Malia Mọhò, Ṣigba E Ma Ko Wlealọ

E ko yì osun ẹnẹ bọ Malia to ohò. Flindọ to whenue Malia mọhò, e ma dẹn bọ e yì hẹnnumẹ etọn Elizabẹti dè to lẹdo pópló Jude tọn lẹ mẹ to hùwaji. Ṣigba todin, Malia ko lẹkọwa whégbè to Nazalẹti. Tofi, mẹsusu na yọnẹn to madẹnmẹ dọ e to ohò. Pọ́n lehe ninọmẹ enẹ na ko hẹn ayimajai wá na ẹn do sọ!

Nuhe sọ hẹn ninọmẹ lọ ylan taun wẹ yindọ Malia ko dopà nado wlealọ hẹ whlẹpatọ de to lẹdo etọn mẹ. Yinkọ etọn wẹ Josẹfu. Podọ e sọ yọnẹn dọ sọgbe hẹ Osẹ́n he Jiwheyẹwhe na Islaeli, eyin yọnnu he ko dopà nado wlealọ hẹ sunnu de sọ yigbe bọ sunnu devo tindo kọndopọ zanhẹmẹ tọn hẹ ẹ, yè dona dlan zannu do e hù. (Deutelonomi 22:23, 24) Enẹwutu, dile etlẹ yindọ Malia ma tindo kọndopọ zanhẹmẹ tọn hẹ sunnu de, e sọgan to nuhà gando lehe e na basi zẹẹmẹ na Josẹfu dọ emi mọhò do go, podọ nuhe na jọ bọdego.

Na e ko yì osun atọ̀n bọ Malia tọ́n, e họnwun dọ Josẹfu na ko to jejeji nado vọ́ ẹ mọ. To whenue yé mọ yede, Malia na ko dọna Josẹfu dọ emi to ohò bo wà nuhe go e pé lẹpo nado basi zẹẹmẹ na ẹn dọ emi to ohò gbọn gbigbọ wiwe Jiwheyẹwhe tọn gblamẹ. Etomọṣo, dile hiẹ sọgan mọ do, e na vẹawuna Josẹfu taun nado mọnukunnujẹ ohó enẹ mẹ bosọ yí i sè.

Josẹfu yọnẹn dọ yọnnu dagbe de wẹ Malia yin bosọ tindo walọ dagbe. Podọ Josẹfu sọ yiwanna ẹn taun. Ṣigba, mahopọnna nuhe Malia dọ lẹpo, Josẹfu mọdọ sunnu devo janwẹ e na ko mọhò na. Na Josẹfu ma jlo dọ yè ni dlan zannu do Malia hù kavi dọ yè ni dowinyan ẹn to gbangba wutu, e lẹn nado gbẹ́ ẹ dai to nuglọ. To ojlẹ enẹlẹ mẹ, omẹ awe he ko dopà alọwle tọn na yede lẹ nọ yin pinpọnhlan taidi asu po asi po. Enẹwutu, eyin yé masọ jlo nado wlealọ ba, yé dona basi gbẹdai.

To nukọn mẹ, dile Josẹfu gbẹ́ to nulẹnpọn do whẹho lọ ji, e yì mlọnai. Angẹli Jehovah tọn sọawuhia ẹ to odlọ mẹ bo dọmọ: “Josẹfu, visunnu Davidi tọn, a dibu nado plan asi towe Malia do whégbè blo, na ohò he e mọ lọ yin gbọn gbigbọ wiwe dali. Ewọ na ji visunnu de, podọ hiẹ dona ylọ oyín etọn dọ Jesu, na e na whlẹn omẹ etọn lẹ sọn ylando yetọn lẹ mẹ.”—Matiu 1:20, 21.

To whenue Josẹfu fọ́n sọn amlọn mẹ, lehe e na ko yọ́n pinpẹn etọn do sọ dọ whẹho lọ yin hinhẹn họnwun na ẹn todin! E ma dọngbàn nado basi kẹdẹdile angẹli lọ degbena ẹn do. E plan Malia do owhé etọn gbè. Na taun tọn, nuyiwa gbangba tọn de wẹ enẹ yin, taidi hùnwhẹ alọwle tọn, nado dohia dọ Josẹfu po Malia po ko wlealọ todin. Etomọṣo, Josẹfu ma tindo kọndopọ zanhẹmẹ tọn hẹ Malia to whenue e to ohò Jesu tọn.

To osun delẹ godo, Josẹfu po Malia he ohò etọn ko whẹ́n po, dona wleawu nado zingbejizọnlin gaa de yì fie dẹn do owhé yetọn gbè to Nazalẹti. Fitẹ wẹ yé tin to dandannu glọ nado yì todin he vijiji Malia tọn ko sẹpọ?