Hẹngblodeji Nuwiwa lẹ Tọn to Tintin Tofi Klisti Tọn Whenu
“Whenẹnu wẹ ahọlu na dọ hlan yé mẹhe to adusilọ etọn mẹ lẹ, dọmọ, Mì wá, mì donanọ Otọ́ ṣie tọn, mì dugú ahọludu he yè ko wleawu etọn dai na mì sọn dòdó aihọn tọn wá.”—MATIU 25:34.
1. To aliho tẹmẹ wẹ pa·rou·siʹa Klisti tọn tin pẹpẹ di “azán Noa gbè tọn”?
TINTIN tofi Klisti tọn—nujijọ he yè ko to nukundo na whenu dindẹn lọ! Ojlẹ lọ dile “azán Noa tọn lẹ te,” he Jesu dọho etọn to kọndopọmẹ hẹ “vivọnu whenu-nu lẹ tọn,” wá to owhe 1914 tọn whenu. (Matiu 24:3, 37, NW) Ṣigba etẹwẹ tintin tofi Klisti tọn, kavi pa·rou·siʹa, na zẹẹmẹdo na pipotọ mẹyiamisisadode “afànumẹ nugbonọ, nuyọnẹntọ” lọ lẹ tọn? (Matiu 24:45) Yèdọ, yé dona lẹzun mẹhe to susudeji dogọ to huhlọn mẹ taidi hinhọ́n hẹntọ lẹ! Onu jiawu lẹ to na jọ! Azọ́n mẹbibẹpli tọn ehe ma ko jọ pọ́n gbede to na bẹjẹeji.
2. Nuklọ́we tẹwẹ ko wá aimẹ na hẹndi Malaki 3:1-5 tọn?
2 Nalete, jẹnukọn whẹ, Klistiani mẹyiamisisadode ehelẹ dona yin kiklọwé. Dile Malaki 3:1-5 ko dọ dọdai etọn do, Jehovah Jiwheyẹwhe po “angẹli alẹnu tọn” etọn Jesu Klisti po, wá nado dlà tẹmpli gbigbọmẹ tọn lọ pọ́n to ojlẹ amakikọ tọn whenu to 1918. Whẹdida dona ko bẹjẹeji po “owhé Jiwheyẹwhe tọn” po. (1 Pita 4:17) Malaki 3:3 dọdai dọmọ: “Ewọ [Jehovah] na sinai di gànkọ̀ntọ de po kiklọ́tọ fataka tọn po, ewọ bo na sọ klọ́ visunnu Levi tọn lẹ, bo sọ klọ́ yé wé di sika po fataka po.” Ojlẹ gànkinkọ̀n po nukiklọ́ tọn po de wẹ e yin.
3. Naegbọn e do yin nujọnu dọ nuklọ́we gbigbọmẹ tọn ni wá aimẹ?
3 Jujugbọn gblagbla ojlẹ whẹdida tọn ehe mẹ, he wá tadona pete kọ̀n to 1918 mẹ, pipotọ hagbẹ́ afanumẹ lọ tọn yin kiklọwé sọn diho aihọn po sinsẹ̀n tọn po mẹ. Naegbọn Jehovah do klọ́ yé wé? Na e bẹ́ tẹmpli gbigbọmẹ tọn etọn hẹn wutu wẹ. Ehe yin tito he taidi tẹmpli tọn lọ na sinsẹn-bibasi na Jehovah to dodonu avọsinsan ofligọ Jesu Klisti tọn ji. Jehovah jlo dọ tẹmpli emitọn ni tin to ninọmẹ wiwejininọ tọn mẹ na to whenuena sọha susugege sinsẹ̀n-basitọ lẹ tọn po todido aigba ji tọn po na yin hinhẹnwá finẹ, yé na do sọgan mọ fide fie nupojipetọ-yinyin wẹkẹ tọn etọn yin osi dohia na te, fihe oyín sọn olọn mẹ wá etọn na yin kinklandowiwe te, po fihe osẹ́n dodo etọn tọn lẹ yin tónusena te po. Gbọnmọ dali, yé na yọn pinpẹn Jehovah tọn bo na sọ kọnawudopọ to hinhẹn lẹndai daho etọn lẹ zun yinyọnẹn mẹ.
Lẹblanulọkẹyi Yinukọn Dogọ Lẹ
4, 5. (a) Nawẹ kanbiọ de gbọn Jesu Klisti dali ylọwhẹ dopodopo hagbẹ́ afanumẹ lọ tọn to egbehe gbọn? (b) To aliho tẹlẹ mẹ wẹ hogbe lọ lẹ “afanumẹ nugbonọ nuyọnẹntọ” lọ po “nutindo etọn lẹ” po sọgan yin nukunnumọjẹemẹ gbọn? (c) Azọ́ndenamẹ tẹwẹ Jesu na afanumẹ etọn lẹ?
4 To 1919 hagbẹ́ afanumẹ he ko yin kiklọ́we lọ sọgan pọ́n nukọn hlan na hẹngblodeji nuwiwà he ma ko jọ gbede pọ́n tọn lẹ. To 1914, Jesu Klisti, Ogán yétọn, ko mọ Ahọluduta olọn mẹ tọn de yí. To whenuena é lẹgọwá azọ́nwatọ lẹ dè to whédo etọn mẹ nado gbadopọnna “whédo” etọn lẹpo, ewọ yin aṣọdona to gigo gandudu tọn mẹ, ehe ewọ ma tindo to whenuena e tin to aigba ji file. Etẹwẹ e mọ? Be hagbẹ́ afanumẹ lọ tọn hẹn alọnu etọn ján to nukunpipedo alemọyinu Ogán lọ tọn lẹ go mẹ ya? Dile e yin kinkandai to Matiu 24:45-47 mẹ do, Jesu kàn kanbiọ de sè he ylọwhẹ dopodopo devi yiamisisadode lẹ tọn nado gbadopọnna mẹdezejo mẹdetiti tọn etọn hlan Mẹssia Jehovah tọn dọmọ: “Mẹnu wẹ afanumẹ nugbonọ, nuyọnẹntọ, mẹhe klunọ etọn do basi ogán whédo etọn tọn, nado na nududu yetọn yé to osaa sisọ mẹ? Donanọ wẹ afanumẹ nẹ, whenuena klunọ etọn wá, mẹhe e na mọ [ẹn] to mọ wà. Nugbo wẹ yẹn dọ hlan mì dọ, ewọ na yí i do basi ogán onu he é tindo lẹpo tọn.”
5 E họnwun hezeheze dọ, zẹẹmẹ Jesu tọn do afanumẹ nugbo ehe ji ma jẹhẹ dopodopo gbẹtọvi depope tọn gba. Lala, ṣigba e basi zẹẹmẹ agun nugbo yiamisisadode Klisti tọn blebu, taidi pipli de. Whédo lọ lẹ wẹ hodotọ Klisti tọn lẹ taidi mẹdopodopo lẹ. Jesu yọnẹn dọ emi na họ̀ hodotọ yiamisisadode etọn lẹ po ohùn etọn titi po, enẹwutu e dlẹnalọdo yé po gbesisọ po to pọmẹ taidi afanumẹ etọn. Kọlintinu lẹ tintan 7:23 dọ dogbọn dali yetọn dọmọ: “Yè ko yí akuẹ sọha de do họ̀ mì [to hodọ gando pipli de go]; mì sọ yin mẹglọnọ gbẹtọ tọn blo.” Jesu degbena hagbẹ́ afanumẹ etọn lẹ nado gbọ hinhọ́n yetọn ni họnwun nado dọnmẹdogo bo basi devi devo lẹ podọ nado to núdùdù na whédo etọn lẹ zọnmii gbọn núdùdù gbigbọmẹ tọn yetọn nina yé to osaa sisọ mẹ dali.
6. Nawẹ afanumẹ lọ yin didona taidi kọdetọn dlapọn Jesu tọn gbọn?
6 Sọn ojlẹ he mẹ tintin tofi Klisti tọn bẹjẹeji podọ kaka jẹ 1918, hagbẹ́ afanumẹ nugbonọ lọ, mahopọnna mayin yinyọnẹn lẹdope, homẹkẹndomẹ, yèdọ po bẹwlu delẹ po, ko to dindin nado na núdùdù whédo lọ lẹ to osaa sisọ etọn mẹ. Ehe wẹ nuhe Ogán lọ mọ to whenuena mẹdlapọn etọn bẹjẹeji. Homẹ Oklunọ Jesu tọn hùn, podọ e basi lilá hagbẹ́ afanumẹ nugbonọ enẹ tọn taidi ayajẹnọ. Etẹwẹ yin alemọyinu homẹhunhun afanumẹ lọ tọn na wiwà nuhe Ogán etọn ko dè è nado wà? Tẹnmẹ he yiaga de! Mọwẹ, azọ́ngbàn pligidi lẹ yin nina ẹn na alemọyinu Ogán etọn tọn lẹ hinhẹngblo. To whenuena e yindọ Ogán lọ todin yin ahọlu olọn mẹ tọn de, naegbọn, to whelọnu lo, wẹ nutindo aigba ji tọn etọn lẹ do lẹzun nuhe tlẹ yin nuhọakuẹ hugan.
7, 8. (a) Etẹwẹ yin ‘nutindo Ogán lọ tọn lẹpo?’ (b) Etẹwẹ yin nukundo sọn afanumẹ lọ si na nukunpedo nutindo ehelẹ go?
7 Enẹwutu, etẹwẹ yin “onú he é tindo lẹpo” lọ? Ehelẹ wẹ onu gbigbọ tọn lẹpo to aigba ji he ko lẹzun nutindo Klisti tọn to kọndopọmẹ hẹ gbedide etọn taidi Ahọlu olọn mẹ tọn. Ehe na taun tọn bẹ́ azọ́ndenamẹ nado basi devi Klisti tọn lẹ hẹn, po lẹblanulọkẹyi daho nuyiwà taidi nukunmọnu Ahọluduta Jiwheyẹwhe tọn heyin zizedai na akọta aihọn tọn lẹpo tọn po.
8 Nukọnyiyi tẹnmẹ tọn mọnkọ nado penukundo nutindo Ogán lọ tọn lẹpo go biọ dọ na hagbẹ́ afanumẹ enẹ tọn ni na whenu dogọ po ayidonugo po nado hẹn azọ́n Ahọluduta lọ tọn zun wiwà podọ, mọwẹ, basi awuwle họgbigba daho lẹ tọn na azọ́n enẹ. E tindo azọ́nwatẹn azọ́n lọ tọn daho hugan todin—yèdọ fininọ aigba lọ tọn pete.
Lẹngbọ lẹ Bibẹpli
9. Etẹwẹ ko dekọtọn sọn hẹngblodeji nuwiwa afanumẹ lọ tọn lẹ mẹ?
9 To whelọnu lo, po tónusise po, hagbẹ́ afanumẹ nugbonọ nuyọnẹntọ Klisti tọn hẹn nuwiwa etọn lẹ gblodeji dogọ. Etẹwẹ yin kọdetọn lọ? Omẹ godo tọn lẹ heyin mẹyiamisisadode 144 000 lẹ yin bibẹpli. To whelọnu numimọ Johanu tọn dile eyin kinkandai do to Osọhia 7:9-17 mẹ lẹzun ojlofọndotenamẹnu, tulinamẹ nugbo tọn de. Titengbe sọn 1935 wẹ hagbé afanumẹ lọ tọn ko to vivi hẹndi numimọ heyin gohùnna madoalọte ehe tọn dù. Sọn aigba lẹpo ji, “gbẹtọ susugege” livi susu lẹ tọn todin to lìnlìn biọ tẹmpli gbigbọmẹ Jehovah tọn mẹ taidi sinsẹ̀n-basitọ etọn lẹ. Angẹli Jehovah tọn dọ na Johanu dọ “mẹdepope ma sọgan hia” gbẹtọ susugege ehe gba. Enẹ zẹẹmẹdo dọ sọha he tindo dogbo depope matin to sọha gbẹtọ he hagbé afanumẹ lọ tọn na hẹn wá tẹmpli gbigbọmẹ Jehovah tọn mẹ gba. Dile e na dẹnsọ bọ aliho ehe nado yin hùnhùndonuvo, azọ́n bibẹ́ yé pli tọn na to nukọnzindo janwẹ.
10. Nuwiwa owanyinọ tẹ mẹ wẹ afanumẹ lọ to mahẹ tindo te to egbehe?
10 Hagbẹ́ afanumẹ nugbonọ lọ tindo azọ́ngban pinpẹn de to nukunpedo sọha he to jijideji “lẹngbọ devo” tọn mẹ, to yinyọnẹn mẹ dọ omẹ taidi lẹngbọ ehelẹ sọn akọta lẹpo mẹ yin nuhọakuẹ na Ogán lọ, yèdọ Jesu. Yewlẹ na taun tọn yin lẹngbọpa etọn. (Johanu 10:16; Owalọ lẹ 20:28; 1 Pita 5:2-4) Enẹwutu po owanyi po na Ogán lọ podọ na lẹngbọ lẹ, hagbẹ́ afanumẹ lọ po ayajẹ po nọ penukundo nuhudo gbigbọmẹ tọn yetọn lẹ go.
11-13. Zẹẹmẹ he sọgbe tẹwẹ azìnponọ whenẹnu Ogbẹ́ Watch Tower Society tọn basi gando nuwiwa afanumẹ lọ tọn go?
11 Mọwẹ, ada tangan heyin nuwiwa hinhọ́n hinhẹn afanumẹ lọ tọn lẹ wẹ yin bibẹ́ mẹjidugando aigba ji tọn heyin Ahọluduta Jiwheyẹwhe tọn plidopọ. To hodidọ do nuwiwa afanumẹ nugbonọ lọ tọn he to jideji tindo hugan gbede pọ́n tọn lẹ ji, F. W. Franz, heyin azinponọ Ogbẹ́ tọn to whenẹnu, dọ to madẹnmẹ whẹpo e do kú to décembre 1992 dọmọ:
12 “Jesu Klisti ko yi titobasinanu lọ zán whlasusu to aliho he jiawu de mẹ to ojlẹ lẹpo mẹ, sọgbe hẹ numimọ gbẹ̀zan owhe 99 ṣie tọn lẹ. E ma yin gbẹtọ tata de wẹ to anadena titobasinanu lọ gba, ṣigba e dona yin Oklunọ Jesu Klisti. Na e ko tindo kọdetọn daho tlala podọ to aliho he jiawu mẹ zẹjlẹgo hugan lehe mí ko lẹndo pọ́n gbede. To egbehe mí tindo titobasinanu de he ko gblodeji lẹdo aihọn pe. E to azọ́nyiwa to Agewaji ji podọ to Hùwaji ji, to Whèyihọ podọ to Whèzẹtẹn. Kiki omẹ dopo akan wẹ sọgan ko yinuwa na hẹngblo he jẹ na ayidonugo ehe—yèdọ Ovi Jiwheyẹwhe tọn, mẹhe to nukunpedo hagbẹ́ afanumẹ nugbonọ nuyọnẹntọ lọ go. Ewọ ko to nukunpedo azọ́ngban etọn lẹ go ganji, podọ enẹ wẹ yinuwa do hẹngblo daho ehe mí ko tindo kunnudide etọn ji.
13 “Whẹho lọ ma yin wiwadotana gbọn omẹ dopo dali gba. Mí tindo titobasinanu de he yin yẹwhehọluduta tọn, podọ é nọ yinuwa to ninọmẹ yẹwhehọluduta tọn mẹ, to aliho anademẹ Jiwheyẹwhe tọn mẹ. Mẹdepope, etlẹ yin dowatọ Ogbẹ́ Watch Tower Bible and Tract Society tọn, ma sọgan sọalọakọn kavi yin nina pipà po azọ́ngbàn lọ po na nuhe ko yin wiwadotana lẹdo globu pé gba. Nujiawu taun de wẹ e yin poun.” Podọ be mẹhe yin hagbẹ́ gbẹtọ susugege tọn lẹ po ayiha lẹpo po ma tin to gbekọndopọmẹ po numọtolanmẹ Mẹmẹsunnu Franz tọn nẹlẹ po ya? Na nugbo tọn, mọwẹ, yé gọna pẹdido tlala na hẹngblodeji nuwiwa afanumẹ nugbonọ lọ tọn.
Mẹjidugando Ahọluduta Jiwheyẹwhe Tọn Lẹ
14, 15. (a)Etẹwẹ Jesu dohia to oló talẹnti tọn mẹ (Matiu 25:14-30)? (b) Po gbesisọ po, etẹwẹ bọdego to Matiu weta 25 mẹ?
14 To Matiu weta 25 mẹ, oló Jesu tọn gando lẹngbọ po gbọgbọẹ lẹ po go basi zẹẹmẹ azọ́n daho ehe tọn heyin bibẹ́ mẹjidugando Ahọluduta Jiwheyẹwhe tọn aigba ji tọn lẹ plidopọ tọn. To oló he jẹnukọnna ẹn tlolo, heyin oló talẹnti lẹ tọn mẹ, Jesu yí nujlẹdonugo dọ devi yiamisisadode he tindo todido nado duahọlu hẹ ẹ to Ahọluduta olọn mẹ tọn etọn mẹ lẹ dona wazọ́n nado hẹn nutindo aigba ji tọn etọn lẹ jideji. To whelọnu lo, e sọgbe pẹpẹ, to oló he bọdego mẹ, Jesu do nuhe yin bibiọ sọn mẹhe jlo nado lẹzun mẹjidugando Ahọluduta olọn mẹ tọn etọn si hia.
15 Doayi ayidonugo etọn go to Matiu 25:31-33 mẹ he dọmọ: “Whenuena ovi gbẹtọ tọn na wá to gigo etọn mẹ, po angẹli etọn lẹpo po e po, whenẹnu wẹ e na sinai to ofìn gigo etọn tọn ji. Nukọn etọn wẹ yè na bẹ́ akọta lẹpo pli do: é nasọ klán yé dovo sọn yénọzo go, dile lẹngbọhọtọ nọ klan lẹngbọ etọn lẹ sọn gbọgbọẹ lẹ go do. E nasọ yí lẹngbọ lẹ do adusi etọn mẹ, ṣigba gbọgbọẹ lẹ do amiyọn mẹ.”
16. Nawẹ akọta lẹ yin bibẹpli bọ gbẹtọ lẹ yin kinklan gbọn?
16 Jesu wá to gigo etọn mẹ to 1914. To adi zogbè mẹ, ewọ, po angẹli etọn lẹ po, fùn awhàn bo dè kẹntọ aovi tọn etọn lẹ sẹ sọn olọn mẹ. Nuhe bọdego to oló etọn mẹ gọalọna mí nado yọn pinpẹn etọn dọ aisinsin Jesu tọn to ofìn gigonọ de ji yin yẹhiadonu awuwle fó na whẹdida to tintin tofi etọn whenu. Bẹplidopọ akọta lẹpo tọn do nukọn etọn zẹẹmẹdo dọ Jesu nọ yinuwa hlan akọta lẹpo taidi lẹngbọ sọgodo etọn tọn, to yẹhiadonu liho. Lẹngbọpa he bẹ́ dọnwludopọ lẹngbọ lẹ po gbọgbọẹ lẹ po tọn hẹn de wẹ e yin. Dile na e yindọ e sọgan yí apadewhe azán de tọn nado klán lẹngbọ lẹ sọn gbọgbọẹ lẹ go to lẹngbọpa paa gbẹtọ tọn de mẹ, nukinklandovo lẹdo aihọn pe gbẹtọ he tindo mẹdekannujẹ nado basi didè nuhe jlo yé tọn lẹ na yí whenu susu hugan mọ. Ehe yinmọ na nukinklandovo lọ na sinai do yanwle nuyiwa dopodopo yetọn lẹ tọn ji.
17. Naegbọn ninọmẹ lọ to egbehe do sinyẹn na gbẹtọ lẹpo?
17 To oló lọ mẹ, Ahọlu Lẹngbọhọtọ lọ bẹ́ omẹ taidi lẹngbọ lẹ do adusi etọn mẹ podọ omẹ taidi gbọgbọẹ lẹ do amiyọn etọn mẹ. Adusiwhe dekọtọn do whẹdida po kọdetọn nukundagbe tọn po—yèdọ ogbẹ̀ madopodo mẹ. Amiyọnwhe yin whẹdida he ma tindo nukundagbe de—yèdọ vasudo madopodo. Nujikudo Ahọlu lọ tọn do whẹho lọ ji tindo kọdetọn sinsinyẹn de.
18. Naegbọn tintin mayinukundomọ Ahọlu lọ tọn ma do dè mẹdepope sọn whẹgbledo mẹ?
18 Mayinukundomọ gandudu Visunnu gbẹtọ tọn to tintin tofi etọn whenu, kavi pa·rou·siʹa, ma dè mẹdepope sọn whẹgbledo mẹ gba. Sọha susu omẹ taidi lẹngbọ lẹ tọn to egbehe to awukọndopọ hẹ hagbẹ́ afanumẹ lọ tọn to yẹwheho wẹndagbe Ahọluduta Jiwheyẹwhe lọ tọn lilá mẹ lẹdo aihọn pe, gbọn didikena hinhọ́n yetọn ni họnwun dali. Na nugbo tọn, yẹwhehodidọ yetọn ko yinukọn jẹ agosu ẹnẹ aigba tọn lẹpo ji.—Matiu 24:14.
19. Jẹhẹnu hagbẹ́ lẹngbọ lọ tọn tẹlẹ wẹ yin didohia to oló lẹngbọ po gbọgbọẹ lẹ po tọn mẹ?
19 Naegbọn Ahọlu Lẹngbọhọtọ lọ do súahọ hagbẹ́ lẹngbọ lọ tọn lẹ po sọgodo donanọ de po? Na godonọnamẹ sọn ahun mẹ wá yetọn heyin azọ́n yẹwhehodidọ Ahọluduta lọ tọn po dagbewanyi he yé dohia hlan mẹmẹsunnu yiamisisadode etọn lẹ po, ehe Jesu pọnhlan taidi yin wiwà hlan ẹn wutu. Enẹwutu, Visunnu gbẹtọ tọn gigonọ dọ hlan yé dọmọ: “Mì wá, mì donanọ Otọ́ ṣie tọn, mì dugú ahọludu he yè ko wleawu etọn dai na mì sọn dòdó aihọn tọn wá.”—Matiu 25:34; 28:19, 20.
Alọgigọna Ahọlu Lọ
20, 21. Kunnudenu tẹwẹ lẹngbọ lọ lẹ na dọ yé nọgodona Ahọluduta lọ?
20 Doayi e go dọ to whenuena Ahọlu lọ basi oylọna lẹngbọ ehelẹ nado dugú lẹdo aigba tọn heyin Ahọluduta Jiwheyẹwhe tọn, e paṣa yé tlala. Yé kanbiọ dọmọ: ‘Oklunọ whetẹnu wẹ mí wa onu ehe lẹ na we?’ Ewọ yigbè dọmọ: “Nugbo wẹ yẹn dọ hlan mì, le mìwlẹ basi hlan dopo to mẹmẹsunnu ṣie helẹ mẹ, yèdọ pẹvipete helẹ yẹn wẹ mì basi i hlan.” (Matiu 25:40) To whenuena Jesu sọawuhia Malia Magdaleni to azán fọ́nsọnku etọn tọn gbè, e dọho dogbọn mẹmẹsunnu gbigbọmẹ tọn etọn lẹ dali to whenuena e dọ hlan ẹn dọmọ. “Yì mẹmẹsunnu ṣie lẹ de.” (Johanu 20:17) To ojlẹ tintin tofi mayinukundomọ etọn tọn whenu, Jesu tindo kiki hagbẹ́ pipotọ vude poun heyin mẹmẹsunnu gbigbọmẹ 144 000 tọn etọn he gbẹsọ tin to agbasa mẹ to aigba ji.
21 To whenuena e yindọ Jesu to mayinukundomọ yin to olọn lẹ mẹ, kiki gbọn aliho he ma yin tlọlọ mẹ wẹ omẹ taidi lẹngbọ ehelẹ gbọn do wà onu ehelẹ hlan ẹn. Yé mọ ẹn to ofìn etọn ji kiki po nukun yise yétọn lẹ tọn po. Jesu yọn pinpẹn vivẹnudido he yé basi lẹpo tọn nado gọalọna mẹmẹsunnu gbigbọmẹ tọn etọn lẹ, mẹhe na yin whédutọgbẹ́ olọn mẹ tọn etọn lẹ. E nọ pọ́n nuhe yin wiwà na mẹmẹsunnu etọn lẹ hlan taidi nuhe yin wiwà na ewọ lọsu titi. Omẹ taidi lẹngbọ lẹ de sọn ojlo mẹ wá do wà dagbe na mẹmẹsunnu Klisti tọn lẹ na yé yọn omẹ ehelẹ nado yin omẹ mọnkọtọn lẹ wutu. Yé yọn pinpẹn etọn dọ mẹmẹsunnu gbigbọmẹ tọn Jesu tọn lẹ yin nukunmọnu Ahọluduta Jehovah tọn, podọ yé jlo nado na kunnudenu titengbe dọ yé to teninọ yetọn go hẹn po yé po to awà Ahọluduta enẹ tọn mẹ.
22. Nawẹ hagbẹ́ lẹngbọ lọ tọn yin didona gbọn? (Yijlẹdo Osọhia 7:14-17 go.)
22 Jehovah mọ dohlan jẹnukọn dọ hagbẹ́ omẹ taidi lẹngbọ tọn enẹlẹ na sọawuhia to ojlẹ tintin tofi Visunnu etọn tọn whenu. Gbẹtọ susugege lẹ na dugú dona jijọho tọn lẹ tofi to aigba ji na owhe Fọtọ́n to Gandudu ayajẹ tọn gbọn Ahọlu Jehovah tọn, Jesu Klisti tọn dali.
23. To aliho tẹlẹ mẹ wẹ lẹngbọ lọ to yinyọnẹn mẹ gọalọna mẹmẹsunnu Ahọlu lọ tọn lẹ te?
23 To whenuena mí zé dọdai Biblu tọn he yọn-na-yizan to ojlẹ tintin tofi Klisti tọn whenu lẹ do lẹnpọn mẹ, to pọmẹ po oló Jesu tọn heyin lẹngbọ lẹ po gbọgbọẹ lẹ tọn po, etẹwẹ mí mọ? Ehe: ma yin whẹho dagbewiwa na dopo to mẹmẹsunnu gbigbọmẹ tọn Ahọlu lọ tọn lẹ mẹ to wunvimẹ podọ vlavonu wẹ nọ hẹn mẹde zun lẹngbọ de po teninọ dódó tọn de po to Jiwheyẹwhe po Ahọlu etọn po nukọn gba. Mẹhe yin hagbẹ́ lẹngbọ tọn lẹ yọn nuhe wà yé te, dile e tlẹ yindọ yé ma mọ Ahọlu he to gandu lọ po nukun jọwamọ yetọn lẹ tọn po do. Yé nọ dovivẹnu vẹkuvẹku nado gọalọna mẹmẹsunnu Ahọlu lọ tọn lẹ e ma yin kiki to agbasanu liho poun gba ṣigba to gbigbọ liho ga. Gbọnna? Gbọn alọgọna yé to yẹwhehodidọ wẹndagbe Ahọluduta lọ tọn mẹ po anadena plọnmẹ Biblu lẹ po nado sọgan basi devi lẹ na Klisti. Gbọnmọ dali, to egbehe hugan livi ẹnẹ hinhọ́n hẹntọ wẹnlatọ Ahọluduta Jiwheyẹwhe tọn lẹ wẹ tin.
Hẹngblodeji Nuwiwa Tọn Lẹ
24. Azọ́nwiwa owanyinọ tẹwẹ ko hẹn hagbẹ́ lẹngbọ tọn lẹ yin gbẹtọ ayajẹnọ lẹ to aigba ji to egbehe?
24 Mì gbọ na mí ni gbadopọnna azọ́n dagbe delẹ heyin hagbẹ́ afanumẹ nugbonọ lọ tọn. Tintan, hagbẹ́ afanumẹ nugbonọ lọ ko yin dide do nutindo Ogán lọ tọn lẹpo ji—alemọyinu ahọluduta etọn tọn lẹ to aigba ji—podọ nutindo ehelẹ zindonukọn nado to jideji tindo. Awetọ, hagbẹ́ enẹ ma to núdùdù na kiki whédo lọ lẹ kẹdẹ gba ṣigba gbẹtọ susugege he to jideji tindo tẹgbẹ po núdùdù gbigbọmẹ tọn po. Atọ̀ntọ, afanumẹ lọ to nukọntọ yin to hinhọ́n Ahọluduta lọ tọn hinhẹn gbayipe mẹ. Ẹnẹtọ, hẹngblodeji daho nuwiwa afanumẹ lọ tọn lẹ tin to bẹplidopọ gbẹtọ susugege lẹngbọ devo lẹ tọn mẹ, bo to yé hẹnwá tẹmpli gbigbọmẹ tọn Jehovah tọn mẹ. Atọ́ntọ, afanumẹ nugbonọ lọ po godonọnamẹ ahún lẹpo tọn po heyin omẹ taidi lẹngbọ lẹ tọn, to awuwle basina hẹngblodeji nutindo lẹ tọn na titobasinanu alahọ tọn lẹ lẹdo globu lọ pé, kaka jẹ tatọ tẹnnọ lẹ to Amẹlika. Azọ́n owanyinanọ mọnkọtọn lẹ ko hẹn hagbẹ́ afanumẹ lọ tọn zùn ayajẹnọ hugan omẹ aigba ji egbezangbe tọn lẹ, podọ yé ko sọ hẹn livi susu mẹdevo lẹ tọn zun ayajẹnọ ga. Ehe lẹpo na pẹdido hlan Jehovah Jiwheyẹwhe podọ hlan Jesu Klisti, he ko deanana hẹngblodeji nuwiwa afanumẹ nuyọnẹntọ lọ tọn lẹ!
25. Nawẹ lẹngbọ lẹ sọgan zindonukọn nado to godonọna hagbẹ́ afanumẹ lọ tọn gbọn, podọ po todido tẹ po to pọndohlan mẹ?
25 Hagbẹ́ afanumẹ lọ tọn to azọ́n sinsinyẹn wà todin hugan gbede pọ́n to azọ́ndenamẹ Jiwheyẹwhe tọn etọn lẹ mẹ. Ojlẹ he po whẹpo “nukunbibia daho” nado gbajẹgbonu ko dibla vọ! (Matiu 24:21) Lehe e yin onu titengbe do sọ dọ omẹ heyin lẹngbọ Jiwheyẹwhe tọn ehelẹ ni gbọṣi adusiwhe na nukun dagbe Ahọlu Lẹngbọhọtọ etọn tọn! Enẹwutu, to whelọnu lo, mì gbọ mímẹpo ni zindonukọn po zohunhun po nado nọgodona afanumẹ nugbonọ nuyọnẹntọ lọ. Na kiki dogbọn mọ bibasi dali wẹ to gbedopo to madẹnmẹ omẹ taidi lẹngbọ lẹ na penugo nado sè hogbe ayajẹ tọn lẹ heyin: “Mì wá, mì donanọ Otọ́ ṣie tọn, mì dugú ahọludu he yè ko wleawu etọn dai na mì sọn dòdó aihọn tọn wá.” (Pọ́n w-F 1/5/93, weda 15.)
Be Hiẹ Sọgan na Gblọndo Ya?
◻Whẹdida jẹnukọn tẹwẹ bọdo zize do ofìn ji Ahọlu lọ tọn go?
◻Nawẹ Matiu 24:45-47 tindo hẹndi egbezangbe tọn gbọn?
◻Gando nuwiwa hẹngblodeji lẹ go, na nuwiwa tẹlẹ wutu wẹ hagbẹ́ afanumẹ lọ tọn lẹ po gbẹtọ susugege lẹ po gọna pẹdido hugan?
◻Nawẹ Matiu 25:34-40 yin hinhẹndi to pa·rou·siʹa whenu gbọn?
[Yẹdide to weda 14]
Ogán lọ zé nutindo etọn lẹpo do alọ afanumẹ nugbonọ lọ tọn mẹ
[Yẹdide to weda 18]
Jesu ko sinai to ofìn gigonọ etọn ji nado dawhẹna gbẹtọvi lẹ