Awusọhia Tẹwẹ Lẹgba Tindo?

Gblọndo Biblu tọn

Lẹgba yin gbigbọ de he nukun ma nọ mọ, enẹ dohia dọ e ma do agbasa he mí gán mọ de.—Efesunu lẹ 6:11, 12.

Yẹdide Lẹgba tọn he gbayipe de he mẹ e hẹn owhán-onù-susunọ de do alọmẹ te. E di gbọgbọẹ he do azò po osi po.

Susu to mẹhe nọ de yẹdide lẹ mẹ wẹ basi yẹdide Lẹgba tọn taidi nudida de he di gbọgbọẹ bo do azò lẹ, osi po owhán-onù-susunọ po. Mẹdelẹ yise dọ mẹhe nọgbẹ̀ to owhe 1 000 linlán die bo nọ de yẹdide lẹ wẹ yin omẹ tintan he de yẹdide Lẹgba tọn enẹ, podọ nue mẹlẹ nọ dọ po otàngblo he yé sè lẹ po wẹ na ko yinuwado yé ji.

Etẹlẹ go wẹ Biblu yí Lẹgba jlẹdo?

Biblu yí Lẹgba jlẹdo onú voovo lẹ go. Ehe zọ́n bọ mí yọ́n omẹ nankọ he e yin, e ma yin awusọhia he e do. Delẹ to nuhe go Biblu yí Lẹgba jlẹdo lẹ mẹ die:

Angẹli hinhọ́n tọn. E nọ kàn ayiha bo nọ yí nue taidi nudagbe lẹ do klọ gbẹtọ lẹ nado jo nuplọnmẹ Jiwheyẹwhe tọn lẹ do bo hodo etọn.—2 Kọlintinu lẹ 11:14.
Kinnikinni de he to lìlì. E nọ diọnukunsọ mẹhe nọ sẹ̀n Jiwheyẹwhe lẹ po kanyinylan po.—1 Pita 5:8.
Dlagọni daho lọ. E ylanhùn bo do huhlọn bosọ nọ hẹnnugble taun.—Osọhia 12:9.

Wefọ Biblu tọn he dọho gando Lẹgba go lẹ

2 Kọlintinu lẹ 11:14: “Satani lọsu nọ to wunmẹdiọ na ede zun angẹli hinhọ́n tọn de.”

Zẹẹmẹ: Satani nọ kàn ayiha bo nọ yí nue taidi nudagbe lẹ do klọ gbẹtọ lẹ nado jo nuplọnmẹ Jiwheyẹwhe tọn lẹ do bo hodo etọn.
Efesunu lẹ 6:11: “Mì ze gbaja Jiwheyẹwhe tọn blebu do, na mì nido penugo nado nọte gligli sọta ayiha wintinwintin Lẹgba tọn lẹ.”

Zẹẹmẹ: Lẹgba nọ kàn ayiha gigẹdẹ lẹ nado hẹn gbẹtọ lẹ vẹtolina Jiwheyẹwhe.
Jakọbu 4:7: “Mì litaina Jiwheyẹwhe; ṣigba mì diọnukunsọ Lẹgba, ewọ nasọ họ̀n sọn mì dè.”

Zẹẹmẹ: Mẹde gán duto Satani ji eyin e nọ setonuna Jiwheyẹwhe kakati nido yin Lẹgba.
1 Pita 5:8: “Kẹntọ mìtọn Lẹgba to dindanpe di kinnikinni de he to lìlì bo to mẹhe e na tlẹndu dín.”

Zẹẹmẹ: Lẹgba gbẹwanna mẹhe nọ setonuna Jiwheyẹwhe lẹ bo nọ jlo na hẹn họntọnjiji yetọn hẹ Ewọ gble.