Be Hiẹ Flin ya?

Be hiẹ ko duvivi hihia zinjẹgbonu agọe Atọ̀họ̀-Nuhihọ́ Lọ Tọn lẹ ya? Eyin mọwẹ, hiẹ na mọ ẹn yin ojlofọndotenamẹnu nado flin nuhe bọdego helẹ:

◻ Naegbọn mí sọgan tindo jide to mẹdopodopo he Jehovah de nado deanana omẹ etọn lẹ mẹ?

Na azọngban titengbe delẹ Jehovah nọ de mẹdopodopo he tindo jẹhẹnu he nuhudo tin na nado deanana omẹ etọn lẹ do aliho he ewọ jlo dọ yé ni gbọn to ojlẹ tangan de mẹ ji.—15/8, weda 14.

◻ Etẹwẹ mí sọgan plọn sọn numimọ Jona tọn mẹ?

Jona nọ lẹn edetiti tọn pọ́n zẹjlẹgo bo ma nọ lẹn mẹdevo lẹ tọn pọ́n sọmọ. Mí sọgan plọnnu sọn Jona dè gbọn mídelẹ po numọtolanmẹ mẹdetiti tọn mítọn lẹ po zize do otẹn awetọ mẹ dali.—15/8, weda 19.

◻ To aliho tẹ mẹ wẹ e sọgan yin didọ te dọ “oyín [Jehovah] tọn wẹ ohọ̀ gángán” de? (Howhinwhẹn lẹ 18:10)

Fibẹtado díndín to oyín Jiwheyẹwhe tọn mẹ zẹẹmẹdo jidide do Jehovah lọsu go. (Psalm 20:1; 122:4) E zẹẹmẹdo godoninọna nupojipetọ-yinyin etọn, alọkikẹyi osẹ́n po nunọwhinnusẹ́n etọn lẹ po, yise tintindo to opagbe etọn lẹ mẹ, po mẹdezejo mlẹnmlẹn hlan ẹn po. (Isaia 50:10; Heblu lẹ 11:6)—1/9, weda 10.

◻ Nawẹ aliho kunnudide Paulu tọn to omẹ gbóogbó lẹ nukọn wleawu apajlẹ de tọn dai na mí gbọn?

To hodidọ hlan Ahọlu Aglipa mẹ, Paulu yí wuntuntun zan, bo zinnudo nuagokun he ewọ po Aglipa po tindo linlẹn dopolọ gandego lẹ ji. Mọdopolọ, mí dona zinnudo adà pọndohlan dagbe wẹndagbe lọ tọn lẹ ji, bo zinnudo todido he mí tindo to pọmẹ lẹ ji. (1 Kọlintinu lẹ 9:22)—1/9, weda 31.

◻ Mẹnu lẹ wẹ mọaleyi sọn homẹfa Jehovah tọn mẹ?

Na homẹfa Jehovah tọn wutu, dotẹnmẹ hundote lọ to yinyin nina livi susu lẹ dogọ to egbehe nado yin whinwhlẹngan to ‘azán Jehovah’ tọn he ja lọ gblamẹ. (2 Pita 3:9-15) Homẹfa etọn sọ to dotẹnmẹ na dopodopo mítọn lẹ nado ‘to azọ́n whlẹngán mítọn tọn wà to obu po sisọsisọ po mẹ.’ (Filippinu lẹ 2:12)—15/9, weda 19-20.

◻ Nawẹ lẹdogbedevomẹ Biblu Septante tọn lọ họakuẹ sọ?

Lẹdogbedevomẹ ehe yin azọ́nwanu tangan de to oyọnẹn hinhẹn gbayipe mẹ dogbọn Jehovah Jiwheyẹwhe po Ahọluduta etọn po dali gọna Jesu Klisti taidi Ahọlu. Dogbọn Septante lọ gblamẹ, dodonu titengbe de yin didoai na Juvi he nọ dó Glẹkigbe lẹ po Kosi lẹ po to owhe kanweko tintan mẹ nado kẹalọyi wẹndagbe Ahọluduta lọ tọn.—15/9, weda 30.

◻ Etẹwẹ oló visunnu duvanọ lọ tọn plọn mí dogbọn Jiwheyẹwhe dali?

Tintan, dọ Jehovah gọ́ na “akọ́ndonanu podọ dagbewanyinọ, awuwhletọ nado sadi, podọ susunọ to lẹblanu po nugbo po mẹ.” (Eksọdusi 34:6) Awetọ, dọ e “wleawu nado jona” to whenuena diọdo ahun mẹ tọn wleawuna dodonu lọ na kandindlẹn na lẹblanu. (Psalm 86:5)—1/10, weda 12, 13.

◻ Whetẹnu wẹ ninọmẹ jijọho tọn lẹ heyin opagbe etọn do to Isaia 65:21-25 mẹ na mọ hẹndi?

Taidi sinsẹ̀n-basitọ pọmẹ Jehovah tọn lẹ to paladisi gbigbọmẹ tọn lọ mẹ to egbehe, mẹyiamisisadode lẹ po “lẹngbọ devo” lẹ po to numimọ jijọho he Jiwheyẹwhe nọ namẹ tọn tindo todin. (Johanu 10:16) Podọ jijọho mọnkọtọn na dlẹnkan biọ Paladisi agbasa tọn mẹ, to whenuena ‘ojlo Jiwheyẹwhe tọn na yin wiwà to aigba lẹpo ji, yèdọ dile e te do to olọn mẹ.’ To ojlẹ enẹ mẹ hogbe yẹwhegan Isaia tọn lẹ na mọ hẹndi to gigọ́mẹ. (Matiu 6:10)—15/10, weda 24.

◻ Naegbọn Klistiani lẹ nọ basi hùnwhẹ whemẹwhemẹ alọwle tọn lẹ ṣigba ma nọ basi jijizan tọn lẹ?

Biblu ma do alọwle hia to ninọmẹ agọ̀ mẹ gba. Whẹho mẹdetiti tọn wẹ e yin vlavo eyin Klistiani lẹ de nado payi hùnwhẹ whemẹwhemẹ alọwle de tọn go, bo lẹnnupọndo ayajẹ nujijọ enẹ tọn ji podọ do gbemima yetọn ji nado wazọ́n to pọmẹ na kọdetọn dagbe taidi asu po asi po de. Ṣigba, hùnwhẹ jijizan tọn he Biblu basi kandai etọn lẹ yin kosi lẹ kẹdẹ tọn, bo kọ̀n nujijọ ehelẹ dopọ hẹ nujijọ kanyinylan tọn lẹ.—15/10, weda 30, 31.

◻ To oló Paulu tọn he yin kinkandai to 1 Kọlintinu lẹ 3:12, 13 mẹ, etẹwẹ “miyọ́n” lọ nọtena, podọ etẹwẹ Klistiani lẹpo dona yọnẹn?

Miyọ́n de tin he mímẹpo pannukọn to gbẹ̀mẹ—yèdọ whlepọn yise mítọn tọn lẹ. (Johanu 15:20; Jakobu 1:2, 3) Mẹhe mí plọn nugbo lọ hẹ lẹpo na yin whiwhlepọn. Eyin mí plọnmẹ to aliho he ma lodo mẹ, kọdetọn awubla tọn lẹ sọgan tin, dile Paulu na avase do. (1 Kọlintinu lẹ 3:15)—1/11, weda 11.

◻ Nawẹ Noa ‘zinzọnlin hẹ Jiwheyẹwhe nugbo lọ’ gbọn? (Gẹnẹsisi 6:9)

Noa zinzọnlin hẹ Jiwheyẹwhe to enẹ mẹ dọ e wà nuhe Jiwheyẹwhe dọna ẹn nado wà. Na zize gbẹzan etọn jo na ojlo Jiwheyẹwhe tọn wiwà wutu, Noa duvivi haṣinṣan zohunhun, pẹkipẹki tọn de hẹ Jiwheyẹwhe.—15/11, weda 10.

◻ Dotẹnmẹ tẹlẹ wẹ yin hunhundotena mí to whenuena mí ma yọ́n ojlẹ taun lọ whenuena ahọsuyi Jiwheyẹwhe tọn na yin hinhẹnṣẹ do mẹylankan lẹ ji?

Ehe na mí dotẹnmẹ hundote nado dohia dọ mí yiwanna Jehovah nugbonugbo bo jlo nado zinzọnlin to aliho etọn lẹ ji kakadoi. E sọ dohia dọ mí yin nugbonọ hlan Jiwheyẹwhe bo dejido aliho he mẹ e nọ penukundo whẹho lẹ te go. Humọ, ehe nọ gọalọna mí nado hẹn mí tin to aṣeji bo tin to nukle to gbigbọmẹ. (Matiu 24:42-44)—15/11, weda 18.

◻ Etẹwẹ e zẹẹmẹdo nado tindo yise to “oyín Ovi Jiwheyẹwhe tọn tọn” mẹ? (1 Johanu 5:13)

Ehe zẹẹmẹdo tonusise na gbedide Klisti tọn lẹpo, gọna gbedide etọn nado ‘yiwanna ode awetọ.’ (Johanu 15:14, 17) Owanyi nọ dín nado wà dagbe hlan mẹdevo lẹ. E nọ de nuvẹun sinmẹ agbasa tọn, sinsẹ̀n tọn, po akọ̀ tọn lẹpo po sẹ̀.—1/12, weda 7.

◻ Naegbọn Kunnudetọ Jehovah tọn lẹ do yin ‘asisa wangbẹna tọn’? (Matiu 10:22)

Kunnudetọ Jehovah tọn lẹ ko yin wangbẹna to aliho agọ̀ mẹ na whẹwhinwhẹ́n dopolọ lẹ he wutu Klistiani fliflimẹ tọn lẹ yin homẹkẹndo. Tintan, Kunnudetọ Jehovah tọn lẹ nọ zinzọnlin gbọn nuyise sinsẹ̀n yetọn tọn ji to aliho de mẹ he ma hẹn yé diyin to mẹdelẹ dè. Awetọ, yé ko yin yanwle whẹsadokọnamẹ lalo lẹ tọn—yèdọ lalo tlọlọ lẹ po kọsislo na nuyise yetọn lẹ po.—1/12, weda 14.