Todido Nujọnu Tọn Na Mẹvivẹ Towe He Ko Kú Lẹ

 1-3. Kẹntọ tẹwẹ to ogbé mímẹpo tọn yàn, podọ naegbọn dogbigbapọnna nuhe Biblu plọn mí nọ hẹn kọgbọ wá na mí?

MÍ NI dọ dọ hiẹ to hinhọ̀nna kẹntọ ylankan de. Ewọ dohuhlọn bosọ yawu tlala hugan we. Hiẹ yọnẹn dọ kanylantọ de wẹ ewọ na hiẹ ko mọ po nukun towe po lehe e hù họntọn towe delẹ do. Mahopọnna vivẹnudido towe nado họ̀nna ẹn, e to dindọnsẹpọ we janwẹ. E taidi dọ todido depope masọ tin ba. Ṣigba, to ajijimẹ a mọ mẹwhlẹngántọ de to adà towe mẹ. Ewọ tindo huhlọn hugan kẹntọ towe taun, podọ e dopagbe nado gọalọna we. Lehe opagbe enẹ na miọnhomẹna we do sọ!

² To linlẹn dopolọ mẹ, kẹntọ mọnkọtọn de wẹ to ogbé towe yàn. Ogbé mímẹpo tọn yàn wẹ e te. Dile mí mọ to weta he wayi mẹ do, Biblu ylọ okú dọ kẹntọ. Depope to mí mẹ ma sọgan họ̀n glo kavi duto kẹntọ ehe ji gba. Mẹyiwanna mítọn susu wẹ kẹntọ ehe ko hù. Ṣigba e họnwun dọ Jehovah tindo huhlọn tlala hugan okú. Mẹwhlẹngántọ owanyinọ de wẹ ewọ podọ e ko sọ dohia dọ emi penugo nado gbawhàn kẹntọ ehe tọn. Podọ e dopagbe nado và kẹntọ lọ heyin okú sudo mlẹnmlẹn, yèdọ doidoi. Biblu plọn mí dọmọ: “Kẹntọ he yè na sudo gbọn godo wẹ okú.” (1 Kọlintinu lẹ 15:26) Owẹ̀n dagbe nankọ die!

³ Todin, mì gbọ mí ni lẹnnupọndo numọtolanmẹ he okú mẹyinyọnẹn mítọn de tọn nọ hẹn mí tindo ji. Mọwiwà na gọalọna mí nado yọ́n pinpẹn todido he na hẹn mí jaya lọ tọn. Flindọ, Jehovah dopagbe dọ oṣiọ lẹ na gọwá nọgbẹ̀ whladopo dogọ. (Isaia 26:19) Yé na yin hinhẹngọwa ogbẹ̀. Enẹ wẹ hẹn todido fọnsọnku tọn he mí tindo lodo.

 4. (a) Naegbọn aliho he mẹ Jesu yinuwa te to okú mẹvivẹ de tọn whenu plọnnu mí gando numọtolanmẹ Jehovah tọn lẹ go? (b) Họntọnjiji vonọtaun tẹwẹ Jesu wleawuna?

⁴ Be mẹvivẹ de ko kú do we pọ́n ya? Awubla po flumẹjijẹ po he e nọ hẹnwa sọgan vẹawu nado doakọnna. To nujijọ mọnkọtọn lẹ whenu, mí dona dike Ohó Jiwheyẹwhe tọn ni miọnhomẹna mí. (2 Kọlintinu lẹ 1:3, 4) Biblu gọalọna mí nado yọ́n numọtolanmẹ Jehovah po Jesu po tọn gando okú go. Jesu nọ yinuwa pẹpẹ taidi Otọ́ etọn, podọ e sọ yọ́n awufiẹsa he nọ dekọtọn to whenue mẹde kú do mí. (Johanu 14:9) To whenuena Jesu tin to Jelusalẹm, e nọ saba dla Lazalọsi po nọviyọnnu etọn lẹ po pọ́n, enẹ wẹ Malia po Malta po, he nọ nọ̀ Bẹtani heyin tòpẹvi he madẹn do Jelusalẹm de mẹ. Yé lẹzun họntọn vivẹ́. Biblu dọ dọ: “Jesu sọ yiwanna Malta, po nọviyọnnu etọn po, po Lazalọsi po.” (Johanu 11:5) Ṣigba, Lazalọsi kú, dile mí plọn to weta he wayi mẹ do.

 5, 6. (a) Nawẹ Jesu yinuwa gbọn to whenuena e tin to whẹndo po họntọn Lazalọsi tọn he to awubla lẹ po dè? (b) Naegbọn awubla he Jesu dohia do yin tuli de na mí?

⁵ Nawẹ Jesu yinuwa gbọn to whenuena họntọn etọn kú? Kandai lọ dọ dọ Jesu wá hẹnnumẹ Lazalọsi tọn lẹ po họntọn etọn lẹ po dè dile yé to awubla. Ninọmẹ lọ yinuwado Jesu ji tlala. Podọ “yè yí homẹgble [kavi awubla] do whàn ẹn to gbigbọ mẹ, yè sọ hẹn ewọ lọsu jẹtukla.” Enẹgodo, kandai lọ dọ dọ, “Jesu viavi.” (Johanu 11:33, 35) Be awubla he Jesu dohia zẹẹmẹdo dọ ewọ ma tindo todido wẹ ya? Lala. Nugbo wẹ dọ, Jesu yọnẹn dọ nujiawu de na jọ to madẹnmẹ. (Johanu 11:3, 4) Etomọṣo, ewọ tindo numọtolanmẹ awufiẹsa po awubla po tọn he okú nọ hẹnwa.

⁶ To aliho de mẹ, awubla he Jesu dohia yin tuli de na mí. E plọn mí dọ Jesu po Otọ́ etọn, Jehovah po, gbẹwanna okú. Ṣigba Jehovah Jiwheyẹwhe penugo nado hoavùn bo gbawhàn kẹntọ enẹ tọn! Mì gbọ mí ni pọ́n nuhe Jiwheyẹwhe na huhlọn Jesu nado wà.

 7, 8. Naegbọn whẹho Lazalọsi tọn sọgan ko hẹn mẹhe to finẹ lẹ nado hẹn todido bu, ṣigba etẹwẹ Jesu wà?

⁷ Oṣiọ Lazalọsi tọn ko yin didi do osókla de mẹ, podọ Jesu biọ dọ zannu he to yọdò lọ ji ni yin didesẹ. Malta ma jlo, na e yọnẹn dọ agbasa Lazalọsi tọn he ko to yọdò mẹ na azán ẹnẹ na ko to yinyọ̀n. (Johanu 11:39) To pọndohlan gbẹtọvi tọn mẹ, e taidi dọ todido depope ma tin ba.

⁸ Zannu lọ yin didesẹ, bọ Jesu dawhá jẹgbonu dọmọ: “Lazalọsi, jẹgbonu wá.” Etẹwẹ jọ? “[Dawe] he yin oṣiọ lọ sọ jẹgbonu wá.” (Johanu 11:43, 44) Pọ́n lehe ayajẹ mẹhe tin to finẹ lẹ tọn na ko sù do sọ! Vlavo Lazalọsi yin nọvisunnu, hẹnnumẹ, họntọn, kavi kọmẹnu yetọn, yé yọnẹn dọ ewọ ko kú. Ṣigba, ewọ ko gọwá ogbẹ̀ todin—yèdọ mẹvivẹ dopolọ—ko tin to ṣẹnṣẹn yetọn whladopo dogọ. Nupaṣamẹ tlala de wẹ ehe dona yin. Matin ayihaawe, mẹsusu wẹ na ko yí homẹhun do gbò Lazalọsi fán. Awhàngbigba do okú ji nankọtọn die!

 9, 10. (a) Nawẹ Jesu do Asisa huhlọn he e yizan nado fọ́n Lazalọsi sọnku tọn hia gbọn? (b) Ale tẹlẹ wẹ mí sọgan mọyi eyin mí hia kandai Biblu tọn lẹ he gando fọnsọnku go?

⁹ Jesu ma dohia to aliho depope mẹ dọ huhlọn edetiti tọn mẹ wẹ e wà azọ́njiawu ehe te gba. E hẹn ẹn họnwun to odẹ̀ he e hò whẹpo do dawhá ylọ Lazalọsi mẹ dọ Jehovah wẹ Asisa fọnsọnku lọ tọn. (Johanu 11:41, 42) E ma yin whlà dopo gee he Jehovah yí huhlọn etọn zan to aliho ehe mẹ te niyẹn gba. Fọnsọnku Lazalọsi tọn yin dopo poun to azọ́njiawu fọnsọnku tọn ṣinẹnẹ lẹ mẹ heyin kinkàndai to Ohó Jiwheyẹwhe tọn mẹ.a Homẹhunnu de wẹ e na yin nado hia bo plọn kandai ehelẹ. Yé plọn mí dọ Jiwheyẹwhe ma nọ homẹnukuntapọ́n, na mẹhe yin finfọnsọnku lẹ bẹ jọja po mẹhomẹ lẹ po, sunnu po yọnnu po, Islaelivi po mẹhe ma yin Islaelivi lẹ po hẹn. Podọ, lehe nuhe yin didọ to wefọ ehelẹ mẹ yin ayajẹnu de do sọ! Di apajlẹ, to whenuena Jesu fọ́n viyọnnu jọja de sọnku, “avò sọ vò” mẹjitọ etọn lẹ tlala. (Malku 5:42) Na nugbo tọn, Jehovah ko wà nuhe dona hẹn yé jaya bọ yé ma na wọ̀n pọ́n gbede de na yé.

¹⁰ Nugbo wẹ dọ, mẹhe Jesu fọnsọnku lẹ gbẹsọ wá kú to godo mẹ. Ṣigba, be ehe zẹẹmẹdo dọ onú tata de poun wẹ e yin nado fọ́n yé sọnku ya? Paali. Kandai Biblu tọn ehelẹ do nugbo nujọnu tọn lẹ hia bosọ hẹn mí tindo todido.

11. Nawẹ kandai fọnsọnku Lazalọsi tọn gọalọ nado mọ nugbo-yinyin nuhe yin didọ to Yẹwhehodọtọ 9:5 mẹ tọn gbọn?

¹¹ Biblu plọn mí dọ oṣiọ lẹ “ma yọ́n nude.” Yé ma tin to ogbẹ̀ podọ yé masọ tin to fidevo depope. Whenuho Lazalọsi tọn do ehe hia. To whenue Lazalọsi lẹkọwa ogbẹ̀, be e dọ nudepope gando ninọmẹ olọn mẹ tọn go nado hẹn homẹhun gbẹtọ lẹ wẹ ya? Kavi be e dobuna yé po otàn yajiji to miyọ́n he to jiji de mẹ tọn po wẹ ya? Paali. Biblu ma dọ dọ Lazalọsi dọho mọnkọtọn depope gba. To azán ẹnẹ he ewọ yin oṣiọ na lẹ mẹ, e “ma yọ́n nude.” (Yẹwhehodọtọ 9:5) Amlọndọ wẹ Lazalọsi te poun to okú mẹ.—Johanu 11:11.

12. Naegbọn mí sọgan kudeji dọ Lazalọsi yin finfọnsọnku nugbonugbo?

¹² Kandai fọnsọnku Lazalọsi tọn sọ plọn mí ga dọ nugbo wẹ todido fọnsọnku tọn, e ma yin otangblo tata de gba. Jesu fọ́n Lazalọsi sọnku to nukun mẹsusu tọn mẹ. Sinsẹ̀ngán he tlẹ gbẹwanna Jesu lẹ lọsu ma tindo ayihaawe gando azọ́njiawu ehe go. Kakatimọ, yé dọmọ: “Etẹ wà wẹ mí te? Na dawe he [Jesu] to ohia susu basi.” (Johanu 11:47) Mẹsusu wẹ yì pọ́n dawe he yin finfọnsọnku lọ. Taidi kọdetọn de, susu to yé mẹ wẹ tindo yise to Jesu mẹ. Fọnsọnku Lazalọsi tọn yin kunnudenu jọnun de dọ Jiwheyẹwhe wẹ do Jesu hlan. Kunnudenu ehe họnwun sọmọ bọ delẹ to sinsẹ̀ngán ahun sinsinyẹnnọ lẹ mẹ blasé nado hù Jesu po Lazalọsi po.—Johanu 11:53; 12:9-11.

13. Kunnudenu tẹwẹ mí tindo nado yise dọ Jehovah sọgan fọ́n oṣiọ lẹ sọnku nugbonugbo?

¹³ Be nuhe ma sọgbe hẹ lẹnpọn dagbe wẹ e yin nado kẹalọyi todido fọnsọnku tọn ya? Lala, na Jesu plọnmẹ dọ ojlẹ lọ ja bọ “mẹhe tin to yọdò [oflin tọn] mẹ lẹpo” na yin finfọnsọnku. (Johanu 5:28) Jehovah wẹ Didatọ ogbẹ̀ lẹpo tọn. Be e dona sinyẹnawu nado yise dọ ewọ penugo nado vọ́ ogbẹ̀ lẹ hẹngọwa wẹ ya? Nugbo wẹ dọ, enẹ na sinai do nugopipe Jehovah tọn nado flinnu ji. Be ewọ sọgan flin mẹvivẹ mítọn he kú lẹ ya? Sunwhlẹvu madosọha wẹ gọ́ jiwhé, ṣogan Jiwheyẹwhe dó oyín na dopodopo yetọn! (Isaia 40:26) Enẹwutu Jehovah Jiwheyẹwhe sọgan flin mẹvivẹ mítọn he kú lẹpo, podọ ewọ ko wleawufo nado hẹn yé gọwá ogbẹ̀.

14, 15. Dile hogbe Job tọn lẹ dohia do, etẹwẹ yin linlẹn Jehovah tọn dogbọn oṣiọ lẹ hinhẹngọwa ogbẹ̀ dali?

¹⁴ Ṣigba, etẹwẹ yin linlẹn Jehovah tọn gando oṣiọ lẹ finfọnsọnku go? Biblu plọn mí dọ ojlo vẹkuvẹku etọn wẹ e yin nado fọ́n oṣiọ lẹ sọnku. Job, dawe nugbonọ lọ kanse dọmọ: “Eyin mẹde kú, be ewọ nasọ nọgbẹ̀ ba?” Job to hodọ gando gbigbọṣi yọdò mẹ kakajẹ whenuena ojlẹ dide Jiwheyẹwhe tọn na sọ̀ nado flin in go. E dọna Jehovah dọmọ: “Hiẹ na ylọ yẹn nasọ siọ we: hiẹ do ko tindo ojlo de hlan azọ́n alọ towe lẹ tọn.”—Job 14:13-15.

¹⁵ Yí nukun homẹ tọn do pọ́n enẹ! Ojlo vẹkuvẹku Jehovah tọn wẹ nado hẹn oṣiọ lẹ gọwá ogbẹ̀. Be e ma yin homẹmiọnnamẹnu wẹ e yin nado yọnẹn dọ linlẹn Jehovah tọn niyẹn ya? Ṣigba etẹwẹ fọnsọnku sọgodo tọn ehe yin taun? Mẹnu lẹ wẹ na yin finfọnsọnku, podọ do fie?

16. Ninọmẹ tẹlẹ mẹ wẹ gbẹtọ lẹ na yin finfọnsọnku do?

¹⁶ Kandai fọnsọnku tọn he tin to Biblu mẹ lẹ plọn nususu mí gando fọnsọnku sọgodo tọn go. Mẹhe ko yin hinhẹngọwa ogbẹ̀ to aigba ji file lẹ vọ́ kọnawudopọ hẹ mẹvivẹ yetọn lẹ. Onú dopolọ wẹ na jọ to fọnsọnku sọgodo tọn whenu—ṣigba e na yin dehe pọnte hugan. Dile mí plọn to Weta 3tọ mẹ do, linlẹn Jiwheyẹwhe tọn wẹ yindọ aigba lọ blebu ni lẹzun paladisi de. Enẹwutu oṣiọ lẹ ma na yin finfọ́n do aihọn he gọ́ na awhàn, sẹ́nhẹngba, po awutu po de mẹ gba. Yé na tindo dotẹnmẹ hundote nado nọgbẹ̀ kakadoi to aigba ehe ji to jijọho po ayajẹ po mẹ.

17. Mẹnu lẹ wẹ na yin finfọnsọnku?

¹⁷ Mẹnu lẹ wẹ na yin finfọnsọnku? Jesu dọ dọ “mẹhe tin to yọdò [oflin tọn mẹ lẹpo] na sè ogbè etọn [Jesu tọn], bo na tọnjẹgbonu.” (Johanu 5:28, 29) Mọdopolọ, Osọhia 20:13 dọmọ: “Ohù hẹn oṣiọ he to e mẹ lẹ jẹage; okú po kutomẹ [Hadẹs] po sọ hẹn oṣiọ he tin to yé mẹ lẹ jẹage.” “Hadẹs” dlẹnalọdo yọdò paa gbẹtọvi lẹ tọn. (Pọ́n Nudọnamẹ Dogọ, “Etẹwẹ Ṣeol po Hadẹs po Yin?”) Yọdò paa ehe lẹpo na yin hinhẹn jẹvọ́ mlẹnmlẹn. Oṣiọ liva susu he tin to finẹ lẹpo na yin hinhẹngọwa ogbẹ̀ whladopo dogọ. Apọsteli Paulu dọmọ: “Fọnsọnku dodonọ lẹ tọn, po mawadodonọ lẹ po tọn de na tin.” (Owalọ lẹ 24:15) Etẹwẹ enẹ zẹẹmẹdo?

18. Mẹnu lẹ wẹ “dodonọ” he na yin finfọnsọnku lẹ bẹhẹn, podọ nawẹ todido ehe sọgan yinuwado hiẹ lọsu titi ji gbọn?

¹⁸ “Dodonọ lẹ” bẹ susu mẹhe go Biblu dọho gando lẹ tọn hẹn he nọgbẹ̀ jẹnukọnna aigba ji wiwá Jesu tọn. Hiẹ sọgan lẹnnupọndo Noa, Ablaham, Sala, Mose, Luti, Ẹsteli, po mẹsusu devo lẹ po ji. Heblu lẹ weta 11 dọhodo delẹ to sunnu po yọnnu po nugbonọ ehelẹ mẹ ji. Ṣigba “dodonọ lẹ” sọ bẹ devizọnwatọ Jehovah tọn he kú to ojlẹ mítọn mẹ lẹ hẹn ga. Na todido fọnsọnku tọn he mí tindo wutu, mí sọgan vò todin sọn obu okú tọn si.—Heblu lẹ 2:15.

19. Mẹnu lẹ wẹ yin “mawadodonọ lẹ,” podọ dotẹnmẹ tẹwẹ Jehovah gbọn homẹdagbe dali hundote na yé?

¹⁹ Etẹwẹ na jọ do mẹhe ma sẹ̀n kavi setonuna Jehovah na yé ma yọ́n nudepope dogbọn ewọ dali lẹ go? “Mawadodonọ” liva susu ehelẹ ma na yin winwọn gba. Omẹ ehelẹ lọsu na yin finfọnsọnku bọ dotẹnmẹ na yin nina yé nado plọnnu dogbọn Jiwheyẹwhe nugbo lọ dali na yé nido nọ sẹ̀n ẹn. To gblagbla owhe fọtọ́n lọ tọn mẹ, oṣiọ lẹ na yin finfọnsọnku bọ dotẹnmẹ na yin nina yé nado kọnawudopọ hẹ gbẹtọvi dodonọ lẹ to aigba ji to sinsẹ̀n-bibasina Jehovah mẹ. Ojlẹ jiawu tlala de wẹ e na yin. Ojlẹ ehe wẹ Biblu ylọdọ Whẹdazan.b

20. Etẹwẹ Gẹhẹnna zẹẹmẹdo, podọ mẹnu lẹ wẹ nọ yì finẹ?

²⁰ Be enẹ zẹẹmẹdo dọ gbẹtọvi he ko nọgbẹ̀ pọ́n lẹpo wẹ na yin finfọnsọnku ya? Lala. Biblu dọ dọ oṣiọ delẹ tin to “Gẹhẹnna” mẹ. (Luku 12:5, nudọnamẹ odò tọn) Agbàdo lọ he mẹ onú kudiho lẹ nọ yin bibẹ dlan do to gbonu adó tòdaho Jelusalẹm hohowhenu tọn wẹ nọ yin yiylọdọ Gẹhẹnna. Onú kúkú lẹ po ogbó po wẹ nọ yin mimẹ̀ to finẹ. Oṣiọ sẹ́nhẹngbatọ he ko peve lẹ tọn nọ yin dindlan do finẹ, na yé nọ yin pinpọnhlan gbọn Juvi lẹ dali taidi mẹhe ma jẹ nado yin didi podọ na fọnsọnku. Enẹwutu Gẹhẹnna yin hogbe yẹhiadonu tọn de he sọgbe pẹpẹ hẹ vasudo madopodo. Dile etlẹ yindọ Jesu tindo azọngban nado dawhẹna mẹhe to ogbẹ̀ po oṣiọ lẹ po, Jehovah wẹ yin Whẹdatọ daho hugan lọ. (Owalọ lẹ 10:42) Ewọ ma na fọ́n mẹylankan he ma jlo na lẹnvọjọ lẹ sọnku gba.

21, 22. (a) Fọnsọnku wunmẹ devo tẹwẹ sọ tin? (b) Mẹnu wẹ yin omẹ tintan lọ he yin finfọnsọnku do ogbẹ̀ gbigbọnọ de mẹ?

²¹ Biblu sọ dlẹnalọdo fọnsọnku wunmẹ devo, he yin gbẹninọ taidi nudida gbigbọnọ to olọn mẹ. Apajlẹ fọnsọnku ehe tọn dopo poun go wẹ Biblu donù, enẹ wẹ Jesu Klisti tọn.

²² To whenuena Jesu yin hùhù taidi gbẹtọvi de, Jehovah ma jo Visunnu nugbonọ Etọn do nado gbọṣi yọdò mẹ gba. (Psalm 16:10; Owalọ lẹ 13:34, 35) Jiwheyẹwhe fọ́n Jesu sọnku, ṣigba e ma yin taidi gbẹtọvi de gba. Apọsteli Pita basi zẹẹmẹ dọ Klisti yin “[hùhù] to agbasalan mẹ, ṣigba bọ yè hẹn wá ogbẹ̀ to gbigbọ mẹ.” (1 Pita 3:18) Na nugbo tọn, azọ́njiawu daho de wẹ ehe yin. Jesu yin hinhẹngọwa ogbẹ̀ whladopo dogọ taidi gbẹtọ gbigbọnọ huhlọnnọ de! (1 Kọlintinu lẹ 15:3-6) Jesu wẹ yin omẹ tintan lọ he mọ fọnsọnku gigonọ ehe yí. (Johanu 3:13) Ṣigba mẹdevo lẹ na mọ fọnsọnku wunmẹ ehe yí ga.

23, 24. Mẹnu lẹ wẹ “lẹngbọpa pẹvi” Jesu tọn bẹhẹn, podọ nẹmu wẹ yin sọha yetọn?

²³ Na e yọnẹn dọ emi na lẹkọyi olọn mẹ to madẹnmẹ wutu, Jesu dọna hodotọ etọn nugbonọ lẹ dọ emi na “wleawu otẹn de tọn” na yé to finẹ. (Johanu 14:2) Jesu ylọ mẹhe jei olọn mẹ lẹ dọ “lẹngbọpa pẹvi.” (Luku 12:32) Omẹ nẹmu wẹ pipli pẹvi Klistiani nugbonọ ehelẹ tọn na bẹhẹn? Sọgbe hẹ Osọhia 14:1, apọsteli Johanu dọmọ: ‘Yẹn sọ pọ́n, doayi e go, Lẹngbọvu de Jesu Klisti ṣite to osó Ziọni ji, po gbẹtọ fọtọ́n donu kantọ̀nkonukunẹnẹ po e po, yé sọ tindo oyín etọn podọ Otọ́ etọn tọn he yè wlan do nukọn yetọn.’

²⁴ Klistiani 144 000 ehelẹ, he bẹ apọsteli nugbonọ Jesu tọn lẹ hẹn, nọ yin finfọ́n do ogbẹ̀ to olọn mẹ. Whetẹnu wẹ fọnsọnku yetọn jọ? Apọsteli Paulu wlanwe dọ e na jọ to ojlẹ tintin tofi Klisti tọn whenu. (1 Kọlintinu lẹ 15:23) Dile hiẹ na plọn to Weta 9tọ mẹ do, mí ko to gbẹnọ to ojlẹ enẹ mẹ. Enẹwutu eyin depope to sọha kleun he pò to 144 000 lẹ mẹ kú todin, e nọ yin finfọnsọnku do ogbẹ̀ olọn mẹ tọn mẹ to afọdopolọji. (1 Kọlintinu lẹ 15:51-55) Ṣigba, susugege gbẹtọvi lẹ tọn tindo nukundido nado yin finfọnsọnku to sọgodo do Paladisi mẹ to aigba ji.

25. Etẹwẹ na yin hodọdeji to weta he bọdego mẹ?

²⁵ Mọwẹ, matin ayihaawe Jehovah na và kẹntọ mítọn he yin okú sudo, bọ e na busẹ kakadoi! (Isaia 25:8) Etomọṣo, hiẹ sọgan kanse dọ, ‘Etẹwẹ mẹhe yin finfọ́n do olọn mẹ lẹ na wà to dọ́n?’ Yé na yin apadewhe gandudu Ahọluduta gigonọ olọn mẹ tọn. Mí na plọn nususu dogọ gando gandudu enẹ go to weta he bọdego mẹ.