Mẹnu lẹ Wẹ Yin Lizọnyizọnwatọ Jiwheyẹwhe Tọn lẹ to Egbehe?

“Jiwheyẹwhe dè wẹ nugopipe mítọn sọn: mẹhe ga ko yí mí do basi [lizọnyizọnwatọ] nugopetọ alẹnu yọyọ tọn.”—2 KỌLINTINU LẸ 3:5, 6.

 1, 2. Azọngban tẹmẹ wẹ Klistiani owhe kanweko tintan tọn lẹ tindo mahẹ te, ṣigba nawẹ onú lẹ diọ gbọn?

TO OWHE kanweko tintan Whe-Mítọn-nu tọn, Klistiani lẹpo wẹ tindo mahẹ to azọngban titengbe de mẹ—yèdọ azọngban lọ nado dọyẹwheho wẹndagbe lọ tọn. Yemẹpo wẹ yin mẹyiamisisadode bosọ yin lizọnyizọnwatọ alẹnu yọyọ lọ tọn. Mẹdelẹ tindo azọngban dogọ lẹ, taidi mẹpinplọn to agun mẹ. (1 Kọlintinu lẹ 12:27-29; Efesunu lẹ 4:11) Mẹjitọ lẹ tindo azọngban titengbe lẹ to whẹndo mẹ. (Kọlọsinu lẹ 3:18-21) Ṣigba yemẹpo wẹ tindo mahẹ to azọ́n dodonu po nujọnu tọn lọ po mẹ heyin yẹwhehodidọ. To Glẹki dowhenu tọn heyin Owe-wiwe Klistiani tọn lẹ mẹ, azọngban ehe wẹ di·a·ko·niʹa—sinsẹ̀nzọn de, kavi lizọnyizọn.—Kọlọsinu lẹ 4:17.

² Dile ojlẹ to jujuyi, onú lẹ diọ. Pipli de wleawu, heyin yinyọnẹn taidi nukọntọ sinsẹ̀n tọn lẹ, he klán lẹblanulọkẹyi yẹwhehodidọ tọn dovo na yedelẹ. (Owalọ lẹ 20:30) Nukọntọ sinsẹ̀n tọn lẹ yin omẹ kleun delẹ to mẹhe ylọ yedelẹ dọ Klistiani lẹ mẹ. Adà he suhugan lẹzun yinyọnẹn taidi omẹ paa lẹ. Dile omẹ paa lẹ ko yin pinplọn dọ yé tindo azọngban dandan tọn delẹ, gọna nunina lẹ bibasi na dagbemẹ-ninọ nukọntọ sinsẹ̀n tọn lẹ tọn, suhugan ko lẹzun todoaitọ tata lẹ to whẹho yẹwhehodidọ tọn mẹ.

3, 4. (a) Nawẹ mẹdopodopo lẹ to Mẹylọhodotọklisti mẹ nọ lẹzun lizọnyizọnwatọ lẹ gbọn? (b) Mẹnu wẹ nọ yin pinpọnhlan taidi lizọnyizọnwatọ de to Mẹylọhodotọklisti mẹ, podọ naegbọn onú lẹ gbọnvo to Kunnudetọ Jehovah tọn lẹ ṣẹnṣẹn?

³ Nukọntọ sinsẹ̀n tọn lẹ sọalọakọ́n nado yin lizọnyizọnwatọ lẹ (sọn lizọnyizọnwatọ, lẹdogbedevomẹ Latin tọn na di·aʹko·nos, “devizọnwatọ” mẹ).a Na ehe, yé mọ gbedewema yí sọn wehọmẹ alavọ kavi wehọmẹ yẹwhenọ lẹ tọn mẹ bo nọ yin mẹdide lẹ. The International Standard Bible Encyclopedia dọmọ: “ ‘Mẹdide’ po ‘nuwiwa mẹdide tọn’ po to paa mẹ dlẹnalọdo otẹn vonọtaun he nọ yin nina lizọnyizọnwatọ lẹ kavi yẹwhenọ lẹ gbọn gbedide tangan hùnwhẹ sinsẹ̀n tọn lẹ dali, po nùzindonuji he tin to pọmẹ po do aṣẹpipa nado lá Ohó lọ kavi nado namẹ sacrement, kavi nado wà awe lẹpo.” Mẹnu wẹ nọ de lizọnyizọnwatọ lẹ? La nouvelle Encyclopédie britannique dọmọ: “To ṣọṣi he ko hẹn ogántẹn whenuho tọn go lẹ mẹ, lizọnyizọnwatọ he nọ basi mẹdide lọ to whepoponu wẹ biṣọpu. To ṣọṣi Presbytérien tọn lẹ mẹ, mẹdide nọ yin bibasi gbọn lizọnyizọnwatọ presbytère tọn lẹ dali.”

⁴ Enẹwutu, to ṣọṣi Mẹylọhodotọklisti tọn lẹ mẹ, lẹblanulọkẹyi nado yin lizọnyizọnwatọ de ko yin didepo tlala. Ṣogan, ehe mayin whẹho lọ to Kunnudetọ Jehovah tọn lẹ ṣẹnṣẹn gba. Naegbọn e do yinmọ? Na e mayin mọ to agun Klistiani owhe kanweko tintan tọn mẹ gba.

Mẹnu Wẹ Yin Lizọnyizọnwatọ Jiwheyẹwhe Tọn lẹ na Taun Tọn?

 5. To gbesisọmẹ hẹ Biblu, mẹhe to sinsẹ̀nzọnwa taidi lizọnyizọnwatọ lẹ bẹ mẹnu lẹ hẹn?

⁵ Sọgbe hẹ Biblu, sinsẹ̀n-basitọ Jehovah tọn lẹpo—olọn mẹ tọn po aigba ji tọn lẹ po—wẹ yin lizọnyizọnwatọ lẹ. Angẹli lẹ yilizọn na Jesu. (Matiu 4:11; 26:53; Luku 22:43) Angẹli lẹ sọ yin “[lizọnyizọnwatọ] na yé he na yin whédutọ whlẹngán tọn lẹ tọn.” (Heblu lẹ 1:14; Matiu 18:10) Jesu yin lizọnyizọnwatọ de. E dọmọ: “Ovi gbẹtọ tọn ma wá nado yilizọn na, adavo nado yílizọn na omẹ.” (Matiu 20:28; Lomunu lẹ 15:8) Enẹwutu, to whenuena e yindọ hodotọ Jesu tọn lẹ dona ‘hodo afọdòmẹ etọn pẹkipẹki,’ e ma yin nupaṣamẹ dọ yé lọsu dona yin lizọnyizọnwatọ lẹ gba.—1 Pita 2:21.

 6. Nawẹ Jesu dohia dọ devi etọn lẹ dona yin lizọnyizọnwatọ lẹ gbọn?

⁶ Ojlẹ vude jẹnukọnna olọn mẹ yìyì etọn, Jesu dọna devi etọn lẹ dọmọ: “Mì yì, bo hẹn akọta lẹpo zun nuplọntọ, bosọ nọ baptizi yé do oyín Otọ́ tọn, po Ovi tọn po, po [gbigbọ wiwe] tọn po mẹ: na mì ni sọ nọ plọn yé nado nọ doayi onú lẹpo go, nudepope he yẹn degbena mì.” (Matiu 28:19, 20) Devi Jesu tọn lẹ dona yin lizọnyizọnwatọ—he nọ hẹn gbẹtọ lẹ zun devi lẹ. Mẹhe yé hẹn zun devi yọyọ lẹ na plọn nado doayi onú he Jesu degbena lẹpo go, gọna gbedide lọ nado tọ́n yì bo hẹn gbẹtọ lẹ zun devi. Sunnu kavi yọnnu, mẹhomẹ kavi ovi, devi nugbo Jesu Klisti tọn de na yin lizọnyizọnwatọ de.—Joẹli 2:28, 29.

7, 8. (a) Wefọ tẹlẹ wẹ dohia dọ Klistiani nugbonọ lẹpo wẹ yin lizọnyizọnwatọ lẹ? (b) Kanbiọ tẹlẹ wẹ yin finfọndote gando mẹdide go?

⁷ To kọndopọmẹ hẹ ehe, to azán Pẹntikọsti owhe 33 W.M. gbè, devi Jesu tọn he tin to finẹ lẹpo, sunnu po yọnnu lẹ po, kọngbedopọ to “azọ́n huhlọnnọ Jiwheyẹwhe tọn” lẹ didọ jẹgbonu mẹ. (Owalọ lẹ 2:1-11) Humọ, apọsteli Paulu wlan dọmọ: “Ayiha wẹ gbẹtọ do yise hlan dodo; onù wẹ yè do basi ogbèyí hlan whlẹngán.” (Lomunu lẹ 10:10) Paulu dọho enẹlẹ, e mayin hlan pipli vude heyin nukọntọ sinsẹ̀n tọn lẹ gba, ṣigba “hlan omẹ he tin to Lomu lẹpo, mẹyiwanna Jiwheyẹwhe tọn [lẹ].” (Lomunu lẹ 1:1, 7) Mọdopolọ, “mẹwiwe he tin to Efesu lẹ, podọ . . . yisenọ to Klisti Jesu mẹ” lẹpo wẹ dona “yí awuwle wẹndagbe jijọho tọn do doafọpana afọ” yetọn. (Efesunu lẹ 1:1; 6:15) Podọ mẹhe sè wekanhlanmẹ heyin didohlan Heblunu lẹ dona ‘hẹn nulila gbangba tọn heyin todido yetọn tọn go gligli matin ayihaawe.’—Heblu lẹ 10:23.

⁸ Nalete, whetẹnu wẹ mẹde nọ lẹzun lizọnyizọnwatọ de? To hogbe devo lẹ mẹ, whetẹnu wẹ e nọ yin dide? Podọ mẹnu wẹ nọ de e?

Mẹdide Taidi Lizọnyizọnwatọ de—Whetẹnu?

 9. Whetẹnu wẹ Jesu yin dide, podọ gbọn mẹnu dali?

⁹ Gando whenuena po mẹhe dali mẹde nọ yin dide po go, gbadopọnna apajlẹ Jesu Klisti tọn. E ma tindo gbedewema mẹdide tọn de sọn wehọmẹ yẹwhenọ tọn delẹ mẹ nado dohia dọ lizọnyizọnwatọ de wẹ e yin, podọ ewọ mayin dide gbọn gbẹtọ depope dali gba. To whelọnu lo, naegbọn mí dona dọ dọ lizọnyizọnwatọ de wẹ e yin? Na ohó gbọdo Isaia tọn lẹ yin hinhẹndi to ewọ mẹ wutu dọmọ: “Gbigbọ [Jehovah, NW ] tọn tin to oji e, na e ko samisisana mi nado dọyẹwheho wẹndagbe tọn.” (Luku 4:17-19; Isaia 61:1) Matin ayihaawe ohó enẹlẹ dohia dọ Jesu yin azọ́ndena nado dọ wẹndagbe lọ. Gbọn mẹnu dali? To whenuena e yindọ gbigbọ Jehovah tọn wẹ de e na azọ́n lọ, e họnwun dọ Jesu yin dide gbọn Jehovah Jiwheyẹwhe dali. Whetẹnu wẹ ehe jọ? Gbigbọ Jehovah tọn na taun tọn wá Jesu ji to whenuena e yin bibaptizi. (Luku 3:21, 22) Enẹwutu, to baptẹm etọn whenu wẹ ewọ yin dide.

10. Gbọn mẹnu dali wẹ Klistiani lizọnyizọnwatọ de nọ lẹzun mẹhe ‘pegan mlẹnmlẹn’?

¹⁰ Etẹwẹ dogbọn hodotọ Jesu tọn owhe kanweko tintan tọn lẹ dali? Tẹnmẹ yetọn taidi lizọnyizọnwatọ lẹ sọ wá sọn Jehovah dè. Paulu dọmọ: “Jiwheyẹwhe dè wẹ nugopipe mítọn sọn: mẹhe ga ko yí mí do basi [lizọnyizọnwatọ] nugopetọ alẹnu yọyọ tọn.” (2 Kọlintinu lẹ 3:5, 6) Nawẹ Jehovah nọ hẹn sinsẹ̀n-basitọ etọn lẹ pegan nado yin lizọnyizọnwatọ lẹ gbọn? Gbadopọnna apajlẹ Timoti tọn, mẹhe Paulu ylọ dọ “[lizọnyizọnwatọ] Jiwheyẹwhe tọn, azọ́ngbẹ́ mítọn to wẹndagbe Klisti tọn mẹ.”—1 Tẹsalonikanu lẹ 3:2.

11, 12. Nawẹ Timoti tindo nukọnyiyi nado lẹzun lizọnyizọnwatọ de gbọn?

¹¹ Ohó he bọdego lẹ hlan Timoti gọalọna mí nado mọnukunnujẹ lehe e lẹzun lizọnyizọnwatọ de do mẹ: “Ṣigba hiẹ ni nọte to onú he hiẹ plọn lẹ mẹ, ehe hiẹ ko yí nukun towe hùn do e go hezeheze, le hiẹ yọ́n mẹhe dè hiẹ plọn yé te; podọ sọn ovu gbọ́n wẹ hiẹ ko yọ́n Owe-wiwe, he sọgan hẹn we zun nuyọnẹntọ hlan whlẹngán gbọn yise he tin to Klisti Jesu mẹ.” (2 Timoti 3:14, 15) Dodonu yise Timoti tọn, he na whàn ẹn nado basi nulila gbangba tọn, wẹ oyọnẹn Owe-wiwe lẹ tọn. Be wehihia mẹdetiti tọn wẹ yin nuhudo lọ lẹpo na ehe ya? Lala. Timoti tindo nuhudo alọgọ tọn nado duale oyọnẹn po nukunnumọjẹnumẹ he pegan gbigbọmẹ tọn po gando nuhe e hia go. (Kọlọsinu lẹ 1:9) Gbọnmọ dali Timoti yin ‘linlẹndiọna nado yise.’ To whenuena e yindọ e ko yọ́n Owe-wiwe lẹ “sọn ovu gbọ́n,” nuplọnmẹtọ etọn tintan lẹ dona ko yin onọ̀ po onọdahó etọn po, e họnwun dọ otọ́ etọn mayin yisenọ de gba.—2 Timoti 1:5.

¹² Ṣigba, lilẹzun lizọnyizọnwatọ de Timoti tọn bẹ nususu hẹn ga. Onú dopo wẹ yindọ, yise etọn yin hinhẹnlodo gbọn gbẹdido hẹ Klistiani lẹ to agun he tin to yakẹ lẹ mẹ dali. Nawẹ mí yọnẹn gbọn? Na to whenuena Paulu dukosọ hẹ Timoti to tintan whenu, sunnu jọja lọ yin “mẹhe mẹmẹsunnu he tin to Listla po Ikonioni po lẹ to dagbe etọn dọ.” (Owalọ lẹ 16:2) To yidogọmẹ, to azán enẹlẹ gbè mẹmẹsunnu delẹ nọ wlan wekanhlanmẹ lẹ hlan agun lẹ nado sọgan hẹn yé lodo. Podọ nugopọntọ lẹ nọ dla yé pọ́n nado sọgan na tuli yé. Awuwledainanu mọnkọtọn lẹ nọ gọalọna Klistiani lẹ taidi Timoti nado tindo nukọnyiyi to gbigbọ-liho.—Owalọ lẹ 15:22-32; 1 Pita 1:1.

13. Whetẹnu wẹ Timoti yin dide taidi lizọnyizọnwatọ de, podọ naegbọn hiẹ na dọ dọ nukọnyiyi gbigbọmẹ tọn etọn ma wá vivọnu do finẹ gba?

¹³ To pọndohlan mẹ na gbedide Jesu tọn heyin kinkàndai to Matiu 28:19, 20 mẹ, mí sọgan deji dọ yise Timoti tọn whàn ẹn jẹ obá de mẹ nado hodo apajlẹ Jesu tọn bosọ yin bibaptizi. (Matiu 3:15-17; Heblu lẹ 10:5-9) Yẹhiadonu klandowiwe po alindọn lẹpo po Timoti tọn dohlan Jiwheyẹwhe wẹ ehe yin. To baptẹm etọn whenu Timoti lẹzun lizọnyizọnwatọ de. Sọn whenẹnu sọyi, ogbẹ̀ etọn, huhlọn etọn, po nuhe e tindo lẹpo po yin Jiwheyẹwhe tọn. Ehe yin adà tangan sinsẹ̀n-bibasi etọn tọn, yèdọ ‘sinsẹ̀nzọn wiwe de.’ Etomọṣo, Timoti ma tindo numọtolanmẹ pekọ tọn gando gbégbò lizọnyizọnwatọ de yinyin tọn go gba. E zindonukọn nado to whinwhẹ́n to gbigbọ-liho, bo lẹzun lizọnyizọnwatọ Klistiani he whèwhín de. Ehe jọ na gbẹdido pẹkipẹki Timoti tọn hẹ Klistiani he whèwhín lẹ taidi Paulu, oplọn mẹdetiti tọn etọn, po nuwiwa zohunhunnọ yẹwhehodidọ tọn etọn po wutu.—1 Timoti 4:14; 2 Timoti 2:2; Heblu lẹ 6:1.

14. To egbehe, nawẹ mẹhe ‘tindo ojlo na ogbẹ̀ madopodo’ de nọ basi nukọnyiyi dohlan lilẹzun lizọnyizọnwatọ de gbọn?

¹⁴ To egbehe, mẹdide na lizọnyizọn Klistiani tọn yin nudopolọ. Mẹhe ‘tindo ojlo na ogbẹ̀ madopodo’ de nọ yin alọgọna nado plọnnu dogbọn Jiwheyẹwhe po lẹndai etọn lẹ po dali gbọn oplọn Biblu tọn de gblamẹ. (Owalọ lẹ 13:48) Omẹ lọ nọ plọn nado yí nunọwhinnusẹ́n Biblu tọn lẹ do yizan mẹ to gbẹzan etọn mẹ podọ nado nọ hodẹ̀ he tindo zẹẹmẹ lẹ dohlan Jiwheyẹwhe. (Psalm 1:1-3; Howhinwhẹn lẹ 2:1-9; 1 Tẹsalonikanu lẹ 5:17, 18) E nọ kọnawudopọ hẹ yisenọ devo lẹ bo nọ yí dagbenu awuwledainanu po tito heyin bibasi gbọn ‘afanumẹ nugbonọ nuyọnẹntọ’ lọ dali lẹ tọn po zan. (Matiu 24:45-47; Howhinwhẹn lẹ 13:20; Heblu lẹ 10:23-25) Gbọnmọ dali e nọ tindo nukọnyiyi to dodonu aliho wepinplọn tọn mẹ.

15. Etẹwẹ nọ jọ to whenuena mẹde yin bibaptizi? (Pọ́n nudọnamẹ odò tọn ga.)

¹⁵ To godo mẹ, Biblu plọntọ lọ, to whenuena e ko wleawuna owanyi na Jehovah Jiwheyẹwhe po yise he lodo po to avọ́sinsan ofligọ tọn mẹ, nọ jlo nado klán ede do wiwe mlẹnmlẹn hlan Otọ́ olọn mẹ tọn etọn. (Johanu 14:1) E nọ basi klandowiwe enẹ to odẹ̀ mẹdetiti tọn etọn mẹ bosọ nọ yin bibaptizi taidi yẹhiadonu gbangba tọn de na nuyiwa nuglọ tọn enẹ. Baptẹm etọn wẹ yin hùnwhẹ mẹdide tọn etọn na whenẹnu wẹ e yin yinyọnẹn taidi devizọnwatọ klandowiwe mlẹnmlẹn de, yèdọ di·aʹko·nos, Jiwheyẹwhe tọn de. E dona nọla na aihọn lọ. (Johanu 17:16; Jakobu 4:4) E ko ze ede blebu jo taidi ‘avọ́sinsan gbẹ̀te, wiwe, heyin alọkẹyi hlan Jiwheyẹwhe’ he ma tindo agọjoyigodo kavi sinai do ninọmẹ de ji. (Lomunu lẹ 12:1)b Lizọnyizọnwatọ Jiwheyẹwhe tọn wẹ e yin, he to apajlẹ Klisti tọn hodo.

Etẹwẹ Lizọnyizọn Klistiani Tọn Yin?

16. Etẹwẹ yin delẹ to azọngban Timoti tọn lẹ mẹ taidi lizọnyizọnwatọ de?

¹⁶ Etẹwẹ lizọnyizọn Timoti tọn bẹhẹn? E tindo azọngban titengbe lẹ taidi gbẹdohẹmẹtọ tomẹyitọ Paulu tọn. Podọ whenuena e lẹzun mẹho de, Timoti wazọ́n sinsinyẹn to mẹpinplọn po Klistiani hatọ lẹ hinhẹnlodo po mẹ. Ṣigba adà tangan lizọnyizọn etọn tọn, dile e yin do na Jesu po Paulu po, wẹ wẹndagbe lọ lilá po gbẹtọ lẹ hinhẹn zun devi lẹ po. (Matiu 4:23; 1 Kọlintinu lẹ 3:5) Paulu dọna Timoti dọmọ: “Ṣigba nọ họ́ dewe to onú popo mẹ, doakọnna nukunbia, nọ to azọ́n yẹwhehodọtọ tọn wà pé, bo nọ wazọ́n devizọn towe tọn diun hezeheze.”—2 Timoti 4:5, wekun flinflin lẹ yin mítọn.

17, 18. (a) Lizọnyizọn tẹmẹ wẹ Klistiani lẹ nọ tindo mahẹ te? (b) Nawẹ azọ́n yẹwhehodidọ tọn yin onú titengbe na Klistiani lizọnyizọnwatọ de gbọn?

¹⁷ Onú dopolọ wẹ e yin na Klistiani lizọnyizọnwatọ lẹ to egbehe. Yé nọ tindo mahẹ to lizọnyizọn gbangba tọn mẹ, yèdọ azọ́n wẹndagbe-jijlá tọn, bo nọ deanana mẹdevo lẹ hlan whlẹngán kọ̀n to dodonu avọ́sinsan Jesu tọn ji bosọ nọ plọn homẹmimiọnnọ lẹ nado ylọ oyín Jehovah tọn. (Owalọ lẹ 2:21; 4:10-12; Lomunu lẹ 10:13) Yé nọ dohia sọn Biblu mẹ dọ Ahọluduta lọ wẹ yin todido dopo kẹdẹ lọ na gbẹtọvi he to yaji lẹ bosọ nọ dohia dọ onú lẹ tlẹ nọ pọnte todin eyin mí nọgbẹ̀ gbọn nunọwhinnusẹ́n jijọ-di-Jiwheyẹwhe tọn lẹ dali. (Psalm 15:1-5; Malku 13:10) Ṣigba Klistiani lizọnyizọnwatọ de ma nọ dọyẹwheho gando nuhahun lẹdo tọn lẹ go gba. Kakatimọ, e nọ plọnmẹ dọ ‘mẹdezejo jijọ-di-Jiwheyẹwhe tọn bẹ opagbe ogbẹ̀ he tin todin po dehe ja tọn po hẹn.’—1 Timoti 4:8.

¹⁸ Na nugbo tọn, suhugan lizọnyizọnwatọ lẹ tọn tindo aliho devizọnwiwa tọn dogọ lẹ, he sọgan gbọnvona Klistiani devo tọn. Mẹsusu tindo azọngban whẹndo tọn lẹ. (Efesunu lẹ 5:21–6:4) Mẹho lẹ po devizọnwatọ lizọnyizọnwiwa tọn lẹ po tindo azọngban lẹ to agun mẹ. (1 Timoti 3:1, 12, 13; Titu 1:5; Heblu lẹ 13:7) Klistiani susu nọ gọalọ nado gbá Plitẹnhọ Ahọluduta tọn lẹ. Mẹdelẹ tindo lẹblanulọkẹyi jiawu nado to azọ́nwa taidi mẹdezejotọ lẹ to dopo to owhé Bẹtẹli Ogbẹ́ Watch Tower tọn lẹ gbè. Ṣigba, Klistiani lizọnyizọnwatọ lẹpo wẹ nọ tindo mahẹ to yẹwhehodidọ wẹndagbe lọ tọn mẹ. Azọngban mẹlẹpo tọn wẹ e yin. Mahẹ tintindo to azọ́n ehe mẹ wẹ nọ do mẹde hia gbangba taidi Klistiani lizọnyizọnwatọ nujọnu tọn de.

Walọyizan Klistiani Lizọnyizọnwatọ de Tọn

19, 20. Walọyizan tẹwẹ Klistiani lizọnyizọnwatọ lẹ dona wleawuna?

¹⁹ Suhugan lizọnyizọnwatọ Mẹylọhodotọklisti tọn lẹ wẹ nọ donukun nado yin nina sisi vonọtaun, podọ yé nọ yí tẹnmẹ-yinkọ mọnkọtọn lẹ taidi “nukọntọ” po “Otọ́” po zan. Ṣigba, Klistiani lizọnyizọnwatọ de nọ yọnẹn dọ Jehovah kẹdẹ wẹ gbégbigbò sisosiso jẹ na. (1 Timoti 2:9, 10) Klistiani lizọnyizọnwatọ depope ma nọ dín sisi he yiaga kavi dín tẹnmẹ-yinkọ vonọtaun mọnkọtọn lẹ gba. (Matiu 23:8-12) E yọnẹn dọ zẹẹmẹ dodonu di·a·ko·niʹa tọn wẹ “sinsẹ̀nzọnwiwa.” Hogbe nuyiwa tọn he gandego lọ nọ yin yiyizan to Biblu mẹ to whedelẹnu na nuhe dù azọ́n mẹdetiti tọn lẹ, taidi teninọ to tafo lẹ kọ̀n. (Luku 4:39; 17:8; Johanu 2:5) Dile etlẹ yindọ yizan etọn to kọndopọmẹ hẹ lizọnyizọn Klistiani tọn yiaga dogọ, di·aʹko·nos de gbẹsọ yin devizọnwatọ de.

²⁰ Enẹwutu Klistiani lizọnyizọnwatọ depope ma tindo whẹwhinwhẹ́n nado tindo numọtolanmẹ nujọnu-yinyin mẹdetiti tọn gba. Klistiani lizọnyizọnwatọ nujọnu tọn lẹ—etlẹ yin dehe tindo azọngban vonọtaun lẹ to agun mẹ—yin afanumẹ whiwhẹnọ lẹ. Jesu dọmọ: “Mẹdepope he jlo na lẹzun kiklo to mì mẹ na yin devi mìtọn; mẹdepope he sọ jlo na yin nukọntọ to mì mẹ na yin afanumẹ mìtọn.” (Matiu 20:26, 27) To whenuena e to walọyizan he sọgbe he dona yin awuwlena dohia devi etọn lẹ, Jesu klọ́ afọ yetọn lẹ, yèdọ wazọ́n heyin afanumẹ he yido hugan tọn. (Johanu 13:1-15) Sinsẹ̀nzọnwiwa whiwhẹ tọn nankọtọn die! Enẹwutu, Klistiani lizọnyizọnwatọ lẹ nọ gbọn whiwhẹ dali sẹ̀n Jehovah Jiwheyẹwhe po Jesu Klisti po. (2 Kọlintinu lẹ 6:4; 11:23) Yé nọ do whiwhẹ ayiha tọn hia to sinsẹ̀nzọnwiwa na ode awetọ mẹ. Podọ to whenuena yé to yẹwheho wẹndagbe lọ tọn dọ, yé nọ gbọn ṣejannabi matindo dali wà sinsẹ̀nzọn na kọmẹnu mayisenọ yetọn lẹ.—Lomunu lẹ 1:14, 15; Efesunu lẹ 3:1-7.

Doakọnnanu to Lizọnyizọn lọ Mẹ

21. Nawẹ Paulu yin ahọsuna na akọ́ndonanu to lizọnyizọn lọ mẹ gbọn?

²¹ E biọ akọ́ndonanu na Paulu nado yin lizọnyizọnwatọ de. E dọna Kọlọsinu lẹ dọ emi jiya susu nado sọgan dọyẹwheho wẹndagbe tọn hlan yé. (Kọlọsinu lẹ 1:24, 25) Ṣigba, na e doakọnnanu wutu mẹsusu kẹalọyi wẹndagbe lọ bosọ lẹzun lizọnyizọnwatọ lẹ. Yé yin jiji taidi visunnu Jiwheyẹwhe tọn lẹ podọ nọvisunnu Jesu Klisti tọn lẹ, po nukundido lọ po nado lẹzun nudida gbigbọnọ lẹ to adà etọn mẹ to olọn mẹ. Ahọsumẹ gigonọ akọ́ndonanu tọn nankọ die!

22, 23. (a) Naegbọn Klistiani lizọnyizọnwatọ lẹ to egbehe tindo nuhudo akọ́ndonanu tọn? (b) Sinsẹ́n jiawu tẹwẹ nọ wá sọn akọ́ndonanu Klistiani tọn mẹ?

²² Akọ́ndonanu yin dandannu to egbehe na mẹhe yin lizọnyizọnwatọ nujọnu tọn Jiwheyẹwhe tọn lẹ. Mẹsusu nọ jẹtukla egbesọegbesọ po azọ̀njijẹ po kavi awufiẹsa yọnhowhe tọn. Mẹjitọ lẹ nọ wazọ́n sinsinyẹn—susu to yé mẹ ma tindo alọwlemẹ de gba—nado penukundo ovi yetọn lẹ go whẹ́n. Po adọgbigbo po, ovi lẹ to wehọmẹ nọ nọavunte sọta nuyiwadomẹji agọ̀ he lẹdo yé pé lẹ. Klistiani susu lẹ nọ pannukọn nuhahun sinsinyẹn akuẹzinzan tọn. Podọ mẹsusu nọ jiya homẹkẹn tọn kavi pannukọn awusinyẹnnamẹnu lẹ na ‘ojlẹ awusinyẹn tọn he dona yin pipehẹ to egbehe lẹ tọn’ wutu! (2 Timoti 3:1) Mọwẹ, diblayi livi ṣidopo lizọnyizọnwatọ Jehovah tọn lẹ tọn to egbehe sọgan dọ hẹ apọsteli Paulu dọmọ: “To onú lẹpo mẹ míwlẹ to whẹsuna míde di [lizọnyizọnwatọ] Jiwheyẹwhe tọn, to [akọ́ndonanu] susu mẹ.” (2 Kọlintinu lẹ 6:4) Klistiani lizọnyizọnwatọ lẹ ma nọ gbọjọ gba. Na nugbo tọn yé dona yin pipà na akọ́ndonanu yetọn.

²³ Humọ, dile e yin do to whẹho Paulu tọn mẹ, akọ́ndonanu nọ hẹn sinsẹ́n jiawu wá. Gbọn akọ́ndonanu dali, mí nọ basi hihọ́na haṣinṣan pẹkipẹki mítọn hẹ Jehovah bosọ nọ hẹn ahun etọn jaya. (Howhinwhẹn lẹ 27:11) Mí nọ hẹn yise mídetiti tọn lodo bosọ nọ hẹn gbẹtọ lẹ zun devi, bo nọ yidogọna mẹmẹsunnu-yinyin Klistiani tọn. (1 Timoti 4:16) Jehovah ko nọgodona lizọnyizọnwatọ etọn lẹ bosọ dona lizọnyizọn yetọn to azán godo tọn ehelẹ whenu. Taidi kọdetọn de, pipòtọ 144 000 lẹ tọn ko yin bibẹpli, podọ livi susu dogọ lẹ tindo todido jidide tọn lọ heyin vivi ogbẹ̀ madopodo tọn dùdù to paladisi aigba ji tọn de mẹ. (Luku 23:43; Osọhia 14:1) Na nugbo tọn, lizọnyizọn Klistiani tọn yin dohia lẹblanu Jehovah tọn. (2 Kọlintinu lẹ 4:1) Na mímẹpo ni wlebòna ẹn bosọ yin homẹhunnọ dọ sinsẹ́n etọn na nọte kakadoi.—1 Johanu 2:17.

[Nudọnamẹ Odò Tọn]

Be Hiẹ Sọgan Na Gblọndo Ya?

• Azọngban tẹmẹ wẹ Klistiani owhe kanweko tintan tọn lẹpo tindo mahẹ te?

• Whetẹnu podọ gbọn mẹnu dali wẹ Klistiani lizọnyizọnwatọ de nọ yin dide?

• Walọyizan tẹwẹ Klistiani lizọnyizọnwatọ de dona wleawuna?

• Naegbọn Klistiani lizọnyizọnwatọ de dona doakọnnanu to awusinyẹnnamẹnu lẹ nukọn?

[Yẹdide to weda 17]

Timoti yin pinplọn Ohó Jiwheyẹwhe tọn sọn ovu whenu. E lẹzun lizọnyizọnwatọ dide de to whenuena e yin bibaptizi

[Yẹdide to weda 18]

Baptẹm yin dohia klandowiwe hlan Jiwheyẹwhe tọn bo nọ dohiagona mẹdide mẹde tọn taidi lizọnyizọnwatọ de

[Yẹdide to weda 20]

Klistiani lizọnyizọnwatọ lẹ nọ tindo ojlo nado wadevizọn