NUPINPLỌN 48
Nọ Yí Nuyọnẹn Do De Họntọn Towe Lẹ
Họntọn alọmayiemẹ lẹ nọ hẹn ayajẹ wá na mí to ojlẹ dagbe lẹ mẹ, bosọ nọ hẹn mí lodo to ojlẹ awusinyẹn tọn lẹ mẹ. Amọ́, Biblu na mí avase dọ e ma yin mẹlẹpo wẹ yin họntọn dagbe. Enẹwutu, nawẹ a gán de họntọn dagbe lẹ gbọn? Gbọ mí ni gbadopọnna kanbiọ he bọdego lẹ.
1. Nawẹ mẹhe a nọ jihọntọn hẹ lẹ gán yinuwado jiwe gbọn?
Mí nọ saba jlo na yinuwa taidi mẹhe mí nọ yí whenu zan dopọ hẹ lẹ. Ehe gán yin to aliho dagbe kavi ylankan mẹ—podọ ehe gán jọ eyin mí nọ yí whenu zan dopọ hẹ yé nukun sọ nukun wẹo kavi to nọtẹn gbẹdido Intẹnẹt ji tọn lẹ ji. Biblu tlẹ dọ dọ, “mẹhe nọ zinzọnlin hẹ nuyọnẹntọ na yọnnuin, ṣigba, mẹhe nọ dogbẹ́ hẹ nulunọ [enẹ wẹ mẹhe ma yiwanna Jehovah lẹ] ma na tindo kọdetọn dagbe.” (Howhinwhẹn lẹ 13:20) Họntọn he yiwanna Jehovah bosọ nọ sẹ̀n ẹn lẹ sọgan gọalọna we nado dọnsẹpọ ewọ dogọ, podọ nado nọ basi nudide dagbe lẹ. Ṣigba, họntọnjiji pẹkipẹki hẹ mẹhe ma yin hagbẹ agun lọ tọn lẹ gán hẹn mí jẹla na Jehovah. Abajọ Biblu dotuhomẹna mí nado nọ yí nuyọnẹn do de họntọn mítọn lẹ! Eyin mí jihọntọn hẹ mẹhe yiwanna Jiwheyẹwhe lẹ, e nọ hẹn ale wá na mí podọ na yelọsu. E nọ zọ́n bọ mí “nọ to tulina ode awetọ bo nọ to ode awetọ hẹn lodo” zọnmii.—1 Tẹsalonikanu lẹ 5:11.
2. Naegbọn Jehovah nọ tindo ojlo to mẹhe a nọ jihọntọn hẹ lẹ mẹ?
Jehovah nọ yí sọwhiwhe do de họntọn etọn lẹ. “Nugbonọ lẹ wẹ nọ jihọntọn pẹkipẹki hẹ Ẹ.” (Howhinwhẹn lẹ 3:32) Nawẹ e na ṣí na Jehovah eyin mí de nado jihọntọn hẹ mẹhe ma yiwanna ẹn lẹ? Homẹ etọn ma na hùn depope! (Hia Jakọbu 4:4.) To alọ devo mẹ, homẹ Jehovah tọn na hùn do mí go bọ e nasọ kẹalọyi mí di họntọn etọn lẹ, eyin mí ma dogbẹ́ ylankan lẹ bo dọnsẹpọ ewọ po mẹhe yiwanna ẹn lẹ po.—Salmu lẹ 15:1-4.
DINDONANU DOGỌ
Gbadopọnna nuhewutu e do yin nujọnu dọ mí ni nọ pọ́n ohá do dó, gọna lehe mí sọgan jihọntọn he na hẹn gbẹzan mítọn tindo ayajẹ dogọ lẹ do.
3. Nọ ṣọ́ dewe sọta ogbẹ́ ylankan lẹ
Ogbẹ́ ylankan lẹ wẹ mẹhe ma yiwanna Jiwheyẹwhe po nujinọtedo etọn lẹ po lẹ. Hò VIDEO lọ, enẹgodo dọhodo kanbiọ he bọdego ji.
Nawẹ mí gán jẹ ogbẹ́ ylankan lẹ do ji to mayọnẹn mẹ gbọn?
Hia 1 Kọlintinu lẹ 15:33, enẹgodo dọhodo kanbiọ ehelẹ ji:
Mẹnu lẹ wẹ gán yin ogbẹ́ ylankan lẹ na we? Etẹwutu?
Hia Salmu lẹ 119:63, enẹgodo dọhodo kanbiọ ehe ji:
Whẹpo a nado jihọntọn hẹ mẹde, omẹ nankọ wẹ a dona mọdọ mẹlọ yin?
Pọmu vivó dopo wẹ nọ hẹn dehe pò lẹpo gble. Nawẹ ogbẹ́ ylankan dopo dido gán bẹpla we gbọn?
4. Mí gán jihọntọn hẹ mẹhe ninọmẹ yetọn gbọnvona mítọn lẹ
Biblu dọhodo Davidi po Jonatani po ji he nọgbẹ̀ to Islaeli hohowhenu tọn. Jonatani yin mẹho na Davidi taun bosọ yin visunnu ahọlu tọn; etomọṣo yé omẹ awe lẹ lẹzun họntọn alọmayiemẹ lẹ. Hia 1 Samuẹli 18:1, enẹgodo dọhodo kanbiọ ehe ji:
Naegbọn e ma yin mẹhe to ohá dopolọ ji hẹ mí kavi tin to ninọmẹ dopolọ mẹ hẹ mí lẹ kẹdẹ janwẹ mí na nọ jihọntọn hẹ?
Hia Lomunu lẹ 1:11, 12, enẹgodo dọhodo kanbiọ ehe ji:
Nawẹ họntọn he yiwanna Jehovah lẹ sọgan na tuli ode awetọ gbọn?
To video wadohia tọn ehe mẹ, pọ́n lehe mẹmẹsunnu jọja de jihọntọn lẹ do to fihe e ma lẹn do. Hò VIDEO lọ, enẹgodo dọhodo kanbiọ he bọdego lẹ ji.
To video lọ mẹ, naegbọn mẹjitọ Akil tọn lẹ to nuhà gando mẹhe e to gbẹdo hẹ to wehọmẹ lẹ go?
Etẹlẹ wẹ sisẹ́ ẹ to tintan whenu nado jihọntọn hẹ omẹ mọnkọ lẹ?
Nawẹ e wá penugo nado duto ṣokẹdẹninọ ji gbọn?
5. Lehe a gán jihọntọn dagbe lẹ do
Pọ́n lehe a sọgan mọ họntọn dagbe lẹ do, gọna lehe hiẹ lọsu sọgan yin họntọn dagbe de do. Hò VIDEO lọ.
Hia Howhinwhẹn lẹ 18:24 po 27:17 po, enẹgodo dọhodo kanbiọ ehelẹ ji:
Nawẹ họntọn nugbo lẹ nọ gọalọna ode awetọ gbọn?
Be a tindo họntọn dagbe mọnkọ lẹ ya? Eyin e ma yinmọ, nawẹ a gán jihọntọn mọnkọ lẹ gbọn?
Hia Filipinu lẹ 2:4, enẹgodo dọhodo kanbiọ ehe ji:
Eyin a jlo na do họntọn dagbe lẹ, hiẹ lọsu whẹ́ wẹ dona yin họntọn dagbe de. Nawẹ a gán wàmọ gbọn?
Eyin a jlo na do họntọn dagbe lẹ, hiẹ lọsu whẹ́ wẹ dona yin họntọn dagbe de
MẸDELẸ NỌ DỌ DỌ: “E ma biọ dọ yè ni do nuyise dopolọ lẹ hẹ mẹde whẹpo do jihọntọn hẹ ẹ.”
Etẹwẹ a na dọ?
BLADOPỌ
Eyin mí yí nuyọnẹn do de họntọn mítọn lẹ, mí nọ hẹn homẹ Jehovah tọn hùn, podọ e nọ hẹn ale wá na mílọsu.
Dogbapọn
Naegbọn Jehovah do nọ do ojlo to mẹhe mí nọ jihọntọn hẹ lẹ mẹ?
Họntọn alọpa tẹlẹ wẹ mí dona dapana?
Nawẹ a sọgan mọ họntọn dagbe lẹ bosọ wleawuna haṣinṣan pẹkipẹki de hẹ yé gbọn?
PỌ́N NUDỌNAMẸ DEVO LẸ
Pọ́n lehe họntọn dagbe lẹ gán gọalọna mí to ojlẹ awusinyẹn tọn lẹ mẹ do.
“Jihọntọn Vivẹ́ lẹ Whẹpo Opodo Nido Wá” (Atọ̀họ̀-Nuhihọ́ lọ Tọn, novembre 2019 tọn)
Gbadopọnna afọdide yọ́n-na-yizan delẹ he a gán ze nado jihọntọn dagbe lẹ.
Etẹlẹ wẹ a dona yọnẹn gando họntọnjiji to Intẹnẹt ji go?
To otàn lọ “N’Jẹdò Otọ́ de Tọn Taun” mẹ, pọ́n nuhe gọalọna dawe de nado vọ́ nulẹnpọn do mẹhe e nọ de di họntọn lẹ ji.
“Biblu Nọ Diọ Gbẹzan Mẹtọn” (Atọ̀họ̀-Nuhihọ́ lọ Tọn, avril-juin 2012 tọn)