Yin Awuwledaina Nado Dọyẹwheho Mahopọnna Homẹkẹn

Jesu na anademẹ dagbe hugan lẹ apọsteli etọn lẹ gando lehe yé na wazọ́n yẹwhehodidọ tọn lọ do go, dile yé to yìyì awe awe. Ṣigba, e ma nọte do finẹ. E yí homẹdagbe do na avase yé gando nukundiọsọmẹtọ lẹ go dọmọ: “Mì pọ́n! yẹn to dido mì hlan taidi lẹngbọ lẹ to ohla lẹ ṣẹnṣẹn . . . Mì nọ họ́ mìde sọta gbẹtọ lẹ, na yé na ze mì jo na whẹdatẹn pẹvi lẹ bọ yé na hò mì to sinagọgu yetọn lẹ mẹ. Mì nasọ yin hinhẹn yì ayimatẹn-gán po ahọlu lẹ po nukọn na yẹn tọn wutu.”—Matiu 10:16-18.

Mọwẹ, hodotọ Jesu tọn lẹ sọgan pehẹ homẹkẹn sinsinyẹn, enẹwutu e dopà jidevọnamẹ tọn de na yé dọmọ: “To whenuena yé ze mì jo, mì yin magbọjẹnọ gando lehe kavi nuhe mì na dọ go blo, na nuhe mì na dọ na yin nina mì to gànhiho enẹ mẹ; na e ma yin mìwlẹ kẹdẹ wẹ to hodọ gba, ṣigba gbigbọ Otọ́ mìtọn tọn wẹ to hodọ gbọn mì dali.” Jesu zindonukọn dọmọ: “Nọvisunnu na ze nọvisunnu jo nado yin hùhù bọ otọ́ na ze ovi etọn jo, podọ ovi lẹ na fọ́n do mẹjitọ lẹ ji na yé nido yin hùhù. Podọ gbẹtọ lẹpo na gbẹwanna mì na oyín ṣie tọn wutu, ṣigba mẹhe doakọnna kakajẹ opodo wẹ na yin whinwhlẹngán.”—Matiu 10:19-22.

Na yẹwhehodidọ lọ wẹ yin nujọnu hugan wutu, Jesu zinnudo nuhudo lọ nado yin nuyọnẹntọ ji na hodotọ etọn lẹ, na yé nido sọgan zindonukọn to azọ́n ehe wiwà mẹ. E dọmọ: “Eyin yé dohomẹkẹn mì to tòdaho de mẹ, mì họnyi devo mẹ; na nugbo wẹ yẹn dọna mì, mìwlẹ ma to na gbọn tòdaho Islaeli tọn lẹpo mẹ lẹdo pé to aliho depope mẹ whẹpo Visunnu gbẹtọ tọn nido wá.”—Matiu 10:23.

Anademẹ, avase po tuli dagbe nankọ po die Jesu na apọsteli etọn 12 lẹ! Ṣigba, ohó ehelẹ sọ gando mẹhe na tindo mahẹ to azọ́n yẹwhehodidọ tọn lọ mẹ to okú po fọnsọnku Jesu tọn po godo lẹ go ga. Ehe họnwun to whenue e dọ dọ “gbẹtọ lẹpo na gbẹwanna” devi emitọn lẹ, e ma yin mẹhe dè apọsteli lẹ yin didohlan nado dọyẹwheho na lẹ kẹdẹ gba. Humọ, mí ma mọ hia dọ apọsteli lẹ yin hinhẹn yì ayimatẹn-gán po ahọlu lẹ po nukọn to ojlẹ kleun he yé yí do dọyẹwheho to Galili whenu kavi dọ hagbẹ whẹndo tọn lẹ ze yé jo nado yin hùhù gba.

E họnwun dọ sọgodo ji wẹ Jesu to nulẹnpọn do to whenue e dọ onú ehelẹ na apọsteli lọ lẹ. Lẹnnupọndo hodidọ etọn ji dọ devi etọn lẹ ma na dọyẹwheho gbọn filẹpo “whẹpo Visunnu gbẹtọ tọn nido wá.” Jesu to didohia dọ devi etọn lẹ ma na dotana yẹwhehodidọ gando Ahọluduta Jiwheyẹwhe tọn go whẹpo Ahọlu Jesu Klisti he yin gigopana lọ nido wá taidi whẹdatọ he Jiwheyẹwhe de.

Dile apọsteli lẹ to yẹwhehodọ, e ma dona paṣa yé dọ yé na pehẹ nukundiọsọmẹ, na Jesu dọmọ: “Devi de ma nọ hú mẹplọntọ etọn, mọjanwẹ afanumẹ de ma nọ hú klunọ etọn do niyẹn.” Nuhe dọ Jesu te họnwun. E pehẹ nuyiwahẹmẹ agọ̀ po homẹkẹn po, na yẹwheho Ahọluduta Jiwheyẹwhe tọn didọ wutu, podọ nudopolọ wẹ na jọ do yelọsu go. Ṣigba, Jesu na avase dọmọ: “Mì dibusi yé he nọ hù agbasa ṣigba he ma sọgan hù alindọn blo; ṣigba, mì kúkú gbọ bo dibusi ewọ he sọgan và alindọn po agbasa po sudo to Gẹhẹnna mẹ.”—Matiu 10:24, 28.

Jesu ze apajlẹ dai to adà ehe mẹ. E yí adọgbigbo do doakọnna okú kakati nado jogbe bo ma yin nugbonọ na Jehovah, yèdọ na Jiwheyẹwhe Ganhunupotọ lọ. Ewọ wẹ sọgan và mẹde sin “alindọn” (enẹ wẹ todido sọgodo tọn etọn nado mọ ogbẹ̀) sudo kavi fọ́n ẹn sọnku nado duvivi ogbẹ̀ madopodo tọn. Lehe enẹ dona ko vọ́ jide na apọsteli lẹ do sọ!

Jesu do lehe Jiwheyẹwhe nọ penukundo devi etọn lẹ go po owanyi po do hia dọmọ: “Oblẹnọ awe wẹ nọ yin sisà yin abọgan-kuẹ pẹvi dopo, kavi e ma yin mọ wẹ? Ṣogan, depope to yé mẹ ma na flẹ jẹ kọmẹ bọ Otọ́ mìtọn ma na yọnẹn. . . . Enẹwutu, mì dibu blo; mìwlẹ họakuẹ hú oblẹnọ susu.”—Matiu 10:29, 31.

Owẹ̀n he lá devi Jesu tọn lẹ te na klan whédo lẹ, na hagbẹ whẹndo tọn delẹ na kẹalọyi i bọ devo lẹ na gbẹ́ ẹ wutu. Jesu dọmọ: “Mì lẹndọ yẹn wá nado hẹn jijọho wá aigba ji blo.” Mọwẹ, e nọ biọ adọgbigbo to hagbẹ whẹndo tọn de si nado kẹalọyi nugbo Biblu tọn. Jesu sọ dọmọ: “Mẹdepope he tindo owanyi na otọ́ kavi onọ̀ hú mi ma jẹna mi; podọ mẹdepope he tindo owanyi na visunnu kavi viyọnnu hú mi ma jẹna mi.”—Matiu 10:34, 37.

Etomọṣo, mẹdelẹ na yí devi lẹ ganji. E dọmọ: “Mẹdepope he na osin fifá kọfo dopo tata dopo to omẹ pẹvi ehelẹ mẹ nado nù na e yin devi de wutu, nugbo wẹ yẹn dọna mì, ewọ ma na hẹn ale etọn bu to aliho depope mẹ gba.”—Matiu 10:42.

Po anademẹ, avase gọna tuli he Jesu na apọsteli etọn enẹlẹ po, yé “gbọn aigba lọ pete ji sọn gbétatò de mẹ jẹ gbétatò de mẹ, bo to wẹndagbe lọ lá bosọ to azọ̀nhẹngbọ to filẹpo.”—Luku 9:6.