Ofligọ lọ Ze Dodowiwa Jiwheyẹwhe Tọn Daga

TO ATẸṢIṢI Adam po Evi po tọn godo, Jehovah do lẹndai etọn hia nado wleawuna Okún de he afọgbẹn etọn na yin sisó. (Gẹnẹsisi 3:15) Ehe mọ hẹndi yí to whenuena kẹntọ Jiwheyẹwhe tọn lẹ hù Jesu Klisti to yatin ji. (Galatianu lẹ 3:13, 16) Jesu ma tindo ylando depope, na yọnnu alọji de wẹ mọhò etọn to azọ́njiawu-liho gbọn huhlọn gbigbọ wiwe tọn gblamẹ. Enẹwutu, hùnsọndai etọn sọgan yin yiyizan taidi mẹflikuẹ nado tún gbẹtọvi he dugu ylando po okú po tọn sọn Adam si lẹ dote.—Lomunu lẹ 5:12,  9.

Nudepope ma sọgan glọnalina Jehovah, Jiwheyẹwhe ganhunupotọ lọ nado hẹn lẹndai etọn lẹ di gba. Enẹwutu, to whenuena gbẹtọ jai jẹ ylando mẹ godo, mẹflikuẹ lọ tin taidi nuhe ko yin súsú dote to nukun Jehovah tọn mẹ bọ ewọ sọgan yinuwa hẹ mẹhe yí yise zan to hẹndi opagbe etọn lẹ tọn mẹ lẹ. Ehe hẹn ovivi ylandonọ Adam tọn lẹ, taidi Enọku, Noa, po Ablaham po penugo nado zinzọnlin bo jihọntọn hẹ Jiwheyẹwhe, ṣogan bo ma hẹn wiwe-yinyin etọn tindo oblọ.—Gẹnẹsisi 5:24; 6:9; Jakobu 2:23.

Delẹ to mẹhe yí Jehovah sè lẹ mẹ wà ylando sinsinyẹn lẹ. Dopo to yé mẹ wẹ Ahọlu Davidi. Hiẹ sọgan kanse dọ, ‘Nawẹ Jehovah sọgan zindonukọn nado nọ dona Ahọlu Davidi gbọn to whenuena Davidi ko deayọ hẹ Bati-ṣeba bosọ hù asu etọn Ulia pó godo?’ Whẹwhinwhẹ́n tangan dopo wẹ yin lẹnvọjọ nujọnu tọn po yise he Davidi dohia po. (2 Samuẹli 11:1-17; 12:1-14) To dodonu avọ́sinsan sọgodo Jesu Klisti tọn ji, Jiwheyẹwhe sọgan jona Davidi he lẹnvọjọ bo na gbẹsọ hẹn whẹdida dodo po dodowiwa Etọn po go. (Psalm 32:1, 2) Nado dekunnu ehe tọn, Biblu do onú titengbe hugan he ofligọ Jesu tọn wadotana hia, yèdọ “nado lá dodo [Jiwheyẹwhe tọn] na jijo ylando hoho [he yè wà wayi] lẹ” podọ “ojlẹ ehe mẹ” tọn lẹ do wutu.—Lomunu lẹ 3:25, 26.

Mọwẹ, gbẹtọvi nọ mọ ale susu yí sọn nuhọakuẹ-yinyin ohùn Jesu tọn mẹ. To dodonu ofligọ lọ tọn ji, ylandonọ he lẹnvọjọ lẹ sọgan duvivi haṣinṣan pẹkipẹki de tọn hẹ Jiwheyẹwhe. Gbọnvona enẹ, ofligọ lọ hùn dotẹnmẹ dote na oṣiọ lẹ nado yin finfọnsọnku biọ aihọn yọyọ Jiwheyẹwhe tọn mẹ. Enẹ na bẹ devizọnwatọ nugbonọ Jiwheyẹwhe tọn he kú whẹpo Jesu do sú ofligọ lọ po mẹsusu he tlẹ kú to wunvi mẹ bo ma sẹ̀n Ẹn lẹ po hẹn. Biblu dọmọ: “Fọnsọnku dodonọ lẹ tọn, po mawadodonọ lẹ po tọn de na tin.” (Owalọ lẹ 24:15) To ojlẹ enẹ mẹ, to dodonu ofligọ lọ tọn ji, Jehovah na na ogbẹ̀ madopodo hlan gbẹtọvi tonusetọ lẹpo. (Johanu 3:36) Jesu lọsu basi zẹẹmẹ dọmọ: ‘Jiwheyẹwhe yiwanna aihọn sọmọ bọ e yí ovi detọ́n etọn dopo akàn namẹ, na mẹdepope he yí ì sè ma nado dọ̀n, ṣigba e nido tindo ogbẹ̀ madopodo.’ (Johanu 3:16) Gbẹtọvi lẹ na mọ ale ehe lẹpo yí na awuwledainanu Jiwheyẹwhe tọn heyin avọ́sinsan ofligọ tọn lọ wutu.

Ṣigba, adà jiawu hugan ofligọ lọ tọn ma yin ale he mí nọ mọyi sọn e mẹ lẹ gba. Nuhe ofligọ Klisti tọn wà na yinkọ Jehovah tọn sọ yin nujọnu hugan. E do Jehovah hia taidi Jiwheyẹwhe whẹdida dodo tọn he sọgan yinuwa hẹ gbẹtọvi ylandonọ lẹ bo na gbẹsọ gbọṣi wiwe-yinyin mẹ. Eyin Jiwheyẹwhe ma ko basi tito ofligọ lọ tọn dai wẹ, kúnkan Adam tọn depope, etlẹ yin Enọku, Noa po Ablaham po lọsu, ma na ko penugo nado zinzọnlin hẹ Jehovah kavi yin họntọn etọn. Psalm-kantọ lọ mọnukunnujẹ ehe mẹ bo wlan dọmọ: “[Jehovah] E, mẹnu wẹ sọgan ṣite, eyin hiẹ OKLUNỌ na payiha ylando go?” (Psalm 130:3) Lehe mí dona dopẹ́ na Jehovah na Ovi yiwanna etọn he e dohlan aigba ji podọ na Jesu he desọn ojlo mẹ bo ze ogbẹ̀ etọn jo taidi ofligọ de do ota mítọn mẹ do sọ!—Malku 10:45.