14. Nawẹ mí sọgan mọ hogbe he mí na yí do miọnhomẹna mẹhe to aluẹmẹ lẹ gbọn?

¹⁴ Enẹwutu, e sọgan vẹawu nado yọ́n nuhe mí na dọna mẹhe to awubla sinsinyẹn mẹ de. Etomọṣo, Biblu dọ dọ “odẹ́ nuyọnẹntọ tọn nọ hẹnazọ̀ngbọ.” (Howh. 12:18) Mẹsusu ko mọ linlẹn homẹmiọnnamẹ tọn delẹ he yé sọgan má hẹ mẹdevo lẹ sọn alọnuwe lọ Whenuena Mẹhe Hiẹ Yiwanna de Kú mẹ.c Ṣigba, to paa mẹ, nudagbe hugan he hiẹ sọgan wà nado gọalọ wẹ nado “nọ viavi hẹ mẹhe to avivi lẹ.” (Lom. 12:15) Gaby, mẹhe asu kú do, yigbe dọmọ: “Dasin wá lẹzun nuhe n’do nọ dọ nuhe to ahun ji na mi lẹ tọ́n. Enẹ wẹ zọ́n bọ n’nọ mọ homẹmimiọn yí jẹ obá de mẹ eyin họntọn lẹ wá viavi hẹ mi. To ojlẹ enẹ mẹ, n’nọ mọdọ n’ma tin to dee ṣo to awubla ṣie mẹ.”

20. Naegbọn opagbe Jehovah tọn lẹ do yin asisa homẹmiọnnamẹ tọn daho de?

²⁰ Lehe e yin homẹmiọnnamẹnu do sọ nado yọnẹn dọ Jehovah, Jiwheyẹwhe homẹmimiọn lẹpo tọn na de awubla lẹpo sẹ̀ bo na miọnhomẹnamẹ mlẹnmlẹn to whenue “mẹhe to yọdò oflin tọn lẹ mẹ lẹpo na sè ogbè [Klisti tọn] bo tọ́njẹgbonu”! (Joh. 5:28, 29) Jiwheyẹwhe dopagbe dọ “[emi] na de okú sẹ̀ kakadoi, Oklunọ Nupojipetọ Jehovah na súnsún dasin sẹ̀ sọn nukun lẹpo mẹ.” (Isa. 25:8, Odò.) To whenẹnu, kakati nado “nọ viavi hẹ mẹhe to avivi lẹ,” mẹhe na nọ aigba ji lẹpo na “nọ jaya hẹ mẹhe to ayajẹ lẹ.”—Lom. 12:15.