“Jiwheyẹwhe Yiwanna Nunamẹtọ Homẹhunhunnọ”

JEHOVAH wẹ yin apajlẹnọ daho hugan alọtútlú tọn. Na nugbo tọn, Biblu dọ dọ ewọ wẹ yin Nunamẹtọ “nunina dagbedagbe po nunina he sọgbe lẹpo po” tọn. (Jakobu 1:17) Di apajlẹ, lẹnnupọndo nuhe Jiwheyẹwhe dá lẹ ji. E basi núdùdù he vivi lẹ, he tindo otọ́n; vounvoun he yọnwhanpẹ lẹ, e mayin dehe ma tindo sinmẹ susu lẹ gba; họyiyi owhè tọn he nọ yọnwhanpẹ taun, e mayin dehe ma nọ dọnmẹdogo gba. Mọwẹ, wunmẹ nudida Jehovah tọn lẹpo wẹ do kunnudenu owanyi po alọtútlú etọn tọn po hia. (Psalm 19:1, 2; 139:14) Humọ, Jehovah yin Nunamẹtọ homẹhunhunnọ. E nọ tindo awuvivi to dagbe wiwà do ota devizọnwatọ etọn lẹ tọn mẹ.—Psalm 84:11; 149:4.

Islaelivi lẹ yin gbedena nado do alọtútlú Jiwheyẹwhe tọn hia to nuyiwa yetọn lẹ hẹ ode awetọ mẹ. “Hiẹ ma na hẹn ayiha towe sinyẹn gba, kavi miọn alọ towe sọn nọvisunnu towe wamọnọ dè gba,” wẹ Mose dọna yé. “Hiẹ na na ẹn dandan, ayiha towe ma na yin [ogoenọ] . . . gba.” (Deutelonomi 15:7, 10) To whenuena e yindọ ahun mẹ wẹ nunamẹ nọ wá sọn, Islaelivi lẹ dona tindo awuvivi to nuyiwa alọtútlú tọn lẹ mẹ.

Klistiani lẹ lọsu yin nina tudohomẹnamẹ mọnkọtọn. Na nugbo tọn, Jesu dọ dọ ‘ayajẹ tin to nunamẹ mẹ.’ (Owalọ lẹ 20:35) Devi Jesu tọn lẹ yin apajlẹ dagbe de to nunamẹ po homẹhunhun po mẹ. Di apajlẹ, Biblu na linlin dọ to Jelusalẹm, mẹhe lẹzun yisenọ lẹ “sọ sà adọkunnu po ajọnu yetọn lẹ po, bo má yé hlan gbẹtọ lẹpo, dile omẹ dopodopo yin matindotọ do.”—Owalọ lẹ 2:44, 45.

Ṣigba Judénu alọtlútọ ehelẹ biọ ohẹn mẹ to godo mẹ. Biblu ma dọ nuhe hẹn ninọmẹ yetọn wá aimẹ na taun tọn gba. Weyọnẹntọ delẹ dọ dọ huvẹ heyin alọdlẹndo to Owalọ lẹ 11:28, 29 mẹ sọgan ko yin nuhe hẹn ninọmẹ lọ wá. Depope he whẹho lọ na yin, Klistiani Judé tọn lẹ tin to ninọmẹ todido matindo tọn mẹ, podọ Paulu jlo na hẹn ẹn diun dọ nuhudo yetọn lẹ ni yin nukunpedego. Nawẹ e na wàmọ gbọn?

Akuẹ-Jijọ na Mẹhe Tin to Nuhudo mẹ Lẹ

Paulu slẹ alọgọ agun lẹ tọn kakajẹ Makedonia he dẹn taun, podọ e basi tito na akuẹ-jijọ de nado yin yíyí do ota Klistiani Judé tọn he tin to ohẹ́n klókló mẹ lẹ tọn mẹ. Hlan Kọlintinu lẹ, Paulu wlan dọmọ: “Dile yẹn degbè hlan agun Galatia tọn lẹ, mọwẹ mì ni to wiwà do. To azán tintan awlẹn tọn gbè, mì gbọ omẹ dopodopo mìtọn ni yí do ede dè to nudotẹn mẹ, dile Jiwheyẹwhe wàdagbena ẹn do.”a—1 Kọlintinu lẹ 16:1, 2.

Paulu jlo dọ akuẹ enẹlẹ ni yin didohlan mẹmẹsunnu he tin to Jelusalẹm lẹ po awuyiya po, ṣigba Kọlintinu lẹ whleawu to gbeyiyi hlan anademẹ Paulu tọn lẹ mẹ. Etẹwutu? Be yé ma tindo numọtolanmẹ hlan ninọmẹ mẹmẹsunnu yetọn Judé tọn lẹ wẹ ya? Lala, na Paulu yọnẹn dọ Kọlintinu lẹ ‘sù to nulẹpo mẹ, to yise mẹ, to hodidọ mẹ, to oyọnẹn mẹ, podọ to vivẹnudido lẹpo mẹ.’ (2 Kọlintinu lẹ 8:7) Vlavo, alọnu yetọn ján to nukunpipedo whẹho nujọnu tọn devo he go Paulu donu to wekanhlanmẹ etọn hlan yé lẹ mẹ. Ṣigba ninọmẹ he tin to Jelusalẹm todin yin niyaniya tọn. Enẹwutu Paulu dọho do whẹho lọ ji to wekanhlanmẹ etọn awetọ hlan Kọlintinu lẹ mẹ.

Tudohomẹnamẹ Hlan Alọtútlú

Jẹnukọn whẹ́, Paulu dọna Kọlintinu lẹ dogbọn Makedonianu lẹ dali, yèdọ mẹhe gbeyiyi yetọn hlan vivẹnudido pọngbọ tọn lọ yin apajlẹ dagbe tọn. Paulu wlan dọmọ: “Le susugege zinzan yetọn tọn po ohẹn yetọn madodogbo po zun susu hlan adọkun homẹdagbe yetọn tọn do, to whlepọn daho nukunbibia tọn mẹ.” Makedonianu lẹ ma tindo nuhudo nado yin vivẹ gba. To vogbingbọn mẹ, Paulu dọ dọ ‘yé yí ovẹ̀ susu do to mí vẹ̀ na lẹblanulọkẹyi nunamẹ homẹdagbe tọn lọ.’ Alọtútlú homẹhunhun Makedonianu lẹ tọn sọ jẹ na ayidego taun to whenuena mí lẹnnupọn deji dọ yé lọsu lẹ tin to “ohẹn . . . madodogbo” mẹ.—2 Kọlintinu lẹ 8:2-4.

To pipà nina Makedonianu lẹ mẹ, be Paulu to tintẹnpọn nado fọ́n gbigbọ agbàwhinwhlẹn tọn de dote to Kọlintinu lẹ ṣẹnṣẹn wẹ ya? Paali, na ewọ yọnẹn dọ ehe mayin aliho he sọgbe lọ nado whanmẹ gba. (Galatianu lẹ 6:4) Humọ, e yọnẹn dọ Kọlintinu lẹ ma dona yin winyando whẹpo do wà nuhe sọgbe lọ gba. Kakatimọ, e tindo jidide dọ Kọlintinu lẹ yiwanna mẹmẹsunnu Judé tọn yetọn lẹ na nugbo tọn podọ jlo nado jọ̀ akuẹ na vivẹnudido pọngbọ tọn lọ. E dọna yé dọ, “na mì . . . ko ṣẹ dai, e mayin nado wà kẹdẹ, ṣigba nado jlo ga sọn owhe dopo gbọ́n.” (2 Kọlintinu lẹ 8:10) Na nugbo tọn, to adà vivẹnudido pọngbọ tọn delẹ mẹ, Kọlintinu lẹ lọsu yin apajlẹ dagbenọ. “Yẹn yọ́n awuwiwle ayiha mìtọn tọn, na ehe wutu yẹn yí mì do doawagun hlan Makedoniatọ lẹ,” wẹ Paulu dọ hlan yé, bo yidogọ dọmọ: “Vivẹnu mìtọn ko sọ doadihomẹna omẹ susu tlala.” (2 Kọlintinu lẹ 9:2, wekun flinflin lẹ yin mítọn) Nalete, todin, Kọlintinu lẹ dona diọ zohunhun yetọn po awuwiwle ayiha mẹ tọn yetọn po biọ nuyiwa mẹ.

Enẹwutu, Paulu dọna yé dọmọ: “Omẹ dopodopo dile e lẹn to ayiha etọn mẹ do, mọwẹ mì ni gbọ e ni na do; e yin, po hùnhlún po blo, kavi huhlọndohẹnbasi tọn blo: na Jiwheyẹwhe yiwanna nunamẹtọ homẹhunhunnọ.” (2 Kọlintinu lẹ 9:7) To whelọnu lo, lẹndai Paulu tọn mayin nado gbidikọna Kọlintinu lẹ gba, na e na vẹawu na mẹde nado yin nunamẹtọ homẹhunhunnọ to whenuena e yin hinhẹn po huhlọn po. Kunnudenu dohia dọ, Paulu yise dọ mẹwhinwhan he sọgbe lọ ko tin-to-aimẹ, dọ omẹ dopodopo ko magbè nado na. To yidogọmẹ, Paulu dọna yé dọmọ: “Na eyin ojlo homẹ tọn tin jẹnukọn, yè kẹalọyi i kẹdẹdi ehe omẹ lọ tindo, e mayin kẹdẹdi ehe e ma tindo gba.” (2 Kọlintinu lẹ 8:12) Mọwẹ, to whenuena ojlo lọ tin—yèdọ whenuena mẹde yin whinwhan gbọn owanyi dali—nuhe ewọ na na yin alọkẹyi gbọn Jiwheyẹwhe dali, mahopọnna lehe sọha lọ whè sọ.—Yijlẹdo Luku 21:1-4 go.

Nunamẹtọ Homẹhunhunnọ lẹ to Egbehe

Vivẹnudido pọngbọ tọn do ota Klistiani Judé tọn lẹ mẹ wleawuna apajlẹ whanpẹnọ de na azán mítọn. Kunnudetọ Jehovah tọn lẹ ko to azọ́n nujijla yẹwhehodidọ lẹdo aihọn pé tọn wà, bo to núdùdù hẹnwa na livi susu he huvẹ to hùhù to gbigbọmẹ lẹ. (Isaia 65:13, 14) Yé nọ wà ehe to tonusise mẹ na gbedide Jesu tọn dọmọ: “Enẹwutu mì yì, bo hẹn akọta lẹpo zun nuplọntọ, bosọ nọ baptizi yé . . . mì ni sọ nọ plọn yé nado nọ doayi onú lẹpo go.”—Matiu 28:19, 20.

Gbedide ehe hinhẹndi mayin azọngban he bọawu de gba. E bẹ nukunpipedo owhé mẹdehlan tọn lẹ po alahọ hugan kanweko lẹ lẹdo aihọn pé po go hẹn. E sọ bẹ Plitẹnhọ Ahọluduta tọn lẹ po Plitẹnhọ Plidopọ tọn lẹ gbigbá po hẹn na sinsẹ̀n-basitọ Jehovah tọn lẹ nido tindo nọtẹn dagbe lẹ nado plido bo na tuli ode awetọ. (Heblu lẹ 10:24, 25) To whedelẹnu, Kunnudetọ Jehovah tọn lẹ sọ nọ wleawuna alọgọ pọngbọ tọn na lẹdo he ko yin hinhẹngble gbọn nugbajẹmẹji jọwamọ tọn dali lẹ.

Sọ lẹnnupọn, ga, do akuẹ susugege he nọ yin zinzan na wezinzin lẹ ji. To osẹ dopodopo mẹ, to madozẹnzẹn mẹ, hugan vọkan 22 000 000 Atọ̀họ̀-Nuhihọ́ Lọ Tọn kavi nudi vọkan 20 000 000 Réveillez-vous! tọn wẹ nọ yin zinzinjẹgbonu. To yidogọmẹ na zinjẹgbonu núdùdù gbigbọmẹ gbesisọ tọn ehe wẹ owe livi susu lẹ, alọnuwe lẹ, kasẹti lẹ, po kasẹti video tọn he nọ yin bibasi to owhe dopodopo mẹ lẹ po tin te.

Nawẹ azọ́n ehe lẹpo nọ yin godonọna gbọn? Gbọn nunina sọn ojlomẹ wá lẹ dali. Ehelẹ nọ yin bibasi, e mayin nado jla oyín na mẹde kavi na mẹwhinwhan ṣejannabi tọn wutu gba, ṣigba nado hẹn sinsẹ̀n-bibasi nugbo yinukọn. Enẹwutu, nunina mọnkọtọn nọ hẹn ayajẹ wá na nunamẹtọ lọ, to kọndopọmẹ hẹ dona Jiwheyẹwhe tọn. (Malaki 3:10; Matiu 6:1-4) Yèdọ ovivu lẹ to Kunnudetọ Jehovah tọn lẹ mẹ tlẹ nọ do yedelẹ hia nado yin alọtlútọ, yèdọ nunamẹtọ homẹhunhunnọ lẹ. Di apajlẹ, to sisè dogbọn nugbajẹmẹji he yin hinhẹnwa aimẹ gbọn jẹhọn ahìzì de dali godo to apadewhe États-Unis tọn, Allison owhe-ẹnẹ-mẹvi basi nunina dọla 2 tọn. “Ehe yin akuẹ he yẹn tindo to akuẹ-sẹdotẹn ṣie mẹ lẹpo,” wẹ e wlan. “Yẹn yọnẹn dọ ovivu lẹ hẹn aihundanu po owe yetọn lẹpo po bu. Vlavo mìwlẹ sọgan yí akuẹ ehe zan nado họ̀ owe de na viyọnnu pẹvi owhe ṣie nkọtọn de.” Maclean, owhe ṣinatọ̀n, wlan dọ ewọ yin homẹhunnọ dọ depope to mẹmẹsunnu lẹ mẹ ma kú to jẹhọn ahìzì lọ mẹ gba. E yidogọ dọmọ: “Yẹn bẹ dọla 17 États-Unis tọn ehe pli sọn sisà nuhe yè nọ sudo afọ mọto tọn lẹ hẹ otọ́ ṣie mẹ. Yẹn jlo na họ̀ nude po akuẹ ṣie po, ṣigba to whenẹnu yẹn lẹnnupọn dogbọn mẹmẹsunnu lẹ dali.”—Pọ́n apotin he tin to aga lọ ga.

Nugbo wẹ dọ, homẹ Jehovah tọn nọ hùn nado mọ jọja po mẹhomẹ lẹ po he ze dagbenu Ahọluduta tọn lẹ do otẹn tintan mẹ gbọn ‘gbégbigbòna ẹn po nutindo yetọn lẹ po’ dali. (Howhinwhẹn lẹ 3:9, 10) Na nugbo tọn, mẹdepope ma sọgan hẹn Jehovah yin adọkunnọ na taun tọn gba, na ewọ wẹ tindo onú lẹpo. (1 Otannugbo lẹ 29:14-17) Ṣigba godoninọna azọ́n lọ yin lẹblanulọkẹyi de he nọ wleawu dotẹnmẹ hundote tọn na sinsẹ̀n-basitọ lọ nado do owanyi etọn na Jehovah hia. Mí dopẹna mẹlẹpo he ahun etọn ko sisẹ́ ẹ to aliho mọnkọtọn mẹ lẹ.

[Nudọnamẹ Odò Tọn]

[Apotin to weda 26, 27]

Aliho He Mẹdelẹ Dè Nado Nanumẹ te lẹ Na Azọ́n Lẹdo Aihọn Pé Tọn

Mẹsusu nọ dè, kavi klan, akuẹ sọha de dovo he yé na yí do apotin nunina tọn he go yè kàn: “Nunina lẹ na Azọ́n Lẹdo Aihọn Pé Ogbẹ́ tọn—Matiu 24:14” do. To osun dopodopo mẹ agun lẹ nọ yí akuẹ ehelẹ vlavo hlan tatọ-tẹnnọ aihọn tọn to Brooklyn, New York, kavi hlan wekantẹn alahọ lẹdo lọ tọn.

Nunina akuẹ tọn sọn ojlomẹ wá sọgan sọ yin dido hlan Wekantẹn Akuẹbẹhẹntọ tọn, Watch Tower Bible and Tract Society of Pennsylvania, 25 Columbia Heights, Brooklyn, New York 11201-2483 tlọlọ, kavi hlan wekantẹn Ogbẹ́ tọn he nọ penukundo otò mìtọn go. Aṣọdonu akuẹgegenu tọn lẹ kavi nuhọakuẹ devo lẹ sọgan sọ yin nina ga. Wekanhlanmẹ kleun de he dohia dọ onú mọnkọtọn yin nunina tlọlọ de dona hodo nunina ehelẹ.

Tito Nunina He Sinai do Ninọmẹ Ji

Akuẹ sọgan yin nina Ogbẹ́ Watch Tower to tito vonọtaun de glọ to ehe mẹ, eyin nunamẹtọ lọ tindo nuhudo mẹdetiti tọn de, nunina lọ na yin gigọjo hlan ẹn. Na nudọnamẹ dogọ, jaale dọnsẹpọ Wekantẹn Akuẹbẹhẹntọ tọn to adlẹsi heyin kinkan do aga lọ mẹ.

Nunina Heyin Tito Basina

To yidogọmẹ na nunina akuẹ tọn tlọlọ lẹ po nunina akuẹ tọn he sinai do ninọmẹ ji lẹ po, wunmẹ nunina tọn devo lẹ na alemọyi sinsẹ̀nzọn lẹdo aihọn pé Ahọluduta lọ tọn lẹ sọ tin. Ehelẹ wẹ:

Alọgọ Owù-Nujijọ Tọn: Ogbẹ́ Watch Tower sọgan yin nina alemọyi nunina alọgọ owù-nujijọ gbẹzan tọn kavi to tito gbọjẹ gaa/agbasazọ́n jijodo tọn mẹ.

Adọkun to Akuẹsẹdotẹn Lẹ: Adọkun to akuẹsẹdotẹn lẹ, kandai akuẹsẹdo tọn lẹ, kavi akuẹ gbọjẹ gaa mẹdopodopo tọn lẹ sọgan yin zize do kandai ogú mimá tọn mẹ kavi sọgan yin súsú lẹkọ to okú godo hlan Ogbẹ́ Watch Tower, to kọndopọmẹ hẹ nubiọtomẹsi akuẹsẹdotẹn lẹdo lọ tọn lẹ.

Kandai Ajọ́ Akuẹ Tọn lẹ po Akuẹ Yinyan lẹ Po: Kandai ajọ́ akuẹ tọn lẹ po akuẹ yinyan lẹ po sọgan yin nina hlan Ogbẹ́ Watch Tower vlavo taidi nunina tlọlọ de kavi to tito de glọ bọ ale lẹ na to yinyin súsú nunamẹtọ lọ zọnmii.

Ohọ̀ po Aigba Po: Ohọ̀ po aigba po he sọgan yin sisà lẹ sọgan yin nina hlan Ogbẹ́ Watch Tower vlavo taidi nunina tlọlọ de bibasi kavi gbọn hinhẹn ohọ̀ po aigba de po dote na nunamẹtọ lọ na gbẹwhenu etọn, yèdọ mẹhe sọgan to finẹ nọ̀ to gbẹwhenu etọn. Omẹ lọ dona dọna Ogbẹ́ whẹpo do basi nudide ohọ̀ po aigba po tọn depope hlan Ogbẹ́.

Kandai Gúmimá po Nunina lẹ Tọn Po: Nutindo kavi akuẹ sọgan yin nina taidi ogú hlan Ogbẹ́ Watch Tower gbọn kandai sọgbe hẹ osẹ́n de bibasi dali, kavi oyín Ogbẹ́ tọn sọgan yin kinkandai taidi mẹhe na dugu nunina lẹ tọn. Nunina he mẹ titobasinanu sinsẹ̀n tọn de yin mahẹtọ te sọgan dè takuẹ he nọ yin bibiọ delẹ pò.

Dile hogbe lọ “nunina heyin tito basina” dohia do, nunina wunmẹ ehelẹ na taun tọn nọ biọ tito bibasi delẹ to adà nunamẹtọ lọ tọn mẹ. Nado gọalọna omẹ dopodopo he to jijlo nado hẹn Ogbẹ́ mọaleyi sọn wunmẹ nunina heyin tito basina tọn delẹ mẹ, Ogbẹ́ ko wleawuna alọnuwe Glẹnsigbe tọn de he hosọ etọn yin Planned Giving to Benefit Kingdom Service Worldwide. Alọnuwe lọ yin kinkan nado na gblọndo hlan kanbiọ susu he Ogbẹ́ ko mọyi na nuhe dù nunina lẹ, po kandai gúmimá tọn lẹ po. E sọ bẹ nudọnamẹ he yọn-na-yizan dogọ lẹ hẹn do tito bibasi do ohọ̀ po aigba po, akuẹ, po takuẹ po ji. Podọ e yin awuwlena nado gọalọna omẹ dopodopo lẹ to États-Unis he to tito basi nado basi nunina vonọtaun de hlan Ogbẹ́ todin kavi nado jo ogú de do to okú godo nado de aliho alemọyi po dehe yọ́n hugan lọ po to lẹnpọn mẹ na whẹndo yetọn po ninọmẹ mẹdetiti tọn lẹ po.

To alọnuwe lọ hihia po hodọdopọ hẹ Wekantẹn Nunina Heyin Tito Bibasina tọn po godo, mẹsusu ko penugo nado gọalọna Ogbẹ́ podọ to ojlẹ dopolọ mẹ, ko dè takuẹ he nọ yin bibiọ lẹ pò taun to mọwiwà mẹ. Wekantẹn Nunina Heyin Tito Basina tọn dona yin didọna podọ dona mọ vọkan dopo kandai depope he gando depope to tito ehelẹ go tọn yí. Mẹhe tindo ojlo to alọnuwe lọ mẹ kavi to depope to tito nunina heyin tito basina ehelẹ tọn lẹ mẹ dona dọnsẹpọ Wekantẹn Nunina Heyin Tito Basina tọn, vlavo gbọn wekanhlanmẹ kavi alokan dali, to adlẹsi heyin sislẹ to odò kavi to wekantẹn Ogbẹ́ tọn he nọ penukundo otò mìtọn go mẹ.

Wekantẹn Nunina Heyin Tito Basina Tọn

Watch Tower Bible and Tract Society of Pennsylvania

100 Watchtower Drive, Patterson, New York 12563-9204

Alokan: (914) 878-7000

[Yẹdide to weda 25]

Nuwiwa Kunnudetọ Jehovah tọn lẹ tọn nọ yin godonọna po nunina sọn ojlo mẹ wá lẹ po