Hiẹ Sọgan Hoavùn Sọta Satani bo Duto Ewọ Ji!

 1. (a) Naegbọn avùn he mí to hihò sọta Satani do yin nujọnu taun to egbehe? (b) Nawẹ mí wagbọn do yọnẹn dọ mí sọgan duto avùn he mí to hihò sọta Satani ji?

SATANI to awhànfun sọta pipotọ mẹyiamisisadode lẹ tọn po “lẹngbọ devo lẹ” po. (Joh. 10:16) Yanwle Lẹgba tọn wẹ nado tlẹ́n devizọnwatọ Jehovah tọn susu dù dile e yọnbasi do, whẹpo whenu gli he pò na ẹn nido wá vivọnu. (Hia Osọhia 12:9, 12.) Be mí sọgan duto avùn he mí to hihò sọta Satani ji ya? Gbau! Biblu dọmọ: “Mì diọnukunsọ Lẹgba, podọ ewọ na họ̀n sọn mì dè.”—Jak. 4:7.

2, 3. (a) Nawẹ linlẹn he gbẹtọ lẹ nọ tindo dọ Satani ma tin nọ nọgodona yanwle Lẹgba tọn lẹ gbọn? (b) Nawẹ a wagbọn do yọnẹn dọ Satani tin nugbonugbo?

² Mẹdelẹ nọ ṣanmẹko eyin yè dọna yé dọ Satani tin. Yé nọ pọ́n Satani po aovi lẹ po hlan taidi omẹ yẹhiadonu tọn lẹ he nọ yin nùdego to owe lẹ mẹ, he nọ sọawuhia to sinima danuwiwa tọn po aihundida video ji tọn lẹ po mẹ. Omẹ enẹlẹ nọ lẹndọ mẹhe tindo nuyọnẹn de ma sọgan yise dọ gbigbọ ylankan lẹ tin. Todin, be a lẹndọ e nọ vẹna Satani dọ mẹdelẹ nọ pọ́n ewọ po aovi etọn lẹ po taidi mẹhe ma tin nugbonugbo lẹ ya? E yọnbasi dọ, enẹ ma nọ vẹna ẹn! Na nugbo lọ wẹ yindọ, e nọ bọawuna Satani nado tọ́nnukunna mẹhe nọ tindo ayihaawe dọ ewọ tin lẹ to gbigbọ-liho. (2 Kọl. 4:4) Dopo to aliho he Satani nọ yizan nado doyẹklọ gbẹtọ lẹ mẹ wẹ nado hẹn linlẹn lọ gbayipe dọ gbigbọ ylankan lẹ ma tin.

³ Taidi devizọnwatọ Jehovah tọn lẹ, mí ma tin to mẹhe yin yẹdoklọ lẹ mẹ. Mí yọnẹn dọ Lẹgba tin nugbo, na Satani wẹ dọhona Evi gbọn odàn de gblamẹ. (Gẹn. 3:1-5) Satani vlẹ Jehovah kò to whẹho Job tọn mẹ. (Job 1:9-12) Satani wẹ tẹnpọn nado whlé Jesu pọ́n. (Mat. 4:1-10) Podọ to whenue Ahọluduta Jiwheyẹwhe tọn yin didoai to 1914 godo, Satani wẹ mẹhe jẹ ‘awhànfun’ ji hẹ pipotọ mẹyiamisisadode lẹ tọn. (Osọ. 12:17) Satani zindonukọn to awhàn enẹ mẹ, na e to vivẹnudo nado hù yise pipotọ gbẹtọ 144 000 lẹ tọn po lẹngbọ devo lẹ tọn po sudo. Nado duto awhàn lọ ji, mí dona nọavùnte sọta Satani bo nọtegli to yise mẹ. Hosọ ehe dọhodo aliho atọ̀n he mẹ mí sọgan wàmọ te lẹ ji.

 4. Nawẹ Satani do ede hia taidi goyitọ akonka de gbọn?

⁴ Goyitọ akonka wẹ Satani yin. Nugbo lọ dọ nudida gbigbọnọ de yí jintli do diọnukunsọ nupojipetọ-yinyin Jehovah tọn bo ze ede daga nado sọzẹn hẹ Jiwheyẹwhe yin ohia lọ dọ nudida enẹ yin goyitọ podọ saklanọ. Enẹwutu, dopo to aliho he mẹ mí sọgan nọavùnte sọta Satani te lẹ mẹ wẹ nado dapana goyiyi bo wleawuna whiwhẹ.a (Hia 1 Pita 5:5.) Ṣigba, etẹwẹ awagundido zẹẹmẹdo? Be awagundido nọ yin nuylankan to whelẹponu wẹ ya?

5, 6. (a) Be awagundido nọ yin nuylankan to whelẹponu wẹ ya? Basi zẹẹmẹ. (b) Awagundido tẹwẹ nọ hẹn owù wá, podọ apajlẹ Owe-wiwe tọn tẹlẹ wẹ do ehe hia?

⁵ Wezẹhomẹ de basi zẹẹmẹ awagundido tọn taidi “numọtolanmẹ nujọnu-yinyin tọn po sisi mẹdetiti tọn po,” gọna “numọtolanmẹ ayajẹ tọn he mẹde nọ tindo, na ewọ kavi mẹvivẹ etọn de, wà onú dagbe de kavi tindo onú dagbe de wutu.” Nude ma ylan to enẹ mẹ. Apọsteli Paulu dọna Tẹsalonikanu lẹ dọmọ: “Mílọsu lẹ nọ doawagun gando mì go to agun Jiwheyẹwhe tọn lẹ mẹ na akọndonanu po yise mìtọn po to homẹkẹn podọ to nukunbibia mìtọn lẹpo he mì to akọndona lẹ mẹ.” (2 Tẹs. 1:4) Enẹwutu, homẹhunhun tintindo to nuhe mẹdevo lẹ wà mẹ po awagundido jẹ obá de mẹ po sọgan wà dagbe na mí. E ma sọgbe dọ winyan ni nọ hù mí na aṣa mítọn, whẹndo kavi otò he mẹ mí wá sọn wutu.—Owalọ 21:39.

⁶ To alọ devo mẹ, awagundido zẹjlẹgo sọgan gbà haṣinṣan he nọ tin to họntọn lẹ ṣẹnṣẹn bo hẹn haṣinṣan mítọn hẹ Jehovah gble. Awagundido mọnkọtọn sọgan zọ́n bọ mí na gblehomẹ bo gbẹ́ ayinamẹ dagbe dai, kakati nado gbọn whiwhẹ dali kẹalọyi i. (Ps. 141:5) Wunmẹ awagundido tọn ehe yin zẹẹmẹ basina taidi “mẹdetiti yiylọdọ nujọnu zẹjlẹgo” kavi “pọndohlan sakla tọn, ehe mẹhe nọ saba lẹn to aliho he ma sọgbe mẹ dọ emi pọnte hú mẹdevo lẹ nọ tindo.” Jehovah gbẹwanna sakla. (Ezek. 33:28; Amọ. 6:8) Ṣigba, homẹ Satani tọn nọ hùn nado mọdọ gbẹtọvi lẹ nọ do gbigbọ nsọle-yinyin tọn hia, na enẹ nọ sọgbe hẹ gbigbọ goyiyi tọn he ewọ tindo wutu. Lehe homẹ Satani tọn na ko hùn do sọ to whenue sunnu delẹ taidi Nimlọdi, Falo, po Absalọmi po doawagun zẹjlẹgo bo jai jẹ omọ̀ goyiyi tọn mẹ! (Gẹn. 10:8, 9; Eks. 5:1, 2; 2 Sam. 15:4-6) Goyiyi yin dopo to nuhe sisẹ́ Kaini nado waylando lẹ mẹ. Jiwheyẹwhe lọsu wẹ na ẹn ayinamẹ, ṣigba goyiyi etọn sinyẹn sọmọ bọ e ma kẹalọyi ayinamẹ lọ. E yí tasinsinyẹn do gbẹkọ ayinamẹ Jehovah tọn go bo tlọ ede do nugbajẹmẹji sinsinyẹn mẹ.—Gẹn. 4:6-8.

7, 8. (a) Etẹwẹ akọ̀ ṣinṣinyan zẹẹmẹdo, podọ nawẹ e tindo kanṣiṣa hẹ goyiyi gbọn? (b) Basi zẹẹmẹ lehe goyiyi sọgan hẹn jijọho agun de tọn gble do tọn.

⁷ To egbehe, aliho ylankan susu mẹ wẹ gbẹtọ lẹ nọ do goyiyi hia te. To whedelẹnu, goyiyi nọ tindo kanṣiṣa hẹ akọ̀ ṣinṣinyan. Wezẹhomẹ de dọ dọ akọ̀ ṣinṣinyan zẹẹmẹdo “nuvẹun kavi wangbẹna tintindo na mẹhe wá sọn akọ̀ devo mẹ lẹ,” podọ “nuyise lọ dọ jẹhẹnu po nugopipe akọ̀ delẹ tọn po gbọnvo na akọ̀ devo lẹ tọn, bọ akọ̀ delẹ yọ́n hugan devo lẹ to jọwamọ-liho.” Akọ̀ ṣinṣinyan he goyiyi nọ fọndote ko dekọtọn do gufinfọn, awhàn, podọ etlẹ yin mẹsusu vivasudo mẹ.

⁸ Nugbo wẹ dọ onú mọnkọtọn lẹ ma dona wá aimẹ to agun Klistiani tọn mẹ. Etomọṣo, wiwọ́ he yisenọ hatọ lẹ nọ tindo sọgan bẹjẹeji po goyiyi po to whedelẹnu bo sọgan wá zẹ̀pá. E họnwun dọ onú mọnkọtọn lẹ jọ to Klistiani owhe kanweko tintan tọn delẹ ṣẹnṣẹn, mẹhe Jakọbu wlan kanbiọ mẹhẹnlẹnnupọn tọn ehe hlan dọmọ: “Fie wẹ awhàn lẹ wá sọn podọ fie wẹ avùn lẹ wá sọn to mì ṣẹnṣẹn?” (Jak. 4:1) Nado dọ hójọhó, eyin mí nọ gbẹwanna mẹdevo lẹ bo nọ mọdọ mí yiaga hugan yé, enẹ sọgan yinuwado hodidọ po nuyiwa mítọn lẹ po ji, bo hẹn awufiẹsa sinsinyẹn wá na mẹdevo lẹ. (Howh. 12:18) Na nugbo tọn, goyiyi sọgan hẹn jijọho agun de tọn gble.

 9. Nawẹ Biblu gọalọna mí nado hoavùn sọta akọ̀ ṣinṣinyan po goyiyi wunmẹ devo lẹ po gbọn? (Pọ́n yẹdide he tin to bẹjẹeji hosọ ehe tọn.)

⁹ Eyin mí nọ lẹndọ mí yiaga hugan mẹdevo lẹ, mí dona flindọ “omẹ he jọ goyitọ to ayiha mẹ, osùnú de wẹ hlan OKLUNỌ.” (Howh. 16:5) E nasọ yọ́n dọ mí ni gbadopọnna míde nado yọ́n nukun he mí nọ yí do pọ́n mẹhe wá sọn akọ̀ devo mẹ, otò devo mẹ, kavi tindo aṣa he gbọnvona mítọn lẹ. Eyin mí nọ yigo na akọ̀ kavi otò he mẹ mí wá sọn wutu, enẹ dohia dọ mí ma kẹalọyi nugbo lọ dọ Jiwheyẹwhe “hẹn akọta gbẹtọ tọn lẹpo wá sọn omẹ dopo mẹ.” (Owalọ 17:26) Sọgbe hẹ linlẹn enẹ, akọ̀ dopo gee wẹ tin, na tọgbo dopo wẹ gbẹtọvi lẹpo tindo, enẹ wẹ Adam. Enẹwutu, nulunu wẹ e yin nado yise dọ akọ̀ delẹ yọ́n hugan akọ̀ devo lẹ to jọwamọ-liho. Eyin mí nọ tindo linlẹn mọnkọtọn, mí na nọgodona ayiha wintinwintin Satani tọn nado hẹn owanyi po pọninọ Klistiani tọn mítọn po gble. (Joh. 13:35) Nado hoavùn sọta Satani bo duto ewọ ji, mí dona nọavùnte sọta goyiyi wunmẹ lẹpo.—Howh. 16:18.

10, 11. (a) Naegbọn e sọgan bọawuna mẹde nado jẹ wanyina aihọn lọ ji? (b) Nawẹ Dema sọgan ko yiwanna aihọn lọ gbọn?

¹⁰ Satani wẹ “ogán aihọn ehe tọn,” podọ aihọn lọ tin to huhlọn etọn glọ. (Joh. 12:31; 1 Joh. 5:19) Enẹwutu, suhugan nuhe aihọn ehe nọ zedonukọnna mí lẹ tọn nọ jẹagọdo nujinọtedo Biblu tọn lẹ. Nugbo wẹ dọ, e ma yin nuhe aihọn nọ zedonukọnnamẹ lẹpo wẹ ylan. Ṣigba, mí dona donukun dọ gbọn aihọn etọn dali, Satani na yí nuhe mẹ mí nọ tindo ojlo te lẹ zan bo tẹnpọn nado doyẹklọ mí, na mí nido waylando kavi jẹ wanyina aihọn lọ ji bo dovọ́na sinsẹ̀n-bibasi mítọn na Jehovah.—Hia 1 Johanu 2:15, 16.

¹¹ Na nugbo tọn, Klistiani owhe kanweko tintan whenu tọn delẹ wá yiwanna aihọn. Di apajlẹ, Paulu wlan dọmọ: “Dema ko gbẹ́ mi dai, na ewọ yiwanna titonu dintọn lọ wutu.” (2 Tim. 4:10) Biblu ma dọ onú aihọn tọn he Dema yiwanna taun, he zọ́n bọ e do jo Paulu do. E sọgan yindọ Dema wá jẹ wanyina agbasanu lẹ ji hugan onú gbigbọ tọn lẹ. Eyin nuhe Dema wà niyẹn, be lẹblanulọkẹyi dagbedagbe lẹ wẹ gbọ e go. Etẹwutu? Na aihọn lọ ma sọgan na nude Dema, ehe na hugan dona he Jehovah sọgan na ẹn lẹ, eyin ewọ yin azọ́nwatọgbẹ́ Paulu tọn!—Howh. 10:22.

12. Aliho tẹlẹ mẹ wẹ mí sọgan jai jẹ omọ̀ “huhlọn mẹkiklọ adọkunnu lẹ tọn” mẹ te?

¹² Nudopolọ sọgan jọ do mílọsu go. Taidi Klistiani lẹ, mí tindo ojlo he sọgbe lọ nado nọ penukundo nuhudo agbasa tọn mítọn po whẹndo mítọn tọn po go. (1 Tim. 5:8) Jehovah jlo dọ mí ni duvivi ogbẹ̀ tọn ganji, podọ nugbo enẹ nọ họnwun to whenue mí lẹnnupọndo lẹdo whanpẹnọ he ewọ wleawuna bo ze Adam po Evi po do e mẹ ji. (Gẹn. 2:9) Ṣigba, Satani sọgan yí nuhe mẹ mí nọ tindo ojlo te lẹ zan nado do omọ̀ na mí gbọn “huhlọn mẹkiklọ adọkunnu lẹ tọn” dali. (Mat. 13:22) Mẹsusu nọ lẹndọ akuẹ na hẹn ayajẹ wá na yé kavi dọ nutindo agbasa tọn lẹ na zọ́n bọ yé na tindo kọdetọn dagbe. Linlẹn yẹdoklọmẹ tọn wẹ enẹ yin, podọ e sọgan fẹayihasẹna mí sọn onú họakuẹ hugan he mí tindo ji, enẹ wẹ haṣinṣan mítọn hẹ Jehovah. Jesu na avase hodotọ etọn lẹ dọmọ: “Mẹdepope ma sọgan yin afanumẹ na ogán awe; adavo ewọ na gbẹwanna ode bo yiwanna awetọ, kavi ewọ na sẹbọdo ode go bo gbẹkọ awetọ go. Mìwlẹ ma sọgan yin afanumẹ na Jiwheyẹwhe podọ na Adọkunnu lẹ.” (Mat. 6:24) Eyin mí lẹzun afanumẹ na Adọkunnu lẹ, mí na doalọtena Jehovah sinsẹ̀n, podọ nuhe Satani to jijlo dọ mí ni wà lọ niyẹn! Mì gbọ mí ni ma dike akuẹ kavi nuhe e sọgan họ̀ lẹ ni yí otẹn sọn haṣinṣan mítọn hẹ Jehovah si gbede blo. Nado hoavùn sọta Satani, mí dona tindo pọndohlan jlẹkaji tọn gando agbasanu lẹ go bosọ tẹdo pọndohlan enẹ go.—Hia 1 Timoti 6:6-10.

13. Nawẹ aihọn lọ hẹn linlẹn agọ̀ gbayipe gando alọwle po fẹnnuwiwa zanhẹmẹ tọn po go gbọn?

¹³ Omọ̀ devo he tin to aihọn Satani tọn mẹ wẹ fẹnnuwiwa zanhẹmẹ tọn. To egbehe, mẹsusu wẹ nọ pọ́n nugbonọ-yinyin na alọwlemẹ mẹtọn, podọ etlẹ yin tito alọwle tọn lọsu hlan taidi aliglọnnamẹnu de kavi nuhe ko dohó. Di apajlẹ, yọnnu nukundeji he nọ daihun to sinima mẹ de dọmọ: “Gbẹtọ ma sọgan tindo alọwlemẹ dopo. N’ma ko mọ mẹhe yin nugbonọ kavi tlẹ jlo na yin nugbonọ na alọwlemẹ etọn pọ́n.” Sunnu he nọ daihun to sinima mẹ de dọmọ: “N’ma lẹndọ jọwamọnu wẹ e yin na gbẹtọ lẹ nado nọpọ́ hẹ alọwlemẹ dopo na pipotọ gbẹzan yetọn tọn.” Homẹ Satani tọn na ko hùn to whenue gbẹtọ nukundeji lẹ nọ dọho jẹagọdo alọwle go, he yin nunina de sọn Jiwheyẹwhe dè. E họnwun dọ Lẹgba ma nọ jlo na doyẹyigona tito enẹ kavi nọgodona ẹn, na e nido tindo kọdetọn dagbe. Enẹwutu, nado hoavùn sọta Satani bo duto ewọ ji, mí dona nọgodona tito alọwle tọn he Jiwheyẹwhe zedai.

14, 15. Nawẹ mí sọgan nọavùnte sọta fẹnnuwiwa zanhẹmẹ tọn gbọn?

¹⁴ Vlavo mí wlealọ kavi yin tlẹnnọ, mí dona nọavùnte sọta fẹnnuwiwa zanhẹmẹ tọn wunmẹ lẹpo. Be avùnhiho enẹ bọawu ya? Lala! Di apajlẹ, eyin jọja de wẹ a yin, a sọgan sè bọ wehọmẹvigbẹ́ towe lẹ na nọ doawagun dọ emi nọ zanhẹ mẹdepope, kavi nọ do wekanhlanmẹ gblewa tọn hlan mẹdevo lẹ, yèdọ aṣa ylankan de he nọ yin pinpọnhlan to lẹdo delẹ mẹ taidi nudopolọ hẹ yẹdide fẹnnuwiwa tọn he mẹ yè nọ zanhẹ yọpọvu lẹ te. Biblu dọmọ: “Ewọ he nọ lọga to ylando wà do agbasa etọn titi go.” (1 Kọl. 6:18) Azọ̀n he nọ yin bibẹplamẹ gbọn zanhẹmẹ dali bo gbayipe to egbehe lẹ ko hẹn yajiji po okú po wá. Podọ suhugan jọja tlẹnnọ he hẹn gbèjininọ yetọn bu lẹ tọn wẹ nọ wá dọ dọ nuhe emi wà vẹna emi. Nuhe fẹnnuwiwa yin taun gbọnvona nuhe sinima lẹ nọ dohia, ehe sọgan hẹn mí nado yise dọ osẹ́n Jiwheyẹwhe tọn gbigbà ma nọ hẹn kọdetọn ylankan depope wá. Nulinlẹnpọn to aliho enẹ mẹ ko hẹn gbẹtọ lẹ nado jai jẹ “huhlọn mẹkiklọ tọn ylando tọn” mẹ.—Heb. 3:13.

¹⁵ Eyin e nọ vẹawuna we nado nọavùnte sọta whlepọn fẹnnuwiwa zanhẹmẹ tọn, etẹwẹ a sọgan wà? Kẹalọyi dọ a tindo madogán de. (Lom. 7:22, 23) Hodẹ̀ bo biọ Jiwheyẹwhe dọ ni na we huhlọn. (Flp. 4:6, 7, 13) Nọ dapana ninọmẹ he sọgan hẹn we biọ fẹnnuwiwa mẹ lẹ. (Howh. 22:3) Podọ to whenue a pannukọn nuhe sọgan hẹn we biọ whlepọn mẹ de, nọ gbẹ́ ẹ dai to afọdopolọji.—Gẹn. 39:12.

16. Etẹwẹ Jesu wà to whenue Satani whlé e pọ́n, podọ etẹwẹ mí sọgan plọn sọn apajlẹ enẹ mẹ?

¹⁶ Jesu ze apajlẹ ayidego tọn de dai na mí gando avùnteninọ sọta whlepọn lẹ go. Opagbe Satani tọn lẹ ma doyẹklọ ẹ, mọjanwẹ ewọ ma tlẹ nọte nado lẹnnupọndo kọdetọn ylankan po ale he yé na hẹnwa lẹ po ji. Kakatimọ, e yawu na gblọndo dọmọ: “E ko yin kinkan dọ.” (Hia Matiu 4:4-10.) Jesu yọ́n Ohó Jiwheyẹwhe tọn ganji, podọ enẹ zọ́n bọ e penugo bo yinuwa to afọdopolọji bosọ yihodọ sọn wefọ lẹ mẹ to whenue e pannukọn whlepọn. Nado hoavùn sọta Satani bo duto ewọ ji, mí ma dona dike bo yin whiwhlepọn nado jai jẹ fẹnnuwiwa zanhẹmẹ tọn mẹ.—1 Kọl. 6:9, 10.

17, 18. (a) Awhànfunnu devo tẹlẹ wẹ Satani tindo, podọ naegbọn ehe ma dona paṣa mí? (b) Etẹwẹ to tepọn Satani, podọ nawẹ ehe na tuli we nado doakọnnanu gbọn?

¹⁷ Atọ̀n poun to awhànfunnu he Satani nọ yizan lẹ mẹ wẹ goyiyi, agbasanu lẹ bibẹpli, po fẹnnuwiwa zanhẹmẹ tọn po. Susu devo lẹ gbẹ́ pò. Di apajlẹ, Klistiani delẹ nọ pehẹ nukundiọsọmẹ sọn hagbẹ whẹndo tọn lẹ dè, mẹṣanko wehọmẹvigbẹ́ lẹ tọn, kavi tlẹ nọ pehẹ alọhẹndotenamẹ aṣẹpatọ lẹ tọn nado dọyẹwheho. Whlepọn mọnkọtọn lẹ ma nọ paṣa mí, na Jesu na avase hodotọ etọn lẹ dọmọ: “Gbẹtọ lẹpo na gbẹwanna mì na oyín ṣie tọn wutu; ṣigba mẹhe doakọnna kakajẹ opodo, omẹ enẹ wẹ na yin whinwhlẹngán.”—Mat. 10:22.

¹⁸ Nawẹ mí sọgan hoavùn sọta Satani bo duto ewọ ji gbọn? Jesu dọna devi etọn lẹ dọmọ: “Gbọn akọndonanu mìtọn dali wẹ mì na whlẹn alindọn mìtọn gán.” (Luku 21:19) Nudepope ma tin he gbẹtọvi de sọgan wà, ehe na hẹn awugble tẹgbẹ tọn wá na mí. Mẹdepope ma sọgan hò haṣinṣan họakuẹ he mí tindo hẹ Jiwheyẹwhe yí sọn mí si, adavo mí na ẹn dotẹnmẹ etọn. (Lom. 8:38, 39) Eyin devizọnwatọ Jehovah tọn lẹ tlẹ kú, enẹ ma dohia dọ Satani duto avùn lọ ji, na Jehovah na hẹn ẹn diun dọ yé na yin finfọnsọnku! (Joh. 5:28, 29) To alọ devo mẹ, sọgodo Satani tọn na blawu taun. To whenue titonu ylankan Satani tọn na yin vivasudo godo, ewọ na yin zizedlan odò mapote mẹ na owhe 1 000. (Osọ. 20:1-3) To whenue Gandudu Owhe Fọtọ́n tọn Jesu tọn na wá vivọnu, Satani na yin “tuntundote sọn gànpa etọn mẹ” na ojlẹ gli de, na ewọ nido doyẹklọ gbẹtọvi pipé lẹ whla godo tọn. To enẹgodo, Lẹgba na yin vivasudo. (Osọ. 20:7-10) Na nugbo tọn, nugbajẹmẹji wẹ to tepọn Satani, ṣigba e ma na yinmọ na hiẹ! Nọavùnte sọta Satani, bo nọtegligli to yise mẹ. Hiẹ sọgan hoavùn sọta Satani bo duto ewọ ji!