Nuhudo Titengbe Awe—Odẹ̀ po Whiwhẹ Po

Jesu ko na apajlẹ de devi etọn lẹ gando linsinsinyẹn to odẹ̀ mẹ go. (Luku 11:5-13) Todin, e sọgan ko to Samalia kavi Galili, podọ e vọ́ nùzindeji dọ mí ma dona nọ gbọjọ na nuhe dù dẹ̀hiho. Nado wàmọ, e na apajlẹ devo dọmọ:

“Dawe whẹdatọ de tin to tòdaho de mẹ he ma nọ dibusi Jiwheyẹwhe bo masọ nọ si gbẹtọ. Asuṣiọsi de sọ tin to tòdaho enẹ mẹ he nọ yì e dè whẹwhẹ, bo nọ dọmọ, ‘Hẹn ẹn diun dọ yẹn mọ whẹdida dodo yí do mẹhe yẹn pé-whẹ̀ hẹ lọ ji.’ Na ojlẹ de, ewọ ma tindo ojlo, ṣigba to godo mẹ, e dọna ede dọ, ‘Dile etlẹ yindọ yẹn ma nọ dibusi Jiwheyẹwhe kavi na sisi gbẹtọ sọ, na asuṣiọsi ehe to tuklado mi mapote wutu, yẹn na hẹn ẹn diun dọ e mọ whẹdida dodo yí, na e nikaa to wiwá bo hẹn agbọ́ pé mi po obiọ mapote etọn lẹ po.’”—Luku 18:2-5.

Jesu basi yọ́n-na-yizan apajlẹ lọ tọn dọmọ: “Mì sè nuhe whẹdatọ lọ dọ, dile ewọ tlẹ yin mawadodonọ do sọ! To whelọnu lo, na nugbo tọn, be Jiwheyẹwhe ma na hẹn ẹn diun dọ whẹdida dodo yin bibasi na mẹdide etọn lẹ he to awhádo hlan ẹn to okle po ozán po, dile etlẹ yindọ e to linsinyẹn dohlan yé ya?” (Luku 18:6, 7) Etẹwẹ hogbe Jesu tọn ehelẹ to didohia gando Otọ́ etọn go?

E họnwun dọ Jesu ma to didọ dọ Jehovah Jiwheyẹwhe taidi whẹdatọ mawadodonọ lọ to aliho depope mẹ. Kakatimọ, vogbingbọn he e jlo na dohia die: Eyin gbẹtọvi he tlẹ yin whẹdatọ mawadodonọ de sọgan kẹalọyi obiọ he yin bibasi po linsinsinyẹn po, ayihaawe ma tin dọ Jiwheyẹwhe na wàmọ. Ewọ yin dodonọ bo jọmẹ bo nasọ na gblọndo odẹ̀ omẹ etọn lẹ tọn, eyin yé ma gbọjọ. Nuhe Jesu dọ bọdego sọ hẹn enẹ họnwun dọmọ: “Yẹn dọna mì dọ: [Jiwheyẹwhe] na hẹn ẹn diun dọ whẹdida dodo yin bibasi na yé po awuyiya po.”—Luku 18:8.

Gbẹtọ lẹ ma nọ saba dawhẹ dodo na agbátọnọ po wamọnọ lẹ po, amọ́ yé nọ saba do nukundagbe hia mẹgboogbo po adọkunnọ lẹ po. Ṣigba, Jiwheyẹwhe ma nọ wàmọ. To ojlẹ sisọ mẹ, e na hẹn ẹn diun dọ mẹylankan lẹ yin yasana bọ devizọnwatọ etọn lẹ mọ ogbẹ̀ madopodo.

Mẹnu lẹ wẹ tindo yise asuṣiọsi lọ tọn nkọ? Omẹ nẹmu wẹ yise nugbonugbo dọ Jiwheyẹwhe na “hẹn ẹn diun dọ whẹdida dodo yin bibasi na yé po awuyiya po”? Jesu ṣẹṣẹ dohia dọ mí dona nọ sinyẹnlin to odẹ̀ mẹ wẹ. Todin, na nuhe dù yise tintindo to huhlọn odẹ̀ tọn mẹ, e kanse dọmọ: “Whenuena Visunnu gbẹtọ tọn na wá, be ewọ na mọ yise ehe nkọ to aigba ji nugbonugbo ya?” (Luku 18:8) Nuhe dọ e te wẹ yindọ mẹsusu sọgan nọma tindo yise mọnkọtọn to whenue Klisti na wá.

Delẹ to mẹhe to todoaina Jesu lẹ mẹ nọ mọdọ yise yetọn ko pé. Yé dejido yede go dọ emi yin dodonọ, amọ́ yé nọ de mẹdevo lẹ pò. Omẹ mọnkọtọn lẹ wẹ Jesu na apajlẹ he bọdego ehe dọmọ:

“Dawe awe yì tẹmpli mẹ nado hodẹ̀, dopo yin Falesi de bọ awetọ yin tòkuẹ-ṣinyantọ de. Falesi lọ ṣite bo jẹ dẹ̀ho ji bosọ to onú ehelẹ dọ to ede mẹ dọmọ, ‘Jiwheyẹwhe E, yẹn dopẹna we dọ yẹn ma taidi mẹdevo lẹ—yèdọ alọslonamẹtọ lẹ, mawadodonọ lẹ, ayọdetọ lẹ—kavi etlẹ yin taidi tòkuẹ-ṣinyantọ ehe. Yẹn nọ blanù whla awe to osẹ dopo mẹ; yẹn nọ na mado-ao nuhe yẹn tindo lẹpo tọn.’”—Luku 18:10-12.

Falesi lẹ yin yinyọnẹn na dodonọ-jijlá yetọn. Yé nọ wàmọ nado hẹn awuji mẹdevo lẹ. Na mẹsusu nido mọ yé, yé nọ saba hẹn nùbibla zun dandan na yede to lundi po jeudi lẹ po, yèdọ azán he ji ahi daho lẹ nọ jẹ te. Podọ yé nọ gbọn hẹngogo dali na mado-ao etlẹ yin omá pẹvi lẹ tọn. (Luku 11:42) Osun vude jẹnukọn, yé do lehe yé gbẹwanna gbẹtọ paa lẹ do hia to whenue yé dọmọ: “Gbẹtọgun ehe, he ma yọ́n Osẹ́n lọ [to pọndohlan Falesi lẹ tọn mẹ] wẹ mẹhodẹ̀do lẹ.”—Johanu 7:49.

Jesu zindonukọn to apajlẹ etọn mẹ dọmọ: “Ṣigba, tòkuẹ-ṣinyantọ lọ he ṣite to olá ma tlẹ jlo nado ze nukun etọn lẹ daga hlan olọn, ṣigba to akọ́nnu etọn hò bosọ to didọmọ, ‘Jiwheyẹwhe E, wàlẹblanuna mi, yẹn ylandonọ.’” Na nugbo tọn, tòkuẹ-ṣinyantọ lọ gbọn whiwhẹ dali kẹalọyi nuṣiwa etọn lẹ. Jesu dotana dọmọ: “Yẹn dọna mì dọ: Dawe ehe yì owhé etọn gbè bo yin dodonọ hú dawe enẹ, na mẹdepope he ze ede daga wẹ yè na whiwhẹ, ṣigba ewọ he whiwhẹ ede wẹ yè na zedaga.”—Luku 18:13, 14.

Gbọnmọ dali, Jesu dohia hezeheze dọ mí dona yin whiwhẹnọ. Ayinamẹ họakuẹ de wẹ enẹ yin na devi etọn lẹ, yèdọ mẹhe yin pinplọn whẹ́n to lẹdo de he mẹ Falesi dodonọ-jlatọ lẹ nọ zinnudo ogántẹn ji hugan. Podọ ayinamẹ họakuẹ de wẹ e yin na hodotọ Jesu tọn lẹpo.