‘Ojọmiọn Jiwheyẹwhe Tọn Nọ Yin Didohia to Aliho Alọpalọpa Mẹ’

Apọsteli Pita dohia dọ Klistiani lẹ “tin to awubla mẹ gbọn whlepọn susu dali.” (1 Pita 1:6) To nukọnmẹ to wekanhlanmẹ gbọdo etọn mẹ, e dọ dọ ‘ojọmiọn Jiwheyẹwhe tọn nọ yin didohia to aliho alọpalọpa mẹ.’ (1 Pita 4:10) Hodidọ he yin lilẹdo ‘to aliho alọpalọpa mẹ’ bẹ hogbe Glẹkigbe dowhenu tọn wunmẹ dopolọ hẹn. Mẹhe nọ dindonanu do Biblu ji de basi zẹẹmẹ hodidọ enẹ tọn dọmọ: “Linlẹn he sẹhundaga de wẹ ehe yin. . . . Nado yí poikilos zan na ojọmiọn [kavi, nukundagbe majẹhẹ] Jiwheyẹwhe tọn zẹẹmẹdo dọ sinmẹ de ma tin to ninọmẹ gbẹtọvi tọn mẹ he ojọmiọn Jiwheyẹwhe tọn ma sọgan sọgbe hẹ.” E zindonukọn dọmọ: “Ninọmẹ depope ma tin, nugbajẹmẹji, nujijọ ajiji kavi obiọ depope ma tin he ojọmiọn Jiwheyẹwhe tọn ma sọgan didẹ, kavi ehe ojọmiọn Jiwheyẹwhe tọn ma sọgan pehẹ po kọdetọn dagbe po bo gbawhàn etọn. Nudepope ma tin to gbẹ̀mẹ he ojọmiọn Jiwheyẹwhe tọn ma sọgan dudeji. Hogbe họnwun lọ poikilos dọ̀n ayidonugo mítọn tlọlọ wá ojọmiọn sinmẹ voovo Jiwheyẹwhe tọn enẹ ji he sọgbe hẹ onú lẹpo na nugbo tọn.”

Ojọmiọn Jiwheyẹwhe Tọn Nọ Gọalọna Mí Nado Doakọnna Whlepọn Lẹ

Sọgbe hẹ nuhe Pita dọ, ojọmiọn Jiwheyẹwhe tọn nọ yin didohia gbọn omẹ voovo he agun Klistiani tọn bẹhẹn lẹ gblamẹ. (1 Pita 4:11) Devizọnwatọ Jiwheyẹwhe tọn dopodopo tindo nunina, kavi nugopipe gbigbọmẹ tọn lẹ, he sọgan yin asisa tulinamẹ tọn na mẹhe to ahidi hẹ whlepọn lẹ. (Lomunu lẹ 12:6-8) Di apajlẹ, hagbẹ agun lọ tọn delẹ yin mẹplọntọ Biblu tọn ayidego tọn lẹ. Hodidọ zinzin tọn yetọn lẹ nọ dozolanmẹna mẹdevo lẹ bo nọ whàn yé nado doakọnnanu. (Nẹhemia 8:1-4, 8, 12) Mẹdevo lẹ nọ basi dlapọn lẹngbọhọtọ tọn lẹ gbọzangbọzan yì mẹhe tindo nuhudo alọgọ tọn lẹ dè. Dlapọn mọnkọtọn lẹ nọ hùn dotẹnmẹ dote nado na tulimẹ bo ‘hẹn homẹmiọn ayiha lẹ.’ (Kọlọsinu lẹ 2:2) Dile nugopọntọ lẹ to dlapọn yise hẹnlodo tọn mọnkọtọn lẹ basi, yé nọ má nunina gbigbọmẹ tọn de. (Johanu 21:16) Mẹdevo lẹ sọ tin to agun lọ mẹ he yin yinyọnẹn na awuyadomẹ, mẹtọnhopọn, podọ owanyi sisosiso he yé nọ dohia to nuyiwa hẹ yisenọ hatọ he to oyà whlepọn tọn ji lẹ mẹ. (Owalọ lẹ 4:36; Lomunu lẹ 12:10; Kọlọsinu lẹ 3:10) Awuvẹmẹ mẹmẹsunnu po mẹmẹyọnnu owanyinọ ehelẹ po tọn gọna godonọnamẹ zohunhunnọ yetọn yin dohia ayidego tọn, kavi “sinmẹ” ojọmiọn Jiwheyẹwhe tọn de.—Howhinwhẹn lẹ 12:25; 17:17.

Mọwẹ, mahopọnna “sinmẹ,” kavi wunmẹ whlepọn mítọn tọn, “sinmẹ,” kavi dohia ojọmiọn Jiwheyẹwhe tọn de na tin he na sọgbe hẹ ẹ janwẹ. (Jakobu 1:17) Alọgọ he sọgbe bosọ wá do ganmẹ he Jehovah nọ na hlan devizọnwatọ etọn lẹ—mahopọnna lehe whlepọn kavi nuhahun yetọn lẹ sọgan gbọnvo sọ—yin ohia dopo poun gando “nuyọnẹn hunkọhunkọ susugege Jiwheyẹwhe tọn” go. (Efesunu lẹ 3:10) Be hiẹ ma kẹalọyi linlẹn ehe ya?