Lehe Mí Dona Nọ Yinuwa hẹ Mẹhe Yin Didesẹ sọn Agun mẹ Do

Onú ṣinṣinyan wẹ na vẹna mí yì ahun mẹ sọ awufiẹsa he mí nọ mọ to whenuena hagbẹ whẹndo tọn kavi họntọn vivẹ de yin didesẹ sọn agun mẹ na e ma lẹnvọjọ sọn ylando etọn mẹ wutu. Lehe mí yinuwa sọgbe hẹ anademẹ Biblu tọn do whẹho ehe ji do sọgan do obá he mẹ owanyi mítọn na Jiwheyẹwhe po nugbonọ-yinyin mítọn na tito etọn po siso jẹ hia.a Mì gbọ mí ni gbadopọnna delẹ to kanbiọ he fọ́n do whẹho ehe ji lẹ mẹ.

Nawẹ mí dona nọ yinuwa hẹ mẹhe yin didesẹ sọn agun mẹ gbọn? Biblu dọmọ: “Eyin mẹhe yè ylọ mẹmẹsunnu de yin galọtọ, kavi nukunkẹnnọ, kavi boṣiọ-sẹ̀ntọ, kavi nutlọtọ, kavi ahànnumunọ, kavi alọslonamẹtọ; mì dùnú hẹ omẹ mọtọnnkọ lala blo.” (1 Kọlintinu lẹ 5:11) Mí hia gando mẹdepope he ma “nọte to oplọn Klisti tọn mẹ” go dọmọ: “Mì yí i do owhé mìtọn gbè kavi dọnudo e gbede blo. Na ewọ he dọnudo e yin mimátọ to azọ́n ylankan etọn lẹ mẹ.” (2 Johanu 9-11, NW ) Mí ma nọ dogbẹ́ kavi dọhodo gbigbọnu lẹ ji hẹ mẹhe yin didesẹ sọn agun mẹ lẹ. Atọ̀họ̀-Nuhihọ́ Lọ Tọn 1^er janvier 1982, weda 11, dọmọ: ‘Na a te do tata didọna mẹde sọgan yin afọdide tintan he na planmẹ biọ hodọdopọ kavi etlẹ yin họntọnjiji mẹ. Be mí na jlo nado ze afọdide tintan enẹ po mẹhe yin didesẹ sọn agun mẹ de po ya?’

Be dandan wẹ dọ mí ni dapana mẹhe yin didesẹ sọn agun mẹ lẹ mlẹnmlẹn ya? Mọwẹ, na whẹwhinwhẹ́n susu wutu. Tintan, mọwiwà nọ do nugbonọ-yinyin na Jiwheyẹwhe po Ohó etọn po hia. Mí nọ setonuna Jehovah, e ma yin to whenuena e bọawu nado wàmọ kẹdẹ wẹ gba ṣigba to whenuena mọwiwà tlẹ vẹawu taun ga. Owanyi he mí tindo na Jiwheyẹwhe nọ whàn mí nado setonuna gbedide etọn lẹpo, na mí yọnẹn dọ ewọ yin dodonọ, owanyinọ, podọ osẹ́n etọn lẹ nọ hẹn ale susu wá na mí wutu. (Isaia 48:17; 1 Johanu 5:3) Awetọ, didapana ylanwatọ he ma lẹnvọjọ nọ basi hihọ́na mí po hagbẹ agun lọ tọn he pò lẹ po ma nado yin hinhẹnflu to gbigbọ-liho podọ to walọyizan-liho bosọ nọ gọalọ nado hẹn oyín dagbe agun lọ tọn go. (1 Kọlintinu lẹ 5:6, 7) Atọ̀ntọ, eyin mí tẹdo nunọwhinnusẹ́n Biblu tọn lẹ go, ehe sọgan hẹn ale wá na mẹhe yin didesẹ sọn agun mẹ lọ. Gbọn godoninọna nudide wedegbẹ́ whẹdida tọn dali, mí sọgan hẹn ylanwatọ he ma ko kẹalọyi vivẹnudido mẹho lẹ tọn nado gọalọna ẹn kakajẹ din lọ nado lẹnnupọn. Gbẹdido họakuẹ mẹyiwanna etọn lẹ tọn hinhẹnbu sọgan gọalọna ẹn nado ‘gọ̀ biọ ede mẹ’ bo mọ obá he mẹ ylando etọn sinyẹn jẹ bosọ ze afọdide he jẹ lẹ nado lẹkọwa Jehovah dè.—Luku 15:17.

Eyin hẹnnumẹ mítọn de yin didesẹ sọn agun mẹ lo? To whẹho mọnkọtọn mẹ, haṣinṣan pẹkipẹki he tin to hagbẹ whẹndo tọn lẹ ṣẹnṣẹn sọgan tẹ́n nugbonọ-yinyin yetọn pọ́n taun. Nawẹ mí dona nọ yinuwa hẹ hẹnnumẹ he yin didesẹ sọn agun mẹ de gbọn? Mí ma sọgan dọhodo ninọmẹ he sọgan fọ́n lẹpo ji tofi gba, ṣigba mì gbọ mí ni gbadopọnna ninọmẹ tangan awe.

To whedelẹnu, hagbẹ whẹndo tọn he yin didesẹ sọn agun mẹ lọ sọgan gbẹ́ nọ nọ̀ owhé dopolọ gbè hẹ hagbẹ whẹndo lọ tọn he pò lẹ. To whenuena e yindọ kanṣiṣa whẹndo tọn ma ko sán na e yin didesẹ sọn agun mẹ wutu, nuwiwa po nuyiwa dopọ egbesọegbesọ whẹndo tọn lẹ po sọgan zindonukọn. Ṣogan, gbọn aliho nuyiwa tọn etọn dali, mẹlọ ko de nado sán kanṣiṣa gbigbọmẹ tọn he tin to ewọ po hagbẹ yisenọ whẹndo etọn tọn lẹ po ṣẹnṣẹn. Enẹwutu hagbẹ whẹndo lọ tọn he yin nugbonọ lẹ ma sọgan má gbigbọnu lẹ hẹ ẹ ba. Di apajlẹ, eyin whẹndo lọ pli nado plọn Biblu dopọ, mẹhe yin didesẹ lọ ma na tindo mahẹ to e mẹ. Ṣigba, eyin ovivu wẹ mẹhe yin didesẹ sọn agun mẹ lọ, azọngban mẹjitọ lẹ tọn wẹ e gbẹ́ yin nado plọn ẹn bo domẹplọnlọ e go. Enẹwutu mẹjitọ owanyinọ lẹ sọgan basi tito nado plọn Biblu hẹ ovi lọ.b—Howhinwhẹn lẹ 6:20-22; 29:17.

To whẹho devo lẹ mẹ, e sọgan yindọ hagbẹ whẹndo tọn he yin didesẹ sọn agun mẹ lọ ma nọ nọ̀ owhé dopolọ gbè hẹ mẹhe pò lẹ. Dile etlẹ yindọ yé sọgan tin to dandannu glọ nado nọ mọ yede to kleun mẹ na whẹho titengbe whẹndo lọ tọn de to whedelẹnu, ojlẹ mọnkọtọn lẹ ma dona nọ wá aimẹ whẹwhẹ gba. Klistiani nugbonọ lẹ ma nọ dín whẹjijọ nado dogbẹ́ hẹ hagbẹ whẹndo yetọn tọn he yin didesẹ sọn agun mẹ bo ma nọ nọ̀ owhé dopolọ gbè hẹ yé. Kakatimọ, nugbonọ-yinyin na Jehovah po titobasinanu etọn po nọ whàn yé nado nọgodona tito Owe-wiwe tọn gando mẹdesẹ sọn agun mẹ go. Nugbonọ-yinyin yetọn na wadagbe na ylanwatọ lọ bo nasọ gọalọna ẹn nado mọaleyi sọn mẹplọnlọ he yin dido e go mẹ.c—Heblu lẹ 12:11.