Mì Nọ Wà Nulẹpo Na Gigo Jiwheyẹwhe Tọn”

TAIDI devizọnwatọ klandowiwe Jiwheyẹwhe tọn lẹ, dandannu wẹ e yin na mí nado nọ do gigo Jehovah tọn hia to nuhe mí nọ dọ bo nọ wà lẹpo mẹ. Apọsteli Paulu na nunọwhinnusẹ́n he na deanana mí de to whenuena e wlan dọmọ: “Vlavo mì to dùdù kavi to nùnù wẹo kavi nudevo depope he mì to wiwà, mì nọ wà nulẹpo na gigo Jiwheyẹwhe tọn.” (1 Kọl. 10:31) Ehe nọ biọ dọ mí ni tẹdo nujinọtedo dodo Jehovah tọn lẹ go, he nọ do jẹhẹnu pipé etọn lẹ hia. (Kol. 3:10) Mí dona nọ hodo apajlẹ Jiwheyẹwhe tọn, taidi mẹwiwe lẹ.—Efe. 5:1, 2.

² Nado dọ̀n ayidonugo Klistiani lẹ tọn wá ehe ji, apọsteli Pita wlan dọmọ: “Taidi ovi tonusetọ lẹ, mì sọ yin adàdiọna sọgbe hẹ ojlo he mì tindo dai to wunvi mìtọn mẹ lẹ ba blo, ṣigba kẹdẹdi Omẹ Wiwe lọ he ylọ mì, mì lẹzun wiwe to walọyizan mìtọn lẹpo mẹ, na e yin winwlan dọmọ: ‘Mì dona yin wiwe, na wiwe wẹ yẹn.’” (1 Pita 1:14-16) Taidi to Islaeli hohowhenu tọn, e yin bibiọ to mẹhe to agun Klistiani tọn mẹ lẹpo si nado yin wiwe. Ehe zẹẹmẹdo dọ yé dona gbọṣi madoblọ mẹ, bo wé sọn hẹnflu ylando tọn po gbigbọ aihọn tọn lẹ po mẹ. Gbọnmọ dali, yé na yin kinklandovo na sinsẹ̀nzọn wiwe.—Eks. 20:5.

³ Nado hẹn wiwejininọ go, mí dona tẹdo osẹ́n po nunọwhinnusẹ́n Jehovah tọn lẹ po go, he yin didohia hezeheze to Owe Wiwe lẹ mẹ. (2 Tim. 3:16) Gbọn Biblu gblamẹ, mí ko plọnnu dogbọn Jehovah po aliho etọn lẹ po dali, bo ko sọ yin dindọnsẹpọ ẹ. Biblu pinplọn mítọn ko hẹn mí kudeji dọ nujọnu wẹ e yin nado dín Ahọluduta Jiwheyẹwhe tọn whẹ́, podọ nado ze ojlo Jehovah tọn wiwà do otẹn tintan mẹ to gbẹzan mítọn mẹ. (Mat. 6:33; Lom. 12:2) Ehe nọ biọ dọ mí ni ze gbẹtọ-yinyin yọyọ lọ do.—Efe. 4:22-24.

⁴ Titẹdo nujinọtedo dodo Jehovah tọn lẹ go ma nọ bọawu to whepoponu gba. Kẹntọ mítọn, Satani Lẹgba nọ to tintẹnpọn nado lẹkọna mí sọn aliho nugbo tọn lọ ji. Nuyiwadomẹji ylankan aihọn lọ tọn po ayilinlẹn ylando tọn mítọn titi lẹ po nọ hẹn nulẹ sinyẹnawu na mí to whedelẹnu. Gbẹninọ sọgbe hẹ klandowiwe mítọn nọ biọ avùnhiho gbigbọmẹ tọn de to mí si. Owe-wiwe lẹ dọna mí dọ eyin mí pannukọn nukundiọsọmẹ kavi whlepọn lẹ, ehe ma dona paṣa mí. Mí dona jiya na dodowiwa wutu. (2 Tim. 3:12) Mí sọgan jaya to whenuena mí tin to whlepọn lẹ mẹ, na mí yọnẹn dọ whlepọn mọnkọtọn lẹ yin kunnudenu dọ mí to ojlo Jiwheyẹwhe tọn wà.—1 Pita 3:14-16; 4:12, 14-16.

⁵ Dile Jesu tlẹ yin mẹpipe de, e plọn tonusise gbọn nuhe e jiya etọn lẹ dali. E ma joawuna mẹtẹnpọn Satani tọn lẹ kavi doafọna yanwle aihọn tọn lẹ gbede. (Mat. 4:1-11; Joh. 6:15) Jesu ma tlẹ lẹnnupọndo gbejijo ji gbede. Dile etlẹ yindọ aihọn gbẹwanna ẹn na nugbonọ-yinyin etọn wutu, e tẹdo nujinọtedo dodo Jehovah tọn lẹ go. Ojlẹ vude jẹnukọnna okú Jesu tọn, e na avase devi etọn lẹ dọ aihọn na gbẹwanna yelọsu lẹ ga. Bẹsọn whenẹnu gbọ́n wẹ hodotọ Jesu tọn lẹ ko to nukunbibia lẹ mọ, ṣigba yinyọnẹn dọ Visunnu Jiwheyẹwhe tọn ko gbawhàn aihọn tọn nọ na yé adọgbigbo.—Joh. 15:19; 16:33; 17:16.

⁶ Eyin mí ma na yin apadewhe aihọn tọn, mí dona tẹdo nujinọtedo dodo Jehovah tọn lẹ go, dile Ogán mítọn basi do. Gbọnvona dọ mí dona dapana mahẹ tintindo to whẹho tonudidọ aihọn tọn lẹ po gbẹdido aihọn tọn lẹ po mẹ, mí dona sọ nọavùnte sọta walọyizan gblezọn aihọn tọn lẹ. Mí dona nọ yí nukun nujọnu tọn do pọ́n ayinamẹ he tin to Jakọbu 1:21 mẹ, ehe dọmọ: “Mì de dihó lẹpo po ylanwiwa wunmẹ lẹpo po sẹ̀, bo yí walọmimiọn do kẹalọyi dido ohó lọ tọn do mì mẹ, he penugo nado whlẹn mì gán.” Gbọn nupinplọn po opli lẹ yìyì po dali, mí sọgan “do ohó” nugbo lọ tọn do ayiha po ahun mítọn po mẹ, bo ma tlẹ na jẹ ojlo tindo ji na nuhe aihọn nọ zedonukọnnamẹ lẹ. Devi Jakọbu wlan dọmọ: “Be mì ma yọnẹn dọ họntọnjiji hẹ aihọn, okẹ̀n wẹ e yin to Jiwheyẹwhe dè? Enẹwutu, mẹdepope he jlo na yin họntọn aihọn tọn to ede hẹn zun kẹntọ Jiwheyẹwhe tọn.” (Jak. 4:4) Na ehe wutu, Biblu bẹ tudohomẹnamẹ sinsinyẹn lẹ hẹn dọ mí ni tẹdo nujinọtedo dodo Jehovah tọn lẹ go bo nọla na aihọn lọ.

⁷ Ohó Jiwheyẹwhe tọn na avase mí sọta mahẹ tintindo to walọ winyandomẹ tọn po fẹnnuwiwa tọn lẹ po mẹ. E dọna mí dọmọ: “Mì gbọ fẹnnuwiwa zanhẹmẹ tọn po mawé wunmẹ lẹpo po kavi nukunkẹn ni ma tlẹ yin nùdego to ṣẹnṣẹn mìtọn blo, kẹdẹdile e jẹna omẹ wiwe lẹ do.” (Efe. 5:3) Enẹwutu, mí ma dona dike ayiha mítọn ni nọ lẹnnupọndo nuhe kudiho, bo huwinyan, kavi he demẹpò lẹ ji, podọ mí ma dona nọ dike onú mọnkọtọn lẹ ni nọ tọ́n to hodọdopọ mítọn lẹ mẹ. Gbọnmọ dali, mí na do kunnudenu lọ hia dọ mí jlo nado tẹdo nujinọtedo dodo po walọ wiwe tọn Jehovah tọn lẹ po go.

⁸ Gbọnvona wiwejininọ to gbigbọ-liho podọ to walọyizan-liho, Klistiani lẹ yọ́n nujọnu-yinyin wiwejininọ to agbasa-liho tọn ga. To Islaeli hohowhenu tọn mẹ, Jiwheyẹwhe he yin wiwe biọ dọ osla yetọn ni yin hinhẹn do wiweji. Mílọsu dona gbọṣi wiweji, na Jehovah “nikaa mọ nuhe ma jẹ de” to mí mẹ.—Deut. 23:14.

⁹ Wiwe-yinyin po wiwejininọ to agbasa-liho po tindo kanṣiṣa pẹkipẹki to Biblu mẹ. Di apajlẹ, Paulu wlan dọmọ: “Mẹyiwanna lẹ emi, . . . mì gbọ mí ni klọ́ míde wé sọn hẹnflu agbasalan tọn podọ gbigbọ tọn lẹpo mẹ, bo nọ to wiwe-yinyin hẹn zun pipé to budisi Jiwheyẹwhe mẹ.” (2 Kọl. 7:1) Enẹwutu, Klistiani sunnu po yọnnu po lẹ dona dovivẹnu nado hẹn agbasa yetọn do wiweji gbọn awulilẹ̀ po avọ̀ yetọn lẹ yinyan to gbesisọ mẹ po dali. Dile ninọmẹ otò de tọn tlẹ gbọnvona devo tọn, to paa mẹ, mí sọgan mọ adí po osin po nado hẹn agbasa mítọn do wiweji podọ nado hẹn ẹn diun dọ ovi mítọn lẹ nọ tin to wiweji.

¹⁰ Na azọ́n kunnudide tọn mítọn wutu, mí nọ saba yin yinyọnẹn taun to okọ́ mítọn mẹ. Hinhẹn owhé mítọn do wiweji podọ do titoji, to homẹ po gbonu po, yin aliho de nado dekunnuna kọmẹnu lẹ. Ehe yin nude he mẹ mẹlẹpo to whẹndo mẹ sọgan tindo mahẹ te. Mẹmẹsunnu lẹ dona tindo ojlo titengbe to owhé lọ po lẹdo etọn lẹ po mẹ, to yinyọnẹn mẹ dọ lẹdo he wé-ṣeke po owhé he gbè nulẹ to kannukannu te po nọ dekunnu dagbe gando mí go na mẹdevo lẹ. Ehe wiwà po nukọntọ-yinyin to whẹho gbigbọmẹ tọn lẹ mẹ po nọ yin kunnudenu de dọ tatọ́ whẹndo tọn lẹ to nukunpedo whédo yetọn go ganji. (1 Tim. 3:4, 12) Mẹmẹyọnnu lẹ lọsu tindo azọngban lọ nado penukundo nulẹ go, titengbe to whégbè. (Titu 2:4, 5) Ovi he yin pinplọn ganji lẹ nọ yí adà yetọn basi nado hẹn yedelẹ po abò yetọn lẹ mẹ po do wiweji podọ do kannukannu. Gbọnmọ dali, whẹndo lọ blebu nọ wazọ́n dopọ nado wleawuna aṣa wiwejininọ tọn he na tin to aihọn yọyọ lọ mẹ nkọ to Ahọluduta Jiwheyẹwhe tọn glọ.

¹¹ To egbehe, susu devizọnwatọ Jehovah tọn lẹ tọn wẹ nọ zan zokẹkẹ kavi mọto taidi tẹnsẹnamẹnu yì opli lẹ. To awà delẹ ji, zokẹkẹ kavi mọto ko lẹzun dandannu de to lizọnyizọn lọ mẹ. Enẹwutu, zokẹkẹ kavi mọto mítọn dona nọ yin hinhẹn do wiweji bo yin nukunpedego ganji. Owhé po tẹnsẹnamẹnu mítọn lẹ po dona dekunnu dọ mí yin dopo to omẹ wiwe Jehovah tọn lẹ mẹ. Ehe sọ gando saki kunnudegbe tọn po Biblu mítọn po go.

¹² Nusisọ́ po aṣọ́dido mítọn po dona tin to kọndopọ mẹ hẹ nunọwhinnusẹ́n Jiwheyẹwhe tọn lẹ. Mí ma sọgan sọawuhia to omẹ nukundeji de nukọn po nusisọ́ he to kluyọ kavi numaylọdọnu tọn de po gba. Lehe mí dona nọ na ayidonugo nusisọ́ mítọn do sọ to whenue mí to afọ Jehovah tọn zedai to lizọnyizọn kunnudegbe tọn mẹ kavi to oplò ji! Nusisọ́ mítọn po aliho he mẹ mí nọ doaṣọ́ te po sọgan yinuwado nukun he mẹdevo lẹ nọ yí do pọ́n sinsẹ̀n-bibasi Jehovah tọn ji. Na nugbo tọn, e ma jẹ nado nọ yinuwa hẹ mẹdevo lẹ po wazẹjlẹgo kavi mẹtọnmahopọn po. (Mika 6:8; 1 Kọl. 10:31-33; 1 Tim. 2:9, 10) Enẹwutu, to whenue mí to awuwle nado tọ́n na lizọnyizọn kunnudegbe tọn kavi nado yì opli agun tọn lẹ, plidopọ lẹdo tọn lẹ, kavi plidopọ daho lẹ, mí dona hẹn nuhe Owe-wiwe lẹ dọ dogbọn wiwejininọ to agbasa-liho po awusọhia jlẹkaji tọn po dali do ayiha mẹ. Na mí nọ jlo nado gbògbéna Jehovah bo pagigona ẹn to whepoponu wutu.

¹³ Mí dona nọ wà nudopolọ to whenue mí to dlapọn basina tatọ́-tẹnnọ mítọn kavi wekantẹn alahọ Kunnudetọ Jehovah tọn lẹ tọn. Nọ flindọ, hogbe lọ Bẹtẹli zẹẹmẹdo “Owhé Jiwheyẹwhe tọn.” Enẹwutu, mí dona nọ sọnú bo yinuwa taidi whenue mí jei opli lẹ to Plitẹnhọ Ahọluduta tọn mẹ.

¹⁴ Etlẹ yin to whenue mí to ayidedai, mí dona nọ na ayidonugo nusisọ́ po aṣọ́dido mítọn po. Mí sọgan nọ kanse míde dọ, ‘Be winyan na hù mi nado dekunnu mayin aṣa tọn na nusisọ́ ṣie wutu wẹ ya?’

¹⁵ Gbọjẹ po aihundida po yin dandannu eyin mí na nọgbẹ̀ bo tindo agbasalilo. Jesu basi oylọna devi etọn lẹ to gbèdopo nado hodo e yì nọtẹn he to olá de nado “gbọjẹ vude.” (Malku 6:31) Gbigbọjẹ gọna aihundida kavi ayidedai sọgan hẹn awuvivi delẹ wá na mí. E sọgan vọ́ huhlọnna mí nado sọgan zindonukọn to azọ́n mítọn mẹ.

¹⁶ Na aihundida wunmẹ susu wẹ tin to egbehe wutu, Klistiani lẹ dona nọ ṣinyan dehe sọgbe lẹ bo nọ do nuyọnẹn Jiwheyẹwhe tọn hia to nuhe wà yé te lẹ mẹ. Dile etlẹ yindọ aihundida tindo otẹn etọn, e ma yin onú titengbe hugan lọ to gbẹ̀mẹ gba. Avase yin nina mí dọ to “azán godo tọn lẹ mẹ,” gbẹtọ lẹ na lẹzun “wanyina gbẹdudu tọ́ kakati nido yin wanyina Jiwheyẹwhe tọ́.” (2 Tim. 3:1, 4) Suhugan nuhe nọ yin yiylọdọ aihundida po ayidedai po to egbehe lẹ tọn wẹ jẹagọ na mẹhe jlo nado tẹdo nujinọtedo dodo Jehovah tọn go lẹ.

¹⁷ Klistiani hohowhenu tọn lẹ dona nọavùnte sọta ninọmẹ mawé tọn he tin to aihọn he yiwanna gbẹdudu he lẹdo yé pé lọ mẹ lẹ. To aihundatẹn Lomu tọn lẹ mẹ, nupọntọ lẹ nọ deayidai gbọn yajiji mẹdevo lẹ tọn pinpọn dali. Danuwiwa, hùnsọndai po fẹnnuwiwa zanhẹmẹ tọn po wẹ nọ yin didohia taidi aihundida nado deayidai na gbẹtọ lẹ, ṣigba Klistiani hohowhenu tọn lẹ nọla na onú mọnkọtọn lẹ. To egbehe, susu to ayidedai aihọn tọn lẹ mẹ wẹ nọ ze onú mọnkọtọn lẹ donukọnnamẹ nado hẹn pekọ wá na ojlo gblezọn gbẹtọvi lẹ tọn. Mí dona “nọ payi” lehe mí to zọnlinzin do go tlala, bo dona nọ gbẹkọ ayidedai he nọ hẹnmẹ flu lẹ go. (Efe. 5:15, 16; Salm. 11:5) Podọ eyin ayidedai lọ lọsu ma tlẹ fọ́n ayihaawe dote, ninọmẹ lọ to paa mẹ sọgan nọma sọgbe.—1 Pita 4:1-4.

¹⁸ Aihundida po ayidedai he sọgbe po susu wẹ tin he Klistiani lẹ sọgan duvivi etọn. Mẹsusu wẹ ko mọaleyi sọn ayinamẹ Owe-wiwe tọn lẹ hihodo mẹ gọna ayinamẹ jlẹkaji tọn he sọgan yin mimọ to owe mítọn lẹ mẹ lẹ.

¹⁹ To whedelẹnu, mẹde sọgan basi oylọna whẹndo susu wá owhé etọn gbè nado duvivi gbẹdido Klistiani tọn. Kavi mẹmẹsunnu po mẹmẹyọnnu lẹ po sọgan yin oylọ-basina wá hùnwhẹ alọwle tọn de kavi nuwiwa pọmẹ tọn de tẹnmẹ. (Joh. 2:2) Mẹhe to jonọ yí lọ lẹ dona hẹn do ayiha mẹ dọ yewlẹ wẹ na hẹn agbàn nuhe jọ to finẹ lẹ tọn. E họnwun dọ, ayiha dona to ote to whenue mẹsusu pli dopọ na ayidedai. Ninọmẹ awuvivo tọn he nọ tin to ayidedai mọnkọtọn lẹ tẹnmẹ ko zọ́n bọ mẹdelẹ ko zẹ̀ dogbó walọ dagbe Klistiani tọn lẹ go, bo ko dù kavi nù zẹjlẹgo kavi tlẹ jai jẹ ylanwiwa sinsinyẹn devo lẹ mẹ. Po ehe po to ayiha mẹ, Klistiani he nọ nọ̀ aṣeji lẹ ko mọdọ nuyọnẹnnu wẹ e yin nado hẹn jlẹkajininọ go, na nuhe dù sọha mẹhe na wá nuwiwa mọnkọ lẹ tẹnmẹ tọn po ojlẹ he e na dẹn na po. Eyin ahàn sinsinyẹn na yin yiyizan to finẹ, e dona yin do jlẹkaji. (Flp. 4:5) Eyin vivẹnu lẹpo yin dido nado mọdọ ayidedai pọmẹ tọn lẹ yin dehe sọgbe bo jlọmẹdote to gbigbọ-liho, núdùdù po ahàn po ma na yin onú titengbe hugan lọ gba.

²⁰ Nudagbe de wẹ e yin nado yin johẹmẹtọ. (1 Pita 4:9) To whenue mí to oylọ-basina Klistiani devo lẹ wá owhé mítọn gbè na núdùdù, kọfanamẹ, aihundida po gbẹdido po, mí dona nọ flin mẹhe tin to nuhudo mẹ lẹ. (Luku 14:12-14) Eyin mí yin dopo to jonọ lẹ mẹ to nuwiwa mọnkọtọn lẹ tẹnmẹ, walọyizan mítọn dona sọgbe hẹ ayinamẹ he tin to Malku 12:31 mẹ lẹ. E nọ saba yọ́n nado do pinpẹn-nutọn hia na homẹdagbe he mẹdevo lẹ dohia mí.

²¹ Klistiani lẹ nọ jaya to nunina susugege Jiwheyẹwhe tọn lẹ mẹ bo nọ yọnẹn dọ yé sọgan “nọ dù bo nọ nù bosọ nọ mọ awuvivi sọn azọ́n sinsinyẹn [yetọn] lẹpo mẹ.” (Yẹwh. 3:12, 13) Eyin mí “nọ wà nulẹpo na gigo Jiwheyẹwhe tọn,” mẹlẹpo, yèdọ jonọyitọ lẹ po jonọ lẹ po sọgan nọ flin ayidedai pọmẹ tọn he wayi lẹ bo nọ jaya dọ e miọnhomẹna emi to gbigbọ-liho.

²² Ovi Kunnudetọ Jehovah tọn lẹ tọn lẹ nọ mọaleyi sọn wepinplọn dodonu tọn aihọn tọn lẹ mẹ. To whenue yé to wehọmẹ yì, ojlo yetọn wẹ nado plọn wehihia po wekinkan po ganji. Nudevo lẹ he nọ yin pinplọnmẹ to wehọmẹ sọgan yọ́n-na-yizan na jọja lẹ dile yé to afọdona yanwle gbigbọmẹ tọn lẹ. To whenue yé gbẹ́ pò to wehọmẹ yì, yé dona dovivẹnu vẹkuvẹku nado ‘flin Mẹdatọ Daho yetọn’ gbọn gbigbọnu lẹ zizedo otẹn tintan mẹ dali.—Yẹwh. 12:1.

²³ Eyin jọja Klistiani he gbẹ́ pò to wehọmẹ yì de wẹ hiẹ, ayiha towe dona to ote taun ma nado nọ dogbẹ́ pẹkipẹki hẹ jọja aihọnmẹnu lẹ. (2 Tim. 3:1, 2) Na Jehovah ko wleawu nususu tọn na mí he na basi hihọ́na mí wutu, nususu wẹ hiẹ sọgan wà nado nọla na nuyiwadomẹji aihọn tọn lẹ. (Salm. 23:4; 91:1, 2) Enẹwutu, yí nuhe Jehovah ko wleawu etọn na mí lẹ zan nado basi hihọ́na dewe.—Salm. 23:5.

²⁴ Nado nọla na aihọn lọ to whenue yé gbẹ́ to wehọmẹ yì, jọja Kunnudetọ susu wẹ ko basi dide ma nado nọ tindo mahẹ to nuwiwa aihundida wehọmẹ godo tọn lẹ mẹ. E sọgan vẹawuna klasigbẹ́ lẹ po mẹplọntọ lẹ po nado mọnukunnujẹ nudide ehe mẹ. Ṣigba, nado hẹn homẹhun Jiwheyẹwhe wẹ yin nujọnu hugan. Ehe nọ biọ dọ hiẹ ni yí ayihadawhẹnamẹnu towe he yin pinplọn gbọn Biblu dali zan bo magbe ma nado doalọ to nuwiwa agbàwhinwhlẹn aihọn tọn lẹ kavi nuwiwa wanyina akọta mẹtọn tọn lẹ mẹ. (Gal. 5:19, 26) Eyin mìwu jọja lẹ nọ dotoaina ayinamẹ Owe-wiwe tọn he mẹjitọ budisi Jiwheyẹwhe tọ́ lẹ nọ na mì lẹ bosọ nọ mọaleyi sọn gbẹdido dagbe he to agun mẹ lẹ mẹ, mí sọgan tẹdo nujinọtedo dodo Jehovah tọn lẹ go.

²⁵ Dile Owe-wiwe lẹ dohia do, tatọ́ whẹndo tọn lẹ tindo azọngban lọ nado wleawudaina whédo yetọn. (1 Tim. 5:8) Etomọṣo, taidi lizọnyizọnwatọ lẹ, yé yọnẹn dọ azọ́n Ahọluduta lọ tọn lẹ wẹ dona tin to otẹn tintan mẹ kakati nido yin agbasazọ́n yetọn. (Mat. 6:33; Lom. 11:13) Eyin yé ze yede jo na Jiwheyẹwhe bọ núdùdù po avọ̀ po nọ pekọna yé, yé na dapana magbọjẹ lẹ po omọ̀ agbasanu lẹ bibẹpli tọn po.—1 Tim. 6:6-10.

²⁶ Klistiani klandowiwe lẹpo he nọ wà agbasazọ́n wẹ dona hẹn nunọwhinnusẹ́n Owe-wiwe tọn lẹ do ayiha mẹ. Nukunpipedo nuhudo mítọn lẹ go po nugbodidọ po zẹẹmẹdo dọ mí dona gbẹ́ nuwiwa he gbà osẹ́n Jiwheyẹwhe tọn lẹ kavi osẹ́n otò lọ tọn lẹ dai. (Lom. 13:1, 2; 1 Kọl. 6:9, 10) Mí sọ dona hẹn owù gbẹdido ylankan tọn lẹ do ayiha mẹ. Taidi awhànfuntọ Klisti tọn lẹ, mí nọ dapana mahẹ tintindo to aliho ajọwiwa tọn he nọ gbà nujinọtedo Jiwheyẹwhe tọn lẹ, nọ bẹpla kadaninọ Klistiani tọn mítọn kavi nọ ze gbigbọnọ-yinyin mítọn do owù mẹ lẹ mẹ. (Isa. 2:4; 2 Tim. 2:4) Mọdopolọ, mí ma nọ tindo kanṣiṣa depope hẹ sinsẹ̀n he Jiwheyẹwhe jẹagọdo lọ, yèdọ “Babilọni Daho lọ.”—Osọ. 18:2, 4; 2 Kọl. 6:14-17.

²⁷ Eyin mí nọ tẹdo nujinọtedo dodo Jiwheyẹwhe tọn lẹ go, ehe na zọ́n bọ mí ma na nọ yí dotẹnmẹ hundote he mí tindo nado nọ dogbẹ́ hẹ Klistiani hatọ lẹ zan nado jla ajọ́ kavi dín ale mẹdetiti tọn devo lẹ. Na taun tọn, lẹndai tangan he wutu mí do nọ kọnawudopọ hẹ mẹdevo lẹ to opli agun tọn lẹ, plidopọ lẹdo tọn lẹ po plidopọ daho lẹ po ji wẹ nado sẹ̀n Jehovah. Mí nọ dùnú to tafo gbigbọmẹ tọn etọn ji bosọ nọ duvivi “tulinina ode awetọ” tọn. (Lom. 1:11, 12; Heb. 10:24, 25) Pipli dopọ mítọn enẹlẹ tin na whẹho gbigbọmẹ tọn lẹ kẹdẹ.

²⁸ Nujinọtedo dodo Jehovah tọn lẹ sọ nọ biọ dọ omẹ etọn lẹ ni “hẹn dopo-yinyin gbigbọ tọn go to gẹdẹ pọninọ jijọho tọn mẹ.” (Efe. 4:1-3) Kakati nado nọ tẹnpọn nado hẹn pekọ wá na míde, mẹdopodopo dona nọ tẹnpọn nado doafọna nuhe yin dagbe na mẹdevo lẹ. (1 Tẹs. 5:15) Matin ayihaawe, gbigbọ he nkọ hiẹ na ko mọ to agun towe mẹ niyẹn. Mahopọnna lehe sinmẹ agbasa tọn, akọ̀, lẹdo, ninọmẹ akuẹzinzan tọn, kavi wepinplọn mítọn lẹ sọgan gbọnvona ode awetọ tọn sọ, nujinọtedo dodo tọn dopolọ lẹ wẹ mímẹpo nọ hodo. Gbonutọ lẹ tlẹ ko doayi ohia vonọtaun ehe go to omẹ Jehovah tọn lẹ ṣẹnṣẹn.—1 Pita 2:12.

²⁹ Nado zinnudo dodonu pọninọ mítọn tọn ji yinukọn dogọ, apọsteli Paulu wlan dọmọ: “Agbasa dopo wẹ tin, podọ gbigbọ dopo, kẹdẹdile mìwlẹ yin yiylọ do todido dopo oylọ mìtọn tọn kọ̀n do; Oklunọ dopo, yise dopo, baptẹm dopo; Jiwheyẹwhe dopo podọ Otọ́ mẹlẹpo tọn mẹhe tin to nulẹpo ji podọ gbọn nulẹpo gblamẹ podọ to nulẹpo mẹ.” (Efe. 4:4-6) Ehe biọ dọ mí dona tin to pọninọ mẹ na nuhe dù nukunnumọjẹnumẹ mítọn gando sinsẹ̀n-nuplọnmẹ dodonu tọn Biblu tọn lẹ po nuplọnmẹ Biblu tọn he siso lẹ po go, nado dohia dọ mí kẹalọyi nupojipetọ-yinyin Jehovah tọn. Na nugbo tọn, Jehovah ko na ogbè wiwe-ṣeke nugbo tọn lọ omẹ etọn lẹ, ehe nọ hẹn yé penugo nado sẹ̀n ẹn abọ́ to abọ́ go.—Zef. 3:9.

³⁰ Pọninọ po jijọho po he tin to agun Klistiani tọn mẹ yin asisa kọfanamẹ tọn de na mẹhe nọ sẹ̀n Jehovah lẹpo. Mí ko mọ hẹndi opagbe he Jehovah do tọn dọmọ: “Yẹn na bẹ yé pli to kọndopọ mẹ, taidi lẹngbọ lẹ to apó de mẹ.” (Mika 2:12) Ojlo mítọn wẹ nado hẹn jijọho po pọninọ enẹ po go gbọn titẹdo nujinọtedo dodo Jehovah tọn lẹ go dali.

³¹ Ayajẹnọ wẹ mẹhe ko yin alọkẹyi do agun wiwe Jehovah tọn mẹ lẹ! Nado tindo oyín Jehovah tọn to ota họakuẹ taun hú avọ́sinsan he mí sọgan basi lẹpo. Dile mí hẹn haṣinṣan họakuẹ mítọn hẹ Jehovah go, mí na dovivẹnu vẹkuvẹku nado tẹdo nujinọtedo dodo tọn etọn lẹ go bo nasọ nọ plọn yé mẹdevo lẹ.—2 Kọl. 3:18.