Owe Osọhia Tọn—Lehe E Gando Sọgodo Towe Go Do

 1. Nudide titengbe tẹwẹ gbẹtọvi lẹpo dona basi?

TO EGBEHE, gbẹtọvi lẹ dona basi nudide titengbe de. Be yé na nọgodona Jehovah Jiwheyẹwhe taidi Gandutọ wẹkẹ lọ tọn he sọgbe lọ ya, kavi yé na nọ adà kẹntọ ylankan etọn Satani Lẹgba tọn mẹ? Adà atọ̀ntọ devo de ma tin. Nudide depope he yé basi na gando sọgodo yetọn go kakadoi. (Mat. 25:31-33, 46) To “nukunbibia daho lọ” whenu, yé na yin hiadogona vlavo nado yin whinwhlẹngán kavi nado yin vivasudo.—Osọ. 7:14; 14:9-11; Ezek. 9:4, 6.

 2. (a) Etẹwẹ Heblu lẹ 10:35-39 dotuhomẹna mí nado wà? (b) Nawẹ owe Osọhia tọn gán gọalọna mí gbọn?

² Hia Heblu lẹ 10:35-39. Eyin a ko de nado nọgodona gandudu Jehovah tọn, be nudide nuyọnẹn tọn lọ wẹ a basi. Todin, a to jejeji nado gọalọna mẹdevo lẹ, na yé nido basi nudide he sọgbe lọ. Enẹwutu, a gán yí nudọnamẹ he to owe Osọhia tọn mẹ lẹ do gọalọna yé. Owe ayidego tọn enẹ do nuhe na jọ do mẹhe diọnukunsọ Jehovah lẹ go hia, amọ́ e sọ zinnudo dona he mẹhe yí nugbonọ-yinyin do nọgodona gandudu etọn lẹ na mọyi lẹ ji. E na yọ́n dọ mí ni gbadopọnna nugbo titengbe enẹlẹ. Mọwiwà na hẹn gbemima mítọn lodo nado to Jehovah sẹ̀n zọnmii. Humọ, mí gán yí nuhe mí plọn lẹ do gọalọna mẹdevo lẹ nado basi nudide he sọgbe lọ bosọ tẹdo e go.

 3. Etẹwẹ mí na gbadopọnna to hosọ ehe mẹ?

³ To hosọ ehe mẹ, mí na gbadopọnna kanbiọ ehelẹ: Etẹwẹ to sẹdotẹnmẹ na mẹhe nọ nọgodona gandudu Jiwheyẹwhe tọn lẹ? To alọ devo mẹ, etẹwẹ na jọ do mẹhe basi dide nado nọgodona gbekanlin vẹẹ ṣẹ́ṣẹ́ he yin zẹẹmẹ basina to owe Osọhia tọn mẹ lọ go lẹ?

 4. Pipli tẹwẹ apọsteli Johanu mọ he topọ hẹ Jesu to olọn mẹ?

⁴ To numimọ de mẹ, apọsteli Johanu mọ pipli awe delẹ he nọ nọgodona gandudu Jehovah tọn, bọ yé mọ dona ogbẹ̀ madopodo tọn yí. Sọha pipli tintan lọ tọn wẹ gbẹtọ 144 000. (Osọ. 7:4) Yé yin bibẹpli sọn aigba ji nado wleawuna gandudu kavi Ahọluduta de po Jesu po to olọn mẹ. To pọmẹ hẹ ewọ, yé na dugán do aigba ji. (Osọ. 5:9, 10; 14:3, 4) To numimọ lọ mẹ, Johanu mọ bọ yé to ote topọ hẹ Jesu to Osó Ziọni ji to olọn mẹ.—Osọ. 14:1.

 5. To madẹnmẹ, etẹwẹ na jọ do pipotọ gbẹtọ 144 000 lẹ tọn go?

⁵ Sọn owhe kanweko lẹ die, gbẹtọ fọtọ́n susu lẹ wẹ yin dide nado yin apadewhe gbẹtọ 144 000 lẹ tọn. (Luku 12:32; Lom. 8:17) Amọ́, Johanu yin didọna dọ omẹ pẹvi de to omẹ ehelẹ mẹ wẹ na pò togbẹ̀ to aigba ji to azán godo tọn lẹ mẹ. ‘Mẹhe pò’ ehelẹ na mọ “hiadonu” godo tọn yetọn, enẹ wẹ dohia nukundagbe Jehovah tọn yí whẹpo nukunbibia daho lọ nido gbajẹgbonu. (Osọ. 7:2, 3; 12:17) Enẹgodo, to ojlẹ de mẹ to nukunbibia daho lọ whenu, pipotọ gbẹtọ 144 000 lẹ tọn ehe na yin bibẹ sọyi olọn mẹ nado yì kọnawudopọ hẹ hagbẹ yetọn he ko hẹn nugbonọ-yinyin yetọn go kakajẹ okú lẹ. To finẹ, yé na lẹzun gandutọgbẹ́ Jesu tọn lẹ to Ahọluduta Jiwheyẹwhe tọn mẹ.—Mat. 24:31; Osọ. 5:9, 10.

6, 7. (a) Pipli tẹwẹ Johanu mọ bọdego, podọ etẹwẹ mí yọnẹn gando yé go? (b) Naegbọn pipotọ gbẹtọ 144 000 lẹ tọn po “gbẹtọ susugege” lọ po dona do ojlo to nuhe tin to Osọhia weta 7tọ mẹ lẹ mẹ?

⁶ To whenue Johanu ko mọ pipli olọn mẹ tọn lọ godo, e mọ “gbẹtọ susugege de.” To vogbingbọn mẹ na gbẹtọ 144 000 lẹ, yè ma gán hia pipli ehe uwọ. (Osọ. 7:9, 10) Etẹwẹ mí yọnẹn gando yé go? Johanu yin didọna dọmọ: “Omẹ ehelẹ wẹ jugbọn nukunbibia daho lọ mẹ, podọ yé ko yàn tewu yetọn lẹ bo ko hẹn yé zun wewe to ohùn Lẹngbọvu lọ tọn mẹ.” (Osọ. 7:14) To whenue yé ko lùn nukunbibia daho lọ tọ́n godo, “gbẹtọ susugege” ehe na nọ aigba ji fi bosọ duvivi dona jiawu lẹ tọn.—Salm. 37:9-11, 27-29; Howh. 2:21, 22; Osọ. 7:16, 17.

⁷ Vlavo mí yin dide nado yì olọn mẹ kavi nado gbọṣi aigba ji fi, be mí yise dọ mí na mọ hẹndi nuhe yin didọ to Osọhia weta 7tọ mẹ lẹ tọn ya? Nuhe mí dona wà niyẹn. Ojlẹ ayidego tọn nankọ die enẹ na yin na pipli devizọnwatọ Jiwheyẹwhe tọn awe ehe lẹpo! Ayajẹ mítọn na gọfla dọ mí basi dide nado nọgodona gandudu Jehovah tọn. Nudevo tẹwẹ owe Osọhia tọn dọna mí gando nukunbibia daho lọ go?—Mat. 24:21.

 8. Nawẹ nukunbibia daho lọ na bẹjẹeji gbọn, podọ nawẹ e na yinuwado suhugan gbẹtọvi lẹ tọn ji gbọn?

⁸ Dile hosọ he wayi dohia do, aṣẹpatọ aihọn ehe tọn lẹ na yangbé Babilọni Daho lọ tọn to madẹnmẹ, enẹ wẹ sinsẹ̀n lalo lẹpo to pọmẹ. (Osọ. 17:16, 17) Nujijọ ehe wẹ na yin bẹjẹeji nukunbibia daho lọ tọn. Be ehe na zọ́n bọ omẹ yọyọ susu na basi dide bo jẹ Jehovah sẹ̀n ji wẹ ya? Paali. Kakatimọ, owe Osọhia tọn weta 6tọ dohia dọ to ojlẹ vonọtaun enẹ mẹ, mẹhe ma to Jehovah sẹ̀n lẹ na dín hihọ́ to titobasinanu tonudidọ po ajọwiwa po tọn aihọn ehe tọn lẹ dè, ehe yin yiyijlẹdo osó lẹ go. Na omẹ enẹlẹ ma nọgodona Ahọluduta Jiwheyẹwhe tọn wutu, Jehovah na pọ́n yé hlan taidi kẹntọ lẹ.—Luku 11:23; Osọ. 6:15-17.

 9. Nawẹ omẹ Jehovah tọn lẹ na ze teninọ he gbọnvo de gbọn to nukunbibia daho lọ whenu, podọ etẹwẹ na jọ do yé go?

⁹ Na nugbo tọn, devizọnwatọ nugbonọ Jehovah tọn lẹ na ze teninọ he gbọnvo mlẹnmlẹn de to ojlẹ sinsinyẹn nukunbibia daho lọ tọn enẹ whenu. Yé na zindonukọn nado yin pipli gbẹtọvi tọn dopo gee lọ he to Jehovah Jiwheyẹwhe sẹ̀n to aigba ji bosọ nọ gbẹ́ nado nọgodona “gbekanlin lọ.” (Osọ. 13:14-17) Teninọ nujikudo tọn yetọn na fọ́n homẹgble sinsinyẹn mẹhe nọ diọnukunsọ Jehovah lẹ tọn dote. Taidi kọdetọn de, pipli akọta lẹ tọn de na yangbé omẹ Jiwheyẹwhe tọn lẹ tọn to aigba lọ blebu ji. Nuyiwa ehe wẹ Biblu ylọdọ mẹgbeyinyan Gọgi Magọgi tọn.—Ezek. 38:14-16.

10. Dile Osọhia 19:19-21 basi zẹẹmẹ etọn do, nawẹ Jehovah na yinuwa gbọn whenue kẹntọ lẹ na yangbé omẹ etọn lẹ tọn?

¹⁰ Nawẹ Jehovah na yinuwa gando mẹgbeyinyan ylankan ehe go gbọn? E dọna mí dọmọ: “Yẹn na biọ adi sinsinyẹn mẹ.” (Ezek. 38:18, 21-23) Osọhia weta 19tọ basi zẹẹmẹ nuhe jọ bọdego tọn. Jehovah do Visunnu Etọn hlan nado yiavùnlọna omẹ Etọn lẹ, bo và kẹntọ yetọn lẹ sudo. “Awhànpa he to olọn mẹ lẹ,” enẹ wẹ angẹli nugbonọ lẹ to pọmẹ hẹ gbẹtọ 144 000 lẹ na kọnawudopọ hẹ Jesu to avùnhiho ehe mẹ. (Osọ. 17:14; 19:11-15) Etẹwẹ na yin kọdetọn awhàn ehe tọn? Gbẹtọvi gọna titobasinanu he nọ diọnukunsọ Jehovah lẹpo na yin vivasudo mlẹnmlẹn!—Hia Osọhia 19:19-21.

11. Nujijọ vonọtaun tẹwẹ na wá aimẹ whenue owe Osọhia tọn na mọ hẹndi daho hugan etọn?

¹¹ Saa yí nukun homẹ tọn do pọ́n lehe e na ṣí na gbẹtọvi nugbonọ he to aigba ji lẹ nado lùn vasudo mlẹnmlẹn he na wá kẹntọ Jiwheyẹwhe tọn lẹ ji lọ tọ́n! Ojlẹ aglinjijẹ tọn nankọ die enẹ na yin! Dile etlẹ yindọ awhágbe ayajẹ tọn lẹ na yin dido to olọn mẹ whenue Babilọni Daho lọ na yin vivasudo, nudevo nasọ hẹn ayajẹ wá humọ. (Osọ. 19:1-3) Na nugbo tọn, nujijọ enẹ wẹ hẹndi daho hugan owe Osọhia tọn lọ tọn, enẹ wẹ “alọwle Lẹngbọvu lọ tọn.”—Osọ. 19:6-9.

12. Dile Osọhia 21:1, 2 dohia do, whetẹnu wẹ alọwle Lẹngbọvu lọ tọn na wá aimẹ?

¹² Whetẹnu wẹ alọwle lọ na wá aimẹ? Ojlẹ kleun de whẹpo awhàn Amagẹdọni tọn nido yin fùnfùn, gbẹtọ 144 000 lẹpo na ko yì olọn mẹ. Amọ́, e ma yin ojlẹ enẹ mẹ wẹ alọwle Lẹngbọvu lọ tọn na wá aimẹ te. (Hia Osọhia 21:1, 2.) Alọwle Lẹngbọvu lọ tọn na wá aimẹ to whenue awhàn Amagẹdọni tọn na ko yin fùnfùn bọ kẹntọ Jiwheyẹwhe tọn lẹpo na ko yin didesẹ godo.—Salm. 45:3, 4, 13-17.

13. Etẹwẹ alọwle Lẹngbọvu lọ tọn na zẹẹmẹdo taun na mẹhe go e gando lẹ?

¹³ Na taun tọn, etẹwẹ alọwle Lẹngbọvu lọ tọn na zẹẹmẹdo na mẹhe go e gando lẹ? Kẹdẹdile alọwle de nọ kọ̀n sunnu de po yọnnu de po dopọ do, alọwle yẹhiadonu tọn ehe na kọ̀n Ahọlu lọ Jesu Klisti po “asiyọyọ” etọn, yèdọ gbẹtọ 144 000 lẹ po dopọ. Bẹsọn nujijọ ayidego tọn enẹ ji, Jesu po gbẹtọ 144 000 lẹ po na bẹ gandudu yetọn do aigba lọ ji jẹeji na owhe 1 000.—Osọ. 20:6.

14, 15. Etẹ go wẹ Osọhia weta 21tọ yí gbẹtọ 144 000 lọ lẹ jlẹdo? (Pọ́n yẹdide he to wepa ji.)

¹⁴ Enẹgodo, Osọhia weta 21tọ yí gbẹtọ 144 000 lẹ jlẹdo tòdaho he yọnwhanpẹ tlala de go, ehe yin yiylọdọ “Jelusalẹm Yọyọ.” (Osọ. 21:2, 9) Tòdaho ehe tindo zannu dodonu tọn 12 delẹ he ji “oyín 12 apọsteli 12 Lẹngbọvu lọ tọn lẹ tọn” yin kinkan do. Naegbọn ehe do dọ̀n ayidonugo Johanu tọn? Na e mọdọ yinkọ emitọn yin kinkan do dopo to zannu lọ lẹ go wutu wẹ. Lẹblanulọkẹyi mayọnjlẹ nankọ die!—Osọ. 21:10-14; Efe. 2:20.

¹⁵ Tòdaho yẹhiadonu tọn ehe ma pé awe. Sika akú wẹ yè do wleawuna alihogbó etọn, e tindo họngbo peali tọn 12, zannu akuẹgegenu tọn lẹ wẹ yè do doaṣọ́na adó po dodonu etọn lẹ po, podọ tòdaho lọ sọzẹn to adà etọn ẹnẹ lẹ mẹ. (Osọ. 21:15-21) Etomọṣo, e taidi dọ nude gbẹ́ to whiwhè! Nuhe Johanu dọna mí bọdego die: “Yẹn masọ mọ tẹmpli de to e mẹ, na Jehovah Jiwheyẹwhe Ganhunupotọ lọ po Lẹngbọvu lọ po wẹ tẹmpli etọn. Tòdaho lọ masọ tindo nuhudo owhè tọn kavi osun tọn nado họ́n do e ji, na gigo Jiwheyẹwhe tọn wẹ to hinhọ́n na ẹn, podọ miyọ́ngbán etọn wẹ Lẹngbọvu lọ.” (Osọ. 21:22, 23) Mẹhe yin apadewhe Jelusalẹm Yọyọ lọ tọn lẹ na topọ hẹ Jehovah tlọlọ. (Heb. 7:27; Osọ. 22:3, 4) Enẹwutu, Jehovah po Jesu po wẹ yin tẹmpli tòdaho enẹ tọn.

16. Dona tẹlẹ wẹ gbẹtọvi lẹ na duvivi etọn to Gandudu Owhe Fọtọ́n tọn Ahọluduta Jiwheyẹwhe tọn whenu?

¹⁶ Homẹhunnu daho wẹ e yin na mẹyiamisisadode lẹ nado lẹnnupọndo tòdaho ehe ji. Amọ́, mẹhe tindo todido aigba ji tọn lẹ lọsu do whẹwhinwhẹ́n lẹ nado do ojlo to e mẹ. To Gandudu Owhe Fọtọ́n tọn Ahọluduta Jiwheyẹwhe tọn whenu, Jelusalẹm Yọyọ lọ na hẹn dona madosọha lẹ wá. Johanu mọ bọ dona ehelẹ to sisà taidi “tọ̀sisa osin ogbẹ̀ tọn de.” Podọ, to adà awe tọ̀sisa lọ tọn lẹ ji wẹ “atin ogbẹ̀ tọn lẹ” tin te, bọ amà yetọn lẹ tin “na azọ̀nhẹngbọ akọta lẹ tọn.” (Osọ. 22:1, 2) Gbẹtọ he togbẹ̀ to ojlẹ enẹ mẹ lẹpo na tindo dotẹnmẹ hundote lọ nado mọaleyi sọn awuwledainanu ehelẹ mẹ. Vudevude, gbẹtọvi tonusetọ lẹpo na yin hinhẹn jẹ pipé kọ̀n. Awutu, awufiẹsa, po dasin po ma nasọ tin ba.—Osọ. 21:3-5.

17. Dile Osọhia 20:11-13 dohia do, mẹnu lẹ wẹ na mọaleyi sọn Gandudu Owhe Fọtọ́n tọn lọ mẹ?

¹⁷ Mẹnu lẹ wẹ na mọaleyi sọn awuwledainanu jiawu enẹlẹ mẹ? Jẹnukọn whẹ́, gbẹtọ susugege he na lùn Amagẹdọni tọ́n lẹ wẹ, to pọmẹ hẹ ovi he gán wá yin jiji to aihọn yọyọ lọ mẹ lẹ. Amọ́, Osọhia weta 20tọ sọ dopà dọ oṣiọ lẹ na yin finfọnsọnku. (Hia Osọhia 20:11-13.) Gbẹtọ “dodonọ” he kú wayi lẹ to pọmẹ hẹ “mawadodonọ” lẹ, yèdọ mẹhe ma mọ dotẹnmẹ lọ nado plọnnu gando Jehovah go lẹ, yemẹpo na gọwá nọgbẹ̀ to aigba ji fi. (Owalọ 24:15; Joh. 5:28, 29) Be ehe zẹẹmẹdo dọ mẹlẹpo na yin finfọnsọnku nado wá nọgbẹ̀ to aigba ji to Gandudu Owhe Fọtọ́n tọn lọ whenu wẹ ya? Lala. Mẹhe desọn ojlo mẹ bo gbẹ́ dotẹnmẹ lọ dai nado sẹ̀n Jehovah jẹnukọnna okú yetọn lẹ ma na yin finfọ́n wá ogbẹ̀. Yé ko tindo dotẹnmẹ lọ nado plọnnu gandego, amọ́ yé dohia dọ emi ma jẹ nado nọgbẹ̀ to Paladisi aigba ji tọn lọ mẹ.—Mat. 25:46; 2 Tẹs. 1:9; Osọ. 17:8; 20:15.

18. Nawẹ ninọmẹ nulẹ tọn na te do to aigba ji to vivọnu owhe 1 000 lọ tọn?

¹⁸ To vivọnu owhe 1 000 lọ tọn, mẹhe to gbẹnọ to aigba ji lẹpo na ko yin hinhẹn jẹ pipé kọ̀n. Ylando he gbẹtọvi lẹ dugu etọn sọn Adam si lọ ma nasọ dohuhlọn do mẹhe to gbẹnọ to ojlẹ enẹ mẹ depope ji ba. (Lom. 5:12) Dẹ̀hodo he ylando Adam tọn hẹnwa mí ji lọ na ko yin didesẹ mlẹnmlẹn. Gbọnmọ dali, mẹhe to aigba ji lẹ na “gọwá ogbẹ̀” taidi gbẹtọvi pipé lẹ to vivọnu owhe 1 000 lọ tọn.—Osọ. 20:5.

19. Naegbọn e do biọ dọ mẹtẹnpọn godo tọn de ni wá aimẹ?

¹⁹ Mí yọnẹn dọ Jesu hẹn nugbonọ-yinyin etọn na Jiwheyẹwhe go etlẹ yin to whenue Satani whlé e pọ́n. Amọ́, be gbẹtọvi pipé lẹpo na wleawufo nado wà nudopolọ to whenue dotẹnmẹ lọ na hundote na Satani nado whlé yé pọ́n ya? Dopodopo mítọn na penugo nado na gblọndo kanbiọ ehe tọn na ede whenue Satani na yin tuntundote sọn odò mapote lọ mẹ to vivọnu owhe 1 000 lọ tọn. (Osọ. 20:7) Mẹhe na yin nugbonọ to mẹtẹnpọn godo tọn ehe whenu lẹ, na mọ ahọsumẹ ogbẹ̀ madopodo tọn yí bo na duvivi mẹdekannujẹ nujọnu tọn lọ tọn to godo mẹ. (Lom. 8:21) Mẹhe na ṣiatẹ lẹ na yin vivasudo kakadoi to pọmẹ hẹ Lẹgba po aovi etọn lẹ po.—Osọ. 20:8-10.

20. Numọtolanmẹ tẹwẹ a tindo gando dọdai ojlofọndotenamẹ tọn he to owe Osọhia tọn mẹ lẹ go?

²⁰ Etẹwẹ yin numọtolanmẹ towe to dogbapọn kleun owe Osọhia tọn ehe tọn godo? Be e ma yin awuvivinu nado mọ dewe to hẹndi dọdai jiawu ehelẹ tọn mẹ ya? Ayihaawe ma tin dọ ehe whàn we nado basi oylọna mẹdevo lẹ nado wá kọnawudopọ hẹ mí to sinsẹ̀n-bibasi wiwe-ṣeke Jiwheyẹwhe mítọn tọn mẹ. (Osọ. 22:17) Todin he mí ko gbadopọnna nujijọ ojlofọndotenamẹ tọn he na wá aimẹ to sọgodo ehelẹ, homẹ mítọn hùn tlala, podọ mí sọ jlo nado dọ taidi apọsteli Johanu dọmọ: “Niṣẹ! Wá, Oklunọ Jesu.”—Osọ. 22:20.