4. Nawẹ Jesu zinnudeji dọ mí dona hẹn Klistiani-yinyin mítọn go gbọn?

⁴ Nalete, taidi devizọnwatọ klandowiwe Jehovah tọn lẹ, mí yọnẹn dọ eyin depope to mí mẹ—jọja kavi mẹho—hẹn Klistiani-yinyin etọn bu, nugbajẹmẹji de wẹ e na yin. Nujinọtedo Jehovah tọn lẹ po nuhe e nọ donukun sọn mí si lẹ po kẹdẹ ji wẹ pọndohlan he sọgbe gando Klistiani-yinyin go sọgan yin zize sinai do. To popolẹpo mẹ, boṣiọ kavi apajlẹ etọn mẹ wẹ mí yin didá te. (Gẹnẹsisi 1:26; Mika 6:8) Biblu yí Klistiani-yinyin mítọn jlẹdo avọ̀ he nọ yin didó na mẹlẹpo nido mọ lẹ go. Jesu na avase gando ojlẹ mítọn go dọ: “Doayi e go, yẹn na wá di ajotọ. Donanọ wẹ ewọ he to alihọ́, bosọ sẹ avọ̀ etọn do, na e nikaa zinzọnlin to omẹ́, yè bo nasọ mọ winyan etọn.”a (Osọhia 16:15) Mí ma jlo na klọ́n jẹhẹnu Klistiani tọn po nujinọtedo walọ dagbe tọn mítọn lẹ po do apadopo bo jo míde do na aihọn Satani tọn nado deanana mí gba. Eyin enẹ jọ do mí go, mí na hẹn “avọ̀” mítọn bu. Ninọmẹ mọnkọtọn na blawu tlala bo nasọ huwinyan taun.