Hẹn Ẹn Diun Nado Ze Onú Tintan lẹ Do Otẹn Tintan Mẹ! — WESẸDOTẸN INTẸNẸT JI TỌN Watchtower Tọn

Hẹn Ẹn Diun Nado Ze Onú Tintan lẹ Do Otẹn Tintan Mẹ!

HIẸ yin asu po otọ́ de po. Dile azán gaa, nuṣikọnamẹ tọn to azọ́n mẹ to sisẹpọ vivọnu, linlẹn towe lẹ lẹhlan opli agun tọn heyin titobasina do whèjai enẹ lọ ji. Eyin hiẹ tọ́nsọn azọ́n mẹ tlolo, hiẹ na tindo ojlẹ kleun de poun nado lawu, diọ avọ̀ towe lẹ, bo dù núdùdù kleun de whẹpo do dokọ opli. To ajiji mẹ, azọ́nmẹyimẹdotọ towe dọnsẹpọ we bo biọ dọ hiẹ ni wà gangodo-zọ́n. E dopagbe nado suahọ we taun. Hiẹ tindo nuhudo akuẹ lọ tọn.

Kavi hiẹ yin asi po onọ̀ de po. Dile hiẹ to awuwlena núdùdù whèjai tọn, ayidonugo towe wá avọ̀ he ma ko yin lili delẹ ji, yèdọ delẹ to yé mẹ he na yin yiyizan to osọ. Hiẹ kanse dewe dọ, ‘Eyin yẹn yì opli to whèjai egbe, whetẹnu wẹ yẹn na mọ dotẹnmẹ nado li avọ̀ lọ lẹ?’ Dile e yindọ hiẹ ko kẹalọyi agbasa-zọ́n whenu-gigọ́ tọn de to agọe, hiẹ to pinplọn lehe e sinyẹnawu sọ nado penukundo azọngban whédo tọn go do to whenuena hiẹ to agbasazọ́n wà.

Kavi hiẹ yin wehọmẹvi de. To abò towe mẹ, tafo towe yin gigọ́ po azọ́ndenamẹ whégbè tọn lẹ po. Suhugan yetọn ko yin didenamẹ sọn ojlẹ dindẹn die wayi, ṣigba hiẹ ko sisẹ yé donukọn, podọ todin azọ́ndenamẹ whégbè tọn lẹ ko wá hoplidopọ nado yin bibasi to ojlẹ dopolọ mẹ. Hiẹ yin whiwhlepọn nado biọ dotẹnmẹ sọn mẹjitọ towe lẹ dè nado nọ whégbè bo gọ̀n opli nado dotana azọ́ndenamẹ whégbè tọn towe lẹ.

Detẹ wẹ hiẹ na ze do otẹn tintan mẹ: agbasazọ́n gangodo tọn lọ, avọ̀ lili lọ, azọ́ndenamẹ whégbè tọn lọ lẹ, kavi opli agun tọn lọ? Etẹwẹ e zẹẹmẹdo, to gbigbọ liho, nado ze onú tintan lẹ do otẹn tintan mẹ? Etẹwẹ yin pọndohlan Jehovah tọn?

Etẹwẹ Dona Tin to Otẹn Tintan Mẹ?

To whenuena Islaelivi lẹ ko mọ Gbedide Ao lẹ yí godo tlolo, dawe de yin mimọ he to nake ṣinyan to Gbọjẹzangbe. Ehe yin gbigbẹ́ sinsinyẹn to Osẹ́n lọ mẹ. (Osọha lẹ 15:32-34; Deutelonomi 5:12-15) Nawẹ hiẹ na ko dawhẹ lọ gbọn? Be hiẹ na ko suwhẹna dawe lọ, bo dọnnu dọ, to popolẹpo mẹ, ewọ ma to azọ́nwa nado zan aliho gbẹzan vivomẹ tọn de gba ṣigba nado wleawu dandannu lẹ tọn na whẹndo etọn wẹ ya? Be hiẹ na ko yihojlẹdohogo dọ ojlẹ susu lẹ na tin to owhe lọ blebu gblamẹ nado payi Gbọjẹzan go podọ Gbọjẹzan dopo poun jijodo, vlavo na awugbopo dawe lọ tọn nado wleawu jẹnukọn wutu, sọgan yin jijona po awubibọ po wẹ ya?

Jehovah pọ́n whẹho lọ hlan po nukun nujọnu tọn po taun. Biblu dọmọ: “OKLUNỌ sọ dọ hlan Mose dọmọ, Dawe lọ na yin hùhù dandan.” (Osọha lẹ 15:35) Etẹwutu wẹ Jehovah do tindo numọtolanmẹ sinsinyẹn mọnkọtọn gando nuhe dawe lọ wà go?

Gbẹtọ lọ lẹ tindo azán ṣidopo nado ṣinyan nake bosọ penukundo nuhudo yetọn devo lẹ gando núdùdù, avọ̀, po nọtẹn po go. Azán ṣinawetọ dona yin kinklandovo na nuhudo gbigbọmẹ tọn yetọn lẹ. Dile e mayin nuhe ylan nado ṣinyan nake do, nuhe ylan wẹ e yin nado yí ojlẹ he dona ko yin kinklandovo na sinsẹ̀n-bibasi Jehovah tọn do wà mọ. Dile etlẹ yindọ Klistiani lẹ matin to Osẹ́n Mose tọn glọ, be nujijọ ehe ma plọnnu mí to zize nuhe tin to otẹn tintan mẹ lẹ do otẹn he jẹ mẹ to egbehe ya?—Filippinu lẹ 1:10.

To owhe 40 yiyizan to zungbo mẹ godo, Islaelivi lẹ wleawu nado biọ Aigba Pagbe tọn ji. Agbọ́ ko pé mẹdelẹ na manna heyin awuwlena sọn olọn mẹ wá dùdù to zungbo mẹ podọ matin ayihaawe to nukọn pọnhlan na diọdo to núdùdù mẹ. Nado gọalọna yé nado tindo pọndohlan dagbe dile yé biọ aigba “he yí anọ́sin po owín po do to sisá de ji,” Jehovah flin yé dọmọ: “Gbẹtọ ma togbẹ̀ gbọn núdùdù kẹdẹ dali gba, ṣigba gbọn onú dopodopo he tọ́nsọn onù OKLUNỌ lọ tọn mẹ jẹgbonu dali wẹ gbẹtọ togbẹ̀ te.”—Eksọdusi 3:8; Deutelonomi 8:3.

Islaelivi lẹ dona wazọ́n sinsinyẹn na “anọ́sin po owín po” yetọn. Awhànpa lẹ tin nado gbawhàn etọn, ohọ̀ lẹ nado yin gbigbá, ogle lẹ nado dó. Etlẹ yin po ehe lẹpo po, Jehovah degbena gbẹtọ lọ lẹ nado dè whenu dovo to azán dopodopo gbè nado lẹnayihamẹpọn do whẹho gbigbọmẹ tọn lẹ ji. Yé nasọ yí sọwhiwhe do plọn aliho Jiwheyẹwhe tọn lẹ ovi yetọn lẹ. Jehovah dọmọ: “Mì nasọ nọ plọn [gbedide ṣie lẹ] ovi mìtọn lẹ, didọho yetọn, whenuena hiẹ sinai to owhé towe gbè, podọ to whenuena hiẹ to zọnlinzin to aliho ji, podọ to whenuena hiẹ mlọnai, podọ to whenuena hiẹ fọ́n ṣite.”—Deutelonomi 11:19.

Whlaatọ̀n to owhe dopo mẹ Islaelivi sunnu lẹpo po mẹdiọzun Juvi lẹ po he tin to aigba lọ ji yin gbedena nado sọawuhia to Jehovah nukọn. To yinyọnẹn mẹ dọ whẹndo lọ blebu sọgan mọale gbigbọmẹ tọn yí sọn nujijọ mọnkọtọn lẹ mẹ, tatọ whẹndo tọn susu basi tito na asi po ovi yetọn lẹ po nado hodo yé. Ṣigba mẹnu wẹ na basi hihọ́na owhé yetọn lẹ po ogle yetọn lẹ po sọn mẹgbeyinyan kẹntọ lẹ tọn si to whenuena whẹndo lọ ko tọ́n yì godo? Jehovah dopagbe dọmọ: “Omẹ depope ma na jlo aigba towe gba, whenuena hiẹ hẹji jei nado sọawuhia to OKLUNỌ Jiwheyẹwhe towe lọ nukọn whlaatọ̀n to owhe lọ mẹ.” (Eksọdusi 34:24) E biọ yise to Islaelivi lẹ si nado yise dọ eyin yé ze dagbenu gbigbọmẹ tọn lẹ do otẹn tintan mẹ, yé ma na hẹn nudepope bú to agbasa liho gba. Be Jehovah yin nugbonọ hlan ohó etọn ya? E wàmọ na jide tọn!

Mì to Ahọluduta lọ Dín Jẹnukọn Whẹ́

Jesu plọn hodotọ etọn lẹ nado ze nuhọakuẹ gbigbọmẹ tọn lẹ do nukọn na nulẹpo. To Yẹwhehodidọ Osó ji tọn mẹ, e na avase hosetọ etọn lẹ dọmọ: “Mì yin vivẹnunọ blo, dọ, etẹ mí na dù? kavi, etẹ mí na nù? Kavi, etẹ mí na do yin mẹṣinyọnavọ̀na? . . . mì dín ahọludu Jiwheyẹwhe tọn, po dódó etọn po whẹ́; onú [dandannu agbasa tọn] helẹ pó wẹ yè na dogọ́ hlan mì.” (Matiu 6:31, 33) To madẹnmẹ jẹgodona okú Jesu tọn, Klistiani he yí baptẹm yọyọ lẹ hodo ayinamẹ enẹ. Susu yetọn yin Juvi lẹ kavi mẹdiọzun Juvi lẹ he ko basi gbejizọnlin yì Jelusalẹm na hùnwhẹ Pẹntikọsti owhe 33 W.M. tọn bibasi. To whenuena yé tin to finẹ, onú madonukun de jọ. Yé sè bosọ kẹalọyi wẹndagbe lọ dogbọn Jesu Klisti dali. Na tintin to jejeji nado plọnnu dogọ dogbọn yise yọyọ yetọn dali wutu, yé gbọṣi Jelusalẹm. Awuwledainanu yetọn lẹ jẹ vivọ ji, ṣigba pekọ agbasanu lẹ tọn tin to otẹn awetọ mẹ. Yé ko mọ Mẹssia lọ! Mẹmẹsunnu Klistiani yetọn lẹ má nutindo agbasa tọn he yé tindo lẹ hẹ yé na yemẹpo nido sọgan to nukọnzindo nado “nọte gligli to oplọn po kọndopọ apọsteli lẹ tọn po mẹ . . . po odẹ̀ po.”—Owalọ lẹ 2:42.

To madẹnmẹ, Klistiani delẹ gbẹkọ nuhudo lọ na kọndopọ gbesisọmẹ tọn to opli lẹ ji go. (Heblu lẹ 10:23-25) Vlavo yé lẹzun agbasanu bẹplitọ, bo gbẹkọ whẹho gbigbọmẹ tọn lẹ go dile yé to tintẹnpọn nado hẹn hihọ́ akuẹzinzan tọn na yedelẹ po whẹndo yetọn lẹ po diun. To whenuena e ko dotuhomẹna mẹmẹsunnu etọn lẹ ma nado gbẹ́ opli lẹ dai godo, apọsteli Paulu wlan dọmọ: “Mì gbọ owalọ mìtọn ni tin matin nukunkẹn; onú he mì tindo ni pé mì: na e ko dọmọ, Yẹn ma to na jo we dai gbede, kavi gbẹ́ we gba.”—Heblu lẹ 13:5.

Ayinamẹ Paulu tọn lẹzun dehe wá do ganmẹ. Nudi owhe atọ́n godo he Paulu wlan wekanhlanmẹ etọn hlan Heblunu lẹ, awhànpa Lomu tọn heyin Cestius Gallus tọn lẹdo Jelusalẹm pé. Klistiani nugbonọ lẹ flin avase Jesu tọn dọmọ: “Whenuena mì mọ [ehe] . . . , gbọ ewọ he tin to họta jẹte yì ohọ̀ mẹ blo, e biọ e mẹ nado yí onú depope sọn ohọ̀ etọn mẹ blo. Mẹhe sọ tin to ogle mẹ gọwa nado yí avọ̀ etọn blo.” (Malku 13:14-16) Yé yọnẹn dọ lunluntọ́n yetọn sinai, e mayin do dolilo agbasazọ́n yetọn kavi nuhọakuẹ nutindo agbasa tọn yetọn lẹ ji gba, ṣigba do tonusise yetọn hlan nudọnamẹ Jesu tọn lẹ ji. Mẹhe ko yigbe hlan ayinamẹ Paulu tọn bo ko sọ yí dagbenu gbigbọmẹ tọn lẹ do otẹn tintan mẹ lẹ matin ayihaawe mọ ẹn taidi nuhe bọawu tlala nado jo owhé, agbasazọ́n, avọ̀, po nutindo họakuẹ mẹdetiti tọn lẹ po dó bo họnyi osó lẹ ji hugan mẹdelẹ he ma ko vò sọn owanyi akuẹ tọn mẹ lẹ.

Lehe Mẹdelẹ Yí Onú Tintan lẹ do Otẹn Tintan mẹ do to Egbehe

Klistiani nugbonọ lẹ to egbehe nọ wlebòna gbẹdido gbesisọ tọn hẹ mẹmẹsunnu yetọn lẹ, podọ mẹsusu nọ basi avọ́sinsan lẹ nado yì opli lẹ. To lẹdo delẹ mẹ, agbasazọ́n dopo gee he tin-to-aimẹ lọ bẹ azọ́n ganmẹ-didiọ tọn hẹn. Mẹmẹsunnu dopo nọ biọ nado diọtẹnmẹ na azọ́nwatọgbẹ́ etọn lẹ to samedi zanmẹ lẹ, ehe suhugan gbẹtọ lẹ tọn to lẹdo lọ mẹ yiwanna nado yizan na ayidedai, eyin yewlẹ to godo mẹ na wazọ́n do otẹn etọn mẹ to whèjai opli tọn lẹ. Mẹmẹsunnu devo lẹ he nọ wazọ́n ganmẹ-didiọ tọn lẹ nọ yì opli to agun he sẹpọ yé de mẹ eyin azọ́n yetọn glọnalina yé sọn yetọn titi yìyì mẹ. To aliho ehe mẹ, diblayin dọ yé ma nọ gbọ̀ opli de go gba. Jlodotọ yọyọ de to Canada yọ́n nujọnu-yinyin Wehọmẹ Lizọnyizọn Yẹwhehọluduta tọn po Opli Sinsẹ̀nzọn tọn po to niyaniya mẹ, ṣigba tito azọ́n etọn tọn nọ glọnalina opli yìyì etọn. Enẹwutu, e nọ suahọ azọ́nwatọgbẹ́ de nado wazọ́n do otẹn etọn mẹ na ewọ nido sọgan vò nado yì opli titengbe ehe lọ lẹ.

Mẹsusu he to yaji sọn awutu jẹmagbọ si lẹ ma tlẹ nọ saba yawu gọ̀n opli de gba. Yé nọ dotoai hlan tito-to-whinnu lọ to whégbè gbọn kanṣiṣa alokan de tọn dali kavi hoyidokanji de to whenuena yé ma penugo nado tin to Plitẹnhọ Ahọluduta lọ tọn mẹ. Yé nọ do pinpẹn-nutọn-yinyọnẹn he jẹ na pipà hia na awuwledainanu gbigbọmẹ Jehovah tọn lẹ gbọn “afanumẹ nugbonọ nuyọnẹntọ” lọ dali! (Matiu 24:45) Klistiani he to nuyiwa taidi nukunpedomẹgotọ mẹjitọ mẹhomẹ lẹ tọn nọ yọ́n pinpẹn etọn na nugbo tọn to whenuena mẹmẹsunnu kavi mẹmẹyọnnu de jlo nado nọhẹ mẹjitọ lọ na nukunpedomẹgotọ lọ nido sọgan yì opli agun tọn de.

Basi Tito Jẹnukọn!

Mẹjitọ lẹ he onú gbigbọmẹ tọn yetọn nọ duahunmẹna lẹ nọ gọalọna ovi yetọn lẹ nado yọ́n pinpẹn opli Klistiani tọn lẹ. Taidi osẹ́n paa tọn de, yé nọ donukun ovi yetọn lẹ nado wà azọ́ndenamẹ whégbè tọn yetọn lẹ to whenuena e yin dide na yé tlolo kakati nado dike na azọ́ndenamẹ lẹ ni hoplidopọ. To whèjai opli tọn lẹ ovi lẹ nọ wà azọ́ndenamẹ whégbè tọn lẹ tlolo he yé lẹkọ wá whégbè sọn wehọmẹ. Ayidedai-yiwanna lẹ po nuwiwa devo lẹ po ma nọ yin dotẹnmẹ na nado glọnalina opli agun tọn lẹ gba.

Taidi asu po otọ́ de po, be hiẹ nọ yí opli lẹ yìyì do otẹn tintan mẹ ya? Taidi asi po onọ̀ de po, be hiẹ nọ tẹnpọn nado basi tito na azọngban towe lẹ nado na dotẹnmẹ opli lẹ yìyì ya? Taidi jọja aflanmẹ de, be hiẹ nọ pọ́n azọ́ndenamẹ whégbè tọn towe lẹ hlan taidi nujọnu hugan opli lẹ kavi opli lẹ taidi nujọnu hugan azọ́ndenamẹ whégbè tọn towe lẹ ya?

Opli agun tọn de yin awuwledainanu owanyinọ Jehovah tọn. Vivẹnu lẹpo dona yin dido nado tindo mahẹ to tito enẹ lọ mẹ. Jehovah na dona we susugege eyin hiẹ ze onú tintan lẹ do otẹn tintan mẹ!

[Yẹdide to weda 19]

Whèjai opli tọn wẹ, ṣigba hiẹ sọ tindo azọ́n nado wà. Etẹwẹ hiẹ na ze do otẹn tintan mẹ?