Aliho He mẹ Hiẹ Sọgan Hẹn Lizọnyizọn Towe Gblodeji te Lẹ

TO WHENUE ojlẹ lọ wá na Jesu nado do devi etọn lẹ hlan taidi yẹwhehodọtọ Ahọluduta lọ tọn lẹ, e dọna yé dọmọ: “Ojijẹ lọ sù, ṣigba azọ́nwatọ lẹ ma sù.” Azọ́n he dona yin wiwà sù taun, enẹwutu e yidogọ dọmọ: “Mì vẹ̀ Ogán jibẹwawhé lọ tọn nado do azọ́nwatọ lẹ hlan ojijẹ etọn mẹ.” (Mat. 9:37, 38) Jesu dọna devi lẹ lehe yé na wà lizọnyizọn yetọn do. Hogbe etọn lẹ dohia dọ azọ́n niyaniya tọn de wẹ. E dọmọ: “Mìwlẹ ma to na gbọn tòdaho Islaeli tọn lẹpo mẹ lẹdo pé to aliho depope mẹ whẹpo Visunnu gbẹtọ tọn nido wá.”—Mat. 10:23.

² Mọdopolọ to egbehe, azọ́n sù taun to lizọnyizọn lọ mẹ. Yẹwheho wẹndagbe Ahọluduta lọ tọn ehe dona yin didọ whẹpo opodo lọ nido wá, opodo lọ ka to unklẹn ja! (Malku 13:10) To whenuena e yindọ aihọn ehe wẹ ogle lọ, ninọmẹ he nkọtọn Jesu po devi etọn lẹ po pehẹ to whenẹnu wẹ mílọsu pannukọn, ṣigba to obá he gblo taun de mẹ. Sọha mítọn whè taun eyin mí yí i jlẹdo gbẹtọvi liva susu he to aihọn lọ mẹ lẹ go, ṣigba mí sọgan deji dọ Jehovah na gọalọna mí. Wẹndagbe Ahọluduta lọ tọn na yin lilá gbọn aigba lẹpo ji, podọ opodo lọ na wá to ojlẹ dide Jehovah tọn mẹ. Be mí na ze Ahọluduta Jiwheyẹwhe tọn do otẹn tintan mẹ to gbẹzan mítọn mẹ nado sọgan hẹn lizọnyizọn mítọn di to gigọ́ mẹ ya? Nado sọgan wà ehe, yanwle yẹwhehọluduta tọn tẹlẹ wẹ mí sọgan doafọna?

³ Nado do nuhe Jehovah to bibiọ to devizọnwatọ klandowiwe Etọn lẹ si hia, Jesu dọmọ: “Hiẹ dona yí ahun towe lẹpo, alindọn towe lẹpo, ayiha towe lẹpo, podọ huhlọn towe lẹpo do yiwanna Jehovah Jiwheyẹwhe towe.” (Malku 12:30) Jiwheyẹwhe biọ to mí si nado yí ahun mítọn lẹpo do wà sinsẹ̀nzọn hlan ẹn. Ehe zẹẹmẹdo dọ mí dona do lehe mẹdezejo mítọn siso sọ podọ lehe klandowiwe mítọn yin ahundopo tọn sọ hia gbọn nuhe go mí pé lẹpo wiwà to sinsẹ̀nzọn Jehovah tọn mẹ dali. (2 Tim. 2:15) Dotẹnmẹ lẹ hundote na dopodopo mítọn, sọgbe hẹ ninọmẹ po nugopipe dopodopo mítọn lẹ tọn po. Gbadopọnna delẹ to dotẹnmẹ hundote lọ lẹ mẹ, bo de yanwle yẹwhehọluduta tọn lẹ he hiẹ na doafọna nado hẹn lizọnyizọn towe di.

⁴ Mẹhe kẹalọyi nugbo lọ lẹpo wẹ tindo lẹblanulọkẹyi nado lá wẹndagbe lọ. Ehe wẹ yin azọ́n titengbe lọ he Jesu dena devi etọn lẹ nado wà. (Mat. 24:14; 28:19, 20) Tlolo he devi Jesu Klisti tọn de sè wẹndagbe lọ wẹ e nọ saba jẹ didọ ẹ na mẹdevo lẹ ji. Nuhe Andle, Filipi, Kọneliọsi po mẹdevo lẹ po wà niyẹn. (Joh. 1:40, 41, 43-45; Owalọ 10:1, 2, 24; 16:14, 15, 25-34) Be ehe dohia dọ mẹde sọgan jẹ wẹndagbe lọ lá na mẹdevo lẹ ji whẹpo do yí baptẹm wẹ ya? Mọwẹ! Tlolo he mẹde pegan taidi wẹnlatọ he ma ko yí baptẹm de to agun mẹ, dotẹnmẹ nọ hundote na ẹn nado tindo mahẹ to kunnudide sọn whédegbè jẹ whédegbè mẹ. Humọ, sọgbe hẹ nugopipe po ninọmẹ etọn lẹ po, e sọgan tindo mahẹ to adà lizọnyizọn lọ tọn devo lẹ mẹ.

⁵ Matin ayihaawe, to whenue wẹnlatọ de yí baptẹm godo, ewọ nọ tindo ojlo nado wà nuhe go e pé lẹpo nado gọalọna mẹdevo lẹ nado sè wẹndagbe lọ. Sunnu po yọnnu po wẹ nọ tindo lẹblanulọkẹyi lọ nado tindo mahẹ to azọ́n yẹwhehodidọ tọn mẹ. Mí nọ yin didona, eyin etlẹ yindọ mahẹ pẹvide wẹ mí tindo to nukọnyiyi azọ́n Ahọluduta Jiwheyẹwhe tọn mẹ. Na nugbo tọn, mẹdepope he sọgan hẹn lizọnyizọn etọn gblodeji bo tindo mahẹ to adà voovo sinsẹ̀nzọn lọ tọn mẹ na yin ayajẹnọ.

⁶ E sọgan yindọ aigba-denamẹ agun he mẹ a te tọn nọ yin azọ́nwadeji gbọzangbọzan bọ yẹwheho nọ yin didọ to e ji ganji. Eyin mọ wẹ, hiẹ sọgan mọdọ emi sọgan hẹn lizọnyizọn emitọn gblodeji gbọn tẹnsisẹ dali nado yì lẹdo he mẹ nuhudo sù te to ogle lọ ji. (Owalọ 16:9) Eyin mẹho kavi devizọnwatọ lizọnyizọnwiwa tọn de wẹ hiẹ yin todin, vlavo agun devo sọgan tindo nuhudo alọgọ towe tọn hugan. Nugopọntọ lẹdo tọn mìtọn sọgan tindo ayinamẹ lẹ gando lehe hiẹ sọgan gọalọna agun devo to lẹdo lọ mẹ do go. Eyin hiẹ jlo nado yì sẹ̀n to awà devo ji to otò towe mẹ, wekantẹn alahọ tọn sọgan na we nudọnamẹ he na gọalọna we lẹ.

⁷ Be hiẹ na jlo nado sẹ̀n to tògodo wẹ ya? Eyin mọ wẹ, be hiẹ dona yí sọwhiwhe do lẹnnupọndo tẹnsisẹ mọnkọtọn ji. Hiẹ sọgan dọhodo nudide enẹ ji hẹ mẹho agun towe tọn lẹ. Na diọdo daho de wẹ e na yin na hiẹ po mẹhe hodo we yì lẹ po. (Luku 14:28) Amọ́, eyin hiẹ ma to linlẹn nado nọ otò lọ mẹ dẹn, e na pọnte hugan dọ hiẹ ni lẹnnupọndo sinsẹ̀n to otò towe titi mẹ ji.

⁸ To otò delẹ mẹ, mẹmẹsunnu he yin mẹyọyọ to nugbo mẹ lẹ wẹ nọ yin yiyizan nado penukundo azọngban lẹ go. Mẹmẹsunnu agun lọ mẹ tọn he yin whiwhẹnọ lẹ nọ jlo dọ mẹho numimọnọ he sẹtẹn wá agun lọ mẹ lẹ ni didá azọngban anadenanu tọn lẹ. Eyin mẹho de wẹ hiẹ bọ a to nulẹnpọn do tẹnsisẹ yì otò mọnkọtọn de mẹ ji, hẹn do ayiha mẹ dọ yanwle towe ma yin nado yì hò otẹn mẹmẹsunnu he to agun lọ mẹ lẹ tọn yí gba. Kakatimọ, wazọ́n dopọ hẹ yé. Na tuli yé nado dovivẹnu dogọ, na yé nido kẹalọyi azọngban lẹ to agun mẹ. (1 Tim. 3:1) Eyin nulẹ ma nọ yin wiwà dile yé nọ yin wiwà do to agun he mẹ a sẹtẹn sọn, yin sọwhiwhenọ. Yí numimọ towe taidi mẹho de zan nado yin alọgọ nujọnu tọn de na mẹmẹsunnu lọ lẹ. Enẹ na zọ́n bọ eyin e wá biọ dọ hiẹ ni jo yé do bo lẹkọyi otò towe mẹ, mẹho agun lọ mẹ tọn lẹ na ko pegan nado didá azọngban agun tọn lẹ.

⁹ Whẹpo wekantẹn alahọ tọn sọgan na we yinkọ agun he a sọgan gọalọna lẹ tọn, Wedegbẹ́ Sinsẹ̀nzọn agun towe tọn dona wlan wekanhlanmẹ mẹdohia tọn de hlan whẹ́. Wekanhlanmẹ ehe dona yin didohlan vlavo hiẹ to devizọnwa taidi mẹho agun tọn, devizọnwatọ lizọnyizọnwiwa tọn, gbehosọnalitọ, kavi wẹnlatọ de. Wedegbẹ́ sinsẹ̀nzọn tọn na yí wekanhlanmẹ mẹdohia tọn de po obiọ towe po hlan wekantẹn alahọ otò he mẹ hiẹ jlo na yì sẹ̀n te lọ tọn tlọlọ.

¹⁰ Nado hẹn lizọnyizọn towe gblodeji, vlavo hiẹ sọgan lẹnnupọndo jonọgbè pinplọn ji, gọna tókunọ-gbè. Eyin hiẹ tindo yanwle lọ nado plọn jonọgbè nado nọ dọyẹwheho to ogbè lọ mẹ, dọho hẹ mẹho agun tọn lẹ po nugopọntọ lẹdo tọn po. Yé sọgan na we ayinamẹ lẹ po tuli he a tindo nuhudo etọn po. To anademẹ wekantẹn alahọ tọn glọ, lẹdo delẹ ko basi titona klasi ogbè pinplọn tọn lẹ nado plọn wẹnlatọ nugopetọ lẹ po gbehosọnalitọ lẹ po nado nọ dọyẹwheho to jonọgbè mẹ.

¹¹ Wẹnlatọ lẹpo dona jẹakọ hẹ nubiọtomẹsi paa lẹ na sinsẹ̀nzọn gbehosọnalitọ alọgọtọ tọn, whepoponu tọn po titengbe tọn po gọna adà sinsẹ̀nzọn whenu-gigọ́ tọn devo lẹ. Gbehosọnalitọ de dona yin Klistiani he ko yí baptẹm bo yin apajlẹ dagbenọ de he ninọmẹ etọn lẹ na ẹn dotẹnmẹ nado yí gànmẹ sọha he yin bibiọ lọ zan nado dọyẹwheho wẹndagbe lọ tọn. Wedegbẹ́ Sinsẹ̀nzọn tọn wẹ nọ kẹalọyi alọdowemẹwe gbehosọnalitọ alọgọtọ tọn po whepoponu po tọn lẹ bo nọ de yé, ṣigba wekantẹn alahọ tọn wẹ nọ de gbehosọnalitọ titengbe lẹ.

¹² Gbehosọnalitọ alọgọtọ tọn lẹ sọgan yin dide e whè gbau na osun dopo, kavi humọ, kavi na ojlẹ dindẹn de sọgbe hẹ ninọmẹ yetọn. Wẹnlatọ Ahọluduta lọ tọn susu nọ duvivi gbehosọnalitọ alọgọtọ tọn bibasi tọn to ojlẹ vonọtaun lẹ mẹ, taidi to ojlẹ Oflin tọn whenu kavi to osun dlapọn nugopọntọ lẹdo tọn tọn mẹ. Mẹdevo lẹ nọ de osun gbọjẹ tọn lẹ. Wehọmẹvi he yin wẹnlatọ he ko yí baptẹm lẹ sọgan jlo nado ze yinkọ dai taidi gbehosọnalitọ alọgọtọ tọn to whenue yé yí gbọjẹ to wehọmẹ. Wẹnlatọ lẹ sọgan de nado basi gbehosọnalitọ alọgọtọ tọn po yanwle gànmẹ he yin didepo tọn po to osun mars po avril po tọn mẹ podọ to osun dlapọn nugopọntọ lẹdo tọn mẹ. Ninọmẹ depope he mẹ hiẹ te, eyin a ko gbẹ́ tindo teninọ dagbe bo tindo walọ wiwe, bosọ sọgan basi tito nado jẹ nubiọtomẹsi gànmẹ tọn lọ kọ̀n, bo mọdọ a sọgan basi gbehosọnalitọ alọgọtọ tọn na osun dopo kavi humọ, mẹho agun tọn lẹ na hùnhomẹ nado lẹnnupọndo alọdowemẹwe towe ji na lẹblanulọkẹyi sinsẹ̀nzọn tọn ehe.

¹³ Nado pegan taidi gbehosọnalitọ whepoponu tọn, hiẹ dona penugo nado jẹ nubiọtomẹsi gànmẹ whemẹwhemẹ tọn lọ kọ̀n. Taidi gbehosọnalitọ whepoponu tọn de, hiẹ dona nọ wazọ́n to kọndopọ mẹ pẹkipẹki hẹ agun towe. Gbehosọnalitọ zohunhunnọ lẹ nọ yin dona de na agun lọ, bo nọ fọ́n zohunhun dote na lizọnyizọn kunnudegbe tọn bo tlẹ sọ nọ na tuli mẹdevo lẹ nado lẹzun gbehosọnalitọ lẹ ga. Ṣigba, whẹpo hiẹ sọgan ze yinkọ dai, a dona yin wẹnlatọ apajlẹ dagbenọ de he ko yí baptẹm e whè gbau na osun ṣidopo.

¹⁴ Gbehosọnalitọ titengbe lẹ nọ saba yin dide sọn gbehosọnalitọ whepoponu tọn he ko yin kọdetọn dagbenọ to lizọnyizọn lọ mẹ lẹ mẹ. Yé dona penugo nado yì sẹ̀n to fidepope he wekantẹn alahọ tọn do yé hlan lẹ. Fihe yé nọ saba yin didohlan lẹ nọ yin lẹdo he to olá lẹ, fie yé sọgan dín jlodotọ lẹ mọ bo wleawuna agun yọyọ lẹ te. To whedelẹnu, gbehosọnalitọ titengbe lẹ nọ yin didohlan agun he tindo nuhudo alọgọ tọn nado wazọ́n mlẹnmlẹn to aigba-denamẹ yetọn ji lẹ mẹ. Gbehosọnalitọ titengbe delẹ he yin mẹho agun tọn lẹ ko yin azọ́ndena nado gọalọna agun pẹvi lẹ, etlẹ yin to whenue nuhudo azọ́nwatọ lẹ tọn vonọtaun de ma tin to aigba-denamẹ lọ ji. Gbehosọnalitọ titengbe lẹ nọ mọ apòmẹ-kuẹ kleun de yí nado penukundo akuẹzinzan he yin dandan tọn yetọn lẹ go. Gbehosọnalitọ titengbe delẹ nọ yin dide na ojlẹ gli de.

¹⁵ Wedegbẹ́ Sinsẹ̀nzọn tọn Hagbẹ Anademẹtọ lọ tọn nọ de mẹdehlan lẹ, bọ Wedegbẹ́ Alahọ tọn otò he mẹ yé yin azọ́ndena do tọn nọ do yé hlan awà he ji gbẹtọ sù te lẹ. Yé nọ wazọ́n dagbe susu nado basi tito nujọnu tọn de na azọ́n yẹwhehodidọ tọn po nuwiwa agun tọn lẹ po bosọ nọ nọgodona tito ehelẹ. Suhugan mẹhe yin dide taidi mẹdehlan he to aigba-denamẹ ji lẹ tọn wẹ ko mọ azọ́nplọnmẹ yí to Wehọmẹ Wẹndagbe-Jlatọ Ahọluduta lọ Tọn lẹ tọn. Ohọ̀ nọ yin nina yé bọ yé nọ mọ apòmẹ-kuẹ kleun de yí nado penukundo akuẹzinzan he yin dandan tọn yetọn lẹ go.

¹⁶ Mẹhe Hagbẹ Anademẹtọ lọ de taidi nugopọntọ lẹdo tọn lẹ ko nọ mọ azọ́nplọnmẹ yí bo nọ sẹ̀n taidi nugopọntọ lẹdo tọn tẹnmẹpọnnamẹtọ lẹ na ojlẹ de nado tindo numimọ whẹ́. Sunnu mọnkọtọn lẹ nọ yiwanna lizọnyizọn lọ bosọ nọ yiwanna mẹmẹsunnu yetọn lẹ. Gbehosọnalitọ zohunhunnọ lẹ wẹ yé, bo nọ yí sọwhiwhe do plọn Biblu bosọ nọ yin hodọtọ po mẹplọntọ kọdetọn dagbenọ lẹ po. Yé nọ yin tọ́ntlọ́ngbọ́n to sinsẹ́n gbigbọ tọn didohia mẹ podọ yé nọ do jlẹkajininọ, lẹnpọn dagbe po wuntuntun po hia. Eyin mẹmẹsunnu lọ ko wlealọ, asi etọn nọ yin gbehosọnalitọ de bo nọ yin apajlẹ dagbenọ to walọ po nuyiwa etọn hẹ mẹdevo lẹ po mẹ. Asi lọ nọ yin yẹwhehodọtọ kọdetọn dagbenọ. E sọ nọ yin asi Klistiani taliaitọ de, e ma nọ yin hoyidọtọ na asu etọn kavi duklunọ do hodọdopọ lẹ ji. Tito nugopọntọ lẹdo tọn lẹ po asi yetọn lẹ po tọn nọ ján taun, enẹwutu mẹhe to vivẹnudo na sinsẹ̀nzọn ehe dona tindo agbasalilo dagbe. E ma yin gbehosọnalitọ lẹ lọsu wẹ nọ biọ nado yin nugopọntọ lẹdo tọn gba. Kakatimọ, yé nọ dọ ojlo yetọn nado lẹzun nugopọntọ lẹdo tọn na nugopọntọ lẹdo tọn yetọn, mẹhe na na yé ayinamẹ lẹ.

¹⁷ Wehọmẹ Wẹndagbe-Jlatọ Ahọluduta lọ tọn lẹ tọn: Nuhudo tin na wẹndagbe-jlatọ Ahọluduta lọ tọn susu dogọ nado wazọ́n to aigba-denamẹ he ma nọ yawu yin azọ́nwadeji lẹ ji podọ nado gọalọna agun lẹ to gbigbọ-liho. Enẹwutu, mẹmẹsunnu po mẹmẹyọnnu tlẹnnọ lẹ po, gọna asu po asi po lẹ sọgan doalọwemẹ nado mọ azọ́nplọnmẹ vonọtaun yí to Wehọmẹ Wẹndagbe-Jlatọ Ahọluduta lọ tọn lẹ tọn. To wehọmẹ lọ fifo godo, mẹhe mọ gbedewema yí lẹ nọ yin didohlan nado yì sẹ̀n taidi gbehosọnalitọ whepoponu tọn lẹ to fie nuhudo sù te to otò yetọn mẹ lẹ. Ṣigba, azọ́ndenamẹ devo lẹ sọgan yin didena mẹhe sọgan ze yede jo lẹ nado sẹ̀n to otò yetọn mẹ kavi to tògodo. Vude to yé mẹ sọgan yin didohlan taidi gbehosọnalitọ titengbe ojlẹ gli tọn kavi whenu-gigọ́ tọn lẹ. Gbehosọnalitọ he tindo ojlo nado yì wehọmẹ ehe lẹ sọgan sè nubiọtomẹsi lọ lẹ eyin yé yì opli he nọ yin bibasi hẹ mẹhe tindo ojlo lẹ to plidopọ daho lẹ ji.

¹⁸ Wehọmẹ Biblu Pinplọn Watchtower Giliadi tọn: Mẹmẹsunnu po mẹmẹyọnnu tlẹnnọ lẹ po, gọna asu po asi po lẹ he nọ yin dide nado yì wehọmẹ ehe, nọ yin mẹhe sè Glẹnsigbe bosọ tin to sinsẹ̀nzọn whenu-gigọ́ tọn vonọtaun mẹ lẹ. Yé nọ yin mẹhe tindo nugopipe lọ nado hẹn nulẹ tin to titoji ganji bosọ nọgodona azọ́n lọ to aigba-denamẹ lọ ji kavi to alahọ mẹ. Yé ko nọ dohia na ojlẹ de dọ yé yiwanna devizọnwiwa na mẹmẹsunnu yetọn lẹ bo sọgan yí homẹdagbe do gọalọna mẹdevo lẹ nado plọn anademẹ Owe-wiwe tọn lẹ po yẹwhehọluduta tọn lẹ po bo nọ tẹdo yé go. Wedegbẹ́ Alahọ tọn wẹ nọ biọ to mẹhe pegan lẹ si nado doalọwemẹ. Mẹhe mọ gbedewema yí lẹ nọ yin azọ́ndena hlan aigba-denamẹ ji kavi hlan alahọ mẹ to tògodo kavi to otò yetọn titi mẹ.

¹⁹ Lẹblanulọkẹyi vonọtaun de wẹ e yin nado sẹ̀n to Bẹtẹli. Bẹtẹli zẹẹmẹdo “Owhé Jiwheyẹwhe tọn,” podọ yinkọ enẹ sọgbe taun na fihe yin ahọnkan azọ́n yẹwhehọluduta tọn ehelẹ. Mẹmẹsunnu po mẹmẹyọnnu po he to sinsẹ̀nzọnwa to Bẹtẹli lẹ to azọ́n titengbe de wà he gando awuwiwlena owe sinai do Biblu ji lẹ, lẹdogbedevomẹ bibasi po owe lọ lẹ mimá po go. Hagbẹ Anademẹtọ lọ, he nọ penukundo agun lẹ go bosọ nọ deanana yé lẹdo aihọn pé, yọ́n pinpẹn sinsẹ̀nzọn yetọn tọn taun. Susu lẹdogbedevomẹ-basitọ he yin hagbẹ Bẹtẹli tọn lẹ tọn wẹ nọ nọ̀ fie ogbè he mẹ yé nọ basi lẹdogbedevomẹ do lọ nọ yin dido te lẹ to aigba-denamẹ alahọ yetọn tọn ji bosọ nọ wazọ́n to finẹ. Ehe nọ gọalọna yé nado nọ sè lehe ogbè lọ nọ yin dido do egbesọegbesọ. Yé sọgan sọ mọ na yede eyin gbẹtọ lẹ nọ mọnukunnujẹ lẹdogbedevomẹ he yé to bibasi do owe mítọn mẹ lẹ mẹ kavi lala.

²⁰ Suhugan azọ́n he nọ yin wiwà to Bẹtẹli lẹ tọn wẹ yin huhlọn-zọ́n lẹ. Na ehe wutu, mẹhe nọ yin yiylọ do Bẹtẹli lẹ nọ saba yin mẹmẹsunnu he ko basi klandowiwe bo ko yí baptẹm lẹ, he yin jọja, bo tindo agbasalilo dagbe, bosọ tindo huhlọn. Eyin nuhudo tin to alahọ he nọ penukundo otò towe go mẹ bọ hiẹ na jlo nado sẹ̀n to Bẹtẹli, hiẹ sọgan yọ́n nususu dogọ gando nubiọtomẹsi lọ lẹ go, eyin a kanhose mẹho agun tọn towe lẹ.

²¹ Nọtẹn yẹwhehọluduta tọn lẹ gbigbá yin adà sinsẹ̀nzọn wiwe tọn de he taidi azọ́n tẹmpli Sọlomọni tọn gbigbá tọn. (1 Ahọ. 8:13-18) Mẹmẹsunnu po mẹmẹyọnnu susu lẹ po wẹ nọ do zohunhun ayidego tọn hia gbọn whenu yetọn lẹ po nutindo yetọn lẹ po yíyí do sanvọ́ dali nado tindo mahẹ to azọ́n ehe mẹ.

²² Be hiẹ penugo nado gọalọ ya? Eyin hiẹ yin wẹnlatọ he ko yí baptẹm de bo to jijlo nado tindo mahẹ to azọ́n ehe mẹ, mẹmẹsunnu he nọ penukundo azọ́n họ̀gbigbá tọn mítọn lẹ go to lẹdo towe mẹ na yọ́n pinpẹn alọgọ towe tọn bo na jlo nado plọnazọ́n we eyin a ma tlẹ ko yin azọ́nyọnẹntọ sọmọ. Hẹn ojlo towe zun yinyọnẹn na mẹho agun tọn towe lẹ. Wẹnlatọ he ko yí baptẹm bosọ pegan delẹ tlẹ ko penugo nado ze yede jo na azọ́n họ̀gbigbá yẹwhehọluduta tọn lẹ to tògodo.

²³ Dotẹnmẹ hundote susu wẹ tin nado tindo mahẹ to sinsẹ̀nzọn họ̀gbigbá tọn mẹ. Wẹnlatọ apajlẹ dagbenọ he ko yí baptẹm bo yin azọ́nyọnẹntọ jẹ obá de mẹ bosọ sọgan gọalọ to azọ́n ehelẹ mẹ to otò yetọn mẹ lẹ, sọgan wazọ́n taidi họ̀gbátọ mẹdezejotọ otò lọ mẹ tọn (Volontaire au développement des constructions locales). Mẹdevo lẹ penugo nado yì gọalọ to azọ́n họ̀gbigbá tọn lẹ mẹ to fidindẹn na ojlẹ de bo nọ yin dide gbọn wekantẹn alahọ tọn dali nado sẹ̀n taidi họ̀gbátọ mẹdezejotọ lẹ (volontaire à la construction) na nuhe bẹsọn osẹ awe jẹ osun atọ̀n. Mẹhe yin dide nado sẹ̀n na ojlẹ dindẹn lẹ nọ yin yiylọdọ devizọnwatọ họ̀gbátọ lẹ (serviteurs à la construction). Devizọnwatọ họ̀gbátọ de he yin didohlan tògodo nọ yin yiylọdọ devizọnwatọ họ̀gbátọ he to sinsẹ̀n to tògodo. Pipli Họ̀gbátọ lẹ tọn de he bẹ devizọnwatọ họ̀gbátọ lẹ po họ̀gbátọ mẹdezejotọ lẹ po hẹn wẹ nọ penukundo azọ́n họ̀gbigbá tọn dopodopo go, bọ họ̀gbátọ mẹdezejotọ otò lọ mẹ tọn lẹ (Volontaire au développement des constructions locales) po mẹdezejotọ agun he go azọ́n lọ gando lẹ tọn po nọ gọalọna yé. Pipli Họ̀gbátọ lẹ tọn lẹ nọ sẹtẹn sọn azọ́n de kọ̀n jẹ devo kọ̀n to aigba-denamẹ alahọ yetọn tọn ji.

²⁴ Eyin hiẹ ko klan gbẹzan towe do wiwe hlan Jehovah, yanwle towe wẹ nado sẹ̀n Jehovah kakadoi. Ṣigba, etẹwẹ yin yanwle gbigbọmẹ tọn towe lẹ todin? Yanwle gbigbọmẹ tọn lẹ tintindo na gọalọna we nado yí huhlọn towe po nutindo towe devo lẹ po zan po nuyọnẹn po. (1 Kọl. 9:26) Yanwle mọnkọtọn lẹ na gọalọna we nado whẹ́n to gbigbọ-liho bo nasọ gọalọna we nado ze ayidonugo do onú titengbe hugan lẹ ji dile hiẹ to vivẹnudo na lẹblanulọkẹyi sinsẹ̀nzọn tọn dogọ lẹ.—Flp. 1:10; 1 Tim. 4:15, 16.

²⁵ Apọsteli Paulu ze apajlẹ dagbe de dai na mí nado hodo to sinsẹ̀nzọn mítọn hlan Jiwheyẹwhe mẹ. (1 Kọl. 11:1) Paulu dovivẹnu vẹkuvẹku to sinsẹ̀nzọn Jehovah tọn mẹ. E yọnẹn dọ Jehovah ko hùn dotẹnmẹ susu dote na emi. E wlan hlan mẹmẹsunnu he tin to Kọlinti lẹ dọmọ: “Ohọ̀n daho de he nọ planmẹ jẹ nuwiwa kọ̀n ko yin hunhundonuvo na mi.” Be ehe ma yin nugbo gando mílọsu lẹ go ya? Mọwẹ, dotẹnmẹ susu lẹ wẹ hundote na mí nado sẹ̀n Jehovah to kọndopọ mẹ hẹ agun lọ, titengbe nado dọyẹwheho wẹndagbe Ahọluduta lọ tọn. Ṣigba, taidi Paulu, nado gbọn “ohọ̀n daho” enẹ nù nọ biọ dọ mí dona diahi hẹ “nukundiọsọmẹtọ susu.” (1 Kọl. 16:9) Paulu nọ jlo nado domẹplọnlọ ede go. Doayi nuhe e dọ go dọmọ: “Yẹn nọ to nutun agbasa ṣie bo nọ hẹn ẹn di afanumẹ de.” (1 Kọl. 9:24-27) Be mílọsu tindo pọndohlan dopolọ ya?

²⁶ Mímẹpo wẹ yin tulina nado nọ dovivẹnu na yanwle yẹwhehọluduta tọn lẹ sọgbe hẹ ninọmẹ mítọn. Mẹsusu wẹ tin to adà sinsẹ̀nzọn whenu-gigọ́ tọn delẹ mẹ to egbehe, na yé yawu ze yanwle yẹwhehọluduta tọn lẹ donukọnna yede wutu. Mẹjitọ yetọn lẹ kavi mẹdevo lẹ ko na tuli yé nado wàmọ etlẹ yin to whenue yé gbẹ́ pò to pẹvi. Gbọnmọ dali, yé ko duvivi dona susu lẹ tọn to sinsẹ̀nzọn Jehovah tọn mẹ—bọ nudide yetọn ma vẹna yé. (Howh. 10:22) Yanwle dagbe devo lẹ sọgan yin nado nọ tindo mahẹ to sinsẹ̀nzọn kunnudegbe tọn mẹ to sẹmẹsẹmẹ, nado bẹ bo nọ deanana plọnmẹ Biblu de kavi nado nọ yí whenu zan dogọ nado nọ wleawuna opli lẹ. Nujọnu lọ wẹ yindọ mí ni hẹn tenọgli mítọn go bo nọ hẹn lizọnyizọn mítọn di to gigọ́ mẹ. Eyin mí wàmọ, mí na to gbégbòna Jehovah bo na jẹ yanwle daho hugan mítọn kọ̀n, yèdọ nado sẹ̀n ẹn kakadoi.—Luku 13:24; 1 Tim. 4:7b, 8.