Kanbiọ lẹ sọn Wehiatọ lẹ Dè

Na mí ma nọ sà zinjẹgbonu sinai do Biblu ji mítọn lẹ wutu, mẹdelẹ nọ lẹndọ e sọgbe nado basi vọkan yetọn bo ze yé do nọtẹn Intẹnẹt tọn devo lẹ kavi nọtẹn Intẹnẹt tọn he tin na hodọdopọ lẹ ji. Ṣigba, mọwiwà nọ gbà Osẹ́n Nọtẹn lọ Tọn lẹa he tin na nọtẹn Intẹnẹt tọn mítọn voovo lẹ, podọ enẹ ko hẹn nuhahun sinsinyẹn lẹ wá. Dile Osẹ́n Nọtẹn lọ Tọn lẹ dohia do, yè ma nagbè mẹdepope nado nọ “bẹ nuhe e (nọtẹn ehe) bẹhẹn lẹ do Intẹnẹt ji (yèdọ nọtẹn Intẹnẹt ji tọn depope, nọtẹn nudọnamẹ mimá tọn, kavi nọtẹn gbẹdido Intẹnẹt ji tọn).” Naegbọn osẹ́n ehe do yin dido?

Mí tindo jlọjẹ do nuhe to nọtẹn Intẹnẹt tọn mítọn lẹ ji lẹpo ji. Atẹṣitọ lẹ po nukundiọsọmẹtọ lẹ po nọ tẹnpọn nado yí zinjẹgbonu mítọn lẹ zan to nọtẹn Intẹnẹt tọn yetọn lẹ ji nado doyẹklọ Kunnudetọ lẹ po mẹdevo lẹ po. Lẹndai nọtẹn yetọn lẹ tọn wẹ nado fọ́n ayihaawe dote to ahun wehiatọ lẹ tọn mẹ. (Salm. 26:4; Howh. 22:5) Mẹdevo lẹ ko yí nudọnamẹ he to zinjẹgbonu mítọn lẹ mẹ lẹ kavi ohia jw.org tọn mítọn zan to ajọjijla lẹ mẹ, to ajọnu yetọn lẹ ji, podọ to tito ọdinatẹẹ ji tọn lẹ ji. Na mí ko mọ jlọjẹ yí nado basi hihọ́na nuhe tin to nọtẹn mítọn ji lẹ po ohia nọtẹn lọ tọn po wutu, mí tindo aṣẹ to osẹ́n-liho nado glọnalina yizan agọ̀ mọnkọtọn. (Howh. 27:12) Ṣigba, eyin mílọsu na dotẹnmẹ mẹdevo lẹ etlẹ yin mẹmẹsunnu mítọn lẹ nado nọ ze nudọnamẹ Intẹnẹt ji tọn mítọn lẹ do nọtẹn devo lẹ ji kavi nado nọ yí ohia jw.org tọn lọ zan nado sà ajọnu yetọn lẹ, whẹdatẹn lẹ ma sọgan sọ nọgodona vivẹnudido mítọn lẹ nado glọnalina nukundiọsọmẹtọ lẹ po ajọwhé lẹ po ba.

Zinjẹgbonu mítọn lẹ yíyí sọn nọtẹn devo ji gbọnvona jw.org sọgan yin owùnu. “Afanumẹ nugbonọ podọ nuyọnẹntọ lọ” kẹdẹ wẹ Jehovah deazọ́nna nado nọ wleawuna núdùdù gbigbọmẹ tọn. (Mat. 24:45) Nọtẹn Intẹnẹt tọn “afanumẹ” lọ tọn he yin alọkẹyi sọgbe hẹ osẹ́n lẹ kẹdẹ gblamẹ wẹ e nọ zín núdùdù gbigbọmẹ tọn lọ jẹgbonu gbọn—enẹ wẹ www.jw.org, tv.jw.org, po wol.jw.org po. Podọ tito ọdinatẹẹ ji tọn atọ̀n wẹ mí tindo—enẹ wẹ JW Language^®, JW Library^® po JW Library Sign Language^® po. Mí sọgan deji dọ awuwledainanu ehelẹ ma bẹ ajọjijla kavi hẹnflu aihọn Satani tọn depope hẹn. Eyin núdùdù gbigbọmẹ tọn lọ wá sọn asisa devo lẹ mẹ, e yọnbasi taun dọ e na ko yin didiọ kavi yin hinhẹnflu.—Salm. 18:26; 19:8.

Humọ, zinjẹgbonu mítọn lẹ zizedo nọtẹn Intẹnẹt tọn he ji mẹlẹ sọgan dọ nuhe yé lẹn gando yé go te lẹ nọ hùn dotẹnmẹ dote na atẹṣitọ po homọdọdonugotọ devo lẹ po nado fọ́n ayihaawe dote gando titobasinanu Jehovah tọn go. Mẹmẹsunnu delẹ ko yin yẹdoklọ biọ hodọdopọ Intẹnẹt ji tọn lẹ mẹ, bo ko gbọnmọ dali hẹn vlẹko wá oyín Jehovah tọn ji dogọ. Nọtẹn Intẹnẹt tọn he ji mẹlẹ nọ má nudọnamẹ lẹ te lẹ ma yin ofi dagbe de nado “yí walọmimiọn do plọn mẹhe ma tindo ayilinlẹn dagbe lẹ.” (2 Tim. 2:23-25; 1 Tim. 6:3-5) E ko sọ yin ayidego dọ nọtẹn gbẹdido Intẹnẹt ji tọn oklọ tọn lẹ kavi nọtẹn Intẹnẹt tọn paa lẹ ko yin awuwlena do yinkọ titobasinanu lọ, Hagbẹ Anademẹtọ lọ, po mẹmẹsunnu he tin to Hagbẹ Anademẹtọ lọ mẹ lẹ po tọn mẹ. Ṣigba, depope to mẹmẹsunnu ehelẹ mẹ ma tindo adà nọtẹn Intẹnẹt ji tọn mẹdetiti tọn de kavi nọ yí nọtẹn gbẹdido Intẹnẹt ji tọn depope zan gba.

Anadidena gbẹtọ lẹ yì jw.org ji nọ gọalọ nado hẹn “wẹndagbe” lọ gbayipe. (Mat. 24:14) Tito ọdinatẹẹ ji tọn he mí nọ zan to lizọnyizọn mítọn mẹ lẹ fọ́n bo to yinyin hinhẹn pọnte. Mí jlo dọ mẹlẹpo ni duvivi yetọn. Enẹwutu, dile Osẹ́n Nọtẹn lọ Tọn lẹ dohia do, a sọgan do vọkan zinjẹgbonu de tọn kavi alọdlẹndonu nuhe tin to jw.org ji tọn de hlan mẹde gbọn Intẹnẹt ji. Gbọn anadidena jlodotọ lẹ hlan nọtẹn Intẹnẹt tọn mítọn he yin alọkẹyi lẹ ji dali, mí nọ deanana yé hlan asisa núdùdù gbigbọmẹ tọn nugbo dopo gee lọ kọ̀n, enẹ wẹ “afanumẹ nugbonọ podọ nuyọnẹntọ lọ.”