Naegbọn Gbẹtọ lẹ Nọ Wà Nuylankan?

DOPO to nuhe mẹsusu na kẹalọyi lẹ mẹ wẹ yindọ: Mímẹpo wẹ yin mapenọ podọ enẹwutu mí nọ ṣinuwa bo nọ wà nuhe nọ wá vẹna mí to godo mẹ lẹ. Etomọṣo, be enẹwutu wẹ nuylankan susu lẹ, vlavo daho kavi pẹvi he mí nọ mọ kavi sè kavi hia to linlinwe lẹ mẹ do nọ jọ diblayin egbesọegbesọ ya?

Mahopọnna mapenọ-yinyin gbẹtọvi lẹ tọn, gbẹtọ lẹ to paa mẹ nọ kẹalọyi dọ dogbó walọ dagbe tọn lẹ tin he go yè ma dona zẹ̀ podọ dọ gbẹtọvi lẹ tindo nugopipe nado dapana nuylankan wiwà. Mẹsusu nasọ kẹalọyi dọ vogbingbọn tin to nuhe ma sọgbe didọ to mayọnẹn mẹ po mẹhẹngble tlọlọ po ṣẹnṣẹn, podọ to awugblenamẹ to mayọnẹn mẹ po hlọnhuhu po ṣẹnṣẹn. Etomọṣo, gbẹtọ paa lẹ nọ saba tindo mahẹ to nuyiwa mẹhẹnjọsi tọn lẹ mẹ to lẹdo yetọn mẹ. Etẹwutu? Naegbọn gbẹtọ lẹ nọ wà nuylankan?

Biblu tá hinhọ́n do hosọ ehe ji. E zinnudo whẹwhinwhẹ́n tangan he wutu gbẹtọ lẹ nọ yinuwa to aliho he yé yọnẹn dọ e ma sọgbe mẹ lẹ ji. Lẹnnupọndo nuhe e dọ lẹ ji.

▪ “Awusinyẹnnamẹ hẹn nuyọnẹntọ dalẹ.”—YẸWHEHODỌTỌ 7:7.

Biblu dohia dọ to whedelẹnu, nuyiwadomẹji sinsinyẹn ninọmẹ lẹ tọn nọ hẹn gbẹtọ lẹ nado wà nuhe yé ma na ko wà to paa mẹ. Mẹdelẹ sọgan tindo mahẹ to sẹ́nhẹngba mẹ to vivẹnudido mẹ nado wà nuhe yé lẹndọ e sọgan hẹn pọngbọ wá na nuhahun po mawadodo he yé to pipehẹ po lẹ. Owe lọ, Urban Terrorism dọmọ: “To whẹho susu mẹ, nuhe nọ sisẹ́ gbẹtọ lẹ nado lẹzun nukunbianamẹtọ to tintan whenu wẹ flumẹjijẹ sinsinyẹn gọna huhlọn tonudidọ tọn, tito gbẹtọ tọn, po akuẹzinzan po tọn he ma nọ diọ lẹ.”

▪ “Wanyina akuẹ wẹ yin adọ̀ onú ylankan wunmẹ lẹpo tọn.”—1 TIMOTI 6:10.

Mẹdelẹ nọ dọ dọ, mẹhe tlẹ tindo walọ dagbe lẹ na gbà osẹ́n walọ dagbe tọn lẹ eyin akuẹ susu yin zizedonukọnna yé. Mẹdelẹ he nọ sọawuhia di họntọnjihẹmẹtọ bo nọ do homẹdagbe hia to ninọmẹ paa lẹ mẹ nọ diọ jijọ to whenue yé mọdọ whẹho akuẹ tọn fọndote, bo nọ lẹzun hùnylantọ kavi kanylantọ. Yí nukun homẹ tọn do pọ́n sẹ́nhẹngba susu he nukunkẹn nọ hẹnwa lẹ—mẹhodu, alọslonamẹ, mẹfinfin, podọ etlẹ yin mẹhuhu.

▪ “Na yè ma hẹn whẹdida di adonu do azọ́n ylankan go, enẹwutu ayiha gbẹtọvi lẹ tọn jai to ohò yetọn mẹ nado wà oylan.”—YẸWHEHODỌTỌ 8:11.

Wefọ enẹ dohia dọ gbẹtọvi lẹ tindo ayilinlẹn nado wà nudepope he jlo yé eyin nukun mẹhe tin to otẹn aṣẹpipa tọn mẹ de tọn ma tin to yé ji. Ehe yin nugbo to whẹho mọto-kùntọ he nọ họ̀nwezun zẹjlẹgo to aliji, mẹhe nọ finwepọ́n to mẹtẹnpọn whenu, mẹhe nọ bẹ tòkuẹ dù, po mọmọ po lẹ tọn mẹ. Eyin gbẹtọ lẹ ma yin hinhẹn po huhlọn po nado hodo osẹ́n, kavi eyin obu nado yin wiwle ma tin, mẹhe nọ yìn osẹ́n to paa mẹ lẹ sọgan tindo jintli nado wà nuhe yé ma na ko wà. Linlinwe lọ, Arguments and Facts dọmọ: “E taidi dọ aliho awubibọ tọn he mẹ sẹ́ngbatọ lẹ nọ yin jijodo matin yasanamẹ te nọ whàn tòvi paa lẹ nado gbà osẹ́n to aliho sinsinyẹn mẹ.”

▪ “Omẹ dopodopo nọ yin whiwhlepọn dile e yin dindọn yì bo yin omọ̀ dó na gbọn ojlo edetiti tọn dali. Enẹgodo, ojlo lọ, to whenuena e ko mọhò, e nọ ji ylando.”—JAKỌBU 1:14, 15.

Gbẹtọvi lẹpo wẹ sọgan tindo linlẹn agọ̀. Egbesọegbesọ wẹ linlẹn po whlepọn ylanwiwa tọn susugege po nọ pannukọn mí. To ojlẹ Biblu tọn mẹ, Klistiani lẹ yin didọna dọmọ: “Whlepọn depope ma ko wá mì ji adavo dehe to paa mẹ na gbẹtọ lẹ.” (1 Kọlintinu lẹ 10:13) Etomọṣo, kọdetọn lọ sinai do nudide he mẹde basi ji—nado yawu de ayiha etọn sọn linlẹn ylankan lọ ji kavi nado to nulẹnpọn do e ji bo na ẹn dotẹnmẹ nado whẹ́n. Wefọ he yin didesọn wekanhlanmẹ gbọdo Jakọbu tọn mẹ to aga na avase dọ eyin mẹde na dotẹnmẹ ojlo ylankan nado “mọhò,” walọ ylankan wẹ na bọdego dandan.

▪ “Ewọ he to zọnlinzin hẹ nuyọnẹntọ na yọnnu in: ṣigba ogbẹ́ nulunọ lẹ tọn na sudo.”—HOWHINWHẸN LẸ 13:20.

Mẹhe mí nọ dogbẹ́ hẹ lẹ sọgan tindo nuyiwadomẹji daho do mí ji—na dagbe kavi na oylan. Whlasusu wẹ gbẹtọ lẹ nọ wà nuhe yé ma lẹn nado wà—na kọgbidinamẹ hagbẹ tọn kavi dile mẹsusu nọ dọ do, na yé dogbẹ́ ylankan he nọ hẹn kọdetọn ylankan wá wutu. To hogbe dowhenu Biblu tọn mẹ, “nulunọ lẹ” nọ dlẹnalọdo mẹhe dovọ́na ayinamẹ nuyọnẹn tọn sọn Ohó Jiwheyẹwhe tọn mẹ lẹ, e ma yin mẹhe ma tindo nuyọnẹn lẹ gba. Vlavo mí yin jọja kavi mẹho, eyin mí ma yí nuyọnẹn do de họntọn po mẹhe mí nọ dogbẹ́ hẹ lẹ po gbọn nujinọtedo dagbe he tin to Biblu mẹ lẹ yiyizan dali, be mí sọgan donukun dọ ogbẹ́ mítọn na “sudo.”

Wefọ ehelẹ po susu devo lẹ po to Biblu mẹ do nuhewutu gbẹtọ lẹ—vlavo mẹhe nọ wà dagbe to onú devo lẹ mẹ—do nọ wà nuhe ylan, etlẹ yin nuhe hẹnmẹjọsi lẹ hia. Dile etlẹ yindọ alọgọnamẹnu wẹ e yin nado yọ́n nuhe nọ sisẹ́ gbẹtọ lẹ nado wà nuhe ylan lẹ, be todido tin dọ ninọmẹ lọ na wá diọ do dagbe ji ya? Mọwẹ, na Biblu ma basi zẹẹmẹ nuhewutu gbẹtọvi lẹ nọ wà nuhe ylan lẹ kẹdẹ tọn gba, ṣigba e sọ dopagbe dọ walọ mọnkọtọn lẹ ma na wá tin ba. Opagbe tẹlẹ wẹ? Be nuylankan he to jijọ to aihọn mẹ lẹpo na wá vivọnu nugbonugbo ya? Hosọ he bọdego na gblọndo lọ lẹ.