Kanbiọ lẹ sọn Wehiatọ lẹ Dè

Naegbọn Kunnudetọ Jehovah tọn lẹ nọ pọ́n sọha 144 000 heyin nùdego to owe Osọhia tọn mẹ hlan taidi sọha tangan de kakati nido yin yẹhiadonu tọn?

Apọsteli Johanu wlan dọmọ: “Yẹn sọ sè sọha yé he yè yí hiadonu do dohiagona lẹ tọn: yé he yè dohiagona lẹ yin fọtọ́n [donu] kantọ̀nkonukunẹnẹ.” (Osọhia 7:4) To Biblu mẹ, hodidọ lọ “yé he yè yí hiadonu do dohiagona lẹ” dlẹnalọdo pipli gbẹtọ tọn de heyin dide sọn gbẹtọvi lẹ mẹ nado dugán do Paladisi aigba ji tọn he ja lọ ji hẹ Klisti to olọn mẹ. (2 Kọlintinu lẹ 1:21, 22; Osọhia 5:9, 10; 20:6) Whẹwhinwhẹ́n susu wẹ zọ́n bọ sọha yetọn, heyin 144 000, nọ yin nukunnumọjẹemẹ taidi sọha paa de. Dopo to whẹwhinwhẹ́n lọ lẹ mẹ sọawuhia to lẹdo hodidọ Osọhia 7:4 tọn mẹ.

To whenuena apọsteli Johanu ko mọ numimọ dogbọn pipli gbẹtọvi 144 000 lẹ tọn ehe dali godo, pipli devo sọ yin didohia ẹ ga. Johanu basi zẹẹmẹ pipli awetọ ehe tọn taidi ‘gbẹtọ susugege, he mẹdepope ma sọgan hia, sọn akọta lẹpo mẹ, sọn hẹnnu lẹpo mẹ, sọn gbẹtọ lẹpo mẹ, podọ sọn ogbè lẹpo mẹ.’ Gbẹtọ susugege ehe dlẹnalọdo mẹhe na lùn “nukunbibia daho” he na và aihọn ylankan egbehe tọn sudo tọ́n lẹ.—Osọhia 7:9, 14.

Ṣigba, doayi vogbingbọn he Johanu dohia to wefọ 4 po 9 Osọhia weta 7 tọn po ṣẹnṣẹn go. E dọ dọ pipli tintan lọ, yèdọ “yé he yè yí hiadonu do dohiagona lẹ,” tindo sọha tangan de. Ṣigba, pipli awetọ, “gbẹtọ susugege” lọ, ma tindo sọha tangan de gba. Po enẹ po to ayiha mẹ, e sọgbe hẹ lẹnpọn dagbe nado pọ́n sọha 144 000 lọ hlan taidi sọha paa de. Eyin sọha 144 000 lọ yin yẹhiadonu tọn bo nọtena pipli he ma tindo sọha tangan de, be vogbingbọn heyin didohia to wefọ awe ehelẹ ṣẹnṣẹn na lẹzun ovọ́. Enẹwutu, lẹdo hodidọ lọ tọn dohia hezeheze dọ sọha 144 000 lọ dona yin pinpọnhlan taidi sọha tangan de.

Weyọnẹntọ Biblu tọn voovo lẹ, hohowhenu tọn po egbezangbe tọn lẹ po, wá tadona dopolọ kọ̀n dọ sọha lọ dona yin pinpọnhlan taidi sọha paa de. Di dohia, to whenuena wezẹhomẹ-kantọ Grande-Bretagne tọn Ethelbert W. Bullinger to zẹẹmẹ basi do Osọhia 7:4, 9 ji to nudi owhe 100 die wayi e dọmọ: “Hodidọ nugbo he bọawu lẹ tọn wẹ e yin: yèdọ sọha tangan de to vogbingbọnmẹ na sọha he mayin tangan de to weta ehe dopolọ mẹ.” (The Apocalypse or “The Day of the Lord,” [Osọhia Kavi “Azán Oklunọ Tọn”] weda 282) To agọe, Robert L. Thomas, Jr., heyin mẹplọntọ Alẹnu Yọyọ tọn to Wehọmẹ Daho Sinsẹ̀n-Nuplọnmẹ tọn to États-Unis, wlan dọmọ: “Dodonu dolido de matin nado pọ́n sọha lọ hlan taidi yẹhiadonu tọn de.” E yidogọ dọmọ: “Sọha tangan de wẹ [to Osọhia 7:4 mẹ] to vogbingbọnmẹ na sọha he ma yin tangan to 7:9 mẹ. Eyin sọha ehe yin pinpọnhlan taidi yẹhiadonu tọn de, be sọha depope ma sọgan yin pinpọnhlan to paa mẹ to owe lọ mẹ.”—Revelation: An Exegetical Commentary, Bladopọ 1, weda 474.

Mẹdelẹ nọ dọnnu dọ to whenuena e yindọ hogbe yẹhiadonu tọn sù to Osọhia mẹ, sọha depope he yin mimọ to owe ehe mẹ, gọna sọha 144 000 lọ, dona yin yẹhiadonu tọn de. (Osọhia 1:1, 4; 2:10) Ṣigba, e họnwun dọ tadona ehe ma sọgbe. Nugbo wẹ dọ, sọha yẹhiadonu tọn susu wẹ tin to Osọhia mẹ, ṣigba e sọ bẹ sọha paa lẹ hẹn ga. Di dohia, Johanu dọho gando “oyín [wiawe apọsteli] wiawe Lẹngbọvu lọ tọn lẹ” go. (Osọhia 21:14) E họnwun dọ, sọha 12 heyin nùdego to wefọ ehe mẹ yin sọha paa de, e ma yin yẹhiadonu tọn de gba. Humọ, apọsteli Johanu wlanwe dogbọn gandudu “owhe fọtọ́n” Klisti tọn dali. Sọha ehe lọsu dona yin pinpọnhlan to paa mẹ dile dogbapọnna Biblu po sọwhiwhe po dohia do.a (Osọhia 20:3, 5-7) Enẹwutu, ninọmẹ po lẹdo hodidọ tọn po wẹ nọ dohia eyin sọha he tin to Osọhia mẹ de na yin pinpọnhlan to paa mẹ kavi to yẹhiadonu-liho.

Wefọ Biblu tọn devo lẹ sọ nọgodona linlẹn lọ dọ sọha 144 000 lọ yin sọha tangan de bo dlẹnalọdo gbẹtọvi sọha he tindo dogbó de, yèdọ pipli pẹvi de eyin mí yí ì jlẹdo “gbẹtọ susugege” lọ go. Di dohia, to numimọ he apọsteli Johanu mọyi to enẹgodo mẹ, gbẹtọ 144 000 lọ lẹ yin zẹẹmẹ-basina taidi mẹhe ‘yè fligọ sọn gbẹtọ lẹ mẹ, nado yin sinsẹ́n tintan.’ (Osọhia 14:1, 4) Hodidọ lọ “sinsẹ́n tintan” dlẹnalọdo pipli kleun de heyin dide taidi afọzedaitọ. Humọ, to whenuena Jesu tin to aigba ji, e dọho dogbọn mẹhe na dugán hẹ ẹ to Ahọluduta etọn olọn mẹ tọn mẹ lẹ dali bo ylọ yé dọ ‘lẹngbọpa pẹvi.’ (Luku 12:32; 22:29) Na nugbo tọn, sọha he yin dide sọn gbẹtọvi lẹ mẹ nado dugán to olọn mẹ lọ whè eyin mí yí ì jlẹdo mẹhe na nọ̀ Paladisi aigba ji tọn he ja lọ mẹ lẹ go.

Enẹwutu, lẹdo hodidọ Osọhia 7:4 tọn po nuhe yin didọ gandego to fidevo to Biblu mẹ lẹ po dohia dọ sọha 144 000 lọ dona yin pinpọnhlan taidi sọha tangan de. E dlẹnalọdo mẹhe na dugán do paladisi aigba ji tọn ji hẹ Klisti to olọn mẹ lẹ, to whenuena gbẹtọ ayajẹnọ susu he sọha yetọn ma yin yinyọnẹn lẹ na to Jehovah Jiwheyẹwhe sẹ̀n to aigba ji.—Psalm 37:29.

[Nudọnamẹ Odò Tọn]

[Blurb to weda 31]

Sọha whédutọgbẹ́ olọn mẹ tọn lẹ tọn wẹ 144 000

[Yẹdide to weda 31]

“Gbẹtọ susugege” lọ madosọha

[Asisa Yẹdide tọn to weda 31]

Sunwhlẹvu lẹ: Courtesy of Anglo-Australian Observatory, fọto gbọn David Malin dali