijlẹdo Luku 22:28, 29; 1 Pita 1:6, 7 go.

Whẹwhinwhẹ́n Susu na Pinpẹn-Nutọn-Yinyọnẹn

11. Mahopọnna wunmẹ todido mítọn tọn, etẹwẹ Jakobu 1:17 na jide etọn mí?

¹¹ Fidepope he mí basi sinsẹ̀n hlan Jehovah te to nugbonọ-yinyin mẹ, ewọ na hẹn pekọ wá na nuhudo po ojlo he sọgbe mítọn lẹ po. (Psalm 145:16; Luku 1:67-74) Vlavo mí tindo todido olọn mẹ tọn nujọnu tọn de kavi nukundido mítọn yin aigba ji tọn, mí tindo whẹwhinwhẹ́n dagbe susu na pinpẹn-nutọn-yinyọnẹn hlan Jiwheyẹwhe. Ewọ nọ saba wà onú he yin dagbe hugan na mẹhe yiwanna ẹn lẹ. Devi Jakobu dọ dọ “nunina dagbedagbe po nunina he sọgbe lẹpo po, aga wẹ e sọn, bosọ jẹte sọn Otọ́ hinhọ́n lẹ tọn dè,” yèdọ Jehovah Jiwheyẹwhe. (Jakobu 1:17) Mì gbọ mí ni doayi nunina po dona ehelẹ po go to kleun mẹ.

12. Naegbọn mí sọgan dọ dọ Jehovah ko na dopodopo devizọnwatọ nugbonọ etọn lẹ todido jiawu de?

¹² Jehovah ko na dopodopo devizọnwatọ etọn lẹ todido jiawu de. Ewọ ko ylọ mẹdelẹ hlan ogbẹ̀ olọn mẹ tọn. Na kunnudetọ he jẹnukọnna ojlẹ Klistiani tọn etọn lẹ, Jehovah na yé todido whanpẹnọ fọnsọnku tọn de hlan ogbẹ̀ madopodo to aigba ji. Di dohia, Ablaham tindo yise to fọnsọnku mẹ bo nọtepọn “todaho de he tindo dòdó”—yèdọ Ahọluduta olọn mẹ tọn to ehe glọ ewọ na yin finfọnsọnku te hlan ogbẹ̀ aigba ji tọn. (Heblu lẹ 11:10, 17-19) Whladopo dogọ, to ojlẹ opodo tọn ehe mẹ, Jiwheyẹwhe to nina livi lẹ todido ogbẹ̀ madopodo to paladisi aigba tọn de ji. (Luku 23:43; Johanu 17:3) Na jide tọn, mẹdepope he Jehovah ko na todido daho mọnkọtọn de dona dopẹ́ sisosiso na ẹn.

13. Nawẹ gbigbọ Jiwheyẹwhe tọn ko yinuwa do omẹ etọn lẹ ji gbọn?

¹³ Jehovah nọ na gbigbọ wiwe etọn taidi nunina de hlan omẹ etọn lẹ. Klistiani heyin todido olọn mẹ tọn na lẹ yin amisisadode po gbigbọ wiwe po. (1 Johanu 2:20; 5:1-4, 18) Ṣogan, devizọnwatọ Jiwheyẹwhe tọn he tindo nukundido aigba ji tọn lẹ tindo alọgọ po anademẹ gbigbọ lọ tọn po. To ehelẹ mẹ wẹ Mose, mẹhe tindo gbigbọ Jehovah tọn te, dile e yin do na sunnu 70 lẹ he yin dide nado gọalọna ẹn. (Osọha lẹ 11:24, 25) To nuyiwadomẹji gbigbọ wiwe tọn glọ, Bezaleli wà sinsẹ̀nzọn taidi azọ́nyọnẹntọ họgbigbá tọn to kọndopọmẹ hẹ gòhọtúntún Islaeli tọn. (Eksọdusi 31:1-11) Gbigbọ Jiwheyẹwhe tọn wá Gideoni, Jẹfta, Samsọni, Davidi, Elija, Eliṣa, po mẹdevo lẹ po ji. Dile etlẹ yindọ omẹ ehelẹ ma na yin hinhẹnwa gigo olọn tọn mẹ gbede, yé yin anadena bo yin alọgọna gbọn gbigbọ wiwe dali, dile e te na lẹngbọ devo Jesu tọn lẹ do to egbehe. Enẹwutu, to whelọnu lo, gbigbọ Jiwheyẹwhe tọn tintindo ma zẹẹmẹdo dọ mí tindo oylọ olọn mẹ tọn dandan gba. Etomọṣo, gbigbọ Jehovah tọn nọ wleawuna anademẹ, nọ gọalọna mí nado dọyẹwheho podọ nado hẹn azọ́ndenamẹ sọn Jiwheyẹwhe dè devo lẹ di, nọ na mí huhlọn hugan jọwamọ tọn, bo nọ wleawuna sinsẹ́n etọn lẹ to mí mẹ, yèdọ owanyi, ayajẹ, jijọho, linsinsinyẹn, jijọdagbe, dagbewà, yise, walọmimiọn, po mawazẹjlẹgo po. (Johanu 16:13; Owalọ lẹ 1:8; 2 Kọlintinu lẹ 4:7-10; Galatianu lẹ 5:22, 23) Be mí ma dona dopẹ́ na nunina lẹblanu tọn sọn Jiwheyẹwhe dè ehe ya?

14. Nawẹ mí nọ mọaleyi sọn nunina Jiwheyẹwhe tọn heyin oyọnẹn po nuyọnẹn po mẹ gbọn?

¹⁴ Oyọnẹn po nuyọnẹn po yin nunina lẹ sọn Jiwheyẹwhe dè ehe mí dona dopẹ́ etọn, vlavo todido mítọn yin olọn mẹ tọn kavi aigba ji tọn. Oyọnẹn he pegan Jehovah tọn nọ gọalọna mí nado “mọdona onú he gbọnvo lẹ” podọ ‘nado to zọnlinzin dole e jẹ na Oklunọ to nukundagbe lẹpo mẹ.’ (Filippinu lẹ 1:9-11; Kọlọsinu lẹ 1:9, 10) Nuyọnẹn jijọ-di-Jiwheyẹwhe tọn nọ yinuwa taidi hihọ́ po anademẹ po to gbẹzan mẹ. (Howhinwhẹn lẹ 4:5-7; Yẹwhehodọtọ 7:12) Oyọnẹn po nuyọnẹn nugbo po sinai do Ohó Jiwheyẹwhe Tọn ji, podọ pipotọ kleun mẹyiamisisadode lẹ tọn na titengbe tọn yin dindọn hlan nuhe yin didọ dogbọn todido olọn mẹ tọn yetọn dali. Etomọṣo, owanyi na Ohó Jiwheyẹwhe Tọn po nukunnumọjẹnumẹ dagbe etọn po mayin dodonu na aliho Jiwheyẹwhe tọn he dohia dọ mí ko yin yiylọ hlan ogbẹ̀ olọn mẹ tọn gba. Sunnu lẹ taidi Mose po Daniẹli po tlẹ wlan adà Biblu lọ tọn lẹ, ṣigba yé na yin finfọnsọnku hlan ogbẹ̀ to aigba ji. Vlavo todido mítọn yin olọn mẹ tọn kavi aigba ji tọn, mímẹpo nọ mọ núdùdù gbigbọmẹ tọn yí gbọn “afanumẹ nugbonọ nuyọnẹntọ” he Jehovah kẹalọyi lọ gblamẹ. (Matiu 24:45-47) Lehe mímẹpo gọna pẹdido na oyọnẹn he mí gbọnmọ dali tindo do sọ!

15. Etẹwẹ yin nunina klohugan Jiwheyẹwhe tọn dopo, podọ nawẹ hiẹ nọ pọ́n ẹn hlan gbọn?

¹⁵ Nunina Jiwheyẹwhe tọn he klohugan dopo wẹ awuwledainanu owanyinọ avọ́sinsan ofligọ Jesu tọn, ehe yin alemọyi na mí vlavo mí tindo nukundido olọn mẹ tọn kavi todido aigba ji tọn. Jiwheyẹwhe yiwanna aihọn gbẹtọvi lẹ tọn “sọmọ bọ e yí Ovi detọ́n etọn dopo akàn namẹ, na mẹdepope he yí ì sè ma nado dọ̀n, ṣigba e nido tindo ogbẹ̀ madopodo.” (Johanu 3:16) Podọ owanyi Jesu tọn whàn ẹn “nado yí ogbẹ̀ etọn do basi ofligọ na omẹ susu.” (Matiu 20:28) Dile apọsteli Johanu basi zẹẹmẹ do, Jesu Klisti “wẹ oyẹsu na ylando mítọn [mẹyiamisisadode lẹ tọn]: e mayin mítọn kẹdẹ, ṣigba na ylando aihọn lẹpo tọn ga.” (1 Johanu 2:1, 2) Enẹwutu, mímẹpo dona gọna pẹdido tlala na awuwledainanu owanyinọ ehe na whlẹngán hlan ogbẹ̀ mavọmavọ.b

Be Hiẹ na Tin to Finẹ Ya?

16. Nujijọ ayidego tọn tẹwẹ na yin bibasi to họyìyì owhè tọn godo to 11 avril 1998, podọ mẹnu wẹ dona tin to finẹ?

¹⁶ Pinpẹn-nutọn-yinyọnẹn na ofligọ heyin awuwlena gbọn Jiwheyẹwhe dali gbọn Visunnu etọn gblamẹ dona whàn mí nado tin to Plitẹnhọ Ahọluduta Tọn lẹ mẹ kavi otẹn devo lẹ mẹ fie Kunnudetọ Jehovah Tọn lẹ na plido to họyìyì owhè tọn godo to 11 avril 1998, nado basi oflin okú Klisti tọn. To whenuena e to hùnwhẹ ehe zedai po apọsteli nugbonọ etọn lẹ po to ozán godo ogbẹ̀ aigba ji tọn etọn mẹ, Jesu dọmọ: “Mì nọ basi ehe to oflin ṣie mẹ.” (Luku 22:19, 20; Matiu 26:26-30) Pipotọ kleun mẹyiamisisadode he pò lẹ na tindo mahẹ to akla madotọ́n, he nọtena agbasalan madoblọ gbẹtọ tọn Jesu tọn, po ovẹ́n vẹẹ he yè ma flusọ lọ po, he nọtena ohùn etọn heyin kinkọnjẹgbonu to avọ́sinsan mẹ. Klistiani heyin jìjì gbọn gbigbọ dali lẹ kẹdẹ wẹ dona tindo mahẹ to e mẹ na yewlẹ kẹdẹ wẹ tin to alẹnu yọyọ lọ mẹ podọ to alẹnu Ahọluduta lọ tọn mẹ wutu bo tindo kunnudenu diun gbigbọ wiwe Jiwheyẹwhe tọn dọ yetọn wẹ todido olọn mẹ tọn. Livi mẹdevo lẹ tọn na tin to finẹ taidi nupọntọ he tindo sisi lẹ he dopẹ́ na owanyi heyin didohia gbọn Jiwheyẹwhe po Klisti po dali to kọndopọmẹ hẹ avọ́sinsan Jesu tọn he hẹn ogbẹ̀ mavọmavọ yọnbasi.—Lomunu lẹ 6:23.

17. Etẹwẹ mí dona flin na nuhe dù mẹdide gbọn gbigbọ dali?

¹⁷ Pọndohlan dai tọn sinsẹ̀n tọn, numọtolanmẹ sinsinyẹn he nọ fọ́n sọn okú mẹyiwanna de tọn mẹ, awusinyẹnnamẹnu he nọ yin pipehẹ to gbẹzan egbesọegbesọ tọn mẹ lẹ, kavi numọtolanmẹ na dona vonọtaun delẹ mimọyi sọn Jehovah dè sọgan hẹn mẹdelẹ nado tindo linlẹn nuṣiwa tọn dọ ogbẹ̀ olọn mẹ tọn yin yetọn. Ṣigba mímẹpo dona flindọ Owe wiwe lẹ ma degbe na mí nado tindo mahẹ to yẹhiadonu Oflin tọn mẹ nado do pinpẹn-nutọn mítọn hia na avọ́sinsan ofligọ Klisti tọn gba. Humọ, mẹdide gbọn gbigbọ dali “mayin ewọ he to jijlo tọn, kavi ewọ he to wezundo tọn, ṣigba Jiwheyẹwhe,” yèdọ Ewọ he jì Jesu taidi Visunnu gbigbọmẹ tọn de podọ mẹhe hẹn ovi 144 000 devo lẹ wá gigo mẹ tọn.—Lomunu lẹ 9:16; Isaia 64:8.

18. Na suhugan mẹhe to sinsẹ̀nzọnwà na Jehovah to egbehe lẹ, dona tẹlẹ wẹ to tenọpọn yé?

¹⁸ Ogbẹ̀ madopodo to paladisi aigba tọn de ji yin todido nunina sọn Jiwheyẹwhe dè tọn na gbẹtọvi susu he to sinsẹ̀nzọn basi hlan Jehovah to azán godo tọn ehelẹ mẹ. (2 Timoti 3:1-5) To madẹnmẹ, yé na duvivi paladisi jiawu ehe tọn. Ahọvi lẹ to whelọnu lo na penukundo whẹho aigba tọn lẹ go to gandudu olọn mẹ tọn glọ. (Psalm 45:16) Ninọmẹ jijọho tọn lẹ na tin-to-aimẹ dile mẹhe na nọ aigba ji lẹ na sọgbe hẹ osẹ́n Jiwheyẹwhe tọn lẹ bo plọn onú susu lẹ dogbọn aliho Jehovah tọn lẹ dali. (Isaia 9:6, 7; Osọhia 20:12) Azọ́n susugege na tin nado wà, to owhé lẹ gbigbá po aigba lọ pipọ̀ po mẹ. (Isaia 65:17-25) Podọ lẹnnupọn do kọndopọ ayajẹnọ whẹndo lẹ tọn ji dile oṣiọ lẹ to gigọwa ogbẹ̀! (Johanu 5:28, 29) To mẹtẹnpọn godo tọn de godo, kanyinylan lẹpo na ko busẹ. (Osọhia 20:7-10) To enẹgodo kakadoi, aigba lọ na yin gigọ́ po gbẹtọvi heyin ‘dide sọn mẹglọnọ hẹngble tọn mẹ do mẹdekannujẹ he do gigo ovi Jiwheyẹwhe tọn lẹ tọn mẹ.’

[Nudọnamẹ Odò Tọn Lẹ]

Nawẹ Hiẹ Na Na Gblọndo Gbọn?

● Etẹwẹ e zẹẹmẹdo nado “yí osìn ogbẹ̀ tọn lọ vọnu”?

● Vlavo todido mítọn yin olọn mẹ tọn kavi aigba ji tọn, whẹwhinwhẹ́n tẹwẹ mí tindo na pinpẹn-nutọn-yinyọnẹn hlan Jiwheyẹwhe?

● Hùnwhẹ whemẹwhemẹ tọn tẹwẹ mímẹpo dona yì?

● Na suhugan omẹ Jehovah tọn lẹ tọn, etẹwẹ sọgodo bẹhẹn?

[Yẹdide to weda 18]

Livi susu ko bẹ ‘osìn ogbẹ̀ tọn yíyí vọnu’ jẹeji. Be hiẹ tin to yé mẹ ya?