Dotoaina Nuhe Gbigbọ to Didọ!
‘Ewọ he tindo otó ni se nuhe gbigbọ to didọ hlan agun lẹ lọ.’—OSỌHIA 3:22.
1, 2. Ayinamẹ tẹwẹ yin dọvọdọ etọn basi gando owẹ̀n he Jesu dohlan agun ṣinawe heyin nùdego to Osọhia mẹ lẹ go?
DEVIZỌNWATỌ Jehovah tọn lẹ dona payi ohó gbọdo he Jesu Klisti dọ na agun ṣinawe heyin nùdego to owe Osọhia tọn mẹ lẹ go. Na nugbo tọn, owẹ̀n ehelẹ dopodopo bẹ ayinamẹ ehe hẹn dọmọ: “Ewọ he tindo otó ni se nuhe gbigbọ to didọ hlan agun lẹ lọ.”—Osọhia 2:7, 11, 17, 29; 3:6, 13, 22.
2 Mí ko gbadopọnna owẹ̀n he Jesu dó angẹli, kavi nugopọntọ, Efesu, Smana, po Pagamu po tọn lẹ. Nawẹ mí sọgan mọaleyi sọn nuhe e dọ na agun ẹnẹ he pò lẹ to anademẹ gbigbọ wiwe tọn glọ mẹ gbọn?
Hlan Angẹli Agun Tiatila Tọn
3. Fie wẹ Tiatila tin te, podọ anazọ́n tẹwẹ e diyin na taun?
3 “Ovi Jiwheyẹwhe tọn” na ayinamẹ po wọhẹ po agun Tiatila tọn. (Hia Osọhia 2:18-29.) Tiatila (Akhisar todin) tin to Otọ̀ Gediz (Hermus hohowhenu tọn) tó to whèyihọ-waji Asia Pẹvi tọn. Tòdaho lọ diyin na anazọ́n susu. Mẹhe nọ basi ahó to tòdaho lọ mẹ lẹ nọ yí atin-dọ̀ de zan na avọ̀ vẹẹ, kavi gefunwunmẹ tọn he diyin yetọn. Lidia, he lẹzun Klistiani to whenuena Paulu dla Filippi pọ́n to Grèce, yin “gefunwunmẹ sàtọ, sọn tòdaho Tiatila tọn mẹ.”—Owalọ lẹ 16:12-15.
4. Etẹwẹ agun Tiatila tọn yin pipà na?
4 Jesu pà agun Tiatila tọn na nuwiwa dagbe, owanyi, yise, akọndonanu, po azọ́n dagbe etọn po to lizọnyizọn lọ mẹ. Na nugbo tọn, ‘azọ́n yetọn godo mẹ tọn lẹ sù hugan tintan tọn lẹ.’ Enẹwutu, eyin mí tlẹ ko tindo kandai dagbe to gbẹzan mẹ, mí ma dona yí nukunpẹvi do pọ́n walọdagbe mítọn lẹ gba.
5-7. (a) Mẹnu wẹ “nawe nẹ Jẹzebẹli” yin, podọ nawẹ mí dona yinuwa hlan nuyiwadomẹji etọn gbọn? (b) Etẹwẹ owẹ̀n Klisti tọn hlan agun Tiatila tọn nọ gọalọna yọnnu he dibusi Jiwheyẹwhe lẹ nado wà?
5 Agun Tiatila tọn to gbeyina boṣiọ-sinsẹ̀n, nuplọnmẹ lalo, po fẹnnuwiwa zanhẹmẹ tọn po. “Nawe nẹ Jẹzebẹli,” vlavo pipli yọnnu lẹ tọn he tindo jijọ Ahọsi ylankan Jẹzebẹli Ahọluduta whẹndo-ao Islaeli tọn tọn—tin to ṣẹnṣẹn yetọn. Weyọnẹntọ delẹ dọ dọ ‘yẹwhegán-yọnnu’ Tiatila tọn lẹ ko tẹnpọn nado klọ Klistiani lẹ nado sẹ̀n yẹwhe po yẹwhe-yọnnu ajọwiwa tọn lẹ po bosọ tindo mahẹ to hùnwhẹ he bẹ núdùdù nina boṣiọ lẹ hẹn mẹ. Mì dike mẹhe ylọ ede dọ yẹwhegán-yọnnu de dín nado yinuwado mẹdevo lẹ ji to agun Klistiani egbezangbe tọn mẹ gbede blo!
6 To madẹnmẹ, Klisti ‘na dọ̀n nawe lọ Jẹzebẹli do azọ̀nzan de ji, podọ mẹhe to ayọde hẹ ẹ lẹ biọ nukunbibia daho mẹ, adavo yé lẹnvọjọ.’ Nugopọntọ lẹ ma dona joawuna nuplọnmẹ po nuyiwadomẹji ylankan mọnkọtọn po, podọ Klistiani de ma dona deayọ gbigbọmẹ tọn po agbasamẹ tọn po kavi doalọ to boṣiọ-sinsẹ̀n mẹ nado yọnẹn dọ oylan pete wẹ ‘onú sisosiso Satani tọn lẹ’ yin gba. Eyin mí setonuna avase Jesu tọn, ‘mí na hẹn nuhe mí tindo go gligli,’ bọ ylando ma na dugán do mí ji. Na mẹyiamisisadode heyin finfọnsọnku lẹ gbẹ́ walọ ylankan, wantuntun, po ayilinlẹn ylankan lẹ po dai wutu, yé mọ ‘huhlọn yí do akọta lẹ ji’ bo na kọnawudopọ hẹ Klisti to akọta lẹ gbigbà do flinflin mẹ. Agun egbezangbe tọn lẹ tindo sunwhlẹvu yẹhiadonu tọn lẹ, podọ mẹyiamisisadode lẹ na yin nina “sunwhlẹvu hinhọ́n afọnnu lọ tọn,” yèdọ Asisunọ-yọyọ lọ, Jesu Klisti, to whenuena yé yin finfọnsọnku yì olọn mẹ.—Osọhia 22:16.
7 Agun Tiatila tọn yin avase na ma nado jotẹnna nuyiwadomẹji ylankan yọnnu atẹṣitọ lẹ tọn. Owẹ̀n gbọdo Klisti tọn hlan agun lọ nọ gọalọna yọnnu he dibusi Jiwheyẹwhe lẹ nado hẹn otẹn heyin didena yé go to egbehe. Yé ma nọ tẹnpọn nado paṣẹ do sunnu lẹ ji bo masọ nọ klọ mẹmẹsunnu lẹ biọ ayọdide gbigbọmẹ kavi agbasamẹ tọn mẹ gba. (1 Timoti 2:12) Kakatimọ, yọnnu mọnkọtọn lẹ nọ ze apajlẹ dagbe dai to azọ́n po sinsẹ̀nzọn dagbe po mẹ hlan pipà Jiwheyẹwhe tọn. (Psalm 68:11; 1 Pita 3:1-6) Eyin agun lọ hẹn nuhe e tindo go—yèdọ sinsẹ̀n-nuplọnmẹ po walọyizan he wé ṣeke po gọna sinsẹ̀nzọn Ahọluduta tọn he họakuẹ—Klisti na wá po ahọsumẹ jiawu lẹ po, e mayin po whẹgbledomẹ po gba.
Hlan Angẹli Agun Sadi Tọn
8. (a) Fie wẹ Sadi tin te, podọ zẹẹmẹ tẹlẹ wẹ a sọgan basi gando e go? (b) Naegbọn agun Sadi tọn dona yin alọgọna?
8 Agun Sadi tọn dona yin alọgọna to niyaniya mẹ na e ko kú to gbigbọ-liho wutu. (Hia Osọhia 3:1-6.) Sadi tin to nudi kilomẹtlu 50 do hùwaji Tiatila tọn, bo yin tòdaho adọkunnọ de. Ajọwiwa, aigba dojo, po avọ̀ sekanfunnọ lẹ bibasi po hẹn ẹn yin tòdaho adọkunnọ he tindo nudi tòmẹnu 50 000 to ojlẹ de mẹ wayi. Sọgbe hẹ whenuho-kàntọ Josèphe, Sadi tindo sọha daho Juvi lẹ tọn de to owhe kanweko tintan J.W.M. Sinagọgu po tẹmpli yẹwhe-yọnnu Efesunu lẹ tọn Artémis po tin to gbakija tòdaho lọ tọn lẹ mẹ.
9. Etẹwẹ dona yin wiwà eyin nuwiwa sinsẹ̀nzọn tọn mítọn lẹ yin mọmọ poun tọn?
9 Klisti dọna angẹli agun Sadi tọn dọmọ: “Yẹn yọ́n azọ́n towe lẹ, dọ hiẹ tindo oyín de dọ hiẹ tin to ogbẹ̀, ṣigba oṣiọ wẹ hiẹ.” Etẹwẹ eyin mí yin yinyọnẹn taidi mẹhe tin to nukle to gbigbọmẹ ṣigba bọ mí ma tindo ojlo depope na lẹblanulọkẹyi sinsẹ̀nzọn tọn lẹ bọ sinsẹ̀nzọnwiwa mítọn yin mọmọ poun tọn bọ mí ko sọ “pọ́ kúkú” to gbigbọmẹ? To whenẹnu mí dona ‘flin lehe mí mọ owẹ̀n Ahọluduta lọ tọn yí bosọ se e’ do, podọ mí dona vọ́ huhlọn mítọn jlado to sinsẹ̀nzọn wiwe mẹ. Na jide tọn, mí dona jẹ mahẹ ahundopo tọn tindo to opli Klistiani tọn lẹ mẹ ji. (Heblu lẹ 10:24, 25) Klisti na avase agun Sadi tọn dọmọ: “Eyin hiẹ ma payi e go gba, yẹn na tọ́n do ojí we di ajotọ, hiẹ ma na yọ́n ojlẹ he mẹ yẹn na tọ́n do ojí we te gba.” Be avase ehe gando mí go to egbehe wẹ ya? To madẹnmẹ mí dona dogbè.
10. To ninọmẹ he tlẹ taidi Sadi tọn mẹ, etẹwẹ sọgan yin nugbo gando Klistiani delẹ go?
10 Etlẹ yin to ninọmẹ he taidi Sadi tọn mẹ, mẹdelẹ sọgan tin he ‘ma hẹn avọ̀ yetọn gble bo sọgan zinzọnlin hẹ Klisti to avọ̀ wewe mẹ na yé jẹ wutu.’ Yé hẹn Klistiani-yinyin yetọn go, gbọṣi madodiho mẹ, bo ma tindo oblọ walọyizan kavi sinsẹ̀n tọn to aihọn ehe mẹ. (Jakobu 1:27) Enẹwutu, Jesu ‘ma to oyín yetọn na gbidi sẹ sọn owe ogbẹ̀ tọn mẹ gba, ṣigba e na dekunnuna oyín yetọn to Otọ́ etọn nukọn, podọ to angẹli lẹ nukọn.’ Na yinyin lilá taidi mẹhe jẹ nado zinzọnlin hẹ Klisti wutu, hagbẹ asi yọyọ mẹyiamisisadode etọn lẹ tọn na yin aṣọdona po alavọ dagbedagbe, wewe he ma kudu po, he nọtena nuwiwa dodo omẹ wiwe Jiwheyẹwhe tọn lẹ tọn. (Osọhia 19:8) Lẹblanulọkẹyi jiawu sinsẹ̀nzọn tọn he to sẹdotẹnmẹ na yé to olọn mẹ lẹ whàn yé nado gbawhàn aihọn ehe tọn. Dona lẹ sọ to tenọpọn mẹhe tindo todido gbẹninọ kakadoi to aigba ji tọn lẹ ga. Oyín yetọn lẹ yin winwlan do owe ogbẹ̀ tọn mẹ ga.
11. Etẹwẹ mí dona wà eyin mí jẹ amlọngọ sà ji to gbigbọ-liho?
11 Depope to mí mẹ ma jlo na biọ ninọmẹ blawu gbigbọmẹ tọn he mẹ agun Sadi tọn tin te gba. Ṣigba etẹwẹ eyin mí doayi e go dọ mí jẹ amlọngọ sà ji to gbigbọ-liho? Mí dona yinuwa to niyaniya mẹ na dagbe mítọn. Eyin mí jẹ wanyina aliho mawadodo tọn lẹ ji kavi jẹ opli lẹ gọ̀n ji kavi to kàndepona lizọnyizọn mítọn, mí dona dín alọgọ Jehovah tọn to odẹ̀ vivẹvivẹ mẹ. (Filippinu lẹ 4:6, 7, 13) Biblu hihia egbesọ tọn po Owe-wiwe gọna owe “họ̀nkọnsi nugbonọ” lọ tọn lẹ po pinplọn na gọalọna mí nado tin to nukle to gbigbọmẹ. (Luku 12:42-44) To whenẹnu mí na tin taidi mẹhe tindo alọkẹyi Klisti tọn to Sadi lẹ, bo na yin dona de na yisenọ hatọ lẹ.
Hlan Angẹli Agun Filadẹlfia Tọn
12. Nawẹ hiẹ na basi zẹẹmẹ ninọmẹ sinsẹ̀n tọn to Filadẹlfia hohowhenu tọn mẹ gbọn?
12 Jesu pà agun Filadẹlfia tọn. (Hia Osọhia 3:7-13.) Filadẹlfia (Alasehir todin) yin ahọnkan adọkunnọ lẹdo ovẹn bibasi tọn to whèyihọ-waji Asia Pẹvi tọn. Dionysus heyin yẹwhe ovẹn tọn wẹ yẹwhe nukundeji tòdaho lọ tọn. E họnwun dọ, Ju he nọ nọ̀ Filadẹlfia lẹ ma tindo kọdetọn dagbe to linlẹn didiọna Klistiani Juvi he tin to finẹ lẹ mẹ nado tẹdo aṣa Osẹ́n Mose tọn delẹ go kavi nado lẹkọ hlan yé kọ̀n gba.
13. Nawẹ Klisti ko yí “họnhungan Davidi tọn” zan gbọn?
13 Na Klisti “tindo họnhungan Davidi tọn” wutu, dagbenu Ahọluduta tọn lẹpo po tito anadenanu whédo yise tọn po ko yin zizedo alọ etọn mẹ. (Isaia 22:22; Luku 1:32) Jesu yí họnhungan enẹ zan nado hùn dotẹnmẹ po lẹblanulọkẹyi Ahọluduta tọn lẹ po dote na Klistiani lẹ to Filadẹlfia hohowhenu tọn mẹ podọ to fidevo lẹ. Sọn 1919 gbọ́n, e ko hùn ‘ohọ̀n daho’ yẹwhehodidọ Ahọluduta tọn dote na “họ̀nkọnsi nugbonọ” lọ bọ agọjẹdomẹtọ de ma sọgan sú i. (1 Kọlintinu lẹ 16:9; Kọlọsinu lẹ 4:2-4) Na nugbo tọn, ohọ̀n lẹblanulọkẹyi Ahọluduta tọn lẹ ko yin súsú do mẹhe tin to “sinagọgu Satani tọn” mẹ lẹ, na yé ma yin Islaelivi gbigbọmẹ tọn lẹ wutu.
14. (a) Opagbe tẹwẹ Jesu dó na agun Filadẹlfia tọn? (b) Nawẹ mí sọgan yin whiwhla sọn aijijẹ mẹ to ‘ojlẹ whlepọn tọn’ whenu gbọn?
14 Jesu dopagbe ehe na Klistiani he tin to Filadẹlfia hohowhenu tọn mẹ lẹ dọmọ: “Na hiẹ ko yí ohó [akọndonanu] ṣie tọn whla wutu, yẹn nasọ whla we to whlepọn whenu ga, ehe ja aihọn lẹpo ji, nado whlé yé he nọ nọ̀ aigba ji lẹ pọ́n.” Yẹwhehodidọ nọ biọ akọndonanu he nkọ Jesu dohia. E ma jogbe na kẹntọ lẹ gbede ṣigba to ojlo Otọ́ etọn tọn wà zọnmii. Enẹwutu, Klisti yin finfọnsọnku do ogbẹ̀ jọmaku olọn tọn mẹ. Eyin mí hẹn gbemima mítọn nado sẹ̀n Jehovah go bo nọgodona Ahọluduta lọ gbọn yẹwheho wẹndagbe lọ tọn didọ dali, mí na yin whiwhla ma nado jai to ‘ojlẹ whlepọn tọn’ ehe whenu. Mí na ‘hẹn nuhe Klisti na mí go gligli’ gbọn vivẹnudido nado hẹn dagbenu Ahọluduta tọn enẹlẹ jideji dali. Ehe wiwà na dekọtọn do jẹgbakun họakuẹ olọn mẹ tọn mẹ na mẹyiamisisadode lẹ podọ ogbẹ̀ madopodo aigba ji tọn na gbẹdohẹmẹtọ nugbonọ yetọn lẹ.
15. Etẹwẹ yin bibiọ to mẹhe na yin ‘dòtin to tẹmpli Jiwheyẹwhe tọn mẹ lẹ’ si?
15 Klisti yidogọ dọ: “Ewọ he gbawhàn, wẹ yẹn na yí do basi dòtin to tẹmpli Jiwheyẹwhe ṣie tọn mẹ, . . . yẹn nasọ wlan oyín Jiwheyẹwhe ṣie tọn do e go, po oyín tòdaho Jiwheyẹwhe ṣie tọn po, Jelusalẹm yọyọ, he jẹte sọn olọn mẹ ja sọn Jiwheyẹwhe ṣie dè: yẹn nasọ wlan oyín ṣie yọyọ do e go.” Nugopọntọ yiamisisadode lẹ dona ze sinsẹ̀n-bibasi nugbo daga. Yé dona gbọṣi hukan hagbẹ-yinyin tọn ji to “Jelusalẹm yọyọ” lọ mẹ gbọn yẹwheho Ahọluduta Jiwheyẹwhe tọn didọ po wiwejininọ gbigbọmẹ tọn po go hinhẹn dali. Ehe yin nujọnu eyin yé jlo na yin dòtin to tẹmpli pagigona olọn mẹ tọn mẹ podọ eyin yé na tindo oyín tòdaho Jiwheyẹwhe tọn to ota taidi tòvi olọn mẹ tọn etọn bo má oyín Klisti tọn taidi asi yọyọ etọn. Matin ayihaawe, yé dona tindo otó he nọ “se nuhe gbigbọ to didọ hlan agun lẹ.”
Hlan Angẹli Agun Laodikea Tọn
16. Nugbo tẹlẹ wẹ yin yinyọnẹn gando Laodikea go?
16 Klisti wọhẹ agun vọdonanutọ he tin to Laodikea. (Hia Osọhia 3:14-22.) Laodikea tin to nudi kilomẹtlu 150 do whèzẹtẹn Efesu tọn to aliklan ali daho ajọwiwa tọn lẹ ji to agbàdo dojo Otọ̀ Lycus tọn mẹ, bo yin tòdaho adọkunnọ de podọ ahọnkan akuẹsẹdo tọn de. Avọ̀ he nọ yin bibasi sọn lẹngbọ-fún yuu lẹdo lọ tọn mẹ lẹ yin yinyọnẹn gbayipe. Na wehọmẹ diyin amasinzọ́nwiwà tọn tin to Laodikea wutu, amasin nukun tọn heyin yinyọnẹn taidi amasin Phrygie tọn sọgan ko yin bibasi to finẹ. Asclepius, yẹwhe amasin tọn, yin dopo to yẹwhe tangan tòdaho lọ tọn lẹ mẹ. E taidi dọ Juvi susu wẹ tin to Laodikea, bọ delẹ to yé mẹ yin adọkunnọ.
17. Naegbọn Laodikeanu lẹ yin wiwọhẹ?
17 To hodidọ na agun he tin to Laodikea gbọn “angẹli” etọn gblamẹ mẹ, Jesu dọho po aṣẹ po taidi “kunnudetọ dodonọ, nugbonọ, omẹ tintan to nudida Jiwheyẹwhe tọn lẹ mẹ.” (Kọlọsinu lẹ 1:13-16) Laodikeanu lẹ yin wiwọhẹ na yé ‘ma miọn bo masọ hunzo’ to gbigbọ-liho. Klisti na slú yé jẹgbonu sọn onù etọn mẹ na yé gblọ wutu. E ma dona ko vẹawu na yé nado mọnukunnujẹ nuyijlẹdonugo ehe mẹ. Asisa osin míawu tọn lẹ tin to Hialapoli he tin to yakẹ, podọ osin fifá tin to Kọlọsi. Enẹwutu, to whenuena e yindọ osin dona yin dindọ̀n gbọ̀n dòglọ sọn fidindẹn yì Laodikea, e sọgan ko gblọ to whenuena e jẹ tòdaho lọ mẹ. Osin-whín de mẹ wẹ osin lọ yin anadena gbọ̀n to fide to aliho ji. Podọ sẹpọ Laodikea, osin lọ nọ sà gbọ̀n bliki osénọ he tindo odò lẹ mẹ.
18, 19. Nawẹ Klistiani egbezangbe tọn he taidi dehe tin to Laodikea lẹ sọgan yin alọgọna gbọn?
18 To egbehe, mẹhe taidi Laodikeanu lẹ ma nọ dozolanmẹnamẹ mọjanwẹ yé ma yin asisa kọfanamẹ tọn do niyẹn. Taidi osin gbigblọ, yé na yin suslú jẹgbonu! Jesu ma jlo dọ yé ni yin hoyidọtọ etọn lẹ, taidi ‘afọzedaitọ yiamisisadode lẹ to otẹn Klisti tọn mẹ’ gba. (2 Kọlintinu lẹ 5:20) Eyin yé ma lẹnvọjọ, yé na hẹn lẹblanulọkẹyi yetọn taidi wẹnlatọ Ahọluduta tọn lẹ bu. Laodikeanu lẹ dín adọkun aihọn tọn lẹ bo ‘ma yọnẹn dọ tapònọ, lèlènọ, agbátọnọ, nukuntọ́nnọ, omẹ́nọ wẹ yé yin.’ Nado tọ́nsọn ninọmẹ hẹ́njijẹ gbigbọmẹ tọn, nukuntintọ́n, po omẹ́ yetọn tọn po mẹ, mẹdepope he tin to ninọmẹ yetọn nkọtọn mẹ to egbehe dona họ̀ yise sika tọn he yè “whlepọn to miyọ́n mẹ,” “avọ̀ wewe” dodowiwa tọn, po ‘nusisá’ he nọ hùn nukun namẹ to gbigbọmẹ po sọn Klisti dè. Homẹ Klistiani nugopọntọ lẹ tọn nọ hùn nado gọalọna yé nado yọ́n nuhudo gbigbọmẹ tọn yetọn na yé nido lẹzun ‘adọkunnọ to yise mẹ.’ (Jakobu 2:5; Matiu 5:3) Humọ, nugopọntọ lẹ dona gọalọna yé nado sá ‘nusisá’ gbigbọmẹ tọn—enẹwẹ nado kẹalọyi bo nọgbẹ̀ sọgbe hẹ nuplọnmẹ, ayinamẹ, apajlẹ, po ninọmẹ apọ̀nmẹ Jesu tọn po. Ehe wẹ yin pọngbọ lọ na “wantuntun agbasalan tọn, wantuntun nukun tọn, po gigovọ́ ogbẹ̀ tọn po.”—1 Johanu 2:15-17.
19 Jesu nọ wọhẹ bo nọ domẹplọnlọ mẹhe e yiwanna lẹpo go. Nugopọntọ he tin to anademẹ etọn glọ lẹ dona yí awuvẹmẹ do wà nudopolọ. (Owalọ lẹ 20:28, 29) Laodikeanu lẹ dona “dovivẹnu bo lẹnvọjọ,” bo basi diọdo lẹ to nulẹnpọn po aliho gbẹzan yetọn tọn po mẹ. To egbehe, be mí ko jẹakọhẹ gbẹzan he nọ dekanpona sinsẹ̀nzọn wiwe mítọn hlan Jiwheyẹwhe wá otẹn he mayin nujọnu de mẹ wẹ ya? Eyin mọwẹ, mì gbọ mí ni ‘họ̀ nusisá nukun tọn sọn Jesu dè’ na mí nido sọgan mọ nujọnu-yinyin Ahọluduta lọ dindin whẹ́ po zohunhun po tọn.—Matiu 6:33.
20, 21. Mẹnu lẹ wẹ to gbeyina “họ̀nhúhú” Jesu tọn ganji to egbehe, podọ todido tẹlẹ wẹ yé tindo?
20 “Doayi e go,” wẹ Klisti dọ, “yẹn ṣite to ohọ̀n go bo to họ̀nhúhú: eyin mẹdepope se ogbè ṣie bo hùnhọ̀n, yẹn na biọ whégbè wá e dè, yẹn nasọ nọ dùjlonu hẹ ewọ, podọ ewọ hẹ yẹn.” Jesu nọ saba namẹ nuplọnmẹ gbigbọmẹ tọn to núdùdù whenu. (Luku 5:29-39; 7:36-50; 14:1-24) Todin e to họ̀nhúhú na agun he taidi Laodikea tọn lẹ. Be hagbẹ agun lọ tọn lẹ na hùnhọ̀n, hẹn owanyi yetọn na ẹn jẹ yọyọ, bo yí ì do ṣẹnṣẹn yetọn, bosọ dike e ni plọn yé ya? Eyin yé wàmọ, Klisti na dùnú hẹ yé bọ yé na mọ ale gbigbọmẹ tọn susugege yí.
21 To yẹhiadonu-liho, “lẹngbọ devo” egbehe tọn lẹ to dotẹnmẹ na Jesu nado biọ họmẹ, podọ nuyiwa mọnkọtọn nọ planmẹ yì ogbẹ̀ madopodo mẹ. (Johanu 10:16; Matiu 25:34-40, 46) Klisti na na mẹyiamisisadode he gbawhàn dopodopo lẹblanulọkẹyi lọ nado ‘sinai hẹ ẹ to ofìn etọn ji, kẹdẹdile ewọ gbawhàn bosọ sinai hẹ Otọ́ etọn to ofìn Etọn ji do.’ Mọwẹ, Jesu dopagbe na mẹyiamisisadode he gbawhàn lẹ dọ yé na dugán hẹ ẹ to adusilọ Otọ́ etọn tọn mẹ to olọn mẹ. Podọ lẹngbọ devo he gbawhàn lẹ to nukọnpọnhlan na nọtẹn jiawu de to aigba ji to gandudu Ahọluduta tọn glọ.
Nuplọnmẹ Na Mímẹpo
22, 23. (a) Nawẹ Klistiani lẹpo sọgan mọaleyi sọn ohó he Jesu dọna agun ṣinawe lẹ mẹ gbọn? (b) Etẹwẹ dona yin gbemima mítọn?
22 Matin ayihaawe, Klistiani lẹpo sọgan mọaleyi tlala sọn nuhe Jesu dọna agun ṣinawe Asia Pẹvi tọn lẹ mẹ. Di dohia, to mimọ dọ Klisti na pipà he jẹ mẹ, mẹho Klistiani lẹ nọ yin whinwhàn nado pà mẹdopodopo kavi agun he to dagbewà to gbigbọ-liho lẹ. Fie madogán lẹ tin te, mẹho lẹ nọ gọalọna yisenọ hatọ lẹ nado mọ pọngbọ Owe-wiwe tọn lẹ. Mímẹpo sọgan to alemọyi zọnmii sọn adà voovo ayinamẹ Klisti tọn hlan agun ṣinawe lẹ mẹ, eyin mí nọ yí ì do yizan mẹ po odẹ̀ vivẹvivẹ po madọngban.a
23 Azán godo tọn ehelẹ mayin ojlẹ vọdonanu tọn, ojlo agbasanu lẹ tọn, kavi nudevo depope he sọgan hẹn mí wà sinsẹ̀nzọn mọmọ tọn hlan Jiwheyẹwhe tọn. Enẹwutu mì gbọ agun lẹpo ni to wunhọ́n zọnmii taidi zògbántin he Jesu jodo do otẹn yetọn mẹ lẹ. Taidi Klistiani nugbonọ lẹ, mì gbọ mí ni magbe nado nọ doayinugo to whenuena Klisti dọho bo dotoaina nuhe gbigbọ to didọ. Eyin mí wàmọ, mí na tindo ayajẹ dẹn-to-aimẹ taidi hinhọ́n-hẹntọ lẹ hlan gigo Jehovah tọn.
[Nudọnamẹ Odò Tọn]
a Osọhia 2:1–3:22 sọ yin hodọdeji to weta 7 jẹ 13 owe Osọhia—Hẹndi Pete Etọn Sẹpọ!, heyin zinzinjẹgbonu gbọn Kunnudetọ Jehovah tọn lẹ dali mẹ.
Etẹwẹ Na Yin Gblọndo Towe?
• Mẹnu wẹ “nawe nẹ Jẹzebẹli” yin, podọ naegbọn yọnnu he dibusi Jiwheyẹwhe lẹ ma nọ hodo apajlẹ etọn?
• Ninọmẹ tẹwẹ tin to agun Sadi tọn mẹ, podọ etẹwẹ mí sọgan wà ma nado tin taidi suhugan Klistiani he tin to finẹ lẹ tọn?
• Opagbe tẹlẹ wẹ Jesu dó na agun Filadẹlfia tọn, podọ nawẹ yé yọn-na-yizan to egbehe gbọn?
• Naegbọn Laodikeanu lẹ yin wiwọhẹ, ṣigba todido tẹwẹ tin to sẹdotẹnmẹ na Klistiani zohunhunnọ lẹ?
[Yẹdide to weda 16]
Aliho ylankan “nawe nẹ Jẹzebẹli” tọn lẹ dona yin didapana
[Yẹdide to weda 18]
Jesu ko hùn ‘ohọ̀n daho’ he nọ planmẹ jẹ lẹblanulọkẹyi Ahọluduta tọn lẹ kọ̀n dote na hodotọ etọn lẹ
[Yẹdide to weda 20]
Be hiẹ nọ yí Jesu bo nọ dotoaina ẹn ya?