Gbedewema-Yitọ Giliadi Tọn lẹ Mọ Anademẹ He Whànmẹ lẹ Yí

KLASI 121tọ Wehọmẹ Biblu Pinplọn Watchtower Giliadi tọn yí gbedewema to 9 septembre 2006 to Nọtẹn Wepinplọn Watchtower tọn to Patterson, New York. Tito-to-whinnu lọ whànmẹ taun.

Geoffrey Jackson, he yin dopo to Hagbẹ Anademẹtọ Kunnudetọ Jehovah tọn lẹ tọn mẹ, bẹ tito-to-whinnu lọ jẹeji gbọn kuavọdidona gbedewema-yitọ 56 po mẹplidopọ 6 366 he wá sọn otò voovo lẹ mẹ po dali. E gbadopọnna Psalm 86:11, he dọmọ: “OKLUNỌ E, plọn ali towe mi; yẹn na nọ zinzọnlin to nugbo towe mẹ; hẹn ayiha ṣie do dopo nado nọ dibusi oyín towe.” Mẹmẹsunnu Jackson donù onú atọ̀n delẹ go he yin nùzindeji to wefọ enẹ mẹ. E dọmọ: “Adà tintan lọ dọhodo nuplọnmẹ ji; awetọ dọhodo nuhe yè plọn lẹ yiyizan ji; podọ atọ̀ntọ, mẹwhinwhàn. Onú atọ̀n ehelẹ yin nujọnu taun na mì mẹdehlan he jei azọ́ndenamẹ mìtọn lẹ mẹ.” Enẹgodo e basi homẹbibiọ na hodidọ po hokansemẹ debọdo-dego lẹ po he zinnudo onú atọ̀n lọ lẹpo ji.

Anademẹ He Whànmẹ Lẹ

William Malenfant, he yin dopo to azọ́nwatọ tatọ́-tẹnnọ tọn lẹ mẹ, gbadopọnna hosọ lọ “Gbẹzan Dagbe Hugan Lọ.” E dọ̀n ayidonugo wá apajlẹ Malia, nọviyọnnu Malta tọn ji. To gbèdopo he Jesu wá owhé yetọn gbè, Malia basi dide nado sinai to afọ etọn go nado dotoaina ẹn bo yí enẹ do basi yanwle etọn tintan. Jesu dọna Malta dọmọ: “Malia ko de omọ́ dagbe lọ, he yè ma sọgan yí sọn e dè.” (Luku 10:38-42) “Saa lẹnnupọndo enẹ ji,” wẹ hodọtọ lọ dọ. “Malia na nọ flin tẹgbẹ dọ emi sinai to afọ Jesu tọn go bo dotoaina nugbo jiawu gbigbọmẹ tọn lẹ tlọlọ—ehe lẹpo na emi basi nudide dagbe de wutu.” To gbedewema-yitọ lọ lẹ pipà na nudide gbigbọmẹ tọn dagbe he yé basi lẹ godo, e dọmọ: “Nudide mìtọn lẹ ko plan mì jẹ gbẹzan dagbe hugan lọ kọ̀n.”

Bọdo enẹ go, Anthony Morris, he yin dopo to Hagbẹ Anademẹtọ lọ mẹ, gbadopọnna hosọ lọ “Ze Jesu Klisti Oklunọ Dogo,” he sinai do Lomunu lẹ 13:14 ji. Nawẹ mí sọgan wà ehe gbọn? Jesu Klisti Oklunọ lọ zize dogo bẹ aliho nuyiwa Oklunọ lọ tọn lẹ hihodo hẹn. Enẹwutu ehe zẹẹmẹdo nado hodo apajlẹ po ayilinlẹn Jesu tọn po. Hodọtọ lọ dọmọ: “Jesu nọ hẹn gbẹtọ lẹ voawu, na e tindo ojlo ahundopo tọn to yé mẹ, bọ yelọsu sọgan mọ domọ.” Enẹgodo hodọtọ lọ gbadopọnna lehe wehọmẹvi lọ lẹ ko mọ oyọnẹn susu yí sọn nuplọnmẹ Giliadi tọn lẹ mẹ do, ‘nado sọgan tunwun nuhe gbigblo, tedidi, sisosiso, po jiyiyi’ nugbo lọ tọn po yin, dile Efesunu lẹ 3:18 dọ do. Ṣigba e flinnu yé gando wefọ 19 go, he dọmọ: “Podọ nado yọ́n owanyi Klisti tọn, he sù hú nuyọnẹn.” Mẹmẹsunnu Morris dotuhomẹna wehọmẹvi lọ lẹ dọmọ: “Dile mì to oplọn mẹdetiti tọn mìtọn basi zọnmii, mì nọ lẹnnupọndo lehe mì sọgan hodo apajlẹ awuvẹmẹ po owanyi Klisti tọn po bo ‘ze Jesu Klisti Oklunọ dogo’ do ji.”

Ayinamẹ Godo Tọn sọn Mẹplọntọ Giliadi Tọn lẹ Dè

Hodidọ he bọdego yin zizedonukọnnamẹ gbọn mẹplọntọ Giliadi tọn Wallace Liverance dali, he hosọ etọn sinai do Howhinwhẹn lẹ 4:7 ji. E dọ dọ dile etlẹ yindọ nuyọnẹn he wá sọn Jiwheyẹwhe dè wẹ yin nujọnu hugan, mí sọ dona “tindo zinzin,” kavi nukunnumọjẹnumẹ, he zẹẹmẹdo nado kọ̀n nudọnamẹ voovo lẹ dopọ bo pọ́n lehe yé gando ode awetọ go do nado sọgan mọ nujọnu-yinyin whẹho de tọn. Hodọtọ lọ dohia dọ nukunnumọjẹnumẹ tintindo nọ hẹn ayajẹ wá. Di apajlẹ, to ojlẹ Nẹhemia tọn mẹ, Levinu lẹ “hẹn gbẹtọ lẹ nado tunwun osẹ́n lọ” bosọ “na tadena,” kavi nukunnumọjẹnumẹ. To enẹgodo, gbẹtọ lẹ jẹ ‘ajògidi daho de basi ji, na yé ko mọnukunnujẹ ohó he yè lá hlan yé lẹ mẹ wutu.’ (Nẹhemia 8:7, 8, 12) Mẹmẹsunnu Liverance dotana dọmọ: “Nukunnumimọjẹ Ohó gbọdo Jiwheyẹwhe tọn mẹ nọ hẹn ayajẹ wá.”

“Mẹnu Na Taun Tọn Wẹ Yin Kẹntọ Towe?” wẹ hosọ he mẹplọntọ Giliadi tọn devo he nọ yin Mark Noumair gbadopọnna. To awhàngbenu, awhànfuntọ susu wẹ nọ yin hùhù gbọn sòpẹ́n hatọ yetọn titi lẹ tọn dali. “Etẹwẹ dogbọn awhàn gbigbọmẹ tọn he fùn mí te dali?” wẹ e kanse. “Eyin mí ma to aṣeji, mí sọgan biọ bẹwlu mẹ gando mẹhe yin kẹntọ mítọn taun lọ go bo wá gbleawuna awhànvipẹ mítọn titi lẹ.” Nuvẹun sọgan hẹn mẹdelẹ biọ bẹwlu mẹ. E hẹn Ahọlu Sauli nado tẹnpọn nado hù Davidi he yin sinsẹ̀n-basitọ hatọ etọn, to whenuena e yindọ na taun tọn Filistininu lẹ wẹ yin kẹntọ yetọn. (1 Samuẹli 18:7-9; 23:27, 28) Enẹgodo, hodọtọ lọ zindonukọn dọmọ: “Nawẹ mì na yinuwa gbọn eyin mì wá to devizọnwa hẹ mẹdehlan de he pegan taun to adà susu mẹ? Be mì na yí homọdọdomẹgo lẹ do gbleawuna awhànfuntọ hatọ mìtọn wẹ, kavi mì na gbọn jijọho dindin dali kẹalọyi nugbo lọ dọ mẹdevo lẹ pegan hugan mì to aliho voovo lẹ mẹ ya? Ayidonugo zizedo mape mẹdevo lẹ tọn ji sọgan hẹn mí biọ bẹwlu mẹ gando mẹhe yin kẹntọ mítọn taun lọ go. Mì hoavùn sọta kẹntọ nujọnu tọn lọ, Satani.”

Numimọ Ayajẹ Tọn lẹ po Hokansemẹ Yọn-Na-Yizan lẹ Po

Adà he bọdego lọ, he hosọ etọn yin “Nọ to Azọ́n Yẹwhehodọtọ Tọn Wà Pé,” yin nukunpedego gbọn mẹplọntọ Giliadi tọn Lawrence Bowen dali bosọ bẹ hokansemẹ po numimọ lẹ po hẹn. Hodọtọ lọ dohia dọ: “Azọ́n tangan mẹdehlan he yin pinplọn to Giliadi de tọn wẹ nado hẹn wẹndagbe lọ gbayipe, podọ klasi ehe ko wàmọ to fidepope he yé sọgan mọ gbẹtọ lẹ te.” Wadohia numimọ ayajẹ tọn delẹ yin vivọbasi.

Nuhe bọdego to tito-to-whinnu lọ mẹ wẹ adà awe he yin nukunpedego debọdo-dego gbọn Michael Burnett po Scott Shoffner po he yin hagbẹ whẹndo Bẹtẹli tọn lẹ dali. Yé kanhose hagbẹ Wedegbẹ́ Alahọ tọn delẹ sọn Australie, Barbados, Corée, po Ouganda po. Hodidọ hagbẹ wedegbẹ́ lọ lẹ tọn do vivẹnu susu he nọ yin dido nado penukundo nuhudo mẹdehlan lẹ tọn go hia, ehe bẹ awuwiwlena adọtẹn he sọgbe po nukunpedomẹgo agbasalilo tọn po hẹn. Hagbẹ wedegbẹ́ tọn lọ lẹ zinnudeji dọ mẹdehlan kọdetọn dagbenọ delẹ ko wleawufo nado diọada sọgbe hẹ ninọmẹ lẹdo lọ tọn lẹ.

Tadona He Dozolanmẹnamẹ Bosọ Whànmẹ De

Hosọ tangan tito-to-whinnu lọ tọn wẹ hodidọ lọ “Mì Dibusi Jiwheyẹwhe, Bosọ Na Gigo E,” he yin zizedonukọnnamẹ gbọn John E. Barr, he yin dopo to Hagbẹ Anademẹtọ lọ mẹ sọn ojlẹ dindẹn die dali. E gbadopọnna Osọhia 14:6, 7, he hia dọmọ: “Yẹn sọ mọ angẹli devo de to zinzlọn to olọn ṣẹnṣẹn, bo tindo wẹndagbe madopodo de to alọ mẹ, nado dọyẹwheho hlan yé he tin to aigba ji lẹ, hlan akọta lẹpo, hlan hẹnnu lẹpo, hlan ogbè lẹpo, hlan gbẹtọ lẹpo, bo to didọ to ogbè lélé mẹ, dọmọ, Mì dibusi Jiwheyẹwhe, bosọ na gigo e; na whẹdida whenu etọn wá.”

Mẹmẹsunnu Barr dotuhomẹna wehọmẹvi lọ lẹ nado hẹn onú atọ̀n do ayiha mẹ gando angẹli enẹ go. Tintan, e dona lá wẹndagbe madopodo lọ dọ Klisti to gandu todin po aṣẹpipa gigọ́ Ahọluduta tọn po. Hodọtọ lọ dọmọ: “Mí kudeji mlẹnmlẹn dọ 1914 wẹ ewọ yin zizedo ofìn ji. Enẹwutu owẹ̀n ayajẹ tọn ehe dona yin lilá lẹdo aihọn pé.” Awetọ, angẹli lọ dọmọ: “Mì dibusi Jiwheyẹwhe.” Hodọtọ lọ basi zẹẹmẹ dọ gbedewema-yitọ lọ lẹ dona gọalọna plọnmẹ Biblu yetọn lẹ nado wleawuna osi sisosiso na Jiwheyẹwhe ma nado wà nudepope he na hẹn homẹgble e. Atọ̀ntọ, angẹli lọ degbè dọmọ: ‘Mì na gigo Jiwheyẹwhe.’ Wehọmẹvi lọ lẹ yin tudohomẹna dọmọ: “Mì wọnji gbede blo dọ mí to devizọnwa na gigo Jiwheyẹwhe tọn, e ma yin na mítọn titi gba.” Enẹgodo to hodidọ do “whẹdida whenu” lọ ji mẹ, Mẹmẹsunnu Barr dọmọ: “Ojlẹ vude wẹ pò bọ whẹdida godo tọn lọ na yin lilá. Mẹsusu to aigba-denamẹ mítọn lẹ ji gbẹ́ tindo nuhudo nado sè wẹndagbe lọ whẹpo whenu nido fẹ́.”

Dile hogbe ehelẹ gbẹ́ to núdọ to otó yetọn lẹ mẹ, gbedewema-yitọ 56 lọ lẹ mọ gbedewema yetọn lẹ yí bo yin didohlan opodo aigba tọn. Ahun gbedewema-yitọ lọ lẹ po mẹdevo he wá otẹn lọ mẹ lẹ po tọn yin whinwhàn tlala gbọn ayinamẹ zodolanmẹnamẹ tọn he yé mọyi to azán ayajẹ tọn enẹ ji lẹ dali.

[Apotin to weda 17]

SỌHA NULINLẸN KLASI TỌN

Sọha otò he mẹ yé wá sọn tọn: 6

Sọha otò he mẹ yé yin didohlan tọn: 25

Sọha wehọmẹvi lẹ tọn: 56

Madozẹnzẹn owhe mẹhodido tọn: 35,1

Madozẹnzẹn owhe to nugbo mẹ tọn: 18,3

Madozẹnzẹn owhe lizọnyizọn whenu-gigọ́ tọn: 13,9

[Yẹdide to weda 18]

Gbedewema-Yíyí Klasi 121tọ Wehọmẹ Biblu Pinplọn Watchtower Giliadi Tọn

To yinkọ he tin to odò lẹ mẹ, hukan lẹ yin sọha yí na sọn nukọn yì godo, bọ yinkọ lẹ yin sislẹ sọn amiyọnwhé yì adusiwhé to hukan dopodopo ji.

(1) Fox, Y.; Kunicki, D.; Wilkinson, S.; Kawamoto, S.; Consolandi, G.; Mayen, C. (2) Santiago, N.; Clancy, R.; Fischer, M.; de Abreu, L.; Davis, E. (3) Hwang, J.; Hoffman, D.; Wridgway, L.; Ibrahim, J.; Dabelstein, A.; Bakabak, M. (4) Peters, M.; Jones, C.; Ford, S.; Parra, S.; Rothrock, D.; Tatlot, M.; Perez, E. (5) de Abreu, F.; Kawamoto, S.; Ives, S.; Burdo, J.; Hwang, J.; Wilkinson, D. (6) Fox, A.; Bakabak, J.; Cichowski, P.; Forier, C.; Mayen, S.; Consolandi, E.; Wridgway, W. (7) Parra, B.; Perez, B.; Tatlot, P.; Santiago, M.; Ibrahim, Y.; Kunicki, C. (8) Burdo, C.; Cichowski, B.; Ives, K.; Ford, A.; Rothrock, J.; Hoffman, D.; Davis, M. (9) Peters, C.; Dabelstein, C.; Jones, K.; Clancy, S.; Fischer, J.; Forier, S.