2 Timoti 1:7—“Jiwheyẹwhe Ma Na Gbigbọ Obu Tọn Mí Gba”

“Na Jiwheyẹwhe ma na mí gbigbọ obu tọn, ṣigba huhlọn tọn, owanyi tọn po wunza tọn po.”—2 Timoti 1:7, Lẹdogbedevomẹ Aihọn Yọyọ Tọn.

“Na Jiwheyẹwhe ma na gbigbọ obu tọn mí gba, adavo huhlọn tọn, owanyi tọn, po ayiha zìnzìn tọn po.”—2 Timoti 1:7, Biblu Wiwe lọ—Gun Alada.

Jiwheyẹwhe gán na adọgbigbo mẹde bo gọalọna ẹn nado wà nue sọgbe. Jiwheyẹwhe ma jlo dọ mẹdepope ni joawuna “obu”—yèdọ obu de he sọgan dọnmẹdogodo nado wà nuhe nọ hẹn homẹ Etọn hùn.

Mí ni dọhodo onú atọ̀n delẹ ji he yin nùdego to wefọ lọ mẹ he Jiwheyẹwhe nọ na mí nado duto obu ji.

“Huhlọn.” Klistiani lẹ ko penugo nado sẹ̀n Jiwheyẹwhe po adọgbigbo po to whenue yé pehẹ kẹntọ hùnylantọ susu po ninọmẹ sinsinyẹn lẹ po. Yé ma joagọyigodo na obu wutu. (2 Kọlintinu lẹ 11:23-27) Nawẹ yé wagbọn bọ e do pà yé? Nuhe apọsteli Paulu dọ gandego die: “To nulẹpo mẹ, yẹn tindo huhlọn lọ gbọn mẹlọ he nọ na mi huhlọn dali.” (Filipinu lẹ 4:13) Jiwheyẹwhe gán na mẹhe nọ sẹ̀n ẹn lẹ “huhlọn he hú jọwamọ tọn” nado duto nuhahun depope ji.—2 Kọlintinu lẹ 4:7.

“Owanyi.” Owanyi sisosiso he Klistiani de tindo na Jiwheyẹwhe nọ gọalọna ẹn nado yiavùnlọna nuhe sọgbe po adọgbigbo po. Mọdopolọ, owanyi he Klistiani de tindo na gbẹtọ lẹ nọ sisẹ́ ẹ nado nọ dọ mẹdevo lẹ tọn jẹnukọnna etọn, etlẹ yin whenue e to pipehẹ nukundiọsọmẹ kavi to owù mẹ.—Johanu 13:34; 15:13.

“Wunza.” Wunza he yin nùdego to Biblu mẹ nọ saba dlẹnalọdo nugopipe Klistiani de tọn nado basi nudide nuyọnẹn tọn he sinai do Biblu ji lẹ. Mẹhe tindo wunza nọ yí sọwhiwhe do lẹnnupọn to aliho he sọgbe hẹ lẹnpọn dagbe mẹ, etlẹ yin whenue e to pipehẹ ninọmẹ he kàn dẹpẹ biọ lẹ. E nọ bayi nudide he sọgbe hẹ ojlo Jiwheyẹwhe tọn, na e yọnẹn dọ haṣinṣan emitọn hẹ Jiwheyẹwhe yin nujọnu hugan nuhe mẹdevo lẹ nọ lẹn.

Apọsteli Paulu wẹ kàn owe Awetọ Timoti tọn hlan họntọn vivẹ́ podọ azọ́nwatọgbẹ́ etọn Timoti. To wekanhlanmẹ ehe mẹ, Paulu na tuli dẹpẹ jọja lọ Timoti taun dọ ni zindonukọn bo to azọ́n sinsinyẹn wà to lizọnyizọn lọ mẹ. (2 Timoti 1:1, 2) Timoti gán ko nọ kuwinyan, ehe gán ko zọ́n bọ e ma na wà nususu to agun Klistiani tọn lọ mẹ. (1 Timoti 4:12) Amọ́, Paulu flinnu Timoti dọ e ko mọ nunina de yí—enẹ wẹ azọ́n titengbe de he e na wà to agun mẹ. E na tuli Timoti dọ ni ma nọ whleawu nado zan aṣẹpipa he e tindo taidi nugopọntọ to agun mẹ, whenue e to wẹndagbe lọ lá, podọ whenue e to pipehẹ whlepọn lẹ na yise etọn wutu blo.—2 Timoti 1:6-8.

Nugbo wẹ dọ Timoti wẹ hodidọ ehelẹ yin kinkan hlan tlọlọ, amọ́ yé sọgan hẹn mẹhe jlo na sẹ̀n Jiwheyẹwhe to egbehe lẹpo deji dọ Jiwheyẹwhe na na yé alọgọ he sin hudo yé do nado sẹ̀n ẹn po kọdetọn dagbe po, mahopọnna nuhahun depope.