Nọte po Sọwhiwhe Po

LẸNGBỌHỌTỌ he nọ to awhádo dọ “Ohla!” gbọzangbọzan to whenuena ohla de ma nọ yin mimọ wá mọ dọ awhadido na alọgọ he bọdego emitọn lẹ ma nọ yin ayidego gba. Mọdopolọ to egbehe, mẹsusu gbẹkọ sisẹpọ azán Jehovah tọn go na yé ko sè avase madosọha lẹ he ko sọawuhia nado yin awhadido lalo tọn lẹ. Nugbo lọ dọ mẹsusu gboawupo nado tunwun avase dehe yin nujọnu tọn go bo setonu na ẹn ko na dotẹnmẹ hundote dagbe de kẹntọ daho Jiwheyẹwhe tọn, Satani Lẹgba, yèdọ “angẹli hinhọ́n tọn” lalonọ enẹ.—2 Kọlintinu lẹ 11:14.

Gbigbọ pekọ-mẹdetiti tọn ehe na yin owunu de etlẹ yin na mẹhe ko to Jehovah sẹ̀n na ojlẹ dindẹn lẹ. Etẹwutu? Gbadopọnna avase apọsteli Pita tọn to owhe kanweko tintan whenu.

Lẹnnupọn Ganji

Wekanhlanmẹ gbọdo awetọ Pita tọn yin nuflinmẹ de na Klistiani fliflimẹ tọn lẹ, podọ e yin na mílọsu lẹ ga. “Mì mẹyiwanna emi,” wẹ e wlan, “episteli awetọ he wẹ yẹn wlan hlan mì dinvie; to awe lẹ mẹ yẹn to homẹ wiwe mìtọn fọ́n daga gbọn oflin tọn dali.” (2 Pita 3:1) Dodonu tẹwẹ Pita tindo na nuduahunmẹnamẹ ehe? Pita zinnudo tintin tofi mẹvlẹtọ lẹ tọn ji mẹhe ovlẹko yetọn na yinuwa do numọtolanmẹ nuhudo niyaniya tọn gando ojlẹ he mẹ devizọnwatọ Jiwheyẹwhe tọn lẹ to gbẹnọ te ji. Din wẹ ojlẹ lọ nado họ́ mẹde sọta yinyin kiklọ gbọn mẹṣankotọ lẹ dali. Gbọnmọ dali Pita na tuli wehiatọ etọn lẹ nado “nọ flin ohó he yè dọ sọn onù yẹwhegan wiwe lẹ tọn mẹ jẹnukọn.” (2 Pita 3:2; Owalọ lẹ 3:22, 23) Etẹwẹ yẹwhegan lẹ ko dọ?

Devizọnwatọ nugbonọ Jiwheyẹwhe tọn lẹ to nujijọ susu whenu ko dọ̀n ayidonugo wá lehe whẹdida sọn olọn mẹ wá lẹ ko hẹn opodo wá na ylanwiwa do ji. Pita flinnu wehiatọ etọn lẹ gando Osingigọ azán Noa tọn gbè go ehe Jiwheyẹwhe yizan nado dademẹ to whenuena aihọn lọ yin gigọ́ po danuwiwa po. Osingigọ daho enẹ po kọdetọn dagbe po hẹn opodo wá na aihọn whenẹnu tọn. Ṣigba Jiwheyẹwhe basi-hihọ́na Noa po whẹndo etọn po to aki de mẹ gọna delẹ to nudida gbẹ̀te “dopodopo nutẹgbẹ lẹpo tọn” mẹ. Otangblo wẹkẹ tọn dekunnuna nugbo-yinyin linlin Biblu tọn lọ.a—Gẹnẹsisi 6:19; 2 Pita 3:5, 6.

Pita ylọ didademẹ sọn olọn mẹ wá enẹ dọ ‘nugbo de heyin jìwọn e go’ gbọn mẹdelẹ dali. Enẹgodo mẹdelẹ yin dindọn biọ pekọ-mẹdetiti tọn mẹ gbọn mẹvlẹtọ azán lọ gbè tọn lẹ dali. Nalete, míwlẹ ma dona wọnji nuhe Jehovah ko wà wayi lẹ go gbede gba. Pita dọna mí dọmọ: “Olọn he tin to dinvie lẹ, po aigba lọ po, gbọn ohó dopolọ dali yè sọ whlá hlan miyọ́n, bosọ hla yé dai hlan whẹdazangbe po dindọn mẹylankan lẹ tọn po.” (2 Pita 3:7) Mọwẹ, didademẹ sọn olọn mẹ wá na wá aimẹ whladopo dogọ.

Jiwheyẹwhe Ma Gboawupo Gba

Owhe fọtọ́n susu ko juwayi. Naegbọn Jiwheyẹwhe nọte dẹn sọmọ nado didẹ nuhahun gbẹtọvi tọn lẹ? Whladopo dogọ, Pita zinnudo nuagokun devo ji. E dọmọ: “Mẹyiwanna emi, mì yin madọnanọ onú dopo akàn he tọn blo, dọ azán dopo to Oklunọ dè taidi owhe fọtọ́n, owhe fọtọ́n sọ taidi azán dopo.” (2 Pita 3:8) Pọndohlan ojlẹ tọn Jiwheyẹwhe tọn gbọnvona míwlẹ tọn. Na Jiwheyẹwhe he tin to ogbẹ̀ kakadoi lọ, ojlẹ he sọn didá Adam tọn whenu kakajẹ dinvie ma tlẹ ko pé osẹ dopo. Etomọṣo, pọndohlan ojlẹ tọn depope he mí sọgan tindo, owhe fọtọ́n dopodopo po azán dopodopo he juwayi po hẹn mí sẹpọ hinhẹndi lẹndai Jehovah tọn.

“Teninọ pọ́n nude nọ hẹn onú lọ dẹn” wẹ yin hodidọ de he zẹẹmẹdo poun dọ e nọ taidi dọ nukundido nujijọ de nọ hẹn nujijọ lọ dẹn. Etomọṣo, Pita na ayinamẹ ‘nukundido bosọ to mìzọnmìzọn ji hlan wiwá azán Jiwheyẹwhe tọn tọn.’ (2 Pita 3:12) Nawẹ míwlẹ sọgan wleawuna walọyizan apọnmẹ tọn de he na hẹn mí tin to aṣeji na sisẹpọ didademẹ sọn olọn mẹ wá tọn gbọn?

Nuyiwa lẹ Nọ Dọho Hugan Hodidọ

Pita ze ayidonugo do nuwiwa po nuyiwa lẹ po ji. Ewọ dlẹnalọdo “owalọ wiwe” po ‘nuwiwa jijọ-di-Jiwheyẹwhe tọn lẹ’ po. (2 Pita 3:11) Etẹwẹ ehelẹ bẹhẹn?

Devizọnwatọ nugbo Jiwheyẹwhe tọn nọ yinuwa to aliho de mẹ he nọ hẹn homẹhun Ewọ. Yise sinsẹ̀n-basitọ nugbonọ mọnkọtọn tọn nọ yin didohia to walọyizan etọn mẹ. Ehe nọ hẹn ewọ gbọnvo na mẹhe nọ dọho yise tọn to Jiwheyẹwhe po opagbe etọn lẹ po mẹ poun. Vlavo hiẹ ko doayi e go dọ lizọnyizọn gbangba Kunnudetọ Jehovah tọn lẹ tọn klan yé dovo taidi mẹhe gbọnvo lẹ. Yé nọ dla we pọ́n to owhé towe gbè nado dọ̀n ayidonugo wá opagbe Jiwheyẹwhe tọn heyin titodohukanji to Biblu mẹ lẹ ji. Ṣigba yé sọ nọ dekunnu na todido po yise yetọn po to fidepope he yé mọ gbẹtọ lẹ te ga.

Kunnudetọ he hẹn alọnu ede tọn ján to yise etọn lilá hlan mẹdevo lẹ mẹ nọ hẹn nuyise etọn lẹ tindo huhlọn bo lodo. Hodidọ nọ hẹn numọtolanmẹ siso podọ to ojlẹ dopolọ mẹ nọ hẹn ayajẹ po pekọ homẹ tọn po wá. To whenuena mí lá wẹndagbe Ahọluduta Jiwheyẹwhe tọn tọn, mí nọ hẹn homẹ Jehovah tọn hùn. Mí yọnẹn dọ ewọ ‘mayin mawadodonọ nado wọnji azọ́n mítọn po owanyi he mí dohia oyín etọn gba,’ dile hagbẹ Pita tọn apọsteli Paulu lá do.—Heblu lẹ 6:10; Lomunu lẹ 10:9, 10.

Etẹwẹ yin kọdetọn alọnuhinhẹnjan ehe po wẹndagbe Ahọluduta lọ tọn hinhẹn gbayipe po to azán godo titonu ylankan ehe tọn lẹ mẹ? Fọtọ́n donu kanweko omẹ ahunjijlọnọ lẹ tọn to pinplọn lehe yè sọgan biọ haṣinṣan pẹkipẹki de mẹ hẹ Jehovah do, nado mọaleyi sọn lẹblanu majẹhẹ etọn mẹ bosọ mọ ayajẹ nugbo tọn to todido na ogbẹ̀ mavọmavọ to paladisi aigba ji tọn de mẹ.

Oyọnẹn Jẹnukọn

Dile mí tlẹ yọnẹn sọn Biblu mẹ dọ Jehovah Jiwheyẹwhe na dademẹ to ojlẹ sisọ etọn mẹ, mí dona payi avase yinukọn dogọ he Pita na lọ go. “Le mìwlẹ ko yọ́n onú helẹ dai, mì nọ payi mìde go na yè nika yí alibubu mẹylankan lẹ tọn do dọ̀n mì, na mì nika jai sọn tenọgligli mìtọn mẹ.”—2 Pita 3:17.

Jehovah yọnẹn po jide po jẹnukọn dọ mẹhe gbọ̀agba yise he dolido tọn lẹ sọgan gbọjọ na mimọ gbandindọn to didademẹ sọn olọn mẹ wá mẹ. E sọ yọnẹn ga dọ nuyiwadomẹji gbẹtọ jijọ-madi-Jiwheyẹwhe tọn lẹ tọn sọgan hẹn devizọnwatọ nugbonọ etọn lẹ gblezọn kavi, e whè gbau, hẹn yise yetọn dọ kinklandowiwe oyín Jiwheyẹwhe tọn ko sẹpọ gbọjọ. Lehe e na blawu do sọ nado jai sọn tenọgligo-hinhẹn mẹ to azán godo tọn ehelẹ mẹ!

E mayin din wẹ ojlẹ lọ nado tindo ayihaawe kavi mayin nujikudonọ gando nuhe Jehovah na wà go gba. (Heblu lẹ 12:1) Kakatimọ, din wẹ ojlẹ lọ nado whẹ́n to pinpẹn-nutọn-yinyọnẹn mẹ na nuhe homẹfa Jehovah tọn ko hẹn wá—yèdọ todido whlẹngán tọn na livi susu he ko lẹzun apadewhe gbẹtọ susugege akọjọpli tọn bo to nukọn pọ́n hlan nado lùn nukunbibia daho lọ tọ́n lẹ. (Osọhia 7:9, 14) Pita dotuhomẹnamẹ dọmọ: “Mì ni to whinwhẹ́n to ojọmiọn mẹ, podọ to oyọnẹn Jesu Klisti Oklunọ Whlẹngantọ mítọn tọn mẹ. Na ewọ wẹ gigo tin hlan sọn dinvie kakadoi.”—2 Pita 3:18.

“Mì Yí Mìde Whla to Owanyi Jiwheyẹwhe Tọn Mẹ”

Hinhẹn alọnu ján to yẹwhehodidọ Ahọluduta lọ tọn mẹ po opli Klistiani tọn lẹ yìyì to gbesisọmẹ po na sinsẹ̀n-bibasi gọna Ohó Jiwheyẹwhe tọn pinplọn nọ basi hihọ́na mí. Gbọnmọ dali, mí ma na tindo whenu nado yin ahunmẹduna zẹjlẹgo dogbọn ninọmẹ titonu ylankan egbezangbe tọn he to didepo tọn dali gba. Obu po magbọjẹ lẹ po ma dona dugán do gbẹzan Klistiani nugbo lẹ tọn ji gba. (1 Kọlintinu lẹ 15:58) Lehe alọnu mítọn ján sọ to Jehovah sinsẹ̀n mẹ, mọjanwẹ ojlẹ nọ yawu juwayi do niyẹn.

Juda, mẹhe nọgbẹ̀ to ojlẹ dopolọ mẹ hẹ Pita po mẹmẹsunnu daa Jesu tọn po, dotuhomẹna mí dọmọ: “Mìwlẹ, mẹyiwanna emi, he hẹn mìde dote to yise wiwewiwe mìtọn ji, bo to dẹ̀ho to [gbigbọ wiwe] mẹ, mì yí mìde whlá to owanyi Jiwheyẹwhe tọn mẹ, bo to todo lẹblanu Jesu Klisti Oklunọ mítọn tọn hlan ogbẹ̀ madopodo.” (Juda 20, 21) Doayi nujọnu-yinyin walọyizan nujikudo tọn heyin awuwlena gbọn dẹ̀hiho gbọzangbọzan tọn dali go. (1 Tẹsalonikanu lẹ 5:17) Enẹgodo Juda yidogọ dọmọ: “To mẹdelẹ [he tindo ayihaawe, NW ] ji mì nọ wàlẹblanu, whenuena yé núdọ̀n hẹ mì; mẹdelẹ, mì nọ yí osi do whlẹngán, bo nọ dọ̀n yé sọn miyọ́n mẹ, bo tlẹ nọ gbẹwanna avọ̀ he agbasalan ko dodú ogo na.” (Juda 22, 23) Lehe e yin onú titengbe de do sọ nado hẹn ode awetọ lodo to ojlẹ awusinyẹnnamẹ tọn ehelẹ whenu! Podọ lehe e yin nujọnu do sọ ma nado jai biọ whlepọn mẹ, to yizan “azán whlẹngán tọn” heyin kandlẹnna lọ taidi whẹwhinwhẹ́n de na “walọ mawé,” he gbayipe to aihọn he gblezọn to walọyizan wiwe mẹ egbezangbe tọn mẹ.—Juda 4; 2 Kọlintinu lẹ 6:1, 2.

Gbọn tonusisena ayinamẹ owanyinọ Pita, Paulu, po Juda tọn po dali podọ gbọn alọnuhinhẹnjan po zohunhun po to devizọnwiwa Jiwheyẹwhe tọn mẹ dali, hiẹ sọgan nọte pọ́n didademẹ Jehovah tọn po sọwhiwhe po. Ṣigba be hiẹ na wàmọ ya?

Ma whleawu nado dọnsẹpọ Kunnudetọ he tin to lẹdo towe mẹ lẹ na alọgọ nado hẹn yise towe lodo to opagbe ogbẹ̀ madopodo Mẹdatọ lọ tọn mẹ blo. Plọn nuhe e biọ to mẹsi nado pegan nado tindo mahẹ to azọ́n globu tọn he ma nasọ vọ́ yin-bibasi-gbede he na yin tadona to nukunbibia daho he to sisẹpọ lọ mẹ. (Malku 13:10) To whenẹnu hiẹ na tindo todido gbẹninọ to aihọn yọyọ dodowiwa tọn he Pita dopagbe etọn mẹ. (2 Pita 3:13) Dotoai na nuflinmẹ etọn lẹ! Nọte po sọwhiwhe po! Hẹn alọnu ján!

[Nudọnamẹ Odò Tọn]

[Yẹdide to weda 7]

Plọnnu todin dogbọn opagbe Jiwheyẹwhe tọn lẹ na Paladisi dali

[Asisa Yẹdide Tọn to weda 5]

Ohla: Animals/Jim Harter/Dover Publications, Inc.; young shepherd: Children: A Pictorial Archive from Nineteenth-Century Sources/Grafton/Dover Publications, Inc.