Odẹ̀

5 Whetẹnu Mí Dona Nọ Hodẹ̀ Podọ to Fie?

MATIN ayihaawe mì na ko doayi e go dọ suhugan sinsẹ̀n he yin tito-basina ganji lẹ tọn nọ wleawuna ohọ̀ dahodaho delẹ na dẹ̀hiho, bosọ nọ na anademẹ lẹ gando ojlẹ tangan he mẹ yè dona nọ hodẹ̀ to azán dopodopo ji te lẹ go. Be Biblu dọ dọ nọtẹn po ojlẹ tangan delẹ po mẹ janwẹ mí dona nọ hodẹ̀ te ya?

Biblu dohia nugbo dọ ninọmẹ delẹ tin he mẹ e sọgbe nado nọ hodẹ̀ te. Di apajlẹ, whẹpo Jesu nido dùnú hẹ hodotọ etọn lẹ, e nọ hodẹ̀ nado dopẹna Jiwheyẹwhe. (Luku 22:17) Podọ to whenue devi etọn lẹ pli nado basi sinsẹ̀n, yé nọ hodẹ̀ dopọ. Gbọnmọ dali, yé gbẹ̀nkàn do aṣa he ko nọ yin hihodo sọn owhe susu lẹ die de go to sinagọgu Juvi lẹ tọn po tẹmpli he to Jelusalẹm lọ po mẹ. Ojlo Jiwheyẹwhe tọn wẹ yindọ tẹmpli enẹ ni yin “ohọ̀ odẹ̀ tọn na akọta lẹpo.”—Malku 11:17.

To whenue devizọnwatọ Jiwheyẹwhe tọn lẹ pli bo hodẹ̀ dopọ, obiọ yetọn lẹ sọgan yin sisè. Eyin mẹhe pli dopọ lọ lẹ tindo linlẹn dopolọ bọ odẹ̀ he yin hihò do ota yetọn mẹ lọ tin to kọndopọ mẹ hẹ nunọwhinnusẹ́n Owe-wiwe tọn lẹ, enẹ nọ hẹn homẹ Jiwheyẹwhe tọn hùn. Odẹ̀ lọ tlẹ sọgan whàn ẹn nado wà nude he vlavo e ma na ko wà eyin mí ma hodẹ̀ hlan ẹn. (Heblu lẹ 13:18, 19) Kunnudetọ Jehovah tọn lẹ nọ hodẹ̀ to gbesisọ mẹ to opli yetọn lẹ ji. Mí yí zohunhun do to oylọ-basina we wá Plitẹnhọ Ahọluduta tọn he sẹpọ we de mẹ nado sè odẹ̀ mọnkọ lẹ na dewe.

Amọ́, Biblu ma plọnmẹ dọ nọtẹn kavi ojlẹ tangan de mẹ janwẹ mí dona nọ hodẹ̀ te gba. Mí hia to Biblu mẹ dọ devizọnwatọ Jiwheyẹwhe tọn susu lẹ nọ hodẹ̀ to whedepopenu podọ to fidepope. Jesu dọmọ: “Whenue hiẹ to dẹ̀ho, biọ abò towe mẹ podọ, to whenuena hiẹ ko sú ohọ̀n towe godo, hodẹ̀ hlan Otọ́ towe he tin to fiwhiwhlá. Whenẹnu, Otọ́ towe he nọ mọnú to nuglọ na suahọ etọn we.”—Matiu 6:6.

Be ehe ma whànmẹ taun ya? Na nugbo tọn, a sọgan dọnsẹpọ Nupojipetọ wẹkẹ lọ tọn to ojlẹ depope mẹ, etlẹ yin to nuglọ bosọ kudeji dọ ewọ na sè towe. Abajọ Jesu do nọ saba dín ojlẹ he mẹ e na tin to edeṣo te nado hodẹ̀! To gbèdopo, e yí ozán dopo blebu do hodẹ̀ hlan Jiwheyẹwhe, nado dín anademẹ sọn ewọ dè whẹpo do basi nudide titengbe de.​—Luku 6:12, 13.

Biblu sọ donù sunnu po yọnnu po devo lẹ go he hodẹ̀ to whenue yé pannukọn nudide sinsinyẹn lẹ kavi whlepọn he sẹhundaga lẹ. Yé nọ hodẹ̀ daga to whedelẹnu podọ do odò to ojlẹ devo lẹ mẹ; yé nọ hodẹ̀ dopọ to pipli lẹ mẹ, podọ whenue yé to yede ṣo. Nujọnu hugan lọ wẹ yindọ yé nọ hodẹ̀. Jiwheyẹwhe tlẹ dotuhomẹna devizọnwatọ etọn lẹ dọmọ: “Mì nọ hodẹ̀ to whepoponu.” (1 Tẹsalonikanu lẹ 5:17) Ewọ nọ to gbesisọ mẹ nado dotoai to whepoponu na mẹhe nọ wà ojlo etọn lẹ. Be tudohomẹnamẹ ehe ma do owanyi etọn na mí hia ya?

Na nugbo tọn, to aihọn he mẹ mẹsusu ma do yise te ehe mẹ, gbẹtọ lẹ nọ do ayihaawe gando nujọnu-yinyin dẹ̀hiho tọn go. A gán nọ kanse dọ, ‘Be dẹ̀hiho ka na hẹn ale wá na mi dódó ya?’

[Nudọnamẹ tangan lẹ]

Mí gán nọ hodẹ̀ to whedepopenu podọ to fidepope