Mì Wleawudaina Azán Jehovah Tọn

 1. Etẹwẹ mí dona wà nado lùn azán Jehovah tọn tọ́n?

WHENUE Biblu dọho gando “azán Jehovah tọn” go, e nọ dlẹnalọdo ojlẹ he mẹ Jehovah na dawhẹna kẹntọ etọn lẹ bo whlẹn omẹ etọn lẹ gán te. To hohowhenu, Jehovah ko hẹn whẹdida ṣẹ to ojlẹ delẹ mẹ. (Isa. 13:1, 6; Ezek. 13:5; Zef. 1:8) To ojlẹ mítọn mẹ, “azán Jehovah tọn” na bẹjẹeji po mẹgbeyinyan sọta Babilọni Daho lọ po, bo na klita do awhàn Amagẹdọni tọn mẹ. Nado lùn “azán” enẹ tọ́n, mí dona wleawu todin. Na nugbo tọn, Jesu plọnmẹ dọ mí dona “wleawudai” na “nukunbibia daho” lọ, ehe dohia dọ nude wẹ e yin he mí dona to wiwà zọnmii.—Mat. 24:21; Luku 12:40.

 2. Naegbọn mí gán mọaleyi sọn owe 1 Tẹsalonikanu lẹ tọn mẹ?

² To wekanhlanmẹ gbọdo apọsteli Paulu tọn tintan hlan Tẹsalonikanu lẹ mẹ, e yí apajlẹ delẹ zan nado gọalọna Klistiani lẹ nado wleawudaina whẹdazan daho Jehovah tọn. Paulu yọnẹn dọ azán Jehovah tọn ma na wá tlolo to ojlẹ enẹ mẹ. (2 Tẹs. 2:1-3) Etomọṣo, e dotuhomẹna mẹmẹsunnu etọn lẹ nado wleawudaina azán enẹ taidi dọ wunkẹngbe wẹ e na wá nkọ, podọ mílọsu gán yí ayinamẹ etọn do yizan mẹ. Mì gbọ mí ni gbadopọnna nuhe e dọ gando: (1) lehe azán Jehovah tọn na wá do, (2) mẹhe ma na lùn azán enẹ tọ́n lẹ, gọna (3) lehe mí gán wleawudai nado luntọ́n do go.

 3. Nawẹ azán Jehovah tọn na wá taidi ajotọ de to zánmẹ gbọn? (Sọ pọ́n yẹdide lọ.)

³ “Kẹdẹdi ajotọ de to zánmẹ.” (1 Tẹs. 5:2) Ehe wẹ yin tintan to apajlẹ atọ̀n he yin yiyizan nado basi zẹẹmẹ lehe azán Jehovah tọn na wá do tọn lẹ mẹ. Ajotọ lẹ nọ saba yawu yinuwa to zánmẹ whenue mẹlẹ ma lẹn do paali. Mọdopolọ, azán Jehovah tọn na wá to ajiji mẹ, bo na ṣiṣọ́ do mẹsusu ji. Lehe nujijọ lọ lẹ na wá aimẹ po awuyiya po do tlẹ gán paṣa Klistiani nugbo lẹ lọsu. Amọ́, to vogbingbọn mẹ na mẹylankan lẹ, míwlẹ ma na yin vivasudo.

 4. Aliho tẹ mẹ wẹ azán Jehovah tọn taidi awufiẹsa ajipanu tọn te?

⁴ “Kẹdẹdile awufiẹsa ajipanu tọn nọ wá yọnnu he to ohò de ji do.” (1 Tẹs. 5:3) Yọnnu he to ohò de ma gán dọ ojlẹ he mẹ ovi-nú na sọ́ ẹ te taun. Amọ́, matin ayihaawe, e yọnẹn dọ ovi-nú na sọ́ emi to gbèdopo dandan. Eyin azán enẹ pé, ovi-nú gán jẹ wiwà ẹ ji to ajiji mẹ po awufiẹsa po madoalọte. Mọdopolọ, mí ma yọ́n azán po ogàn he mẹ azán Jehovah tọn na bẹjẹeji te po. Etomọṣo, mí kudeji dọ e na wá, podọ whẹdida Jiwheyẹwhe tọn do mẹylankan lẹ ji na yin to ajiji mẹ bọ yé ma gán họ̀ngán.

 5. Aliho tẹ mẹ wẹ nukunbibia daho lọ taidi zánfinfọ́n te?

⁵ Taidi zánfinfọ́n. Apajlẹ atọ̀ntọ he Paulu yizan sọ donù ajotọ he to núfìn to zánmẹ go. Amọ́ tofi, e taidi dọ Paulu yí azán Jehovah tọn jlẹdo zánfinfọ́n go. (1 Tẹs. 5:4) Ajotọ he wá to zánmẹ lẹ gán hẹn alọnu yetọn ján sọmọ bo ma na yọnẹn dọ whenu to yìyì. Hinhọ́n zánfinfọ́n tọn gán họ́n do yé ji bo de yé gbà to ajiji mẹ. Mọdopolọ, nukunbibia daho lọ na de mẹhe nọ gbọṣi zinvlu mẹ taidi ajotọ bo nọ zindonukọn to nuhe Jiwheyẹwhe gbẹwanna lẹ wiwà mẹ lẹ gbà. To vogbingbọn mẹ na yewlẹ, mí gán wleawufo nado gbẹ́ walọ he Jehovah gbẹwanna lẹ dai, bo zindonukọn to “dagbewà wunmẹ lẹpo, dodowiwa po nugbo po” mẹ. (Efe. 5:8-12) Enẹgodo, Paulu yí apajlẹ awe he tindo kanṣiṣa hẹ yede lẹ zan nado basi zẹẹmẹ mẹhe ma na luntọ́n lẹ tọn.

 6. Linlẹn tẹ mẹ wẹ suhugan mẹlẹ tọn to amlọndọ te? (1 Tẹsalonikanu lẹ 5:6, 7)

⁶ “Mẹhe nọ damlọn lẹ.” (Hia 1 Tẹsalonikanu lẹ 5:6, 7.) Paulu yí mẹhe ma na lùn azán Jehovah tọn tọ́n lẹ jlẹdo mẹhe to amlọndọ lẹ go. Yé ma nọ yọ́n nuhe to jijọ lẹdo yé lẹ kavi yọnẹn dọ whenu to yìyì. Enẹwutu, yé ma gán doayi nujijọ titengbe delẹ go kavi yinuwa gando yé go. To egbehe, suhugan mẹlẹ tọn wẹ to amlọndọ to gbigbọ-liho. (Lom. 11:8) Yé ma nọ kiyana kunnudenu lọ dọ mí to gbẹnọ to “azán godo tọn lẹ” mẹ, podọ dọ nukunbibia daho lọ na wá to madẹnmẹ. Nujijọ ayidego tọn aihọn lọ tọn lẹ gán fọ́n mẹdelẹ sọn amlọn gbigbọmẹ tọn mẹ bo whàn yé nado tindo ojlo kleun de to owẹ̀n Ahọluduta tọn mítọn mẹ. Amọ́, mẹsusu wẹ nọ gọ̀ amlọndọ kakati nado gbọṣi nukle. Mẹdelẹ he tlẹ yise dọ azán whẹdida tọn de tin nọ lẹndọ e ma na wá todin tlolo. (2 Pita 3:3, 4) Amọ́, mí yọnẹn dọ ayinamẹ gbọdo lọ nado gbọṣi nukle yin niyaniya tọn hugan gbede pọ́n dile ojlẹ to yìyì.

 7. Nawẹ mẹhe Jiwheyẹwhe na vasudo lẹ taidi ahànnumunọ lẹ gbọn?

⁷ “Mẹhe nọ nùahànmú lẹ.” Apọsteli lọ yí mẹhe Jiwheyẹwhe na vasudo lẹ jlẹdo ahànnumunọ lẹ go. Mẹhe nùahànmú de ma nọ yọ́n nuhe to jijọ lẹdo e, podọ e ma nọ basi nudide dagbe lẹ. Mọdopolọ, mẹylankan lẹ ma nọ yinuwa to kọndopọ mẹ hẹ avase Jiwheyẹwhe tọn lẹ. Yé nọ de aliho gbẹninọ tọn he nọ plan yé yì vasudo mẹ. Amọ́, e yin bibiọ to Klistiani lẹ si nado gbọṣi lẹnpọn dagbenọ-yinyin yetọn mẹ bosọ nọ nukle. (1 Tẹs. 5:6) Weyọnẹntọ Biblu tọn de basi zẹẹmẹ nukleninọ tọn taidi “mẹde he ahun etọn ma nọ gbàdo, bọ ehe nọ hẹn ẹn penugo nado lẹnnupọn ganji bo basi nudide he sọgbe.” Naegbọn ahun mítọn ma dona nọ gbàdo? Na mí nikaa dadó whẹho tonudidọ tọn egbezangbe tọn kavi whẹho paa gbẹtọvi tọn lẹ mẹ. Kọgbidinamẹ lọ nado nọgodona tonudọgbẹ́ de na jideji dile azán Jehovah tọn to dindọnsẹpọ dogọ. Amọ́, mí ma dona nọ to nuhà gando lehe mí dona yinuwa do go. Gbigbọ Jiwheyẹwhe tọn gán gọalọna mí bọ ahun mítọn ma na gbàdo, podọ mí na penugo nado basi nudide dagbe lẹ.—Luku 12:11, 12.

 8. Nawẹ 1 Tẹsalonikanu lẹ 5:8 basi zẹẹmẹ jẹhẹnu he na gọalọna mí nado nọ nukle bo hẹn lẹnpọn dagbenọ-yinyin mítọn go lẹ tọn gbọn? (Sọ pọ́n yẹdide lọ.)

⁸ Mì ‘ze tùnudo de po ogangbakun de’ po do. Paulu yí mí jlẹdo awhànfuntọ he to aṣeji bo sọawhànnu lẹ go. (Hia 1 Tẹsalonikanu lẹ 5:8.) E nọ yin nukundo sọn awhànfuntọ de si nado wleawudaina awhàn to whelẹponu. Nudopolọ wẹ e yin na mílọsu. Mí nọ wleawudaina azán Jehovah tọn eyin mí ze tùnudo yise po owanyi po tọn gọna ogangbakun todido tọn do. Jẹhẹnu ehelẹ gán gọalọna mí taun.

 9. Nawẹ yise mítọn nọ basi hihọ́na mí gbọn?

⁹ Tùnudo de nọ basi hihọ́na ahun awhànfuntọ de tọn. Yise po owanyi po nọ basi hihọ́na ahun yẹhiadonu tọn mítọn. Yé na gọalọna mí nado to Jiwheyẹwhe sẹ̀n bosọ to apajlẹ Jesu tọn hodo zọnmii. Yise nọ hẹn mí deji dọ Jehovah na suahọ mí eyin mí dín ewọ po ahun lẹpo po. (Heb. 11:6) E na whàn mí nado hẹn nugbonọ-yinyin mítọn na Nukọntọ mítọn Jesu go eyin etlẹ biọ dọ mí ni doakọnna awusinyẹnnamẹnu lẹ. Mí gán wleawuna yise nado pehẹ avùnnukundiọsọmẹnu lẹ eyin mí nọ lẹnnupọndo apajlẹ egbezangbe tọn mẹhe hẹn tenọgli yetọn go lẹ tọn ji, mahopọnna homẹkẹn kavi nuhahun akuẹzinzan tọn. Podọ, mí gán dapana omọ̀ agbasanu lẹ bibẹpli tọn eyin mí hodo apajlẹ mẹhe hẹn gbẹzan yetọn bọawu nado ze Ahọluduta lọ do otẹn tintan mẹ lẹ tọn.b

10. Nawẹ owanyi he mí do na Jiwheyẹwhe po kọmẹnu mítọn lẹ po nọ gọalọna mí nado doakọnnanu gbọn?

¹⁰ Owanyi sọ yin dandan nado nọ nukle bo gbọṣi lẹnpọn dagbenọ-yinyin mítọn mẹ. (Mat. 22:37-39) Owanyi na Jiwheyẹwhe nọ gọalọna mí nado doakọnnanu to lizọnyizọn lọ mẹ, mahopọnna nuhahun depope he mọwiwà gán hẹnwa na mí. (2 Tim. 1:7, 8) Na mí sọ yiwanna mẹhe ma tindo nuyise dopolọ hẹ mí lẹ wutu, mí nọ to yẹwhehodọ bosọ nọ to azọ́nwa to aigba-denamẹ mítọn ji zọnmii bo tlẹ nọ dekunnu gbọn alokan po wekanhlanmẹ lẹ po gblamẹ. Mí ma nọ hẹn todido bu dọ to gbèdopo, kọmẹnu mítọn lẹ na wá diọ bo jẹ nuhe sọgbe wà ji.—Ezek. 18:27, 28.

11. Nawẹ owanyi na yisenọ hatọ lẹ nọ gọalọna mí gbọn? (1 Tẹsalonikanu lẹ 5:11)

¹¹ Mí sọ nọ yiwanna Klistiani hatọ mítọn lẹ. Mí nọ do owanyi mọnkọ hia eyin mí “nọ to tulina ode awetọ bo nọ to ode awetọ hẹn lodo.” (Hia 1 Tẹsalonikanu lẹ 5:11.) Kẹdẹdile awhànfuntọ lẹ nọ wazọ́n abọ́ to abọ́ go to awhàngbenu do, mí nọ na tuli ode awetọ. Na nugbo tọn, awhànfuntọ de gán gbleawuna awhànfuntọ hatọ etọn to awhàngbenu to mayọnẹn mẹ, amọ́ e ma na desọn ojlo mẹ bo wàmọ gbede. Mọdopolọ, mí ma na desọn ojlo mẹ gbede bo gbleawuna mẹmẹsunnu po mẹmẹyọnnu mítọn lẹ po kavi yí oylan do sú oylan họ́. (1 Tẹs. 5:13, 15) Mí sọ nọ do owanyi mítọn hia eyin mí nọ na sisi mẹmẹsunnu he nọ deanananu to agun mẹ lẹ. (1 Tẹs. 5:12) Whenue Paulu kàn wekanhlanmẹ ehe, agun Tẹsalonika tọn yin didoai e ma ko pé owhe dopo. E yọnbasi dọ sunnu dide agun lọ tọn lẹ ma do numimọ sọmọ bo gán ko ṣì nudelẹ wà. Etomọṣo, yé jẹna sisi. Dile nukunbibia daho lọ to dindọnsẹpọ, e gán biọ dọ mí ni ganjẹ anademẹ mẹho agun tọn mítọn lẹ tọn go hugan lehe e yindo todin. Vlavo mí ma na mọ anademẹ yí tlọlọ sọn tatọ́-tẹ̀nnọ kavi alahọ mẹ; enẹwutu, nujọnu wẹ e yin nado plọn nado yiwanna mẹho agun tọn mítọn lẹ todin bosọ nọ na yé sisi. Eyin etlẹ to kínni bo to kanna, mì gbọ mí ni hẹn lẹnpọn dagbenọ-yinyin mítọn go, bo ma nọ ze ayiha do awugbopo yetọn lẹ ji, amọ́ do nugbo lọ ji dọ Jehovah wẹ to anadena nugbonọ ehelẹ gbọn Klisti gblamẹ.

12. Nawẹ todido mítọn nọ basi hihọ́na nulẹnpọn mítọn gbọn?

¹² Kẹdẹdile ogangbakun de nọ basi hihọ́na ota awhànfuntọ de tọn do, todido whlẹngán tọn mítọn nọ basi hihọ́na nulẹnpọn mítọn. Po todido he lodo de po, mí nọ yọnẹn dọ nuhe aihọn ehe nọ zedonukọnnamẹ lẹ ma vó nude. (Flp. 3:8) Todido mítọn nọ zọ́n bọ ahun mítọn ma nọ gbàdo, bọ mí sọ nọ deji. Ehe yin nugbo to whẹho Wallace po Laurinda po he to sinsẹ̀n to Aflika tọn mẹ. To osẹ atọ̀n gblamẹ, dopodopo yetọn hẹn mẹjitọ de bu to okú mẹ. Na azọ̀n bẹplamẹ COVID-19 tọn wutu, yé ma gán lẹkọyi whé nado nọpọ́ hẹ whẹndo yetọn lẹ. Wallace wlan dọmọ: “Todido fọnsọnku tọn gọalọna mi nado lẹnnupọndo omẹ mítọn he kú lọ lẹ ji, e ma yin do lehe yé te do to azán godo tọn yetọn to aihọn ehe mẹ ji gba, amọ́ do lehe yé na te do to azán tintan yetọn to aihọn yọyọ lọ mẹ ji. Todido ehe nọ miọnhomẹna mi whenue n’to awubla kavi whenue n’jẹdò yetọn.”

13. Etẹwẹ mí gán wà nado mọ gbigbọ wiwe yí?

¹³ “Mì ṣí miyọ́n gbigbọ tọn blo.” (1 Tẹs. 5:19) Paulu yí gbigbọ wiwe jlẹdo miyọ́n he to mí mẹ de go. Eyin mí tindo gbigbọ Jiwheyẹwhe tọn, mí nọ hùnzo bọ apàpà nọ sọ́ mí nado wà nuhe sọgbe, podọ mí nọ mọ huhlọn nado wazọ́n na Jehovah. (Lom. 12:11) Etẹwẹ mí gán wà nado mọ gbigbọ wiwe yí? Mí gán hodẹ̀, nọ plọn Ohó gbọdo Jiwheyẹwhe tọn bosọ nọ dogbẹ́ hẹ titobasinanu he e yí gbigbọ etọn do to anadena lọ. Mọwiwà na gọalọna mí nado wleawuna “sinsẹ́n gbigbọ tọn.”—Gal. 5:22, 23.

14. Etẹwẹ mí dona dapana eyin mí na to gbigbọ Jiwheyẹwhe tọn mọyi zọnmii? (Sọ pọ́n yẹdide lọ.)

¹⁴ To whenue Jiwheyẹwhe ko na mí gbigbọ wiwe etọn godo, mí dona payi ma nado “ṣí miyọ́n gbigbọ tọn.” Mẹhe nọ gbọṣi wiwe ji to linlẹn po walọyizan yetọn po mẹ lẹ kẹdẹ wẹ Jiwheyẹwhe nọ na gbigbọ etọn. E ma na zindonukọn nado to gbigbọ etọn na mí eyin mí nọ lẹnnupọndo onú mawé lẹ ji bosọ nọ yinuwa sọgbe hẹ yé. (1 Tẹs. 4:7, 8) Podọ, nado to gbigbọ wiwe mọyi zọnmii, mí ma dona “yinuwa hẹ dọdai lẹ po vlẹko po.” (1 Tẹs. 5:20) Tofi, “dọdai lẹ” to alọdlẹndo owẹ̀n he gbigbọ Jiwheyẹwhe tọn nọ do mẹ lẹ, ehe bẹ owẹ̀n he gando azán Jehovah tọn po niyaniya-yinyin ojlẹ mítọn tọn po go lẹ hẹn. Mí ma nọ sẹ̀ azán enẹ donukọn to linlẹn mítọn mẹ, bo lẹndọ Amagẹdọni ma na wá to gbẹwhenu mítọn. Kakatimọ, mí nọ donukun in, bo nọ hẹn ẹn do ayiha mẹ gligli, gbọn walọyizan dagbe de go hinhẹn gọna alọnu mítọn hinhẹn ján to “nuyiwa mẹdezejo na Jiwheyẹwhe tọn lẹ” mẹ egbesọegbesọ dali.—2 Pita 3:11, 12.

15. Etẹwẹ mí gán wà na nudọnamẹ agọ̀ po nujijla oklọ tọn aovi lẹ tọn po nikaa doyẹklọ mí? (1 Tẹsalonikanu lẹ 5:21)

¹⁵ To madẹnmẹ, mẹhe nọ diọnukunsọ Jiwheyẹwhe lẹ na lá to linlẹn de mẹ dọ: “Jijọho po hihọ́ po!” (1 Tẹs. 5:3) Nujijla oklọ tọn aovi lẹ tọn na gọ́ aigba lọ ji, bo na hẹn suhugan mẹlẹ tọn buali. (Osọ. 16:13, 14) Bọ míwlẹ lo? Mí ma na yin yẹdoklọ eyin mí nọ “dindona nulẹpo.” (Hia 1 Tẹsalonikanu lẹ 5:21.) Hogbe Glẹkigbe tọn he yin lilẹdo “dindona” nọ yin yiyizan gando ogànmú akuẹgegenu tọn lẹ gbigbejepọn go. Enẹwutu, mí dona nọ gbeje nuhe mí nọ sè kavi hia lẹ pọ́n nado yọnẹn eyin yé yin hójọhó. Ehe yin nujọnu na Tẹsalonikanu lẹ, podọ e na tlẹ sọ yin nujọnu na mí hugan dile nukunbibia daho lọ to dindọnsẹpọ. Kakati nado nọ kẹalọyi nuhe mẹlẹ dọ lẹ domọ poun, mí nọ yí nugopipe nulẹnpọn tọn mítọn zan bo nọ yí nuhe mí hia kavi sè lẹ jlẹdo nuhe Biblu po titobasinanu Jehovah tọn po dọ go. Gbọnmọ dali, nujijla oklọ tọn aovi lẹ tọn kavi ayiha gigẹdẹ yetọn depope ma na doyẹklọ mí.—Howh. 14:15; 1 Tim. 4:1.

16. Todido dejidego tẹwẹ mí tindo, podọ etẹwẹ mí magbe nado wà?

¹⁶ Devizọnwatọ Jiwheyẹwhe tọn lẹ na lùn nukunbibia daho lọ tọn taidi pipli de. Amọ́ mí ma yọ́n nuhe ogbẹ̀ dopodopo mítọn tọn na yin to osọ. (Jak. 4:14) Etomọṣo, vlavo mí lùn nukunbibia daho lọ tọ́n kavi kú jẹnukọnna ẹn, mí na mọ ahọsumẹ ogbẹ̀ madopodo tọn yí eyin mí hẹn nugbonọ-yinyin mítọn go. Mẹyiamisisadode lẹ na nọpọ́ hẹ Klisti to olọn mẹ. Lẹngbọ devo lẹ na nọ paladisi mẹ to aigba ji. Mì gbọ mímẹpo ni nọ ze ayiha do todido jiawu mítọn ji bo wleawudaina azán Jehovah tọn!