Dike Jehovah Ni Deanana We Yì Mẹdekannujẹ Nujọnu Tọn Kọ̀n
“Zín nukun do osẹ́n pipé he yin mẹdekannujẹ tọn lọ mẹ.”—JAK. 1:25.
BE HIẸ SỌGAN NA GBLỌNDO YA?
Osẹ́n tẹwẹ nọ planmẹ yì mẹdekannujẹ nujọnu tọn kọ̀n, podọ mẹnu lẹ wẹ nọ mọaleyi sọn e mẹ?
Etẹwẹ yin aṣli lọ nado tindo mẹdekannujẹ nujọnu tọn?
Mẹdekannujẹ tẹwẹ tin to sẹdotẹnmẹ na mẹhe gbọṣi aliho ogbẹ̀ tọn ji lẹ?
1, 2. (a) Etẹwẹ to jijọ do mẹdekannujẹ go, podọ etẹwutu? (b) Mẹdekannujẹ tẹwẹ devizọnwatọ Jehovah tọn lẹ to nukundo?
MÍ TO gbẹnọ to ojlẹ he mẹ nukunkẹn, sẹ́nhẹngba po danuwiwa po fọ́n bo to jijideji te. (2 Tim. 3:1-5) Enẹwutu, gandudu lẹ nọ de osẹ́n susu lẹ tọ́n, nọ na huhlọn ponọ lẹ bo nọ yí fọtodenu lẹ zan nado ṣọ́ nuhe gbẹtọ lẹ to wiwà. To otò delẹ mẹ, gbẹtọ paa lẹ ko wleawuna zomọ he nọ namẹ avase do owhé yetọn gbè, nọ zan agasagodo susu na ohọ̀n yetọn lẹ bosọ nọ dọ̀n huhlọn lẹtliki tọn gbọn adó yetọn lẹ ji nado basi hihọ́na yede. Mẹsusu ma nọ jlo na tọ́n to zánmẹ kavi dọ ovi yetọn lẹ ni yì daihun yedeṣo to gbonu to okle kavi zánmẹ. E họnwun dọ mẹdekannujẹ fọ́n bo to didepo podọ ehe sọgan gbẹ́ zindonukọn.
2 To jipa Edẹni tọn mẹ, Satani sọalọakọ́n dọ gbẹtọ lẹ sọgan mọ mẹdekannujẹ nujọnu tọn eyin yé tọ́n sọn anademẹ Jehovah tọn glọ. Lehe enẹ sọawuhia nado yin lalo daho de do sọ! Na nugbo tọn, dile gbẹtọvi lẹ to nukunpẹvi yí do pọ́n dogbó walọ dagbe tọn po gbigbọmẹ tọn he Jiwheyẹwhe zedai lẹ po sọ, mọ wẹ yé nọ to yaji do niyẹn. Devizọnwatọ Jehovah tọn lẹ lọsu nọ jiya na ninọmẹ he fọ́n bo to yinylan deji ehe tọn wutu. Ṣigba, mí to nukundo whenue afanumẹ-yinyin na ylando po gbigble po na wá opodo, podọ nado duvivi nuhe Biblu ylọdọ “mẹdekannujẹ gigonọ he yin ovi Jiwheyẹwhe tọn lẹ tọn.” (Lom. 8:21) Na nugbo tọn, Jehovah ko to awuwlena devizọnwatọ etọn lẹ na mẹdekannujẹ enẹ. Gbọnna?
3. Osẹ́n tẹwẹ Jehovah na hodotọ Klisti tọn lẹ, podọ kanbiọ tẹlẹ wẹ mí na gbadopọnna?
3 Nado wleawuna devizọnwatọ etọn lẹ na mẹdekannujẹ sọgodo tọn enẹ, Jehovah na mí nuhe Biblu-kantọ Jakọbu ylọdọ “osẹ́n pipé he yin mẹdekannujẹ tọn lọ.” (Hia Jakọbu 1:25.) Lẹdogbedevomẹ Biblu tọn devo lẹ lilẹ́ hogbe enẹlẹ do “osẹ́n he nọ hẹn mí jẹ mẹdekannu” (The New English Bible) podọ “osẹ́n pipé mẹdekannujẹ tọn lọ” (The New American Bible). To paa mẹ, gbẹtọ lẹ nọ pọ́n osẹ́n hlan taidi aliglọnnamẹnu de kakati nido yin nuhe nọ hẹnmẹ jẹ mẹdekannu. To whelọnu lo, etẹwẹ “osẹ́n pipé he yin mẹdekannujẹ tọn lọ” yin? Podọ nawẹ osẹ́n enẹ nọ hẹn mí jẹ mẹdekannu gbọn?
OSẸ́N HE NỌ HẸNMẸ JẸ MẸDEKANNU LỌ
4. Etẹwẹ “osẹ́n pipé he yin mẹdekannujẹ tọn lọ” yin, podọ mẹnu lẹ wẹ nọ mọaleyi sọn e mẹ?
4 “Osẹ́n pipé he yin mẹdekannujẹ tọn lọ” ma yin Osẹ́n Mose tọn gba, na todohukanji osẹ́n tọn enẹ do sẹ́nhẹngba lẹ hia podọ nuhe yin didọdai to e mẹ lẹ ko yin hinhẹndi gbọn Klisti gblamẹ. (Mat. 5:17; Gal. 3:19) Enẹwutu, osẹ́n tẹwẹ Jakọbu to alọdlẹndo? “Osẹ́n Klisti tọn” hodọ wẹ e te, ehe sọ nọ yin yiylọdọ “osẹ́n yise tọn” podọ “osẹ́n mẹhe to yedekannu lẹ tọn.” (Gal. 6:2; Lom. 3:27; Jak. 2:12) To whelọnu lo, “osẹ́n pipé” lọ bẹ nuhe Jehovah biọ to mí si lẹpo hẹn. Klistiani yiamisisadode lẹ po “lẹngbọ devo lẹ” po nọ mọaleyi sọn osẹ́n enẹ mẹ.—Joh. 10:16.
5. Naegbọn osẹ́n mẹdekannujẹ tọn lọ ma yin agbànpẹnmẹnu de?
5 To vogbingbọn mẹ na osẹ́n he otò susu nọ zedai lẹ, “osẹ́n pipé” lọ ma doglẹ kavi yin agbànpẹnmẹnu de gba, ṣigba e bẹ gbedide he bọawu lẹ po nunọwhinnusẹ́n dodonu tọn lẹ po hẹn. (1 Joh. 5:3) “Zẹgẹ ṣie bọawu bọ agbàn ṣie sọ fua,” wẹ Jesu dọ. (Mat. 11:29, 30) Humọ, “osẹ́n pipé” lọ ma tindo nuhudo todohukanji gblẹlẹ osẹ́n-bá lẹ tọn gba, na e sinai do owanyi ji bo yin kinkan do ayiha po ahun lẹ po mẹ, e ma yin do zannu lẹ ji.—Hia Heblu lẹ 8:6, 10.
LEHE “OSẸ́N PIPÉ” LỌ NỌ HẸN MÍ JẸ MẸDEKANNU DO
6, 7. Etẹwẹ mí sọgan dọ gando nujinọtedo Jehovah tọn lẹ go, podọ etẹwẹ osẹ́n mẹdekannujẹ tọn lọ nọ hùn dotẹnmẹ dote na mí nado wà?
6 Dogbó he Jehovah zedai na nudida nuyọnẹntọ etọn lẹ yin na ale po hihọ́ yetọn po. Di apajlẹ, lẹnnupọndo osẹ́n he nọ deanana huhlọn jọwamọ tọn lẹ po nugonu jọwamọ tọn lẹ po ji. Gbẹtọ lẹ ma nọ pọ́n osẹ́n enẹlẹ hlan taidi kọgbidinamẹnu de. Kakatimọ, yé nọ yọ́n pinpẹn yetọn na yé kẹalọyi dọ osẹ́n jọwamọ tọn lẹ yin dandannu na dagbemẹninọ yetọn. Mọdopolọ, nujinọtedo walọ dagbe tọn po gbigbọmẹ tọn Jehovah tọn lẹ po, ehe sọawuhia to “osẹ́n pipé” Klisti tọn lọ mẹ, nọ hẹn ale wá na gbẹtọvi lẹ.
7 Gbọnvona dọ osẹ́n mẹdekannujẹ tọn lọ nọ basi hihọ́na mí, e sọ nọ hùn dotẹnmẹ dote na mí nado hẹn pekọ wá na ojlo mítọn he sọgbe lẹ bọ to ojlẹ dopolọ mẹ mí ma nọ gbleawuna míde kavi do sisi matindo hia na jlọjẹ po mẹdekannujẹ mẹdevo lẹ tọn po. Enẹwutu, aṣli lọ nado tindo mẹdekannujẹ nujọnu tọn—yèdọ nugopipe lọ nado nọ wà nuhe mí jlo—wẹ nado wleawuna ojlo he sọgbe lẹ, enẹ wẹ dehe tin to kọndopọ mẹ hẹ jẹhẹnu po nujinọtedo Jehovah tọn lẹ po. To hogbe devo mẹ, mí dona plọn nado yiwanna nuhe Jehovah yiwanna lẹ podọ nado gbẹwanna nuhe e gbẹwanna lẹ, podọ osẹ́n mẹdekannujẹ tọn lọ nọ gọalọna mí nado wà ehe.—Amọ. 5:15.
8, 9. Ale tẹlẹ wẹ mẹhe nọ tẹdo osẹ́n mẹdekannujẹ tọn lọ go lẹ nọ mọyi? Na apajlẹ.
8 Na mí yin mapenọ wutu, mí nọ diahi nado duto ojlo agọ̀ lẹ ji. Etomọṣo, eyin mí tẹdo osẹ́n mẹdekannujẹ tọn lọ go po nugbonọ-yinyin po, mí sọgan tindo mẹdekannujẹ jẹ obá de mẹ etlẹ yin todin. Di apajlẹ: Plọnmẹ Biblu yọyọ de he nọ yin Jay peve to siga nùnù mẹ. To whenuena e plọn dọ aṣa emitọn ma nọ hẹn homẹ Jiwheyẹwhe tọn hùn e mọdọ emi dona basi nudide de. Be e na zindonukọn nado nọ joawuna ojlo agbasalan tọn etọn wẹ ya kavi e na ze ede jo na Jehovah? E gbọn nuyọnẹn dali de nado sẹ̀n Jiwheyẹwhe dile etlẹ yindọ e vẹawuna ẹn nado jo azọ̀-nùnù do. Numọtolanmẹ tẹwẹ e tindo to whenue e duto aṣa etọn ji? “N’mọdọ n’jẹ mẹdekannu bo gọ́ na ayajẹ,” wẹ e dọ to godo mẹ.
9 Jay plọn sọn numimọ mẹ dọ mẹdekannujẹ aihọn tọn he nọ na dotẹnmẹ gbẹtọ lẹ nado ‘ze ayiha do agbasalan ji’ nọ hẹnmẹ zun afanumẹ, to whenue mẹdekannujẹ Jehovah tọn he zẹẹmẹdo “ayiha zizedo gbigbọ ji” nọ hẹnmẹ jẹ mẹdekannu bo nọ dekọtọn do “ogbẹ̀ po jijọho po” mẹ. (Lom. 8:5, 6) Fie wẹ Jay mọ huhlọn te nado duto aṣa he nọ hẹnmẹ yin afanumẹ etọn ji? E ma wá sọn ewọ lọsu dè gba; ṣigba sọn Jiwheyẹwhe dè. “N’nọ plọn Biblu to gbesisọ mẹ, bo nọ biọ gbigbọ wiwe to odẹ̀ mẹ bosọ nọ dín alọgọ owanyinọ he agun Klistiani tọn nọ na mi sọn ojlo mẹ wá,” wẹ e dọ. Awuwledainanu enẹlẹ sọgan gọalọna mímẹpo to vivẹnudido mítọn nado tindo mẹdekannujẹ nujọnu tọn mẹ. Gbọnna?
ZÍN NUKUN DO OHÓ JIWHEYẸWHE TỌN MẸ
10. Etẹwẹ e zẹẹmẹdo nado “zín nukun” do osẹ́n Jiwheyẹwhe tọn mẹ?
10 Apadewhe Jakọbu 1:25 tọn hia dọmọ: “Ewọ he zín nukun do osẹ́n pipé he yin mẹdekannujẹ tọn lọ mẹ bo zindonukọn to e mẹ . . . na yin ayajẹnọ to bibasi i mẹ.” Hogbe Glẹki dowhenu tọn he yin lilẹdo “zín nukun do” zẹẹmẹdo “nado dẹ́ bo pọ́n nude mẹ,” ehe nọ biọ vivẹnudido vẹkuvẹku. Enẹwutu, eyin mí jlo dọ osẹ́n mẹdekannujẹ tọn lọ ni yinuwado ayiha po ahun mítọn po ji, mí dona dovivẹnu nado nọ plọn Biblu po sọwhiwhe po bo nọ lẹnayihamẹpọn do nuhe mí hia lẹ ji to odẹ̀ mẹ.—1 Tim. 4:15.
11, 12. (a) Nawẹ Jesu zinnudo nuhudo lọ nado hẹn nugbo lọ zun mítọn ji gbọn? (b) Owù tẹwẹ mí dona dapana titengbe eyin mí yin jọja?
11 To ojlẹ dopolọ mẹ mí dona “zindonukọn” kavi doakọnnanu dile mí to Ohó Jiwheyẹwhe tọn yí do yizan mẹ bo gbọnmọ dali hẹn nugbo lọ zun mítọn. Jesu donù linlẹn enẹ go to whenuena e dọna mẹdelẹ he tindo yise to ewọ mẹ dọmọ: “Eyin mì gbọṣi ohó ṣie mẹ, be devi ṣie wẹ mì yin nugbonugbo, mìwlẹ nasọ yọ́n nugbo lọ, nugbo lọ nasọ hẹn mì jẹ mẹdekannu.” (Joh. 8:31, 32) Owe alọdlẹndonu tọn de dọ dọ hogbe lọ nado “yọ́n” tofi sọ zẹẹmẹdo nado do pinpẹn-nutọn-yinyọnẹn hia, na “nuhe mẹlọ ‘yọnẹn’ yin nuhọakuẹ kavi nujọnu na ẹn wutu.” Enẹwutu eyin mí “yọ́n” nugbo lọ to gigọ́ mẹ, mí na hẹn ẹn zun míde tọn. Gbọnmọ dali, mí sọgan dọ po gbesisọ po dọ “ohó Jiwheyẹwhe tọn” to “azọ́nwa” to mí mẹ, enẹ wẹ yindọ e to nuyiwa do gbẹtọ-yinyin mítọn ji na mí nido sọgan di Otọ́ olọn mẹ tọn mítọn to gigọ́ mẹ.—1 Tẹs. 2:13.
12 Kanse dewe dọ, ‘Be n’yọ́n nugbo lọ nugbonugbo ya? Be n’ko hẹn ẹn zun ṣie ya? Kavi be n’gbẹ́ nọ tindo ojlo sinsinyẹn to “mẹdekannujẹ” aihọn tọn delẹ mẹ wẹ ya?’ To whenue mẹmẹyọnnu he yin pinplọn whẹ́n gbọn mẹjitọ Klistiani lẹ dali de to nulẹnpọn do jọja whenu etọn ji, e wlan dọmọ: “Mẹhe whẹ́n to nugbo lọ mẹ lẹ nọ saba tindo yise to Jehovah mẹ. Ṣigba to whẹho ṣie mẹ, n’ma dovivẹnu nado yọ́n mẹhe ewọ yin. N’ma plọn nado gbẹwanna nuhe e gbẹwanna lẹ. N’ma yise pọ́n dọ nuhe n’nọ wà lẹ nọ duahunmẹna ẹn. Podọ n’ma plọn nado nọ lẹhlan ewọ dè eyin n’tin to nuhahun mẹ. N’nọ ganjẹ nukunnumọjẹnumẹ ṣie titi go, ṣigba n’wá yọnẹn todin dọ gúgú wẹ to nuwà hẹ mi, na n’ma yọ́n nudepope to ojlẹ enẹ mẹ.” Mí dopẹ́ dọ mẹmẹyọnnu lọ wá yọnẹn dọ pọndohlan emitọn ma sọgbe bo basi diọdo tangan delẹ. E tlẹ wá bẹ sinsẹ̀nzọn gbehosọnalitọ whepoponu tọn jẹeji.
GBIGBỌ WIWE SỌGAN GỌALỌNA WE NADO JẸ MẸDEKANNU
13. Nawẹ gbigbọ wiwe Jiwheyẹwhe tọn nọ gọalọna mí nado jẹ mẹdekannu gbọn?
13 To 2 Kọlintinu lẹ 3:17 mẹ mí hia dọmọ: “Fie gbigbọ Jehovah tọn te, mẹdekannujẹ nọ tin to finẹ.” Nawẹ gbigbọ wiwe nọ gọalọna mí nado jẹ mẹdekannu gbọn? To yidogọ mẹ na nudevo lẹ, e nọ gọalọna mí nado wleawuna jẹhẹnu he yin dandan nado jẹ mẹdekannu lẹ—enẹ wẹ “owanyi, ayajẹ, jijọho, linsinsinyẹn, homẹdagbe, dagbewà, yise, walọmimiọn, mawazẹjlẹgo.” (Gal. 5:22, 23) Matin jẹhẹnu enẹlẹ, titengbe owanyi, gbẹtọvi lẹ ma sọgan tindo mẹdekannujẹ nujọnu tọn, podọ ninọmẹ he mẹ aihọn lọ te to egbehe do nugbo ehe hia. E jẹna ayidego dọ to whenue apọsteli Paulu slẹ adà sinsẹ́n gbigbọ tọn lẹ godo, e yidogọ dọmọ: “Osẹ́n depope ma tin he jẹagọdo onú mọnkọtọn lẹ.” Etẹ na dọ wẹ e te? Osẹ́n depope ma sọgan yinuwa do sinsẹ́n gbigbọ Jiwheyẹwhe tọn ji bo na glọnalina ẹn ma nado whẹ́n to gbẹzan mítọn mẹ. (Gal. 5:18) To popolẹpo mẹ, etẹwẹ na yin lẹndai osẹ́n enẹ tọn? Ojlo Jehovah tọn wẹ yindọ mí ni to awuwlena jẹhẹnu Klisti tọn nkọ lẹ zọnmii bo nọ do yé hia matin aliglọnnamẹnu depope.
14. Aliho tẹlẹ mẹ wẹ gbigbọ aihọn tọn nọ hẹn mẹhe joawuna ẹn lẹ zun afanumẹ te?
14 Mẹhe gbigbọ aihọn tọn nọ deanana podọ mẹhe nọ hẹn pekọ wá na ojlo agbasalan tọn yetọn lẹ sọgan lẹndọ yé to yedekannu. (Hia 2 Pita 2:18, 19.) Ṣigba, yé ma yọnẹn dọ afanumẹ wẹ yé yin na taun tọn. Osẹ́n po gbedide madosọha lẹ po wẹ ko yin zizedai nado dekanpona ojlo po walọyizan ylankan yetọn lẹ po. Paulu dọmọ: “Osẹ́n yin didoai, e ma yin na dodonọ lẹ gba, ṣigba na sẹ́nhẹngbatọ lẹ po tasinyẹntọ lẹ po.” (1 Tim. 1:9, 10) Yé sọ yin afanumẹ ylando tọn ga, bo nọ yin whinwhàn nado wà “nuhe yin ojlo agbasalan” tọn lẹ, ehe yin ogán ylankan de. (Efe. 2:1-3) To aliho de mẹ, omẹ mọnkọtọn lẹ taidi supọ̀ he nọ yin dindọn vudevude biọ panu owín tọn mẹ. Yé nọ yin whinwhàn gbọn ojlo yetọn dali bo nọ wá mọ yede to omọ̀ mẹ.—Jak. 1:14, 15.
MỌ MẸDEKANNUJẸ TO AGUN KLISTIANI TỌN MẸ
15, 16. Ale tẹlẹ wẹ gbẹdido hẹ agun lọ ko hẹn wá na mí, podọ mẹdekannujẹ tẹwẹ mí nọ duvivi etọn?
15 To whenue hiẹ lẹzun hagbẹ agun Klistiani tọn, a ma doalọwemẹ nado yin dopo to hagbẹ etọn lẹ mẹ. Kakatimọ, a wá agun lọ mẹ na Jehovah dọ̀n we wutu. (Joh. 6:44) Etẹwẹ whàn ẹn nado wàmọ? Be e mọdọ a yin dodonọ he nọ dibusi Jiwheyẹwhe wẹ ya? “Paali!” wẹ a sọgan dọ. To whelọnu lo, etẹwẹ Jiwheyẹwhe mọ? E mọ ahun he na kẹalọyi osẹ́n po anademẹ owanyinọ etọn lẹ po. To agun lọ mẹ, Jehovah ko plọn we gbọn núdùdù nina we to gbigbọ-liho dali. E ko hẹn we jẹ mẹdekannu sọn sinsẹ̀n-nuplọnmẹ lalo po otangblo lẹ po si bosọ to pinplọn we lehe a na wleawuna gbẹtọ-yinyin Klisti tọn nkọ do. (Hia Efesunu lẹ 4:22-24.) Gbọnmọ dali, hiẹ tindo lẹblanulọkẹyi nado tin to pipli gbẹtọ lẹ tọn dopo gee he sọgan yin yiylọ po gbesisọ po dọ “mẹhe to yedekannu” to aihọn lọ mẹ lẹ mẹ.—Jak. 2:12.
16 Lẹnnupọndo ehe ji: Eyin hiẹ tin to pọmẹ hẹ mẹhe yiwanna Jehovah po ahun dopo po lẹ, be obu nọ di we wẹ ya? Be a nọ to adusi po amiyọn po pọ́n gbọzangbọzan wẹ ya? Eyin hiẹ to hodọdopọ hẹ mẹmẹsunnu po mẹmẹyọnnu lẹ po to Plitẹnhọ Ahọluduta tọn mẹ, be a nọ to nutindo towe lẹ ṣọ́ na mẹde nikaa fìn yé wẹ ya? Lala! Kakatimọ, a nọ voawu. Be hiẹ na tindo numọtolanmẹ dopolọ to mẹdevo lẹ ṣẹnṣẹn to fidevo ya? Paali! Ṣigba, mẹdekannujẹ he hiẹ nọ duvivi etọn to omẹ Jiwheyẹwhe tọn lẹ ṣẹnṣẹn todin yin dohia mẹdekannujẹ he a na tindo to sọgodo tọn.
“MẸDEKANNUJẸ GIGONỌ HE YIN OVI JIWHEYẸWHE TỌN LẸ TỌN”
17. Nawẹ mẹdekannujẹ gbẹtọvi lẹ tọn gando “awusọhia visunnu Jiwheyẹwhe tọn lẹ tọn” go gbọn?
17 To whenue Paulu to hodọdo mẹdekannujẹ he Jehovah tindo to sẹdotẹnmẹ na devizọnwatọ aigba ji tọn etọn lẹ ji, e wlan dọmọ: “Nukundido vẹkuvẹku nudida tọn to tenọpọn awusọhia visunnu Jiwheyẹwhe tọn lẹ tọn.” Enẹgodo, e yidogọ dọmọ: “Nudida lọsu na ede [na] yin hinhẹn jẹ mẹdekannu sọn afanumẹ-yinyin na gbigble mẹ bo tindo mẹdekannujẹ gigonọ he yin ovi Jiwheyẹwhe tọn lẹ tọn.” (Lom. 8:19-21) “Nudida” he yin nùdego tofi nọtena gbẹtọvi lẹ he tindo todido nado nọgbẹ̀ to aigba ji bo na mọaleyi sọn “awusọhia” visunnu yí gbigbọ do de Jiwheyẹwhe tọn lẹ tọn mẹ. Awusọhia enẹ na bẹjẹeji to whenue “visunnu” ehelẹ na gọalọna Klisti to olọn mẹ nado và mẹylankan lẹpo sudo sọn aigba ji bosọ whlẹn “gbẹtọ susugege de” nado luntọ́n biọ titonu yọyọ lọ mẹ.—Osọ. 7:9, 14.
18. Nawẹ gbẹtọvi tonusetọ lẹ na yin hinhẹn jẹ mẹdekannu vudevude gbọn, podọ mẹdekannujẹ tẹwẹ yé na duvivi etọn to godo mẹ?
18 To whenẹnu, gbẹtọvi he na yin fifligọ lẹ na duvivi mẹdekannujẹ vonọtaun de tọn, enẹ wẹ mẹdekannujẹ sọn nuyiwadomẹji Satani po aovi etọn lẹ po tọn si. (Osọ. 20:1-3) Kọgbọ nankọ die enẹ na yin! Enẹgodo, ahọlu po yẹwhenọ hatọ Klisti tọn 144 000 lẹ po na zindonukọn to gbẹtọvi lẹ hinhẹn jẹ mẹdekannu mẹ gbọn ale avọ́sinsan Ofligọ lọ tọn yiyizan vudevude do ota yetọn mẹ kakajẹ whenue ylando Adam tọn po mape po na ko yin didesẹ mlẹnmlẹn dali. (Osọ. 5:9, 10) To godo mẹ, yise gbẹtọvi lẹ tọn na yin whiwhlepọn bọ nugbonọ lẹ na tindo mẹdekannujẹ pipé he yin lẹndai Jehovah tọn na yé—yèdọ “mẹdekannujẹ gigonọ he yin ovi Jiwheyẹwhe tọn lẹ tọn.” Yí nukun homẹ tọn do pọ́n! Hiẹ ma nasọ nọ dovivẹnu whẹpo do wà nuhe sọgbe to nukun Jiwheyẹwhe tọn mẹ ba, na agbasa towe blebu na ko yin hinhẹn zun pipé bọ gbẹtọ-yinyin towe na ko diọ mlẹnmlẹn taidi Jiwheyẹwhe tọn nkọ.
19. To egbehe, etẹwẹ mí dona to wiwà nado gbọṣi aliho he nọ planmẹ yì mẹdekannujẹ nujọnu tọn kọ̀n lọ ji?
19 Be hiẹ to jejeji nado mọ “mẹdekannujẹ gigonọ he yin ovi Jiwheyẹwhe tọn lẹ tọn” ya? Eyin mọ wẹ, dike “osẹ́n pipé he yin mẹdekannujẹ tọn lọ” ni nọ yinuwado ayiha po ahun towe po ji zọnmii. Nọ yí sọwhiwhe do plọn Owe-wiwe lẹ. Nọ nọgbẹ̀ sọgbe hẹ nugbo lọ bo hẹn ẹn zun towe. Nọ biọ gbigbọ wiwe to odẹ̀ mẹ. Nọ mọaleyi to gigọ́ mẹ sọn agun Klistiani tọn po núdùdù gbigbọmẹ tọn he Jehovah nọ wleawuna lẹ po mẹ. Ma dike Satani ni klọ́ we dile e klọ́ Evi nado lẹndọ nubiọtomẹsi Jiwheyẹwhe tọn lẹ sinyẹn zẹjlẹgo do blo. Matin ayihaawe, Lẹgba yọnnuin taun. Ṣigba dile mí na mọ to hosọ he bọdego mẹ do, mí ma dona dike ‘alọ Satani tọn ni jẹ mí go, na mí ma to wunvi mẹ gando yanwle etọn lẹ go.’—2 Kọl. 2:11.
[Yẹdide to weda 9]
Be n’gbẹ́ nọ tindo ojlo sinsinyẹn to “mẹdekannujẹ” aihọn tọn delẹ mẹ wẹ ya?
[Yẹdide to weda 9]
Be n’ko hẹn nugbo lọ zun ṣie ya?