• Be Azọ́n Towe Na Nọte to Miyọ́n lọ Nukọn Ya?
    Atọ̀họ̀-Nuhihọ́ lọ Tọn—1998 | novembre 1

    • 13. Etẹwẹ miyọ́n lọ to oló Paulu tọn mẹ nọtena, podọ etẹwẹ Klistiani lẹpo dona yọnẹn?

      13 Miyọ́n de tin he mímẹpo pannukọn to gbẹ̀mẹ—yèdọ whlepọn yise mítọn tọn lẹ. (Johanu 15:20; Jakobu 1:2, 3) Klistiani he tin to Kọlinti lẹ dona ko yọnẹn, kẹdẹdile míwlẹ dona ko yọnẹn to egbehe do, dọ mẹlẹpo he míwlẹ to nugbo lọ plọn na yin whiwhlepọn. Eyin mí plọnmẹ to aliho he ma sọgbe mẹ, kọdetọn awubla tọn lẹ sọgan tin. Paulu na avase dọmọ: “Eyin azọ́n omẹ de tọn he e dó do e ji nọte, ewọ na mọaleyi. Eyin azọ́n omẹ de tọn fiọ, onú na gú i: ṣigba yè na whlẹn ewlọsu gán; ganṣo di gbọn miyọ́n mẹ.”c—1 Kọlintinu lẹ 3:14, 15.

      14. (a) Nawẹ Klistiani he nọ basi devi lẹ sọgan ‘jiya nuhẹngu’ tọn gbọn, ṣogan nawẹ yé sọgan mọ whlẹngán yí gbọn miyọ́n gblamẹ do? (b) Nawẹ míwlẹ sọgan dè owù yajiji nuhẹngu tọn pò gbọn?

      14 Hogbe mẹhẹnlẹnnupọn tọn wẹ nugbonugbo! Awufiẹsa taun wẹ e nọ yin nado wazọ́n sinsinyẹn nado gọalọna mẹde nado lẹzun devi de, podọ nado wá mọ poun dọ omẹ lọ ko jogbe na whlepọn kavi homẹkẹn bọ to agọgbọnẹnmẹ jo aliho nugbo tọn lọ do. Paulu yigbe domọ to whenuena e dọ dọ mí nọ jiya nuhẹngu tọn to whẹho mọnkọtọn lẹ mẹ. Numimọ lọ sọgan yin awufiẹsa tọn sọmọ bọ whlẹngán mítọn yin zẹẹmẹ basina taidi “gbọn miyọ́n mẹ”—taidi dawe de he hẹn nulẹpo bu to miyọ́n de mẹ bọ po huhlọn po wẹ ewọ lọsu do lùn miyọ́n lọ tọ́n. Na míwlẹ tọn, nawẹ mí sọgan dè owù nuhẹngu tọn lọ pò gbọn? Gbá po azọ́nwanu he nọ dẹn-to-aimẹ lẹ po! Eyin mí plọn nuplọntọ mítọn lẹ bo biọ ahun yetọn lẹ mẹ, bo whàn yé nado yí nukun nujọnu tọn do pọ́n jẹhẹnu Klistiani tọn mọnkọtọn lẹ taidi nuyọnẹn, wuntuntun, obu Jehovah tọn, po yise nujọnu tọn po, to whenẹnu mí to gbigbá po azọ́nwanu he nọ dẹn-to-aimẹ, bọ miyọ́n ma sọgan dù lẹ po. (Psalm 19:9, 10; Howhinwhẹn lẹ 3:13-15; 1 Pita 1:6, 7) Mẹhe wleawuna jẹhẹnu ehelẹ na to ojlo Jiwheyẹwhe tọn wà zọnmii; yewlẹ tọn wẹ todido gbẹninọ kakadoi tọn. (1 Johanu 2:17) Nalete, nawẹ mí sọgan ze oló Paulu tọn do yizan mẹ gbọn? Lẹnnupọndo apajlẹ delẹ ji.

  • Be Azọ́n Towe Na Nọte to Miyọ́n lọ Nukọn Ya?
    Atọ̀họ̀-Nuhihọ́ lọ Tọn—1998 | novembre 1

    • c Paulu ma to didọ dọ whlẹngán họdotọ lọ tọn na tin to owù mẹ gba, ṣigba “azọ́n” họdotọ lọ tọn wẹ e to zizedo ayihaawe mẹ. La Bible en français courant basi lẹdogbedevomẹ wefọ ehe tọn dọmọ: “Eyin azọ́n mẹde tọn nọte, ewọ na mọ ahọsumẹ yí; eyin e fiọ, ewọ dona doakọnna nuhẹnbu lọ; ṣogan ewọ na luntọ́n po ogbẹ̀ etọn po, dile mẹde sọgan basi do sọn miyọ́n de mẹ.”