‘Gbigbọ Nọ Dindona Onú Sisosiso Jiwheyẹwhe Tọn Lẹ’
“Gbigbọ lọ nọ dindona onú lẹpo, etlẹ yin onú sisosiso Jiwheyẹwhe tọn lẹ.”—1 KỌL. 2:10.
1. Adà he gbigbọ wiwe nọ yiwà tẹwẹ Paulu zinnudeji to 1 Kọlintinu lẹ 2:10 mẹ, podọ kanbiọ tẹlẹ wẹ fọndote?
LEHE mí dopẹ́ do sọ dọ gbigbọ wiwe Jehovah tọn to nuyiwa! Owe-wiwe lẹ dọho gando gbigbọ wiwe go taidi alọgọtọ, nunina, kunnudetọ, podọ nuhe nọ vẹvẹ do ota mítọn mẹ. (Joh. 14:16; Owalọ 2:38; Lom. 8:16, 26, 27) Apọsteli Paulu zinnudo adà tangan devo he gbigbọ wiwe nọ yiwà ji dọmọ: “Gbigbọ lọ nọ dindona onú lẹpo, etlẹ yin onú sisosiso Jiwheyẹwhe tọn lẹ.” (1 Kọl. 2:10) Na nugbo tọn, Jehovah nọ yí gbigbọ wiwe etọn zan nado de nugbo sisosiso gbigbọmẹ tọn lẹ hia. Eyin alọgọ gbigbọ enẹ tọn dẹn, nawẹ mí sọgan mọnukunnujẹ lẹndai Jehovah tọn lẹ mẹ gbọn? (Hia 1 Kọlintinu lẹ 2:9-12.) Ṣigba, kanbiọ susu wẹ fọndote: Nawẹ ‘gbigbọ lọ nọ dindona onú sisosiso Jiwheyẹwhe tọn lẹ’ gbọn? Mẹnu lẹ gblamẹ wẹ Jehovah de onú ehelẹ hia gbọn to owhe kanweko tintan W.M.? To egbehe, nawẹ gbigbọ lọ nọ dindona onú sisosiso ehelẹ do, podọ gbọn mẹnu lẹ gblamẹ?
2. Aliho voovo awe tẹlẹ mẹ wẹ gbigbọ wiwe na yinuwa te?
2 Jesu do aliho voovo awe he mẹ gbigbọ lọ na yinuwa te hia. Ojlẹ kleun de jẹnukọnna okú etọn, e dọna apọsteli etọn lẹ dọmọ: “Alọgọtọ lọ, yèdọ gbigbọ wiwe, he Otọ́ lọ na dohlan to oyín ṣie mẹ, enẹ lọ wẹ na plọn mì onú lẹpo bo na hẹn onú lẹpo he yẹn ko dọna mì wá oflin mẹ na mì.” (Joh. 14:26) Gbọnmọ dali, gbigbọ wiwe na yinuwa taidi mẹplọntọ po nuflinmẹtọ de po. Taidi mẹplọntọ de, e na gọalọna Klistiani lẹ nado tunwun nuhe yé ma ko mọnukunnujẹemẹ dai lẹ go. Taidi nuflinmẹtọ de, e na gọalọna yé nado flin nuhe yé ko mọ zẹẹmẹ etọn lẹ bo yí yé do yizan mẹ ganji.
To Owhe Kanweko Tintan Whenu
3. Hogbe Jesu tọn tẹlẹ wẹ dohia dọ “onú sisosiso Jiwheyẹwhe tọn lẹ” na yin didehia vudevude?
3 Jesu plọn devi etọn lẹ nugbo susu he yin onú yọyọ pete na yé. Ṣigba, nususu gbẹ́ pò bọ yé na plọn. Jesu dọna apọsteli lẹ dọmọ: “Yẹn gbẹ́ tindo onú susu nado dọna mì, ṣigba mì ma penugo nado hẹn yé todin gba. Ṣogan, to whenue e na wá, yèdọ gbigbọ nugbo lọ, e na deanana mì yì nugbo lọ lẹpo kọ̀n.” (Joh. 16:12, 13) Jesu gbọnmọ dali to didohia dọ onú sisosiso gbigbọmẹ tọn lẹ na yin didehia vudevude gbọn gbigbọ wiwe gblamẹ.
4. To azán Pẹntikọsti owhe 33 W.M. gbè, nawẹ gbigbọ wiwe yinuwa taidi mẹplọntọ po alọgọtọ de po gbọn?
4 To azán Pẹntikọsti owhe 33 W.M. gbè, “gbigbọ nugbo lọ” wá bo kọ̀n do nudi Klistiani 120 he pli dopọ to Jelusalẹm ji. Kunnudenu yinukundomọ po nudidọ lẹ po do ehe hia. (Owalọ 1:4, 5, 15; 2:1-4) Devi lẹ dọho to ogbè voovo mẹ “gando onú jiawu Jiwheyẹwhe tọn lẹ go.” (Owalọ 2:5-11) Ojlẹ lọ sọ̀ na nuyọyọ de nido yin didehia. Yẹwhegán Joẹli ko dọ dọdai gando kinkọnjẹgbonu gbigbọ wiwe tọn ehe go. (Joẹ. 2:28-32) Mẹhe to finẹ lẹ yí nukun yetọn lẹ do to mimọ hẹndi dọdai enẹ tọn to aliho he yé ma donukun de mẹ, podọ apọsteli Pita nọ nukọn nado basi zẹẹmẹ nujijọ ehe tọn na yé. (Hia Owalọ lẹ 2:14-18.) Gbọnmọ dali, gbigbọ wiwe yinuwa taidi mẹplọntọ de bo hẹn ẹn họnwun na Pita dọ nuhe devi lẹ to mimọ ehe yin hẹndi dọdai hohowhenu tọn enẹ tọn. Gbigbọ lọ sọ yinuwa taidi nuflinmẹtọ de, na Pita ma yihodọ sọn owe Joẹli tọn kẹdẹ mẹ gba, ṣigba sọn ohàn psalm lẹ tọn awe mẹ ga, ehe Davidi kàn. (Ps. 16:8-11; 110:1; Owalọ 2:25-28, 34, 35) Na nugbo tọn, nuhe mẹhe pli dopọ to finẹ lẹpo mọ bo sè lẹ yin onú sisosiso Jiwheyẹwhe tọn lẹ.
5, 6. (a) To Pẹntikọsti 33 W.M., kanbiọ titengbe he gando alẹnu yọyọ lọ go tẹlẹ wẹ dona mọ gblọndo? (b) Mẹnu lẹ wẹ fọ́n whẹho ehelẹ dote, podọ nawẹ yé basi nudide gbọn?
5 Whẹho susu gbẹ́ dona yin hinhẹn họnwun na Klistiani owhe kanweko tintan tọn lẹ. Di apajlẹ, kanbiọ susu fọ́n gando alẹnu yọyọ lọ he bẹ azọ́n to azán Pẹntikọsti tọn enẹ gbè go. Be Ju po mẹdiọzun Ju lẹ po kẹdẹ wẹ na nọ alẹnu lọ mẹ ya? Be Kosi lẹ lọsu sọgan yin alọkẹyi do e mẹ bo na yin amisisadode po gbigbọ wiwe po ya? (Owalọ 10:45) Be sunnu Kosi lẹ dona gboadà bosọ yìn Osẹ́n Mose tọn whẹ́ wẹ ya? (Owalọ 15:1, 5) Kanbiọ titengbe wẹ ehelẹ yin. Klistiani enẹlẹ tindo nuhudo gbigbọ Jehovah tọn nado dindona onú sisosiso ehelẹ. Ṣigba, mẹnu lẹ gblamẹ wẹ gbigbọ lọ na yinuwa gbọn?
6 Mẹmẹsunnu numimọnọ lẹ wẹ fọ́n kanbiọ he dona yin dogbapọnna ehelẹ dopodopo dote. Pita, Paulu po Balnaba po tin to opli hagbẹ anademẹtọ lọ tọn enẹ tẹnmẹ podọ yé dọ lehe Jehovah to nuyiwa hẹ Kosi he ma gboadà lẹ do. (Owalọ 15:7-12) To whenuena hagbẹ anademẹtọ lọ ko gbadopọnna kunnudenu ehe to kọndopọ mẹ hẹ nuhe yin didọ to Owe-wiwe Heblu tọn mẹ lẹ, yé basi nudide de po alọgọ gbigbọ wiwe tọn po. Enẹgodo, yé hẹn nudide enẹ zun yinyọnẹn na agun lẹ gbọn wekanhlanmẹ dali.—Hia Owalọ lẹ 15:25-30; 16:4, 5; Efe. 3:5, 6.
7. Etẹwẹ nọ gọalọ nado de nugbo sisosiso lẹ hia?
7 Kandai gbọdo Johanu, Pita, Jakọbu po Paulu po tọn lẹ, tá hinhọ́n do whẹho susu devo lẹ ji. Ṣigba to ojlẹ de mẹ whenue Owe-wiwe Klistiani tọn lẹ ko yin tadona godo, nunina dọdai didọ po oyọnẹn he yin didehia gbọn azọ́njiawu dali po tọn lẹ doalọte. (1 Kọl. 13:8) Be gbigbọ lọ na gbẹ́ pò to nuyiwa taidi mẹplọntọ po nuflinmẹtọ de po ya? Be e na gbẹ́ to alọgọna Klistiani lẹ nado dindona onú sisosiso Jiwheyẹwhe tọn lẹ ya? Dọdai lẹ dohia dọ mọ wẹ.
To Ojlẹ Opodo lọ Tọn Mẹ
8, 9. Mẹnu lẹ wẹ na ‘sẹ́’ po nuyọnẹn gbigbọmẹ tọn po to ojlẹ opodo lọ tọn mẹ?
8 Angẹli de dọ dọdai gando ojlẹ opodo lọ tọn go dọmọ: “Mẹplọntọ he yin nuyọnẹntọ lẹ na to sisẹ́ di sisẹ́ dovlomẹ tọn; podọ yé he lẹ́ mẹsusu hlan dodo kọ̀n lẹ di sunwhlẹvu lẹ kakadoi. . . . Yè nasọ hẹn oyọnẹn sudeji.” (Dan. 12:3, 4) Mẹnu lẹ wẹ na yin nuyọnẹntọ lẹ podọ mẹnu lẹ wẹ na to sisẹ́? Jesu tá hinhọ́n do ehe ji to apajlẹ likun po ogbé ylankan lẹ po tọn etọn mẹ. To whenuena e to hodọ gando “vivọnu titonu de tọn” go, e dọmọ: “To ojlẹ enẹ mẹ, dodonọ lẹ na to sisẹ́ mlanmlan taidi owhè to ahọluduta Otọ́ yetọn tọn mẹ.” (Mat. 13:39, 43) To zẹẹmẹ Jesu tọn mẹ, e do “dodonọ lẹ” hia taidi “ovi ahọluduta lọ tọn lẹ” he yin Klistiani yiamisisadode lẹ.—Mat. 13:38.
9 Be Klistiani yiamisisadode lẹpo wẹ na ‘sẹ́’ ya? Mọwẹ to linlẹn de mẹ, na Klistiani lẹpo wẹ na tindo mahẹ to yẹwhehodidọ, azọ́n gbẹtọ lẹ hinhẹn zun devi tọn, po ode awetọ jijlọdote to opli lẹ ji po mẹ. Mẹyiamisisadode lẹ wẹ na ze apajlẹ etọn dai. (Zek. 8:23) Ṣigba, to yidogọ mẹ na ehe, onú sisosiso lẹ na yin didehia to ojlẹ opodo lọ tọn mẹ. Dọdai he Daniẹli basi kandai etọn lọ yin ‘titlẹ́ po hiadonu po’ kakajẹ ojlẹ enẹ mẹ. (Dan. 12:9) Nawẹ gbigbọ lọ na dindona onú sisosiso ehelẹ gbọn, podọ gbọn mẹnu lẹ gblamẹ?
10. (a) Mẹnu lẹ gblamẹ wẹ gbigbọ wiwe nọ de nugbo sisosiso lẹ hia gbọn to azán godo tọn lẹ mẹ? (b) Basi zẹẹmẹ do lehe nugbo he gando tẹmpli daho gbigbọmẹ tọn Jehovah tọn go lẹ yin hinhẹn họnwun do ji.
10 To egbehe, eyin ojlẹ sọ̀ nado tá hinhọ́n do whẹho gbigbọmẹ tọn de ji, gbigbọ wiwe nọ gọalọna afọzedaitọ numimọnọ “afanumẹ nugbonọ podọ nuyọnẹntọ lọ” tọn he tin to tatọ́-tẹnnọ aihọn tọn mẹ lẹ nado tunwun nugbo sisosiso he yé ma ko mọnukunnujẹemẹ dai lẹ go. (Mat. 24:45; 1 Kọl. 2:13) Hagbẹ Anademẹtọ lọ nọ gbadopọnna zẹẹmẹ yọyọ lẹ to pọmẹ. (Owalọ 15:6) Yé nọ zín nuhe yé plọn lẹ jẹgbonu na ale mẹlẹpo tọn. (Mat. 10:27) Dile ojlẹ lẹ to yìyì, e sọgan sọ biọ dọ hinhọ́n ni yin titá do zẹẹmẹ lẹ ji dogọ, podọ yé sọ nọ wàmọ po ahundopo po.—Pọ́n apotin lọ “Lehe Gbigbọ De Zẹẹmẹ Tẹmpli Gbigbọmẹ Tọn lọ Tọn Hia Gbọn.”
Lehe Mí Sọgan Mọaleyi sọn Adà He Gbigbọ Wiwe Nọ Yiwà to Egbehe mẹ Do
11. To egbehe, nawẹ Klistiani lẹpo nọ mọaleyi sọn adà he gbigbọ wiwe nọ yiwà nado de onú sisosiso Jiwheyẹwhe tọn lẹ hia mẹ gbọn?
11 Klistiani nugbonọ lẹpo nọ mọaleyi sọn adà he gbigbọ wiwe nọ yiwà nado de onú sisosiso Jiwheyẹwhe tọn lẹ hia mẹ. Taidi Klistiani owhe kanweko tintan tọn lẹ, mí nọ plọn nudọnamẹ he gbigbọ wiwe gọalọna mí nado mọnukunnujẹemẹ lẹ to egbehe bo nọ flin yé to godo mẹ bosọ nọ yí yé do yizan mẹ. (Luku 12:11, 12) E ma yin dandan dọ mí ni yì wehọmẹ susu whẹpo do mọnukunnujẹ nugbo sisosiso gbigbọmẹ tọn he yin zinzinjẹgbonu lẹ mẹ gba. (Owalọ 4:13) Nawẹ mí sọgan hẹn nukunnumọjẹnumẹ mítọn gando onú sisosiso Jiwheyẹwhe tọn lẹ go pọnte dogọ gbọn? Mì gbọ mí ni gbadopọnna ayinamẹ delẹ.
12. Whetẹnu wẹ mí dona nọ biọ alọgọ gbigbọ wiwe tọn to odẹ̀ mẹ?
12 Nọ biọ alọgọ gbigbọ wiwe tọn to odẹ̀ mẹ. To whenue mí jlo na gbadopọnna owe sinai do Biblu ji de, mí dona biọ alọgọ gbigbọ wiwe tọn to odẹ̀ mẹ whẹ́. Ehe yin nugbo etlẹ yin to whenue mí tin míde ṣo kavi dọ whenu he mí tindo nado plọnnu ma sù sọmọ. Na jide tọn, ovẹvivẹ whiwhẹ tọn mọnkọtọn lẹ na hẹn homẹ Otọ́ mítọn olọn mẹ tọn hùn. Dile Jesu dohia do, Jehovah na na mí gbigbọ wiwe etọn po awubibọ po na obiọ ahundopo tọn mítọn.—Luku 11:13.
13, 14. Adà tẹwẹ awuwiwlena opli lẹ nọ yiwà to nukunnumimọjẹ onú sisosiso Jiwheyẹwhe tọn lẹ mẹ?
13 Nọ wleawuna opli lẹ. Mí nọ mọ “núdùdù . . . to ojlẹ sisọ mẹ” gbọn pipli afanumẹ lọ tọn gblamẹ. “Afanumẹ” lọ nọ hẹn azọ́ndenamẹ etọn di gbọn awuwiwlena owe sinai do Biblu ji lẹ gọna tito bibasina nupinplọn po opli lẹ po dali. E tindo whẹwhinwhẹ́n dagbe susu he wutu e do nọ biọ to “pipli mẹmẹsunnu lẹ tọn pete” si nado gbadopọnna nudọnamẹ delẹ. (1 Pita 2:17; Kọl. 4:16; Juda 3) Eyin mí nọ wà nuhe go mí pé lẹpo nado hodo ayinamẹ he yin nina lẹ, enẹ na dohia dọ mí to gbekọndopọ hẹ gbigbọ wiwe.—Osọ. 2:29.
14 To whenuena mí to awuwlena opli lẹ, mí na wà dagbe nado nọ hia wefọ he yin dide lẹ bo tẹnpọn nado mọ lehe dopodopo yetọn gando hosọ he mí to dogbapọnna lọ go do. Vudevude, mọwiwà na hẹn nukunnumọjẹnumẹ mítọn do Biblu ji siso deji. (Owalọ 17:11, 12) Eyin mí nọ dín wefọ lẹ mọ, yé na gbọṣi ayiha mítọn mẹ podọ gbigbọ wiwe sọgan gọalọna mí nado nọ flin yé. Humọ, mí na nọ yawu mọ wefọ he mí to dindin lẹ eyin mí tindo aṣa lọ nado nọ hia wefọ lẹ tlọlọ sọn Biblu mẹ.
15. Naegbọn mí dona nọ hia owe sinai do Biblu ji lẹ to gbesisọ mẹ, podọ nawẹ hiẹ nọ wà ehe gbọn?
15 Nọ hia owe sinai do Biblu ji lẹ to gbesisọ mẹ. Owe he yin zinzinjẹgbonu delẹ ma nọ yin dogbapọnna to opli mítọn lẹ ji, ṣigba yé yin awuwlena na dagbe mítọn. Linlinnamẹwe mítọn he tlẹ yin awuwlena na gbonutọ lẹ sọ yọ́n-na-yizan na mílọsu ga. To aihọn he ján ehe mẹ, e nọ saba biọ dọ mí ni nọtepọn mẹde kavi nude to whedelẹnu. Eyin mí hẹn owe mítọn he mí ma ko hia kavi he mí ko hia apadewhe etọn de, mí sọgan yí dotẹnmẹ hundote ehelẹ zan nado hia adà etọn de. Mẹdelẹ nọ dotoaina owe mítọn he tin to kanji lẹ to whenue yé to zọnlinzin kavi to ohún mẹ nado sọgan jẹakọ hẹ dehe yin zinzinjẹgbonu to agọe lẹ. Gbọnvona dọ owe mítọn lẹ nọ yin awuwlena po dodinnanu sọwhiwhe tọn lẹ po, podọ nado hẹn awuvivi wá na wehiatọ paa lẹ, yé sọ nọ hẹn pinpẹn-nutọn-yinyọnẹn mítọn na gbigbọnu lẹ siso deji.—Hab. 2:2.
16. Ale tẹwẹ mí nọ mọyi eyin mí nọ kàn kanbiọ he fọ́n to ayiha mẹ na mí lẹ dai bo basi dodinnanu do yé ji?
16 Nọ lẹnayihamẹpọn. To whenue a to Biblu kavi owe sinai do Biblu ji lẹ hia, nọ yiagbọji nado lẹnnupọn. Dile hiẹ yí sọwhiwhe do to linlẹn nuhe hia a te tọn lẹ hodo debọdo-dego, kanbiọ lẹ sọgan fọ́n to ayiha towe mẹ. Hiẹ sọgan kàn kanbiọ ehelẹ dai bo basi dodinnanu do yé ji to godo mẹ. Whenue mí to dodinna nuhe dọ̀n ayidonugo mítọn lẹ wẹ mí nọ saba plọnnu sisosiso. Nukunnumọjẹnumẹ he mí tindo nọ lẹzun apadewhe adọkunnu mẹdetiti tọn he mẹ mí sọgan desọn to whenue mí tindo nuhudo etọn.—Mat. 13:52.
17. Tito-to-whinnu tẹwẹ hiẹ nọ hodo na nuhe dù oplọn whẹndo tọn kavi mẹdetiti tọn?
17 De whenu dovo na sinsẹ̀n-bibasi whẹndo tọn. Hagbẹ Anademẹtọ lọ ko na tuli mímẹpo nado de whèjai de kavi ojlẹ devo de dovo to osẹ dopodopo mẹ na oplọn mẹdetiti tọn kavi whẹndo tọn. Tito opli mítọn lẹ tọn he yin vivọjlado hùn dotẹnmẹ dotena mí nado yí ayinamẹ ehe zan. Etẹwẹ hiẹ nọ gbadopọnna to Sinsẹ̀n-Bibasi Whẹndo tọn whenu? Mẹdelẹ nọ hia Biblu bo nọ basi dodinnanu do wefọ he fọ́n kanbiọ dote to ayiha mẹ na yé lẹ ji bosọ nọ kàn zẹẹmẹ kleunkleun lẹ do Biblu yetọn mẹ. Whẹndo susu nọ yiagbọji nado basi yọ́n-na-yizan nuhe yé plọn lẹ tọn. Tatọ́ whẹndo tọn delẹ nọ de owe he yé mọdọ e sọgbe hẹ nuhudo whẹndo lọ tọn kavi dehe dọhodo hosọ kavi kanbiọ he whẹndo lọ fọndote lẹ ji. Matin ayihaawe, hiẹ na lẹnnupọndo hosọ devo he hiẹ na gbadopọnna lẹ ji dile ojlẹ to yìyì.a
18. Naegbọn mí ma dona dọ̀n yonu dogodo nado plọn nugbo sisosiso Ohó Jiwheyẹwhe tọn lẹ?
18 Jesu dọ dọ gbigbọ lọ na yinuwa taidi alọgọtọ de. Enẹwutu mí ma dona dọ̀n yonu dogodo nado plọn nugbo sisosiso Ohó Jiwheyẹwhe tọn lẹ. Nugbo ehelẹ yin apadewhe “oyọnẹn [họakuẹ] Jiwheyẹwhe tọn” podọ mí yin tulina nado nọ dindona yé. (Hia Howhinwhẹn lẹ 2:1-5.) Yé de nususu hia gando “nuhe Jiwheyẹwhe ko wleawu etọn dai na mẹhe yiwanna ẹn lẹ” go. Dile mí to vivẹnudo nado plọn nususu dogọ gando Ohó Jehovah tọn go, gbigbọ wiwe na gọalọna mí, na “gbigbọ lọ nọ dindona onú lẹpo, etlẹ yin onú sisosiso Jiwheyẹwhe tọn lẹ.”—1 Kọl. 2:9, 10.
[Nudọnamẹ odò tọn]
Nawẹ Hiẹ Na Na Gblọndo Gbọn?
• Aliho voovo awe tẹlẹ mẹ wẹ gbigbọ wiwe nọ gọalọna mí nado dindona “onú sisosiso Jiwheyẹwhe tọn lẹ” te?
• Mẹnu lẹ gblamẹ wẹ gbigbọ wiwe de nugbo sisosiso lẹ hia gbọn to owhe kanweko tintan whenu?
• Nawẹ gbigbọ wiwe nọ yinuwa nado tá hinhọ́n do whẹho lẹ ji to egbehe gbọn?
• Etẹwẹ hiẹ sọgan wà nado mọaleyi sọn adà he gbigbọ wiwe nọ yiwà mẹ?
[Apotin to weda 22]
Lehe Gbigbọ De Zẹẹmẹ Tẹmpli Gbigbọmẹ Tọn lọ Tọn Hia Gbọn
Dopo to “onú sisosiso Jiwheyẹwhe tọn” he yin didehia to owhe kanweko tintan whenu lẹ mẹ wẹ yindọ gòhọtúntún lọ he tẹmpli lẹ wá diọtẹnna to godo mẹ yin yẹhiadonu onú tangan gbigbọmẹ tọn he klohugan de tọn. Paulu ylọ onú tangan enẹ dọ “gòhọ nugbo tọn lọ [he] Jehovah pẹ́n, bọ e ma yin gbẹtọ.” (Heb. 8:2) Ehe yin tẹmpli daho gbigbọmẹ tọn lọ, yèdọ awuwledainanu de nado dọnsẹpọ Jiwheyẹwhe, he yọnbasi gbọn avọ́sinsan po yẹwhenọduta Jesu Klisti tọn po gblamẹ.
“Gòhọ nugbo tọn lọ” wá aimẹ to owhe 29 W.M., to whenue Jesu yin bibaptizi bọ Jehovah kẹalọyi i taidi mẹhe na lẹzun avọ́sinsan pipé de. (Heb. 10:5-10) To okú po fọnsọnku Jesu tọn po godo, e biọ Fiwiwe Gbaugbau tẹmpli gbigbọmẹ tọn lọ mẹ nado ze nuhọakuẹ avọ́sinsan etọn tọn do “Jiwheyẹwhe lọsu nukọn.”—Heb. 9:11, 12, 24.
Apọsteli Paulu wlan to wefọ devo mẹ dọ Klistiani yiamisisadode lẹ to “whinwhẹ́n zun tẹmpli wiwe de na Jehovah.” (Efe. 2:20-22) Be tẹmpli ehe yin nudopolọ po “gòhọ nugbo tọn lọ” he e basi zẹẹmẹ etọn to wekanhlanmẹ etọn hlan Heblu lẹ mẹ to godo mẹ wẹ ya? Na owhe susu, devizọnwatọ Jehovah tọn lẹ lẹndọ mọ wẹ. E taidi dọ Klistiani yiamisisadode lẹ nọ yin awuwlena to aigba ji nado lẹzun “zannu” lẹ to tẹmpli olọn mẹ tọn Jehovah tọn mẹ.—1 Pita 2:5.
Ṣigba sẹpọ owhe 1971, hagbẹ pipli afanumẹ lọ tọn numimọnọ lẹ jẹ nukunnumọjẹemẹ ji dọ tẹmpli he go Paulu donù to owe Efesunu lẹ tọn mẹ lọ ma sọgan yin tẹmpli daho gbigbọmẹ tọn Jehovah tọn gba. Eyin “gòhọ nugbo tọn lọ” bẹ Klistiani yiamisisadode he fọnsọnku lẹ hẹn wẹ, e dona ko wá aimẹ to whenue fọnsọnku yetọn bẹjẹeji godo to “tintin tofi Oklunọ tọn” whenu. (1 Tẹs. 4:15-17) Ṣigba to whenue Paulu to hodọ gando gòhọtúntún lọ go, e wlan dọmọ: “Gòhọ ehe yin ohia de na ojlẹ dide he ko wá todin lọ.”—Heb. 9:9.
To whenue yé yí sọwhiwhe do yí wefọ ehelẹ jlẹdo devo lẹ go, e wá họnwun dọ tẹmpli gbigbọmẹ tọn lọ ma to yinyin gbigbá todin podọ Klistiani yiamisisadode lẹ ma yin “zannu” he nọ yin awuwlena to aigba ji nado lẹzun apadewhe tẹmpli enẹ tọn lẹ gba. Kakatimọ, Klistiani yiamisisadode lẹ to devizọnwa to awánu podọ to Fiwiwe tẹmpli gbigbọmẹ tọn lọ tọn mẹ, bo nọ to “avọ́sinsan pipà tọn” na hlan Jiwheyẹwhe egbesọegbesọ.—Heb. 13:15.
[Yẹdide to weda 23]
Nawẹ mí sọgan hẹn nukunnumọjẹnumẹ mítọn gando “onú sisosiso Jiwheyẹwhe tọn lẹ” go pọnte dogọ gbọn?