Nuhewutu Gbẹtọvi lẹ Tindo Nuhudo Alọgọtọ de Tọn

‘YẸN yin homẹkẹndomẹtọ he peve de,’ wẹ dawe goyitọ danuwatọ dai tọn de yigbe dọ. Ewọ ko yin nùzantọ ylankan de he ko gbọn numọtolanmẹ matindo dali vannukundo bosọ yangbé hodotọ budisi Jiwheyẹwhe tọ́ Jesu Klisti tọn lẹ tọn. “Ṣigba . . . yẹn mọ lẹblanu yí,” wẹ e dọ po pinpẹn-nutọn-yinyọnẹn po. Dile etlẹ sọgan taidi nuhe ma yọ́n yise do, homẹkẹndomẹtọ kanylantọ ehe lẹzun Klistiani nugbonọ apọsteli Paulu.—1 Timoti 1:12-16; Owalọ lẹ 9:1-19.

E mayin mẹlẹpo wẹ ko wà nuhe Paulu wà nkọtọn lẹ gba. Ṣogan, mímẹpo wẹ gboawupo nado jẹ nujinọtedo Jiwheyẹwhe tọn lẹ kọ̀n. Etẹwutu? Na “omẹ pó wẹ waylan, bosọ whète do gigo Jiwheyẹwhe tọn go.” (Lomunu lẹ 3:23) Humọ, e bọawu taun nado tlọ́ biọ todido matindo zẹjlẹgo mẹ, vlavo bo tindo numọtolanmẹ lọ dọ mí ylan hugan nado mọ lẹblanu Jiwheyẹwhe tọn yí. Dile e to nulẹnpọndo ayilinlẹn ylando tọn etọn lẹ ji, Paulu lọsu na edetiti lá dọmọ: “Ṣó! tapònọ he yẹn yin! Mẹnu wẹ sọgan whlẹn mi sọn agbasa okú tọn he si?” To gblọndo nina na kanbiọ edetiti tọn mẹ, e wlan dọmọ: “Yẹn dopẹna Jiwheyẹwhe gbọn Jesu Klisti Oklunọ mítọn dali.”—Lomunu lẹ 7:24, 25.

Nawẹ Mẹdatọ dodonọ de sọgan tindo kanṣiṣa hẹ ylanwatọ lẹ gbọn? (Psalm 5:4) Doayi e go dọ Paulu dọmọ: ‘Yẹn dopẹna Jiwheyẹwhe gbọn Jesu Klisti Oklunọ mítọn dali.’ Mẹdevo he mọ lẹblanu Jiwheyẹwhe tọn yí basi zẹẹmẹ dọmọ: “Eyin mẹdepope waylan, mí tindo [alọgọtọ, NW] de to Otọ́ dè, Jesu Klisti dodonọ lọ. Ewọ sọ wẹ [avọ́sinsan oyẹsu tọn de, NW] na ylando mítọn: e mayin mítọn kẹdẹ, ṣigba na ylando aihọn lẹpo tọn ga.”—1 Johanu 2:1, 2.

Naegbọn Jesu Klisti yin yiylọdọ “alọgọtọ de to Otọ́ dè”? Podọ nawẹ Jesu yin “avọ́sinsan oyẹsu tọn de” na ylando mítọn lẹ gbọn?

Nuhewutu Nuhudo Tin na Alọgọtọ De

Jesu wá aigba ji “nado yí ogbẹ̀ etọn do basi ofligọ na omẹ susu.” (Matiu 20:28) Ofligọ de yin akuẹ he nọ yin súsú nado họ̀ nude lẹkọ, kavi nado hẹn túndote wá na mẹde. Wunmẹ hogbe nuyiwa tọn Heblu tọn heyin lilẹdogbedevomẹ do “ofligọ” do linlẹn nuṣinyọndo, kavi ovẹsè bibasi, na ylando lẹ tọn hia. (Psalm 78:38) Hogbe Glẹki tọn lọ, taidi enẹ heyin mimọ to Matiu 20:28 mẹ, yin yiyizan na titengbe tọn nado dlẹnalọdo akuẹ he nọ yin súsú nado flí gàntọ awhàn tọn lẹ gọ̀ kavi nado tún kanlinmọ lẹ dote. Nado na pekọ nubiọtomẹsi whẹdida dodo tọn, nude nọ yin nina do otẹn nudevo he tindo nuhọakuẹ dopolọ tọn mẹ.

Gbẹtọvi lẹzun kanlinmọ na atẹṣiṣi sunnu tintan tọn sọta Jiwheyẹwhe wutu. Dile e yin didohia to Gẹnẹsisi weta 3 mẹ do, sunnu pipé enẹ—yèdọ Adam—de nado doafọna aliho nuyiwa tolivivẹ tọn sọta Jehovah Jiwheyẹwhe. Gbọn mọwiwà dali, e sà ede po kúnkàn etọn he na gbẹsọ wá yin jiji lẹ po do kanlinmọgbenu ylando po okú po tọn mẹ. Adam gbọnmọ dali hẹn nunina ogbẹ̀ pipé gbẹtọvi tọn bu na ede po kúnkàn etọn lẹpo po.—Lomunu lẹ 5:12, 18, 19; 7:14.

To Islaeli hohowhenu tọn mẹ, Jiwheyẹwhe basi titona avọ́sinsan kanlin tọn lẹ nado basi ovẹsè na, kavi ṣinyọnnudo, ylando gbẹtọ lẹ tọn. (Levitiku 1:4; 4:20, 35) To yẹhiadonu liho, ogbẹ̀ kanlin avọ́sinsan tọn lọ tọn nọ yin nina do otẹn ylandonọ lọ tọn mẹ. (Levitiku 17:11) Na enẹ tọn wutu, “azán ovẹsè tọn” sọgan sọ yin hodọ gandego taidi “azán ofligọ lẹ tọn.”—Levitiku 23:26-28.

Ṣigba, to whenuena e yindọ kanlin lẹ yìdo hugan gbẹtọ lẹ, e “glo dọ ohùn oyìnsú tọn po gbọgbọẹ tọn po [ni] de ylando sẹ̀ [mlẹnmlẹn].” (Heblu lẹ 10:1-4) Na avọ́sinsan de nido tindo nuhọakuẹ he pé nado basi ovẹsè na, kavi de ylando lẹ sẹ̀ kakadoi, e dona sọzẹn to nuhọakuẹ mẹ hẹ nuhe Adam hẹnbu lọ. Ojlẹgàn whẹdida dodo tọn biọ sunnu pipé de (Jesu Klisti) nado hẹn nuhe sunnu pipé devo (Adam) ko hẹnbu lọ sọzẹn. Ogbẹ̀ pipé gbẹtọvi de tọn kẹdẹ wẹ sọgan sú mẹflikuẹ lọ nado fli ovivi Adam tọn lẹ sọn kanlinmọgbenu he mẹ otọ́ tintan yetọn ko sà yé do. ‘Alindọn de na alindọn’ na jẹ nubiọtomẹsi whẹdida dodo nugbo tọn kọ̀n.—Eksọdusi 21:23-25.

To whenuena Adam waylando bo yin owhẹ̀ okú tọn dá na, ovivi etọn he ma ko yin jiji lẹ gbẹsọ tin to homẹ na ẹn podọ na enẹwutu kú hẹ ẹ. Jesu sunnu pipé lọ, yèdọ “Adam godo tọn,” de sọn ojlo mẹ wá bo ma wleawuna whẹndo de gba. (1 Kọlintinu lẹ 15:45) E tindo ovi he mayin jiji lẹ to homẹ to whenuena e kú taidi avọ́sinsan gbẹtọvi pipé de tọn. Enẹwutu, e sọgan yin didọ dọ akọ̀ sọgodo gbẹtọvi tọn he tin to homẹ na ẹn lẹ kú hẹ ẹ. Jesu kẹalọyi whẹndo he to kúkú, Adam ylandonọ tọn taidi ede tọn. E yí jlọjẹ nado tindo whẹndo edetiti tọn de do sanvọ́. Gbọn ogbẹ̀ pipé gbẹtọvi tọn etọn yíyí do sanvọ́ dali, Jesu vọ́ kúnkan gbẹtọvi tọn lẹpo he wá sọn Adam dè họ̀ na yé nido sọgan lẹzun whẹndo Etọn, bo hẹn Ẹn lẹzun “Otọ́ Madopodo” yetọn.—Isaia 9:6, 7.

Avọ́sinsan ofligọ Jesu tọn hùn aliho dote na gbẹtọvi tonusetọ lẹ nado mọ lẹblanu Jiwheyẹwhe tọn yí bo mọ ogbẹ̀ madopodo yí. Enẹwutu, apọsteli Paulu wlan dọmọ: “Na okú wẹ alè ylando tọn; ṣigba nunina Jiwheyẹwhe tọn wẹ ogbẹ̀ madopodo to Jesu Klisti Oklunọ mẹ.” (Lomunu lẹ 6:23) Mí nọ yin whinwhàn nado pà Jehovah na owanyi po awuvẹmẹ heyin kinkọndopọ hẹ ofligọ lọ po, heyin awuwlena mahopọnna nususu he e biọ to ewọ lọsu po Visunnu yiwanna vivẹ́ etọn po si. (Johanu 3:16) Podọ na jide tọn Jesu sọawuhia nado yin “alọgọtọ de to Otọ́ dè” to whenuena e yin finfọnsọnku do ogbẹ̀ olọn mẹ tọn mẹ bosọ ze nuhọakuẹ avọ́sinsan ofligọ etọn tọn donukọnna Jiwheyẹwhe to olọn lẹ mẹ.a (Heblu lẹ 9:11, 12, 24; 1 Pita 3:18) Ṣigba nawẹ Jesu Klisti to ede dohia taidi alọgọtọ mítọn to olọn mẹ gbọn todin?

[Nudọnamẹ Odò Tọn]

[Yẹdide to weda 4]

Ogbẹ̀ pipé gbẹtọvi tọn Jesu tọn lẹzun akuẹ he na fli ovivi Adam tọn lẹ gọ̀