Numimọ lẹ Gando Mẹhe to Olọn Mayinukundomọ mẹ lẹ Go

“Ofìn de tin to finẹ to olọn mẹ, bọ mẹde sinai do ofìn lọ ji. Awusọhia Mẹhe sinai to e ji lọ tọn sọ taidi zannu jaspali po zannu saldiu po tọn, aidowhẹdo de he awusọhia etọn taidi emẹlaldi sọ tin lẹdo ofìn lọ pé.”—Osọhia 4:2, 3.

“Lẹdo etọn lẹpo sọ to sisẹ́ taidi sisẹ́ aidowhẹdo de tọn to aslọ mẹ to jikun whenu. Lehe hinhọ́n he lẹ́ do e lọ te do niyẹn. E taidi awusọhia gigo Jehovah tọn.”—Ezekiẹli 1:27, 28.

Numimọ ehelẹ he apọsteli Johanu po yẹwhegán Ezekiẹli po mọ do gigo Jiwheyẹwhe Ganhunupotọ lọ, Jehovah tọn hia po nuhe mí sọgan yawu mọnukunnujẹemẹ lẹ po—yèdọ zannu akuẹgegenu, aidowhẹdo po ofìn gigonọ de po. Onú ehelẹ nọ do whanpẹ, yẹyi daho po gigo Jehovah tọn po hia to aliho he jiawu de mẹ.

Lehe zẹẹmẹ Jiwheyẹwhe tọn yin bibasi do tofi, sọgbe hẹ hogbe salmu-kantọ lọ tọn lẹ dọmọ: “Jehovah klo bosọ jẹna pipà tlala. Ewọ wẹ jẹna budisi hugan yẹwhe he pò lẹpo. Yẹwhe ovọ́ lẹ wẹ yẹwhe gbẹtọ lẹ tọn lẹpo yin, ṣigba, Jehovah wẹ dá olọn lẹ. Gigo po whanpẹ daho po tin to nukọn etọn; huhlọn po whanpẹ po tin to fiwiwe etọn.”—Salmu lẹ 96:4-6.

Dile etlẹ yindọ Jehovah wẹ Nupojipetọ lọ, e basi oylọ na mí nado dọnsẹpọ ewọ to odẹ̀ mẹ bosọ na mí jide dọ emi nọ dotoaina mí. (Salmu lẹ 65:2) Jiwheyẹwhe yiwanna mí bo nọ penukundo mí go sọmọ bọ apọsteli Johanu dọ po nujikudo po dọ: “Jiwheyẹwhe wẹ owanyi.”—1 Johanu 4:8.

“[Devi Stefani] gọ́ na gbigbọ wiwe, zín nukun etọn do olọn bo mọ gigo Jiwheyẹwhe tọn podọ Jesu ṣite to adusilọ Jiwheyẹwhe tọn mẹ, ewọ sọ dọmọ: ‘Mì pọ́n! Yẹn mọ olọn hùndonuvo bọ Visunnu gbẹtọ tọn ṣite to adusilọ Jiwheyẹwhe tọn mẹ.’”—Owalọ lẹ 7:55, 56.

Ojlẹ vude whẹpo Stefani do mọ numimọ ehe, mẹhe e to hodọna lẹ, enẹ wẹ nukọntọ Ju lẹ ko nọgodona hùhù Jesu tọn. Numimọ lọ dohia dọ Jesu to ogbẹ̀ podọ e ko yin finfọnsọnku bo ko yin gigopana. Apọsteli Paulu wlan gandego dọmọ: “[Jehovah] fọ́n [Jesu] sọn oṣiọ lẹ mẹ bo ze e sinai do adusilọ etọn mẹ to olọn mẹ bo hẹn ẹn yiaga hú gandudu, aṣẹpipa, huhlọn, oklunọ-yinyin lẹpo podọ oyín he nọ yin yiylọ lẹpo, e ma yin to titonu ehe kẹdẹ mẹ, ṣigba to dehe ja lọ lọsu mẹ ga.”—Efesunu lẹ 1:20, 21.

Gbọnvona dọ Jesu tin to otẹn he yiaga de mẹ, Owe-wiwe lẹ dohia dọ onú gbẹtọvi lẹ tọn nọ duahunmẹna ẹn sisosiso dile Jehovah nọ wà do. To lizọnyizọn aigba ji tọn Jesu tọn whenu, e hẹnazọ̀ngbọna gbẹtọvi lẹ, hẹn madogánnọ lẹ jẹgangan bosọ fọ́n oṣiọ lẹ sọnku. Gbọn okú avọ́sinsan tọn etọn gblamẹ, e do owanyi sisosiso etọn na Jiwheyẹwhe podọ na gbẹtọvi lẹ hia. (Efesunu lẹ 2:4, 5) To madẹnmẹ, Jesu he to ote to adusilọ Jiwheyẹwhe tọn mẹ na yí aṣẹpipa etọn zan bo na hẹn dona daho wá na gbẹtọvi tonusetọ lẹ to filẹpo.

“Yẹn [yẹwhegán Daniẹli] sọ to nupọn kakajẹ whenue ofìn lẹ yin didoai bọ Mẹhe Ko Tin sọn Hohowhenu lọ [Jehovah] sọ sinai. . . . Fọtọ́n donu fọtọ́n angẹli lẹ tọn nọ to lizọnyina ẹn, podọ fọtọ́n ao donu fọtọ́n ao angẹli lẹ tọn ṣite to nukọn etọn.”—Daniẹli 7:9, 10.

To numimọ he gando olọn go ehe mẹ, e ma yin angẹli dopo wẹ Daniẹli mọ gba ṣigba susugege yetọn. Numimọ jiawu nankọ die ehe na ko yin! Angẹli lẹ yin nudida gbigbọnọ gigonọ lẹ, he yọnnuin bosọ dohuhlọn. Yé bẹ selafu po kelubimi lẹ po hẹn. Biblu donù angẹli lẹ go hugan whla 250.

Angẹli lẹ ma yin gbẹtọvi he ko nọ aigba ji pọ́n lẹ gba. Jiwheyẹwhe ko dá angẹli lẹ hoho whẹpo gbẹtọvi lẹ do wá tin. To bẹjẹeji aigba tọn, angẹli lẹ ko tin bo penugo nado mọ bosọ yí ayajẹ do to awhá pipà tọn do.—Jobu 38:4-7.

Dopo to aliho he mẹ angẹli lẹ nọ yilizọn na Jiwheyẹwhe te lẹ mẹ wẹ mahẹ tintindo to azọ́n vonọtaun he to yinyin wiwà to aigba ji to egbehe lọ mẹ, enẹ wẹ wẹndagbe Ahọluduta Jiwheyẹwhe tọn lilá. (Matiu 24:14) Mahẹ tintindo yetọn to azọ́n ehe mẹ ko yin didohia apọsteli Johanu to numimọ de mẹ, mẹhe wlan dọmọ: “Yẹn sọ mọ angẹli devo to zinzlọn to agahomẹ, podọ e tindo wẹndagbe madopodo nado lá na mẹhe nọ nọ̀ aigba ji lẹ, yèdọ na akọta lẹpo, hẹnnu lẹpo, ogbè lẹpo podọ gbẹtọ lẹpo.” (Osọhia 14:6) Dile etlẹ yindọ angẹli lẹ masọ nọ dọhona gbẹtọvi lẹ to egbehe ba, yé gbẹ́ nọ gọalọ nado deanana mẹhe to wẹndagbe lọ lá lẹ yì ahunjijlọnọ lẹ dè.

“Awhàn de sọ gbajẹgbonu to olọn mẹ: Mikaẹli [Jesu Klisti] po angẹli etọn lẹ po funawhàn hẹ dlagọni lọ, dlagọni lọ po angẹli etọn lẹ po sọ funawhàn ṣigba yé ma duto e ji, mọdopolọ otẹn de masọ yin mimọ na yé to olọn mẹ ba. Enẹwutu, dlagọni daho lọ yin dindlan do odò, yèdọ odàn hoho lọ, he nọ yin yiylọdọ Lẹgba podọ Satani, he nọ to aigba fininọ lẹpo klọ; ewọ yin dindlan do aigba ji, podọ angẹli etọn lẹ yin dindlan do odò po e po.”—Osọhia 12:7-9.

Jijọho ma nọ olọn mẹ kaka sọyi. To bẹjẹeji whenuho gbẹtọvi tọn, dopo to angẹli lẹ mẹ jo ede na ojlo lọ nado yin sinsẹ̀n-basina bo ṣiatẹ sọta Jehovah bo gbọnmọ dali lẹzun Satani he zẹẹmẹdo “Agọjẹdomẹtọ.” To godo mẹ, angẹli devo lẹ kọnawudopọ hẹ ẹ to atẹṣiṣi lọ mẹ bo gbọnmọ dali lẹzun aovi lẹ. Na kanyinylan yetọn wutu, yé diọnukunsọ Jehovah sinsinyẹn bo hẹn suhugan gbẹtọvi lẹ tọn nado gbẹ́ anademẹ owanyinọ Jehovah tọn lẹ dai.

Satani po aovi etọn lẹ po gblezọn bosọ ylanhùn taun. Yé yin kẹntọ gbẹtọvi lẹ tọn bo ko sọ yidogọna yajiji he gbayipe to aigba ji tlala. Di apajlẹ, Satani hù kanlin-yìnyìn dawe nugbonọ Jobu tọn lẹ po devizọnwatọ etọn lẹ po. Podọ e hù ovi Jobu tọn ao lẹpo gbọn “jẹhọn daho de” yiyizan nado họ́ ohọ̀ he mẹ yé te dali. Enẹgodo, Satani yí “nutitẹ̀ fifiẹ lẹ do hò Jobu sọn afọpahomẹ kaka yì ahọ̀ndòmẹ.”—Jobu 1:7-19; 2:7.

Ṣigba, to madẹnmẹ Satani na yin didesẹ mlẹnmlẹn. Na e ko yin dindlan do lẹdo aigba tọn mẹ wutu, e yọnẹn dọ “whenu gli de wẹ emi tindo.” (Osọhia 12:12) Satani ko yin whẹgbledo, podọ owẹ̀n dagbe de wẹ ehe yin na taun tọn!

“[Hiẹ Jesu] họ̀ gbẹtọ lẹ na Jiwheyẹwhe sọn hẹnnu lẹ, ogbè lẹ, gbẹtọ lẹ, podọ sọn akọta lẹpo mẹ, hiẹ sọ hẹn yé zun ahọluduta de po yẹwhenọ lẹ po hlan Jiwheyẹwhe mítọn, bọ yé na duahọlu do aigba ji.”—Osọhia 5:9, 10.

Dile Jesu yin finfọnsọnku sọn aigba ji yì olọn mẹ do, mọ wẹ, e na yin na mẹdevo lẹ do ga. Jesu dọna apọsteli nugbonọ etọn lẹ dọmọ: “Yẹn jei nado wleawu otẹn de tọn na mì. Humọ, . . . yẹn na lẹkọwa bo na yí mì do whégbè do dee dè, na fihe yẹn te mìlọsu nido to finẹ.”—Johanu 14:2, 3.

Lẹndai de wutu wẹ mẹhe nọ yì olọn mẹ lẹ do nọ yì dọ́n. To pọmẹ hẹ Jesu, yé na wleawuna Ahọluduta de he na dugán do mẹhe to aigba ji lẹpo ji bo na hẹn dona lẹ wá na yé. Ahọluduta ehe wẹ Jesu dọna hodotọ etọn lẹ nado hodẹ̀ gandego to odẹ̀ apajlẹ tọn lọ mẹ, ehe dọmọ: “Otọ́ mítọn he tin to olọn mẹ, na oyín towe ni yin kinklandowiwe. Na Ahọluduta towe ni wá. Na ojlo towe ni yin wiwà, kẹdẹdi to olọn mẹ, mọdopolọ to aigba ji.”—Matiu 6:9, 10.

“Yẹn [apọsteli Johanu] sè ogbè lélé de sọn ofìn lọ kọ̀n dọmọ: ‘Mì pọ́n! Gòhọ Jiwheyẹwhe tọn tin to gbẹtọvi lẹ dè, . . . ewọ nasọ súnsún dasin lẹpo sẹ̀ sọn nukun yetọn mẹ, okú ma nasọ tin ba, mọjanwẹ aluẹmẹninọ kavi avi kavi awufiẹsa ma nasọ tin ba. Onú hoho lẹ ko juwayi.’”—Osọhia 21:3, 4.

Numimọ dọdai tọn ehe to alọdlẹndo ojlẹ he mẹ Ahọluduta Jiwheyẹwhe tọn he bẹ Jesu po mẹhe yin finfọnsọnku sọn aigba ji lẹ po hẹn, na hẹn gandudu Satani tọn wá opodo bo na lẹ́ aigba lọ zun paladisi de. Nuhe ko hẹn awufiẹsa po awubla susu po wá na gbẹtọvi lẹ ma nasọ tin ba. Okú lọsu na tlẹ yin didesẹ.

Ṣigba, etẹwẹ dogbọn gbẹtọ liva susu he ko kú bo ma na yin finfọnsọnku do olọn mẹ lẹ dali? To nukọn mẹ, yé na yin finfọnsọnku po todido lọ po nado nọgbẹ̀ kakadoi to Paladisi mẹ to aigba ji.—Luku 23:43.