E Tindo Huhlọn Do Aovi Susu Ji

Dile devi lẹ lẹkọwa huto to ninọmẹ dobu he mẹ yé jugbọn to ohù ji lọ godo, yé mọ nude he paṣa yé. Dawe awe delẹ he ylanhùn taun bo tindo gbigbọ aovi tọn wá sọn tẹpa he to yakẹ de mẹ bo họ̀nwezun jei Jesu dè! Dopo to dawe lọ lẹ mẹ dọ̀n ayidonugo mẹtọn taun, vlavo na e ylanhùn hugan bọ aovi lẹ ko to e mẹ na whenu dindẹn wutu.

Dawe agbátọnọ ehe tlẹ nọ zọ̀n omẹ́ pé. To ozán po okle po, e nọ “to awhádo to yọdò lẹ ṣẹnṣẹn podọ to osó lẹ ji bo nọ yí zannu lẹ do to awugblena ede.” (Malku 5:5) E ylanhùn sọmọ bọ obu nọ di gbẹtọ lẹ nado gbọn awà ali enẹ tọn ji. Mẹdelẹ ko tẹnpọn nado blá ẹ, ṣigba e nọ wẹ́n gẹdẹ lọ lẹ bo nọ gbà afọgàn he to afọ na ẹn lẹ. Mẹdepope ma tindo huhlọn nado hùwhẹ́ ẹ.

Dile dawe lọ dọnsẹpọ Jesu bo jẹklo to afọ etọn lẹ kọ̀n, aovi he to e ji lọ lẹ hẹn ẹn nado dawhá dọmọ: “Etẹwẹ yẹn tindo nado wà hẹ we, hiẹ Jesu, Visunnu Jiwheyẹwhe Gigogán lọ tọn? Yẹn biọ to hiẹ si nado yí Jiwheyẹwhe do whlé ma nado sayana mi.” Jesu dohia dọ emi tindo aṣẹpipa do aovi lẹ ji bo degbe dọmọ: “Tọ́njẹgbonu sọn dawe lọ mẹ, hiẹ gbigbọ mawé.”—Malku 5:7, 8.

Na taun tọn, huhlọn aovi susu tọn glọ wẹ dawe lọ tin te. To whenue Jesu kanse dọ, “Nawẹ hiẹ nọ yin?” e gblọn dọmọ: “Yẹn nọ yin Awhànpa, na mí omẹ susu wẹ.” (Malku 5:9) Awhànpa Lomunu lẹ tọn dopo nọ bẹ awhànfuntọ fọtọ́n lẹ hẹn; enẹwutu aovi susu wẹ pli dopọ do dawe ehe ji bo nọ mọ awuvivi to yajiji etọn mẹ. Yé vẹ̀ Jesu “ma nado degbe dọ yé ni yì odò mapote mẹ.” Nuhe to tepọn yewlẹ po ogán yetọn Satani po na ko họnwun na yé.—Luku 8:31.

Pipli ohàn tọn de he bẹ nudi ohàn 2 000 hẹn to núdù to fie ma dẹn do finẹ. Sọgbe hẹ Osẹ́n lọ, kanlin ehelẹ yin mawé podọ Ju lẹ ma tlẹ dona tindo yé. Aovi lọ lẹ dọmọ: “Do mí hlan ohàn lọ lẹ mẹ, na mí nido sọgan biọ yé mẹ.” (Malku 5:12) Jesu na yé gbè nado yì bọ yé biọ ohàn lọ lẹ mẹ. Whenẹnu, ohàn 2 000 lọ lẹpo hozín yì pópló ji bo flẹ jẹ ohù mẹ.

To whenue mẹhe nọ penukundo ohàn lọ lẹ go lẹ mọ ehe, yé họ̀nwezun bo yì na linlin nuhe jọ lọ tọn to tòdaho lọ mẹ podọ to glètoho lọ mẹ. Gbẹtọ lẹ sọ wá nado pọ́n nuhe ko jọ. To whenue yé wá, yé mọdọ dawe he mẹ aovi lẹ tọ́n sọn lọ to ganji bo to nuyiwa to aliho he sọgbe mẹ. Etẹ nkọ! E do awù bo sin afọ Jesu tọn lẹ kọ̀n!

Obu sọ jẹ mẹhe sè nujijọ ehe kavi mọ dawe lọ lẹ ji, na yé ma mọnukunnujẹ nuhe enẹ zẹẹmẹdo na yé mẹ wutu. Yé vẹvẹna Jesu nado yì sọn lẹdo yetọn mẹ. Dile Jesu to tọjihun mẹ biọ nado yì, dawe he tindo gbigbọ aovi tọn dai lọ jẹ vivẹ̀ ẹ ji nado dike emi ni hodo e. Ṣigba, Jesu dọna dawe lọ dọmọ: “Yì whégbè to hẹnnumẹ towe lẹ dè, bo dọ nuhe Jehovah ko wà na we lẹpo gọna lẹblanu he e ko dohia we na yé.”—Malku 5:19.

Jesu nọ saba dọna mẹhe ewọ hẹnazọ̀ngbọna lẹ ma nado dọna mẹde, na e ma jlo dọ gbẹtọ lẹ ni yọ́n mẹhe ewọ yin gbọn linlin azọ́njiawu lẹ tọn sisè poun dali. To whẹho ehe mẹ, dawe he tindo gbigbọ aovi tọn dai lọ yin kunnudenu jọnun huhlọn he Jesu tindo tọn, podọ ewọ sọgan dekunnuna mẹhe dè Jesu lọsu ma sọgan yì lẹ. Kunnudide etọn sọ sọgan vọ́ linlin agọ̀ depope he na yin nina gando ohàn he busẹ lọ lẹ go jlado. Enẹwutu, dawe lọ yì bo jẹ nuhe Jesu wà na ẹn lẹ lá pé ji to Dekapole.