Whetẹnu Wẹ Yọnnu Klistiani Dona Ṣinyọnnudo Ota Podọ Etẹwutu?

Whetẹnu wẹ yọnnu Klistiani de dona ṣinyọnnudo ota to kọndopọ mẹ hẹ sinsẹ̀n-bibasi etọn podọ etẹwutu? Mì gbọ mí ni lẹnnupọndo nuhe apọsteli Paulu yin gbigbọdo nado dọ do whẹho ehe ji. E wleawuna anademẹ he mí dona hodo nado sọgan basi nudide dagbe he nọ gbògbéna Jiwheyẹwhe lẹ. (1 Kọlintinu lẹ 11:3-16) Paulu do onú titengbe atọ̀n he dona yin nulẹnpọndeji hia: (1) nuwiwa he biọ dọ yọnnu ni ṣinyọnnudo ota lẹ, (2) ninọmẹ he mẹ e dona wàmọ te lẹ, podọ (3) whẹwhinwhẹ́n he wutu e dona hodo nujinọtedo ehe lẹ.

Nuwiwa lọ lẹ. Paulu donù nuwiwa awe go: dẹ̀hiho po dọdai didọ po. (Wefọ 4, 5) Na nugbo tọn, odẹ̀ yin hodọdopọ sisi tọn hẹ Jehovah. To egbehe, dọdai didọ na bẹ nudepope he sinai do Biblu ji he Klistiani lizọnyizọnwatọ de to pinplọnmẹ hẹn. Ṣigba, be nuhe dọ Paulu te wẹ yindọ yọnnu dona nọ ṣinyọnnudo ota to whedepopenu he e to dẹ̀ho kavi to nugbo Biblu tọn plọnmẹ ya? Lala. Ninọmẹ he mẹ yọnnu de hodẹ̀ kavi plọnmẹ te wẹ na magbe etọn.

Ninọmẹ lọ lẹ. Paulu donù ninọmẹ kavi lẹdo nuwiwa tọn awe go—enẹ wẹ whẹndo po agun po. E dọmọ: “Sunnu wẹ ota yọnnu tọn . . . yọnnusi depope he to dẹ̀ho kavi to didọdai to ma ṣinyọnnu ota etọn mẹ, e de yẹyi sọn ota etọn go.” (Wefọ 3, 5) To whẹndo mẹ, asu yọnnu lọ tọn wẹ Jehovah de taidi tatọ́ etọn. Eyin e ma do sisi he jẹ hia aṣẹpipa asu etọn tọn, e na de yẹyi sọn asu etọn go eyin e nọ penukundo azọngban he Jehovah dena asu etọn go. Di apajlẹ, eyin e lẹzun dandan dọ yọnnu lọ ni deanana plọnmẹ Biblu de to whenuena asu etọn tin to otẹn lọ mẹ kavi to yakẹ, e na do sisi hia aṣẹpipa asu etọn tọn gbọn nuṣinṣinyọndo ota dali. Yọnnu lọ na wàmọ vlavo asu etọn ko yí baptẹm kavi lala, to whenuena e yindọ sunnu lọ wẹ yin tatọ́ whẹndo lọ tọn.a Eyin e sọ lẹzun dandan dọ yọnnu lọ ni hodẹ̀ kavi plọnmẹ to whenuena visunnu pẹvi etọn he ko yí baptẹm tin to otẹn lọ mẹ kavi to yakẹ, e nasọ ṣinyọnnudo ota ga, e ma yin na visunnu lọ yin tatọ́ whẹndo lọ tọn wutu wẹ gba, ṣigba na aṣẹpipa he yin nina sunnu hagbẹ agun Klistiani tọn he ko yí baptẹm lẹ wutu.

Paulu donù ninọmẹ agun tọn go bo dọmọ: “Eyin mẹde sọawuhia nado yin aklọndintọ, míwlẹ ma tindo walọ mọtọnnkọ gba, kavi agun Jiwheyẹwhe tọn lẹ.” (Wefọ 16) To agun Klistiani tọn mẹ, sunnu he ko yí baptẹm lẹ wẹ otẹn tatọ́ tọn yin nina. (1 Timoti 2:11-14; Heblu lẹ 13:17) Sunnu lẹ kẹdẹ wẹ nọ yin dide taidi mẹho kavi devizọnwatọ lizọnyizọnwiwa tọn po azọ́n he Jiwheyẹwhe dena yé po nado penukundo lẹngbọpa Jiwheyẹwhe tọn go. (Owalọ lẹ 20:28) Ṣigba to whedelẹnu, ninọmẹ delẹ sọgan biọ dọ yọnnu Klistiani de ni penukundo azọ́ndenamẹ he dona yin hinhẹndi gbọn sunnu nugopetọ he yí baptẹm de dali go. Di dohia, e sọgan biọ dọ yọnnu lọ ni deanana dope sinsẹ̀nzọn kunnudegbe tọn na sunnu nugopetọ he ko yí baptẹm de ma tin-to-aimẹ kavi tin to finẹ wutu. Kavi yọnnu lọ sọgan deanana plọnmẹ Biblu he ko yin tito-basina jẹnukọn de to whenuena sunnu he ko yí baptẹm de tin to otẹn lọ mẹ kavi to yakẹ. To whenuena e yindọ sinsẹ̀nzọn mọnkọtọn lẹ yin apadewhe nuwiwa agun Klistiani tọn, yọnnu lọ dona ṣinyọnnudo ota nado dohia dọ ewọ to azọ́n he sunnu dona wà hẹndi.

To alọ devo mẹ, adà sinsẹ̀n-bibasi tọn mítọn susu ma nọ biọ dọ yọnnu ni ṣinyọnnudo ota. Di apajlẹ, e ma to dandannu glọ nado wàmọ to whenuena e to gblọndo na to opli Klistiani tọn lẹ ji, to kunnude hẹ asu etọn kavi sunnu he ko yí baptẹm devo, kavi to nuplọn kavi to dẹ̀ho hẹ ovi pẹvi etọn he ma ko yí baptẹm lẹ to whenuena asu etọn ma tin to otẹn lọ mẹ kavi to yakẹ. Nugbo wẹ dọ kanbiọ devo lẹ sọgan fọndote gando whẹho ehe go, podọ eyin mẹmẹyọnnu de ma yọ́n nuhe e dona wà, e sọgan basi dodinnanu dogọ.b Eyin e gbẹ́ to ayihaawe tindo janwẹ podọ eyin ayihadawhẹnamẹnu etọn whàn ẹn nado wàmọ, e ma na ylan eyin e ṣinyọnnudo ota.

Whẹwhinwhẹ́n lọ lẹ. To wefọ 10tọ mẹ, mí mọ whẹwhinwhẹ́n awe he wutu yọnnu Klistiani de na jlo nado ṣinyọnnudo ota dọmọ: “E jẹna yọnnu nado tindo huhlọn [kavi ohia aṣẹpipa tọn] to ota etọn ji na angẹli lẹ tọn wutu.” Tintan whẹ́, doayi hogbe lọ lẹ, ‘ohia aṣẹpipa tọn’ go. Nuṣinṣinyọndo ota yin aliho dopo na yọnnu nado dohia dọ ewọ kẹalọyi aṣẹpipa he Jehovah zedo alọmẹ na sunnu he ko yí baptẹm to agun mẹ lẹ. Enẹwutu, yọnnu lọ nọ do owanyi po nugbonọ-yinyin etọn po hia Jehovah Jiwheyẹwhe. Whẹwhinwhẹ́n awetọ yin mimọ to hogbe lọ lẹ “na angẹli lẹ tọn wutu” mẹ. Nawẹ yọnnu de nọ yinuwado nudida gbigbọnọ huhlọnnọ enẹlẹ ji gbọn to whenuena e ṣinyọnnudo ota?

Homẹ nọ hùn angẹli lẹ nado mọdọ aṣẹpipa Jiwheyẹwhe tọn nọ yin sisi na to titobasinanu Jehovah tọn blebu mẹ, yèdọ adà olọn mẹ tọn po aigba ji tọn po. Yé sọ nọ mọaleyi sọn apajlẹ gbẹtọvi mapenọ lẹ tọn mẹ to whẹho ehe mẹ. To popolẹpo mẹ, yelọsu dona litaina tito Jehovah tọn—yèdọ mẹtẹnpọn de he ze angẹli susu jai to hohowhenu. (Juda 6) Todin, angẹli lẹ sọgan mọ ninọmẹ susu, to ehe mẹ yọnnu Klistiani de na tindo numimọ, oyọnẹn po nuyọnẹn po taun hú sunnu he ko yí baptẹm de to agun mẹ; ṣogan e nọ litaina aṣẹpipa sunnu lọ tọn sọn ojlo mẹ wá. To ninọmẹ delẹ mẹ, yọnnu lọ nọ yin Klistiani yiamisisadode he na wá lẹzun dopo to whédutọgbẹ́ Klisti tọn lẹ mẹ. To godo mẹ, yọnnu mọnkọtọn na wadevizọn to otẹn de mẹ he yiaga hú angẹli lẹ tọn bo dugán hẹ Klisti to olọn mẹ. Apajlẹ dagbe nankọ die ehe yin na angẹli lẹ nado mọ todin! Na nugbo tọn, lehe e yin lẹblanulọkẹyi na mẹmẹyọnnu lẹpo nado do tonusise whiwhẹ tọn hia gbọn nuyiwa nugbonọ-yinyin po taliai tọn yetọn po dali to angẹli nugbonọ livi susu lẹ nukọn do sọ!