Be A Ko Wleawufo Nado Yí Baptẹm Ya?

Nususu lẹ wẹ a ko plọn gando Jehovah go to Biblu pinplọn towe whenu. Podọ e yọnbasi dọ nuhe a plọn lẹ yíyí-do-yizan mẹ ko whàn we nado basi diọdo delẹ. Etomọṣo, nudelẹ gán zọ́n bọ a na to yonu dọ̀n dogodo nado klan dewe do wiwe na Jehovah bo yí baptẹm. Nupinplọn ehe na dọhodo nudelẹ ji he gán glọnalina we ma nado yí baptẹm, gọna lehe a sọgan duto yé ji do.

1. Obá tẹ mẹ wẹ a dona ko plọnnu jẹ whẹpo do yí baptẹm?

Nado yí baptẹm, a dona tindo “oyọnẹn he pegan nugbo tọn.” (1 Timoti 2:4) Ehe ma zẹẹmẹdo dọ whẹpo a nido yí baptẹm, a dona penugo nado nọ na gblọndo na kanbiọ depope he yè kanse we do Biblu ji gba. Klistiani he tlẹ ko yí baptẹm sọn owhe susu die lẹ lọsu gbẹ́ nọ to nuplọn. (Kolosinu lẹ 1:9, 10) Ṣigba, a dona ko mọnukunnujẹ nuplọnmẹ dodonu tọn Biblu tọn lẹ mẹ. Mẹho agun tọn lẹ na gọalọna we nado yọnẹn eyin a ko tindo oyọnẹn Biblu tọn jẹ obá he pé lọ mẹ.

2. Etẹwẹ yin delẹ to afọdide he a dona ze whẹpo do pegan na baptẹm lẹ mẹ?

Whẹpo a nido sọgan yí baptẹm, a dona “lẹnvọjọ bo diọ.” (Hia Owalọ lẹ 3:19.) Ehe zẹẹmẹdo dọ ylando depope he a ko wà lẹ nọ vẹna we sisosiso yì ahun mẹ, bọ a nọ biọ dọ Jehovah ni jona we. Podọ a nọ gbẹ́ aṣa ylankan lẹ dai po nujikudo po bosọ magbe nado zan gbẹzan he nọ hẹn homẹhun Jiwheyẹwhe. Humọ, a jẹ mahẹ tindo ji to nuwiwa agun tọn lẹ mẹ, bo nọ wá opli lẹ bosọ nọ dọyẹwheho taidi wẹnlatọ he ma ko yí baptẹm de.

3. Naegbọn a ma dona natẹn obu nado glọnalina we?

Mẹdelẹ nọ dibu dọ emi ma na wá penugo nado de opà he emi do na Jehovah. Nugbo wẹ dọ a na wá ṣinuwa to whedelẹnu, kẹdẹdile e yindo na sunnu po yọnnu po nugbonọ delẹ he go Biblu donù. Amọ́, Jehovah ma nọ donukun dọ sinsẹ̀n-basitọ etọn lẹ ni yin mẹpipe lẹ. (Hia Salmu lẹ 103:13, 14.) Homẹ etọn nọ hùn eyin a wà nuhe go huhlọn towe pé lẹpo! Ewọ na gọalọna we. Na nugbo tọn, Jehovah hẹn mí deji dọ nudepope “ma na penugo nado klan mí sọn owanyi [etọn] go.”—Hia Lomunu lẹ 8:38, 39.

DINDONANU DOGỌ

4. Plọn nado yọ́n Jehovah ganji dogọ

Obá tẹ mẹ wẹ e biọ dọ a ni yọ́n Jehovah jẹ whẹpo do sọgan yí baptẹm? A dona yọ́n ewọ ganji, sọmọ bọ a na yiwanna ẹn bo nasọ nọ jlo na wà nuhe nọ hẹn homẹhun in lẹ. Hò VIDEO lọ nado pọ́n lehe mọwiwà ko pà Biblu plọntọ susu lẹdo aihọn pé do. Enẹgodo dọhodo kanbiọ he bọdego ji.

VIDEO: Ali He Nọ Planmẹ Jẹ Baptẹm Kọ̀n (3:56)

• To video lọ mẹ, etẹwẹ gọalọna mẹdelẹ nado wleawufo na baptẹm?

Hia Lomunu lẹ 12:2, enẹgodo dọhodo kanbiọ ehelẹ ji:

• Be a do ayihaawe gando nuhe Biblu plọnmẹ depope go ya? Kavi be a nọ kanse dewe vlavo eyin nugbo lọ janwẹ Kunnudetọ Jehovah tọn lẹ nọ plọnmẹ dódó ya?

• Eyin mọ wẹ, etẹwẹ a sọgan wà?

5. A sọgan duto nuhe to aliglọnna we nado yí baptẹm lẹ ji

Mímẹpo wẹ nọ pehẹ nuhahun lẹ to whenue mí basi dide nado klan gbẹzan mítọn do wiwe na Jehovah bo yí baptẹm. Nado mọ apajlẹ dopo, hò VIDEO lọ, enẹgodo dọhodo kanbiọ he bọdego lẹ ji.

VIDEO: Wanyina Jehovah Nọ Gbawhàn Aliglọnnamẹnu lẹ Tọn (5:22)

• To video lọ mẹ, aliglọnnamẹnu tẹlẹ ji wẹ Narangerel dona dù te nado sọgan sẹ̀n Jehovah?

• Nawẹ owanyi etọn na Jehovah gọalọna ẹn nado duto aliglọnnamẹnu enẹlẹ ji gbọn?

Hia Howhinwhẹn lẹ 29:25 po 2 Timoti 1:7 po, enẹgodo dọhodo kanbiọ ehe ji:

• Etẹwẹ nọ na mí adọgbigbo nado duto aliglọnnamẹnu lẹ ji?

6. Ganjẹ alọgọ Jehovah tọn go

Jehovah na gọalọna we nado wà nuhe nọ hẹn homẹhun in lẹ. Hò VIDEO lọ, enẹgodo dọhodo kanbiọ he bọdego lẹ ji.

VIDEO: Jehovah Jiwheyẹwhe Na Gọalọna We (2:50)

• To video lọ mẹ, etẹwẹ zọ́n dai bọ Biblu plọntọ lọ do whleawu nado yí baptẹm?

• Etẹwẹ e wá plọn he gọalọna ẹn nado hẹn jidide etọn to Jehovah mẹ lodo?

Hia Isaia 41:10, 13, enẹgodo dọhodo kanbiọ ehe ji:

• Naegbọn a gán deji dọ e na pà we nado de opà klandowiwe tọn towe?

7. Nọ do pinpẹn-nutọn- yinyọnẹn nujọnu tọn hia na owanyi Jehovah tọn

Lehe a nọ lẹnnupọndo owanyi sisosiso he Jehovah tindo na we ji do, mọ wẹ a na nọ dopẹna ẹn bo nasọ nọ jlo dogọ nado sẹ̀n ẹn kakadoi do niyẹn. Hia Salmu lẹ 40:5, enẹgodo dọhodo kanbiọ ehe ji:

• Detẹ to dona Jehovah tọn lẹ mẹ wẹ nọ whàn we hugan?

Yẹwhegán Jelemia yiwanna Jehovah po ohó etọn po, bosọ nọ do pinpẹn-nutọn-yinyọnẹn sisosiso hia na lẹblanulọkẹyi lọ he e tindo nado do oyín Jehovah tọn to ota. E dọmọ: “Ohó towe ko sọ hẹn aglinjijẹ po ayajẹ po wá na ahun ṣie, na yẹn ko tindo oyín towe to ota, Jehovah Jiwheyẹwhe [E].” (Jelemia 15:16) Todin, na gblọndo kanbiọ ehelẹ tọn:

• Naegbọn a mọdọ lẹblanulọkẹyi họakuẹ de wẹ e yin nado yin dopo to Kunnudetọ Jehovah tọn lẹ mẹ?

• Be e jlo we nado yí baptẹm bo lẹzun dopo to Kunnudetọ Jehovah tọn lẹ mẹ ya?

• Be nude tin he to aliglọnna we nado wàmọ ya?

• Etẹwẹ a lẹndọ e biọ dọ a ni wà nado pegan na baptẹm?

BLADOPỌ

Po alọgọ Jehovah tọn po, a sọgan duto nudepope he to aliglọnna we nado yí baptẹm ji.

Dogbapọn

• Obá tẹ mẹ wẹ e biọ dọ a ni yọ́n nuhe to Biblu mẹ lẹ jẹ whẹpo do pegan na baptẹm?

• Diọdo tẹlẹ wẹ e sọgan biọ dọ a ni basi nado pegan na baptẹm?

• Naegbọn a ma dona natẹn obu nado glọnalina we?

PỌ́N NUDỌNAMẸ DEVO LẸ

Gbadopọnna whẹwhinwhẹ́n he ji nudide towe nado yí baptẹm dona sinai do lẹ.

“Be A Ko Wleawufo Nado Yí Baptẹm Ya?” (Atọ̀họ̀-Nuhihọ́ lọ Tọn, mars 2020 tọn)

Pọ́n lehe a sọgan duto avùnnukundiọsọmẹnu titengbe he gán hẹnalọdotena we lẹ ji do.

“Etẹwẹ Glọnalina Mi Nado Yin Bibaptizi?” (Atọ̀họ̀-Nuhihọ́ lọ Tọn, mars 2019 tọn)

Pọ́n lehe dawe de penugo nado duto aliglọnnamẹnu sinsinyẹn delẹ ji do bo wá yí baptẹm.

‘Naegbọn A to Gbàndọn Nado Yí Baptẹm?’ (1:10)

To tintan whenu, dawe de he nọ yin Ataa whleawu nado yí baptẹm. Pọ́n nuhe hẹn ẹn deji nado ze afọdide nujọnu tọn ehe.

Be N’Jẹna Onú Ehe Lẹpo Nugbo Ya? (7:21)