Biblu dohia dọ devizọnwatọ Jiwheyẹwhe tọn lẹ na “jẹ whlepọn hunkọhunkọ mẹ.” (Jakobu 1:2) Doayi hogbe lọ “hunkọhunkọ” (Glẹki poi·kiʹlos) go. Dile Glẹkigbe lọ nọ yin yiyizan do to hohowhenu, e zẹẹmẹdo “wunmẹwunmẹ” kavi “sinmẹ voovo” bo zinnudo “wunmẹ voovo whlepọn lẹ tọn” ji. Na taun tọn, to hodidọ egbesọegbesọ tọn mẹ, zẹẹmẹ tangan hogbe lọ tọn wẹ yin “sinmẹ voovo.” Enẹwutu, nado dọ ẹ to yẹhiadonu-liho, “whlepọn hunkọhunkọ” lẹ nọtena whlepọn he nọ sọawuhia to sinmẹ voovo mẹ lẹ. Ṣigba, Jehovah nọ gọalọna mí nado duto dopodopo yetọn ji. Naegbọn mí sọgan dọ mọ po jide po?

Mọwẹ, mahopọnna “sinmẹ,” kavi wunmẹ whlepọn mítọn tọn, “sinmẹ,” kavi dohia ojọmiọn Jiwheyẹwhe tọn de na tin he na sọgbe hẹ ẹ janwẹ. (Jakobu 1:17) Alọgọ he sọgbe bosọ wá do ganmẹ he Jehovah nọ na hlan devizọnwatọ etọn lẹ—mahopọnna lehe whlepọn kavi nuhahun yetọn lẹ sọgan gbọnvo sọ—yin ohia dopo poun gando “nuyọnẹn hunkọhunkọ susugege Jiwheyẹwhe tọn” go. (Efesunu lẹ 3:10) Be hiẹ ma kẹalọyi linlẹn ehe ya?