Di apajlẹ, tẹ́n ayihamẹlinlẹnpọn do ohó apọsteli Paulu tọn lẹ he yin mimọ to 2 Kọlintinu lẹ 7:1 mẹ pọ́n: “Enẹwutu, le mí tindo opagbe helẹ, mẹyiwanna vivẹ emi, mì gbọ mí ni klọ́ míde sọn dihó agbasalan po gbigbọ tọn lẹpo po mẹ, bosọ hẹn wiwe sọgbe to osi Jiwheyẹwhe tọn mẹ.” Tindo nukunnumọjẹnumẹ hogbe ehelẹ tọn. Kanse dewe, ‘Etẹwẹ yin “opagbe ehelẹ” he Paulu dlẹnalọdo lẹ na taun tọn?’ Gbọn lẹdo hodidọ lọ tọn hihia dali, hiẹ na doayi e go dọ wefọ he jẹnukọn lẹ dọmọ: “Mì tọ́n sọn ṣẹnṣẹn yetọn, bo nọ olá,” wẹ Jehovah dọ “mì gando onú mawé go blo;” “yẹn nasọ yí mì, bo na yin Otọ́ de hlan mì, mìwlẹ nasọ yin ovisunnu ṣie lẹ, podọ oviyọnnu ṣie lẹ, wẹ Oklunọ Ganhunupo dọ.”—2 Kọlintinu lẹ 6:17, 18.

Gbedide Paulu tọn nado ‘klọ́ míde sọn dihó lẹpo mẹ’ tindo huhlọn hugan todin! Taidi zodolanmẹnamẹnu huhlọnnọ de na mọwiwà, Jiwheyẹwhe dopagbe nado ‘yí mí,’ enẹ wẹ yin, ze mí do nukunpedomẹgo hihọ́ tọn etọn glọ. Hiẹ sọgan kanse dewe dọ ‘Be yẹn na duvivi haṣinṣan pẹkipẹki de tọn hẹ ewọ—taidi enẹ he yin visunnu po viyọnnu de tọn hẹ otọ́ de ya?’ Be linlẹn nado yin ‘yíyí’ kavi yin owanyina dogbọn Jiwheyẹwhe nuyọnẹntọ, owanyinọ de dali mayin nudọ̀nmẹdogo de ya? Eyin linlẹn enẹ di nuhe ma sọgan yọnbasi de na we, doayi aliho he mẹ otọ́ owanyinọ de nọ do owanyi po owanyi zogbe po hia hlan ovi etọn lẹ go gbọn. Todin lẹnnupọn do kanṣiṣa mọnkọtọn de ji he tin to aimẹ to hiẹ po Jehovah po ṣẹnṣẹn! Dile e na dẹnsọ bọ hiẹ na to ayihamẹlẹnpọn do e ji, mọwẹ ojlo na haṣinṣan mọnkọtọn na to whinwhẹ́n do.

Ṣigba doayi e go: Dindọn sẹpọ Jehovah pẹkipẹki yọnbasi kẹdẹ eyin hiẹ ‘ma gando onú mawé de go.’ Kanse dewe: ‘Be pipeve to taba zinzan mẹ matin to “onú mawé” he Jiwheyẹwhe gblewhẹdo lẹ mẹ ya? Be zinzan ẹn na yin “dihó agbasa tọn,” hùnhùn dee do nùvo na owù agbasalilo tọn lẹpo wẹ? Whenuena Jehovah yin Jiwheyẹwhe madodihonọ de, kavi “wiwe,” be ewọ na kẹalọyi hinhẹn dee kudiho sọn ojlomẹ wá to aliho ehe mẹ ya?’ (1 Pita 1:15, 16) Sọ doayi e go ga dọ Paulu na avase gando ‘dihó gbigbọmẹ tọn mẹde tọn go,’ kavi linlẹn apọnmẹ tọn. Kanse dewe: ‘Be walọyizan ehe dugán do lẹnpọn ṣie ji wẹ? Be yẹn na yì jẹ obá he siso de mẹ nado hẹn pekọ wá na nujlomẹnu ṣie lẹ, vlavo to zize agbasalilo ṣie, whẹndo ṣie, yèdọ etlẹ yin teninọ ṣie po Jiwheyẹwhe po do owù mẹ wẹ ya? Jẹ obá tẹ mẹ wẹ yẹn ko na dotẹnmẹ pipeve to taba zinzan mẹ nado hẹn gbẹzan ṣie gble jẹ?’ Pinpannukọn kanbiọ mẹhẹnjọsi tọn ehelẹ sọgan na adọgbigbo lọ we ganji nado doalọte!

Jẹnukọnna nugbo lọ pinplọn, whẹndo Lin tọn ko do atin okun betel tọn 1 300 do aigba yetọn ji. Dile etlẹ yindọ e na yí owhe 5 na atin lọ lẹ nido hẹn alè wá, to whenue yé na jẹ sinsẹ́n ji to gigọ́ mẹ, whẹndo Lin tọn sọgan donukun nado tindo 42 350 000 C.F.A. to owhe dopodopo mẹ. Dile ojlẹ jijẹ tọn tintan dọnsẹpọ, whẹndo Lin tọn dona basi nudide nujọnu tọn de. Yé ko plọn gbọn oplọn Biblu tọn yetọn dali dọ Klistiani lẹ dona klọ́ yedelẹ we “sọn dihó agbasalan po gbigbọ tọn lẹpo po mẹ” gbọn didapana yizan, kavi godoninọna, walọyizan mawé mọnkọtọn lẹ taidi taba nùnù, amasin adínọ lẹ ṣiṣizan, po okun betel tọn dùdù po dali. (2 Kọlintinu lẹ 7:1) Etẹwẹ yé na wà?

To kọgbidinamẹnu sọn tukladomẹ ayihadawhẹnamẹnu tọn mẹ, Mẹdaho Lin basi nudide nado doalọtena oplọn etọn. To ojlẹ dopolọ mẹ, Alọwlesi Lin tọn sà okun betel tọn lẹ sọn delẹ to atin he ko whẹ́n lẹ mẹ bo mọ alè hugan 1 650 000 C.F.A. Ehe yin nukundido vude poun nuhe na wá to madẹnmẹ tọn eyin yé jo atin yetọn lẹ do. Ṣigba, ayihadawhẹnamẹnu Mẹdaho Lin tọn zindonukọn nado to tukla do e.

E to vivẹnudo do whẹho lọ ji kakajẹ azán de ji e biọ to Kunnudetọ lẹdo lọ tọn lẹ si nado sán atin betel tọn etọn lẹ liai na ẹn. Kunnudetọ lọ lẹ basi zẹẹmẹ dọ nudide etọn wẹ nado basi; enẹwutu, e na ‘hẹn agban ede tọn’ bo sán atin lọ lẹ liai na ede. (Galatianu lẹ 6:4, 5) Yé na ẹn tuli nado flin opagbe lọ to 1 Kọlintinu lẹ 10:13, he dọmọ: “Owhlepọ́n de ma sa ko pla mì adavo ehe hunkọ tin ayà hlan gbẹtọ: ṣigba nugbonọ wẹ Jiwheyẹwhe, mẹhe ma na dike yè ni whle mì pọ́n hú ehe mì sọgan hẹn; ṣigba ewọ na deali de po owhlepọ́n lọ po ga nado gán, na mìwlẹ nido tin sọgan nado doakọn na ẹn.” Kunnudetọ lọ lẹ sọ lẹnnupọn hẹ ẹ ga dọmọ: “Eyin mí sán atin towe lẹ liai na we, e sọgan vẹ́ na we podọ hiẹ na gblewhẹdo mí na nuhẹnbu lọ.” To ojlẹ vude godo, nudidọ ayinyọ̀n gẹdẹ tọn fọ́n Alọwlesi Lin tọn sọn amlọn mẹ. Asu etọn po ovi lẹ po to atin betel tọn lẹ sán liai!

Mẹdaho Lin mọ dọ Jehovah yin nugbonọ hlan opagbe Etọn. E mọ azọ́n he hẹn ẹn tindo ayihadawhẹnamẹnu he họnwun de, he hẹn ẹn penugo nado lẹzun gigopana Jehovah tọ́ de. E yí baptẹm to plidopọ lẹdo Kunnudetọ Jehovah Tọn lẹ tọn to avril 1996.