Omẹ Jehovah Tọn lẹ Nọ “Gbẹ́ Mawadodo Dai”

 1. Etẹwẹ tin to otẹn vonọtaun de mẹ to sinsẹ̀n-bibasi mítọn mẹ?

BE HIẸ ko mọ bọ yinkọ lọ Jehovah yin kinkan do adó de go kavi to onú hoho-sẹdotẹn de pọ́n ya? Na jide tọn, enẹ na ko fọnjlodotena we bo hẹn homẹ towe hùn. To popolẹpo mẹ, yinkọ Jiwheyẹwhe tọn tin to otẹn vonọtaun de mẹ to sinsẹ̀n-bibasi mítọn mẹ, na mí yin Kunnudetọ Jehovah tọn lẹ wutu! To aigba lọ blebu ji, pipli devo de ma tin to egbehe he nọ yí yinkọ Jiwheyẹwhe tọn zan dile míwlẹ nọ wà do. Etomọṣo, mí yọnẹn dọ lẹblanulọkẹyi lọ nado tindo yinkọ Jiwheyẹwhe tọn to ota sọ bẹ azọngban hẹn.

 2. Na lẹblanulọkẹyi lọ nado tindo oyín Jiwheyẹwhe tọn to ota wutu, azọngban tẹwẹ mí tindo?

² Yinkọ Jiwheyẹwhe tọn yiyizan poun ma nọ hẹn mí tindo nukundagbe Jehovah tọn. Mí dona nọgbẹ̀ sọgbe hẹ nujinọtedo walọ dagbe tọn etọn lẹ. Na whẹwhinwhẹ́n enẹ wutu, Biblu flinnu mí dọ omẹ Jehovah tọn lẹ dona “tọ́n sọn danú [kavi oylan] mẹ.” (Ps. 34:14) Apọsteli Paulu zinnudo nunọwhinnusẹ́n ehe ji hezeheze to whenue e wlan dọmọ: “Gbọ mẹhe to oyín Jehovah tọn ylọ lẹpo ni gbẹ́ mawadodo dai.” (Hia 2 Timoti 2:19.) Mí yin yinyọnẹn taidi mẹhe nọ ylọ yinkọ Jehovah tọn lẹ, na mí yin Kunnudetọ etọn lẹ wutu. Ṣigba, nawẹ mí sọgan gbẹ́ mawadodo dai gbọn?

 3, 4. Wefọ tẹwẹ dọ̀n ayidonugo weyọnẹntọ he nọ basi zẹẹmẹ do Biblu ji lẹ tọn sọn whenu dindẹn die, podọ etẹwutu?

³ Lẹnnupọndo lẹdo hodidọ Paulu tọn he tin to 2 Timoti 2:19 mẹ ji. Wefọ ehe dlẹnalọdo “dodonu dolido Jiwheyẹwhe tọn” bosọ donù hodidọ awe he yin kinkan do e ji lẹ go. E họnwun dọ hodidọ tintan lọ, “Jehovah yọ́n mẹhe yin etọn lẹ,” yin didesọn Osọha lẹ 16:5 mẹ. (Pọ́n hosọ he wayi.) Hodidọ awetọ lọ, “Gbọ mẹhe to oyín Jehovah tọn ylọ lẹpo ni gbẹ́ mawadodo dai,” ko dọ̀n ayidonugo weyọnẹntọ he nọ basi zẹẹmẹ do Biblu ji lẹ tọn sọn whenu dindẹn die. Etẹwutu?

⁴ Hogbe he Paulu yizan lẹ dohia dọ ewọ to hoyidọ sọn asisa devo mẹ. Etomọṣo, e taidi dọ fide ma tin to Owe-wiwe Heblu tọn lẹ mẹ he sọgbe hẹ hogbe he Paulu yizan lẹ. Enẹwutu, etẹwẹ apọsteli lọ to alọdlẹndo to whenue e wlan dọmọ: “Gbọ mẹhe to oyín Jehovah tọn ylọ lẹpo ni gbẹ́ mawadodo dai”? Jẹnukọnna hodidọ ehe, Paulu yihodọ sọn Osọha lẹ weta 16 mẹ, ehe dọhodo kandai atẹṣiṣi Kola tọn ji. Be hodidọ awetọ lọ gando nujijọ atẹṣiṣi tọn dopolọ go wẹ ya?

 5-7. Nujijọ he wá aimẹ to ojlẹ Mose tọn mẹ tẹwẹ Paulu to alọdlẹndo to 2 Timoti 2:19 mẹ? (Pọ́n yẹdide he tin to bẹjẹeji hosọ ehe tọn.)

⁵ Biblu dọ dọ Datani po Abilami po, visunnu Eliabi tọn lẹ, kọnawudopọ hẹ Kola bo yin nukọntọ na mẹhe ṣiatẹ sọta Mose po Aalọn po lẹ. (Sọh. 16:1-5) Yé ma do sisi hia Mose bosọ gbẹ́ aṣẹpipa etọn he Jiwheyẹwhe na ẹn dai. Atẹṣitọ ehelẹ gbọṣi omẹ Jehovah tọn lẹ ṣẹnṣẹn, bo yin owùnu de na nugbonọ lẹ to gbigbọ-liho. To whenue ojlẹ sọ̀ na Jehovah nado do vogbingbọn hia to mẹhe to sinsẹ̀n ẹn po nugbonọ-yinyin po podọ nado do atẹṣitọ lẹ hia, ewọ na gbedide he họnwun de.

⁶ Kandai lọ dọmọ: “OKLUNỌ lọ sọ dọho hlan Mose, dọmọ, Dọho hlan agun lọ, dọmọ, Mì hẹji yì sọn gòhọtúntún Kola, Datani, po Abilami po tọn dali. Mose sọ tite bo yì jẹ Datani po Abilami po dè; mẹho Islaeli tọn lẹ lọ hodo e. Ewọ sọ dọho hlan agun lọ, dọmọ, Yẹn vẹ̀ mì, mì fọnyi sọn gòhọ omẹ ylankan helẹ tọn mẹ, bosọ doalọ onú yetọn de go blo, mìwlẹ nikaa yin súsúdo to ylando yetọn lẹpo mẹ. Mọwẹ yé [yawu] hẹn yede hẹji yì sọn gòhọtúntún Kola, Datani po Abilami po tọn lọ mẹ, to awà lẹpo ji.” (Sọh. 16:23-27) Enẹgodo, Jehovah và atẹṣitọ enẹ lẹpo sudo. To alọ devo mẹ, sinsẹ̀n-basitọ nugbonọ he gbẹ́ mawadodo dai lẹ yin pipò do ogbẹ̀.

⁷ Jehovah nọ gbeje ahun mẹ pọ́n! E nọ doayi nugbonọ-yinyin mẹhe yin etọn lẹ tọn go. Etomọṣo, mẹhe yin nugbonọ lẹ dona yinuwa po nujikudo po nado klan yede sọn mawadodonọ lẹ mẹ. Enẹwutu, e yọnbasi dọ Paulu to alọdlẹndo kandai Osọha lẹ 16:5, 23-27 tọn to whenue e wlan dọmọ: “Gbọ mẹhe to oyín Jehovah tọn ylọ lẹpo ni gbẹ́ mawadodo dai.” Tadona mọnkọtọn tin to kọndopọ mẹ hẹ ohó he Paulu dọ dọmọ: “Jehovah yọ́n mẹhe yin etọn lẹ.”—2 Tim. 2:19.

 8. Naegbọn e ma ko pé nado nọ yí oyín Jehovah tọn zan kavi nado tin to agun Klistiani tọn mẹ?

⁸ To whenue Paulu dlẹnalọdo nujijọ ojlẹ Mose tọn mẹ tọn, ewọ to nuflin Timoti gando nuhudo lọ nado nọ yinuwa po nujikudo po nado basi hihọ́na haṣinṣan họakuẹ etọn hẹ Jehovah. Nado tin to agun Klistiani tọn mẹ ma ko pé, dile oyín Jehovah tọn yiylọ poun to ojlẹ Mose tọn mẹ ma ko pé do. Sinsẹ̀n-basitọ nugbonọ lẹ dona gbẹ́ mawadodo dai. Etẹwẹ ehe zẹẹmẹdo na Timoti? Podọ etẹwẹ omẹ Jehovah tọn lẹ sọgan plọn sọn ayinamẹ gbọdo Paulu tọn mẹ to egbehe?

 9. Nawẹ “kanbiọ nulú tọn po wunvi tọn lẹ po” yinuwado agun Klistiani dowhenu tọn ji gbọn?

⁹ Ohó Jiwheyẹwhe tọn na mí ayinamẹ tangan delẹ gando mawadodo he Klistiani lẹ dona gbẹdai lẹ go. Di apajlẹ, to lẹdo wefọ 2 Timoti 2:19 tọn mẹ, mí mọdọ Paulu dọna Timoti “ma nado nọ dọnnu do hogbe lẹ ji,” podọ nado “nọ gbẹ́ ohó ovọ́” lẹ dai. (Hia 2 Timoti 2:14, 16, 23.) Hagbẹ agun lọ tọn delẹ nọ ze nuplọnmẹ atẹṣitọ lẹ tọn daga. Podọ, e taidi dọ mẹdevo lẹ nọ fọ́n linlẹn he nọ hẹn nudindọn wá lẹ dote. Eyin linlẹn lọ lẹ ma tlẹ jẹagọdo Owe-wiwe lẹ tlọlọ, yé nọ hẹn kinklan wá. Linlẹn mọnkọtọn lẹ nọ dekọtọn do nudindọn do hogbe lẹ ji mẹ, bo nọ ze gbigbọnọ-yinyin agun lọ tọn do owù mẹ. Enẹwutu, Paulu zinnudo nuhudo lọ ji nado “nọ gbẹ́ kanbiọ nulú tọn po wunvi tọn lẹ po dai.”

10. Nawẹ mí dona yinuwa gbọn to whenue mí pehẹ atẹṣitọ de?

¹⁰ To egbehe, omẹ Jehovah tọn lẹ ma nọ saba pehẹ atẹṣitọ lẹ to agun mẹ. Etomọṣo, eyin mí sè nuplọnmẹ he ma sọgbe hẹ Owe-wiwe lẹ, mahopọnna asisa he mẹ e wá sọn, mí dona gbẹ́ yé dai po nujikudo po. E ma na yin nuyọnẹnnu nado nọ dọnnu hẹ atẹṣitọ lẹ, vlavo nukun-sọ-nukun, gbọn Intẹnẹt ji, kavi gbọn nuyizan hodọdopọ tọn devo depope dali. Eyin linlẹn lọ tlẹ yin nado gọalọna mẹlọ, hodọdopọ mọnkọtọn na jẹagọdo anademẹ Owe-wiwe lẹ tọn he ji mí dọhodo wayi. Kakatimọ, taidi omẹ Jehovah tọn lẹ, mí nọ dapana atẹṣiṣi, na nugbo tọn mí nọ gbẹ́ ẹ dai mlẹnmlẹn.

11. Etẹwẹ sọgan fọ́n “kanbiọ nulú tọn” lẹ dote, podọ nawẹ mẹho agun tọn lẹ sọgan ze apajlẹ dagbe dai gbọn?

¹¹ Onú devo lẹ tin gbọnvona atẹṣiṣi, ehe sọgan ze jijọho agun lọ tọn do owù mẹ. Di apajlẹ, pọndohlan voovo tintindo gando ayidedai go sọgan dekọtọn do “kanbiọ nulú tọn po wunvi tọn lẹ po” mẹ. Na nugbo tọn, to whenue mẹde nọ nọgodona ayidedai he gbà nujinọtedo walọ dagbe tọn Jehovah tọn lẹ, mẹho agun tọn lẹ ma dona jotẹnna walọyizan mọnkọtọn nado dapana nudindọn poun. (Ps. 11:5; Efe. 5:3-5) Etomọṣo, mẹho lẹ dona tin to aṣeji ma nado nọ ze pọndohlan yedetiti tọn lẹ daga. Yé nọ yí nugbonọ-yinyin do hodo ayinamẹ Owe-wiwe lẹ tọn he yin nina Klistiani nugopọntọ lẹ dọmọ: “Mì yìn lẹngbọpa Jiwheyẹwhe tọn he yin zizedo alọmẹ na mì, . . . e ma yin nado duklunọ do mẹhe yin ogú Jiwheyẹwhe tọn lẹ ji gba, ṣigba nado yin apajlẹ na lẹngbọpa lọ.”—1 Pita 5:2, 3; hia 2 Kọlintinu lẹ 1:24.

12, 13. (a) Etẹwẹ yin pọndohlan Kunnudetọ Jehovah tọn lẹ tọn gando nudide ayidedai tọn bibasi go, podọ nunọwhinnusẹ́n Biblu tọn tẹlẹ wẹ yé nọ yí do yizan mẹ? (b) Nawẹ nunọwhinnusẹ́n he yin hodọdeji to hukan 12tọ mẹ lẹ yọ́n-na-yizan to whẹho mẹdetiti tọn lẹ mẹ gbọn?

¹² To whẹho ayidedai tọn mẹ, titobasinanu mítọn ma nọ gbadopọnna sinima, aihundida video ji tọn, owe kavi ohàn lẹ nado dosẹ́n gando dehe mí dona dapana lẹ go gba. Etẹwutu? Biblu na tuli mẹdopodopo nado nọ plọn “huhlọn wuntuntun tọn yetọn . . . nado nọ yọ́n vogbingbọn to dagbe po oylan po ṣẹnṣẹn.” (Heb. 5:14) Owe-wiwe lẹ do nunọwhinnusẹ́n dodonu tọn lẹ he Klistiani de dona gbadopọnna to whenue e to ayidedai lẹ de hia. To adà gbẹzan mítọn tọn lẹpo mẹ, yanwle mítọn dona yin nado “nọ to dodinna nuhe Oklunọ kẹalọyi lẹ zọnmii.” (Efe. 5:10) Biblu plọn mí dọ tatọ́ whẹndo tọn lẹ tindo aṣẹpipa do whẹndo yetọn ji jẹ obá de mẹ, enẹwutu yé sọgan de nado gbẹ́ ayidedai tangan delẹ dai to whédo yetọn mẹ.—1 Kọl. 11:3; Efe. 6:1-4.

¹³ Nunọwhinnusẹ́n Biblu tọn he ji mí dọhodo wayi lẹ ma gando nudide ayidedai tọn lẹ kẹdẹ go gba. Pọndohlan voovo tintindo gando nusisọ́ po dapipa po go, agbasalilo po núdùdù po, gọna whẹho mẹdetiti tọn devo lẹ sọgan fọ́n nudindọn dote. Ṣigba, eyin whẹho mọnkọtọn de ma tùnafọ nunọwhinnusẹ́n Owe-wiwe lẹ tọn de ji, omẹ Jehovah tọn lẹ ma nọ dọnnu, na “e ma jẹ dọ afanumẹ Oklunọ tọn ni hoavùn, ṣigba ewọ dona nọ wà dẹẹdẹ hlan mẹlẹpo.”—2 Tim. 2:24.

14. Apajlẹ tẹwẹ Paulu yizan nado zinnudo nuhudo lọ nado dapana gbẹdido ylankan lẹ ji?

¹⁴ Aliho devo tẹ mẹ wẹ mẹhe ‘to oyín Jehovah tọn ylọ lẹ sọgan gbẹ́ mawadodo dai’ te? Mí nọ wàmọ eyin mí dapana gbẹdido pẹkipẹki hẹ mẹhe yiwanna mawadodo lẹ. E jẹna ayidego dọ to whenue Paulu ko dọhodo “dodonu dolido Jiwheyẹwhe tọn” ji godo, e na apajlẹ devo bọdego. Ewọ kanwe gando “owhé daho de” go he tindo ‘núzinzan sika po fataka po tọn lẹ gọna atin tọn po okọ́ tọn po, podọ delẹ na lẹndai yẹyi tọn ṣigba devo lẹ na lẹndai madoyẹyi tọn.’ (2 Tim. 2:20, 21) To enẹgodo, e na ayinamẹ Klistiani lẹ nado “nọla na” kavi klan yede sọn núzinzan he nọ yin yiyizan na lẹndai “madoyẹyi” tọn lẹ go.

15, 16. Etẹwẹ mí sọgan plọn sọn apajlẹ “owhé daho de” tọn lọ mẹ?

¹⁵ Etẹwẹ yin zẹẹmẹ apajlẹ ehe tọn? Paulu yí agun Klistiani tọn jlẹdo “owhé daho de” go, podọ e yí hagbẹ agun lọ tọn dopodopo jlẹdo “núzinzan” kavi azọ́nwanu whégbè tọn lẹ go. To owhé de gbè, núzinzan delẹ sọgan ko yin hinhẹnflu gbọn adí ylankan kavi dihó dali. Whétọ lọ nọ de azọ́nwanu mọnkọtọn lẹ dovo na núzinzan he tin to wiweji lẹ, taidi dehe nọ yin yiyizan nado dà núdùdù.

¹⁶ Mọdopolọ to egbehe, omẹ Jehovah tọn he to vivẹnudo nado nọ wiweji lẹ, dona dapana haṣinṣan tintindo hẹ hagbẹ agun lọ tọn he nọ zindonukọn nado gbà nunọwhinnusẹ́n Jehovah tọn lẹ. (Hia 1 Kọlintinu lẹ 15:33.) Eyin mí dona wàmọ na mẹdelẹ to agun lọ mẹ, nẹmunẹmu wẹ mí ma na “joagọ” sọn mẹhe to gbonu agun lọ tọn lẹ dè bo ma nọ dogbẹ́ pẹkipẹki hẹ yé, yèdọ mẹhe susu to yé mẹ yin ‘wanyina akuẹtọ, tolivẹtọ do mẹjitọ go, nugbomadọtọ, mẹhẹngbletọ, kanylantọ, mẹhe ma tindo owanyi na dagbewà, mẹdehiatọ, wanyina gbẹdudu tọ́ kakati nido yin wanyina Jiwheyẹwhe tọ́’!—2 Tim. 3:1-5.

17. Obá tẹ mẹ wẹ Islaelivi nugbonọ lẹ setonu jẹ to whenue yé hẹn tenọgligo sọta mawadodo?

¹⁷ Biblu donù lehe Islaelivi lẹ yinuwa po nujikudo po do go to whenue yè dọna yé nado “hẹji yì sọn gòhọtúntún Kola, Datani, po Abilami po tọn dali.” Kandai lọ dọ dọ ‘yé yawu hẹn yede hẹji yì.’ (Sọh. 16:24, 27) Yé ma whleawu kavi dọngbàn paali. Wefọ lọ sọ donù obá he mẹ yé setonu jẹ go. Yé “hẹn yede hẹji yì . . . to awà lẹpo ji.” Nugbonọ lẹ ma dona tin to owù depope mẹ. Tonusise yetọn ma yin yẹnuwiwa tọn. Yé hẹn tenọgligo na Jehovah bo yinuwa sọta mawadodo. Etẹwẹ mí sọgan plọn sọn apajlẹ ehe mẹ?

18. Etẹ dọ wẹ Paulu te to whenue e na ayinamẹ Timoti nado “nọ họ̀nna ojlo jọja whenu tọn lẹ”?

¹⁸ Nado basi hihọ́na haṣinṣan mítọn hẹ Jehovah, mí dona nọ yawu yinuwa po nujikudo po. Nuhe dọ Paulu te niyẹn to whenue e na ayinamẹ Timoti nado “nọ họ̀nna ojlo jọja whenu tọn lẹ.” (2 Tim. 2:22) To ojlẹ enẹ mẹ, Timoti ko whẹ́n mẹho, bo sọgan ko tin to gblagbla owhe 30 tọn mẹ. Etomọṣo, nulú “ojlo jọja whenu tọn lẹ” ma nọte do owhe tangan de ji. Eyin ojlo mọnkọtọn lẹ fọ́n na Timoti, e dona “nọ họ̀nna” yé. To hogbe devo mẹ, Timoti dona “gbẹ́ mawadodo dai.” Jesu zinnudo nudopolọ ji to whenue e dọmọ: “Eyin nukun towe to hinhẹn we dahli, sún in sẹ̀ bo ze e dlan sọn dewe go.” (Mat. 18:9) To egbehe, Klistiani he nọ yí ayinamẹ enẹ do yizan mẹ lẹ nọ yinuwa po nujikudo po nado hẹn gbigbọnọ-yinyin yetọn go matin awuwhiwhle kavi gbàndindọn.

19. Nawẹ mẹdelẹ to egbehe ko yinuwa po nujikudo po nado basi hihọ́na yede to gbigbọ-liho gbọn?

¹⁹ Mẹdelẹ he nọ nùahàn sinsinyẹn zẹjlẹgo whẹpo do lẹzun Kunnudetọ lẹ ko basi nudide nado dapana ahàn sinsinyẹn nùnù mlẹnmlẹn. Mẹdevo lẹ ko dapana ayidedai tangan delẹ he ma ylan ṣigba bo sọgan fọ́n ojlo ylankan dote na yé. (Ps. 101:3) Di apajlẹ, whẹpo mẹmẹsunnu de do lẹzun Kunnudetọ, ewọ ko nọ duvivi wedudu he ma sọgbe lẹ tọn gbọn agọ́ ji. Ṣigba, to whenue e plọn nugbo lọ godo, e de ma nado nọ dúwe etlẹ yin to nuwiwa pọmẹ tọn Kunnudetọ lẹ tọn whenu, na obu lọ ma nado fọ́n ojlo kavi linlẹn hoho etọn lẹ dote. Na nugbo tọn, e ma yin bibiọ to Klistiani lẹ si nado dapana ahàn sinsinyẹn nùnù mlẹnmlẹn, wedudu kavi onú devo lẹ he ma ylan to yede mẹ. Ṣigba, mímẹpo si wẹ e yin bibiọ sọn nado nọ ze afọdide nujikudo tọn nado basi hihọ́na míde to gbigbọ-liho.

20. Dile etlẹ yindọ e sọgan nọma bọawu nado “gbẹ́ mawadodo dai,” etẹwẹ nọ na mí jide po homẹmimiọn po?

²⁰ Lẹblanulọkẹyi lọ nado tindo oyín Jiwheyẹwhe tọn to ota bẹ azọngban hẹn. Mí dona “gbẹ́ mawadodo dai” bosọ “tọ́n sọn danú [kavi oylan] mẹ.” (Ps. 34:14) Na nugbo tọn, e ma nọ bọawu nado wàmọ to whelẹponu. Ṣigba, homẹmiọnnamẹnu wẹ e yin nado yọnẹn dọ Jehovah nọ yiwanna “mẹhe yin etọn” bo nọ tẹdo aliho dodo tọn etọn lẹ go to whepoponu lẹ.—2 Tim. 2:19; hia 2 Otannugbo lẹ 16:9a.