Ojijẹ lọ Sù Taun!

JESU dọ dọdai dọ hodotọ emitọn lẹ na duvivi ojijẹ he sù taun de tọn to ojlẹ opodo tọn ehe mẹ. (Mat. 9:37; 24:14) Pọ́n lehe hogbe etọn lẹ yin nugbo to aliho vonọtaun de mẹ do to awà Transcarpatie tọn de ji to Ukraine. To lẹdo enẹ mẹ, agun 50 he bẹ wẹnlatọ hugan 5 400 plipli hẹn wẹ tin to tòpẹvi atọ̀n delẹ he sẹpọ yede mẹ.a Na nugbo tọn, mado-ẹnẹ mẹhe nọ nọ̀ tòpẹvi atọ̀n enẹlẹ mẹ lẹ tọn wẹ yin Kunnudetọ Jehovah tọn!

Nawẹ gbẹtọ lẹ nọ yinuwa gbọn to aigba-denamẹ lọ ji? Vasile he yin mẹmẹsunnu lẹdo lọ tọn de dọmọ: “Tofi, mẹlẹ nọ na sisi Biblu, yiwanna whẹdida dodo, tindo haṣinṣan whẹndo tọn he lodo, bosọ nọ tẹnpọn nado gọalọna ode awetọ po ahundopo po.” E yidogọ dọmọ: “Yé ma nọ kẹalọyi nuyise mítọn lẹ to whelẹponu. Amọ́, eyin a do nude hia yé sọn Biblu mẹ, yé nọ dotoai po sọwhiwhe po.”

Na nugbo tọn, mẹmẹsunnu mítọn lẹ nọ pehẹ avùnnukundiọsọmẹnu vonọtaun delẹ dile yé to yẹwhehodọ to lẹdo he mẹ wẹnlatọ sù te ehe mẹ. Di apajlẹ, agun dopo tindo wẹnlatọ 134, amọ́ owhé 50 poun wẹ to aigba-denamẹ lọ ji! Nawẹ wẹnlatọ lẹ diọada sọgbe hẹ ninọmẹ ehe gbọn?

Mẹmẹsunnu po mẹmẹyọnnu susu lẹ po nọ yí yede zan nado yì dọyẹwheho to fie nuhudo sù te lẹ. Mẹmẹsunnu Ionash he ko tindo owhe 90 dọmọ: “Eyin yè má do zẹnzẹn, owhé 1 jẹ 2 wẹ wẹnlatọ dopo nọ dlapọn to aigba-denamẹ agun mítọn tọn ji. N’nọ yì dọyẹwheho to glètoho lẹ mẹ, podọ whẹpo n’do bẹ manọna de to agọe, n’zingbejizọnlin na nudi kilomẹtlu 160 yì aigba he ma yin didenamẹ de ji bo dọyẹwheho to Hongrie-gbè mẹ.” Wẹnlatọ lẹ dona nọ basi avọ́sinsan susu nado yì gọalọ to aigba-denamẹ devo lẹ ji. Ionash dọmọ: “Nado sọgbe do gànmẹ na pinpán, n’nọ fọ́n to ogàn 4 mẹ afọnnu bo nọ yì dọyẹwheho kakajẹ ogàn 6 mẹ whèjai, whenue pinpán lọ nọ lẹkọ jei lẹdo ṣie mẹ. N’nọ wàmọ whla awe kavi atọ̀n to sẹmẹsẹmẹ.” Be e wá mọdọ vivẹnudido emitọn lẹ hẹn ale wá ya? E dọmọ: “Lizọnyizọn ehe hẹn ayajẹ daho wá na mi. E vivi na mi taun dọ n’gọalọna whẹndo he to lẹdo he to olá de mẹ nado yọ́n nugbo lọ.”

E họnwun dọ e ma yin mẹhe to agun lẹdo ehe tọn mẹ lẹpo wẹ na penugo nado zingbejizọnlin yì fidindẹn lẹ. Etomọṣo, mímẹpo, kakajẹ wẹnlatọ mẹhomẹ lẹ ji, wẹ nọ dovivẹnu nado wazọ́n to aigba-denamẹ agun lọ tọn ji to gigọ́ mẹ. Taidi kọdetọn de, to 2017, mẹhe wá Oflin to tòpẹvi atọ̀n lọ lẹ mẹ diblayi sọha wẹnlatọ lẹ tọn donù awe—kavi mado-awe sọha gbẹtọ lẹ tọn to tòpẹvi lọ lẹ mẹ. Matin ayihaawe, mí gbẹ́ tindo “nususu nado wà to azọ́n Oklunọ tọn mẹ,” mahopọnna fidepope he mí to sinsẹ̀n te.—1 Kọl. 15:58.