10, 11. (a) Todido tẹwẹ yin zizedonukọnna lẹngbọ devo lẹ? (b) Nawẹ Klisti hẹn ẹn yọnbasi na gbẹtọvi lẹ nado tindo todido gbọn podọ nawẹ hẹndi todido aigba ji tọn tindo kanṣiṣa hẹ “awusọhia visunnu Jiwheyẹwhe tọn lẹ tọn” gbọn?

¹⁰ Apọsteli Paulu wlanwe hlan “visunnu Jiwheyẹwhe tọn” he yin dide gbọn gbigbọ dali lẹ gando todido gigonọ yetọn nado yin “gudutọgbẹ́” Klisti tọn lẹ go. Enẹgodo, e donù todido jiawu he Jehovah zedonukọnna gbẹtọ susugege lẹngbọ devo lẹ tọn go dọmọ: “Nukundido vẹkuvẹku nudida [he yin gbẹtọvi lẹ] tọn to tenọpọn awusọhia visunnu Jiwheyẹwhe tọn lẹ [mẹyiamisisadode lẹ] tọn. Na nudida yin hinhẹn zun mẹmẹglọ na ovọ́, e ma yin sọn ojlo etọn titi mẹ, ṣigba gbọn ewọ he hẹn ẹn zun mẹmẹglọ gblamẹ, to dodonu todido tọn ji na nudida lọsu na ede nido yin hinhẹn jẹ mẹdekannu sọn afanumẹ-yinyin na gbigble mẹ bo tindo mẹdekannujẹ gigonọ he yin ovi Jiwheyẹwhe tọn lẹ tọn.”—Lom. 8:14-21.

12. Ale jiawu tẹlẹ wẹ awusọhia mẹyiamisisadode lẹ tọn na hẹnwa na gbẹtọvi lẹ?

¹² Kọgbọ nankọ die “nudida” he yin gbẹtọvi lẹ na mọ to Gandudu Owhe Fọtọ́n Klisti tọn whenu! To whenẹnu, “visunnu Jiwheyẹwhe tọn” he ko yin yẹyidogona lẹ na ‘sọawuhia’ whladopo dogọ to whenue yé na sẹ̀n taidi yẹwhenọ lẹ hẹ Klisti bo na gọalọna gbẹtọvi lẹ nado mọaleyi sọn avọ́sinsan ofligọ etọn tọn mẹ. Taidi mẹjidugando Ahọluduta olọn tọn lẹ tọn, gbẹtọvi lẹ na jẹ tundote mọyi ji sọn nuyiwadomẹji ylando po okú po tọn si. Vudevude, gbẹtọvi tonusetọ lẹ na “yin hinhẹn jẹ mẹdekannu sọn afanumẹ-yinyin na gbigble mẹ.” Eyin yé gbọṣi nugbonọ-yinyin mẹ na Jehovah to owhe fọtọ́n lọ whenu podọ to mẹtẹnpọn godo tọn he na wá aimẹ to vivọnu owhe fọtọ́n lọ tọn mẹ, yinkọ yetọn na yin kinkan do “owe-hihá ogbẹ̀ tọn lọ” mẹ kakadoi. Yé na biọ “mẹdekannujẹ gigonọ he yin ovi Jiwheyẹwhe tọn lẹ tọn” mẹ. (Osọ. 20:7, 8, 11, 12) Todido gigonọ de wẹ ehe yin nugbonugbo!