Naegbọn Yajiji Do Sù Sọmọ?

1, 2. Kanbiọ tẹwẹ mẹsusu nọ kanse?

YUJẸHỌN sinsinyẹn de hẹnnugble to gbétatò de mẹ. Danuwatọ de hẹn osò biọ ṣọṣi de mẹ, bo yí do gbleawuna mẹdelẹ bosọ hù mẹsusu. Azọ̀n kansẹẹ tọn hù nawe de sọn ovi etọn atọ́n lẹ kọ̀n.

² Eyin nugbajẹmẹji kavi nuylankan mọnkọtọn lẹ jọ, mẹsusu wẹ nọ kanse dọ, “Etẹwutu wẹ?” Mẹsusu nọ kàn nuhewutu aihọn do gọ́ na wangbẹna po yajiji po sọmọ sè. Be hiẹ lọsu ko kàn enẹ sè dewe pọ́n ya?

3, 4. (a) Kanbiọ tẹlẹ wẹ Habakuku kanse? (b) Nawẹ Jehovah na ẹn gblọndo gbọn?

³ To Biblu mẹ, mí hia dọ mẹhe tlẹ tindo yise he dolido to Jiwheyẹwhe mẹ lẹ lọsu kàn kanbiọ mọnkọtọn lẹ sè. Di apajlẹ, yẹwhegán Habakuku kanse Jehovah dọ: “Naegbọn hiẹ do hẹn mi nado to kanyinylan mọ? Podọ naegbọn hiẹ do jotẹnna kọgbidinamẹ? Naegbọn vasudo po danuwiwa po do tin to nukọnna mi? Podọ naegbọn jlẹdidọ po avùnhiho po do gbayipe?”—Habakuku 1:3.

⁴ To Habakuku 2:2, 3 mẹ, mí mọ gblọndo he Jiwheyẹwhe na Habakuku gọna opagbe he E do nado jla ninọmẹ lọ do. Jehovah yiwanna gbẹtọvi lẹ taun. Biblu dọmọ: “E to mìtọn hòpọn.” (1 Pita 5:7) Na nugbo tọn, yajiji mítọn nọ vẹna Jiwheyẹwhe hú lehe e nọ vẹna mílọsu do. (Isaia 55:8, 9) Eyin mọ wẹ, gbọ mí ni dọhodo kanbiọ ehe ji, Naegbọn yajiji do sù sọmọ to aihọn mẹ?

 5. Etẹwẹ mẹplọntọ sinsẹ̀n tọn susu nọ dọ gando yajiji go? Etẹwẹ Biblu plọnmẹ?

⁵ Sinsẹ̀ngán lẹ, yẹwhenọ lẹ po mẹplọntọ sinsẹ̀n tọn lẹ po nọ saba dọ dọ ojlo Jiwheyẹwhe tọn wẹ dọ gbẹtọ ni jiya. Mẹdelẹ sọgan dọ dọ nuhe nọ jọ do mẹde go lẹpo, kakajẹ nugbajẹmẹji lẹ ji, ko yin kinkandai jẹnukọn gbọn Jiwheyẹwhe dali bọ mí ma sọgan mọnukunnujẹemẹ gbede. Mẹdevo lẹ tlẹ sọgan nọ dọ dọ gbẹtọ lẹ, etlẹ yin ovi pẹvi lẹ nọ kú nado sọgan yì nọpọ́ hẹ Jiwheyẹwhe to olọn mẹ. Ṣigba, lalo wẹ. Jehovah ma nọ hẹn yajiji wá mí ji pọ́n gbede. Biblu dọmọ: “E dẹn do Jiwheyẹwhe nugbo lọ nado yinuwa po kanyinylan po, yèdọ Ganhunupotọ lọ nado waylan!”—Jobu 34:10.

 6. Naegbọn mẹsusu do nọ dowhẹ Jiwheyẹwhe na yajiji he gọ́ gbẹ̀mẹ wutu?

⁶ Mẹsusu wẹ nọ dowhẹ Jiwheyẹwhe na yajiji he gọ́ gbẹ̀mẹ wutu, na yé lẹndọ Jiwheyẹwhe wẹ to gandu do aihọn lọ ji. Ṣigba, dile mí ko plọn to Weta 3tọ mẹ do, mẹhe to gandu do aihọn ehe ji na taun tọn wẹ Satani Lẹgba.

7, 8. Naegbọn yajiji do sù sọmọ to aihọn mẹ?

⁷ Biblu dọna mí dọ “aihọn lọ pete tin to huhlọn mẹylankan lọ tọn glọ.” (1 Johanu 5:19) Ogán aihọn ehe tọn, Satani, ko gblezọn bosọ yin kanylantọ. Ewọ wẹ “to aigba fininọ lẹpo klọ.” (Osọhia 12:9) Mẹsusu sọ nọ hodo apajlẹ etọn. Whẹwhinwhẹ́n dopo poun niyẹn he wutu aihọn do gọ́ na lalodido, wangbẹna po kanyinylan po.

⁸ Whẹwhinwhẹ́n devo lẹ sọ tin he wutu yajiji do sù sọmọ. To atẹṣiṣi Adam po Evi po tọn godo, yé jo ogú ylando tọn dai na ovi yetọn lẹ. Podọ na ylando wutu, gbẹtọvi lẹ nọ hẹn yajiji wá hatọ yetọn lẹ ji. Yé nọ saba jlo na do yede hia di mẹjọmẹ hú mẹdevo lẹ. Yé nọ hoavùn bo nọ funawhàn bosọ nọ tafu mẹdevo lẹ. (Yẹwhehodọtọ 4:1; 8:9) To whedelẹnu, “ojlẹ po kosọ po” wẹ nọ zọ́n bọ gbẹtọ lẹ do nọ jiya. (Yẹwhehodọtọ 9:11) Asidan po nuylankan devo lẹ po sọgan jọ do yé go, na yé tin to fide gbọn kosọ dali to ojlẹ lọ mẹ wutu.

 9. Naegbọn mí sọgan deji dọ nude janwẹ na ko zọ́n bọ Jehovah do jotẹnna yajiji?

⁹ Jehovah ma nọ hẹn yajiji wá mí ji pọ́n gbede. E ma yin ewọ wẹ mí dona nọ dowhẹ na awhàn, sẹ́nhẹngba po nuyiwahẹmẹ agọ̀ lẹ po. Jiwheyẹwhe ma nọ hẹn nugbajẹmẹji lẹ taidi aigba sisọsisọ, jẹhọn ahizi po singigọ lẹ po wá. Ṣigba, a sọgan kanse dọ, ‘Eyin Jehovah wẹ dohuhlọn hugan to wẹkẹ lọ mẹ, naegbọn e ma do nọ glọnalina nuylankan enẹlẹ nado jọ?’ Mí yọnẹn dọ Jiwheyẹwhe nọ hò mítọn pọ́n taun, enẹwutu nude janwẹ na ko zọ́n bọ e do jotẹnna yajiji kakajẹ din.—1 Johanu 4:8.

10. Nawẹ Satani diọnukunsọ Jehovah gbọn?

¹⁰ To jipa Edẹni tọn mẹ, Lẹgba doyẹklọ Adam po Evi po. Satani sawhẹdokọna Jiwheyẹwhe dọ Gandutọ ylankan de wẹ e yin. E sọalọakọ́n dọ Jiwheyẹwhe to nudagbe de whlá do Adam po Evi po. Satani jlo dọ yé ni yise dọ gandudu emitọn na pọnte hú Jehovah tọn podọ dọ yé ma tindo nuhudo Jiwheyẹwhe tọn.—Jenẹsisi 3:2-5; pọ́n Nudọnamẹ Dogọ 27tọ.

11. Kanbiọ tẹwẹ mí dona dín gblọndo na?

¹¹ Adam po Evi po vẹtolina Jehovah bo ṣiatẹ sọta ẹ. Yé lẹndọ yé tindo jlọjẹ nado magbe dagbe po oylan po tọn na yede. Nawẹ Jehovah sọgan dohia dọ linlẹn atẹṣitọ lọ lẹ tọn ma sọgbe podọ dọ ewọ yọ́n nuhe na wà dagbe na mí hugan gbọn?

12, 13. (a) Naegbọn Jehovah ma và atẹṣitọ lọ lẹ sudo to afọdopolọji? (b) Naegbọn Jehovah do na dotẹnmẹ Satani nado dugán do aihọn ehe ji bosọ natẹn gbẹtọvi lẹ nado deanana yede?

¹² Jehovah ma và Adam po Evi po sudo to afọdopolọji. Kakatimọ, e jo yé do bọ yé ji ovi lẹ. Enẹgodo, Jehovah hẹn ẹn yọnbasi na ovi Adam po Evi po tọn lẹ nado de mẹhe yé jlo dọ ni yin gandutọ yetọn. Lẹndai Jehovah tọn wẹ yindọ gbẹtọvi pipé lẹ ni gọ́ aigba ji, podọ nude ma na glọnalina enẹ mahopọnna nudepope he Lẹgba sọgan tẹnpọn nado wà.—Jenẹsisi 1:28; Isaia 55:10, 11.

¹³ Satani diọnukunsọ Jehovah to angẹli livi susu lẹ nukọn. (Jobu 38:7; Daniẹli 7:10) Enẹwutu, Jehovah na whenu Satani nado dohia eyin whẹsadokọnamẹ etọn lẹ yin nugbo. E sọ na whenu gbẹtọvi lẹ nado do gandudu yetọn titi lẹ ai to anademẹ Satani tọn glọ, na e nido họnwun eyin e na pà yé matin alọgọ Jiwheyẹwhe tọn.

14. Etẹwẹ họnwun dile ojlẹ to yìyì?

¹⁴ Na owhe fọtọ́n susu, gbẹtọvi lẹ ko tẹnpọn nado deanana yede, amọ́ e ma pà yé. E ko họnwun dọ lalonọ wẹ Satani. Gbẹtọvi lẹ do nuhudo alọgọ Jiwheyẹwhe tọn dandan. Owhẹ̀ yẹwhegán Jelemia tọn whẹ́n to whenue e dọ dọ: “Jehovah E, yẹn yọnẹn ganji, dọ aliho gbẹtọ tọn ma tin to alọ edetiti tọn mẹ. E ma tin to huhlọn mẹhe to zọnlinzin tọn mẹ nado deanana afọdide etọn lẹ.”—Jelemia 10:23.

15, 16. (a) Naegbọn Jehovah do jotẹnna yajiji na ojlẹ dindẹn sọmọ? (b) Naegbọn Jehovah ma ko didẹ nuhahun he Satani hẹnwa lẹ?

¹⁵ Naegbọn Jehovah do jotẹnna yajiji na ojlẹ dindẹn sọmọ? Naegbọn e ma nọ glọnalina nuylankan lẹ nado jọ? E biọ whenu susu whẹpo e do wá họnwun dọ gandudu Satani tọn gboawupo. Gbẹtọvi lẹ ko tẹ́n gandudu voovo lẹ pọ́n, amọ́ e ma pà yé. Dile etlẹ yindọ yé ko yinukọn taun to lẹnunnuyọnẹn po azọ́n nuyọnẹn wintinwintin tọn po mẹ, whẹdida mawadodo, ohẹ́n, sẹ́nhẹngba po awhàn po ko jideji hugan gbede pọ́n. Mí ma sọgan deanana míde matin alọgọ Jiwheyẹwhe tọn bọ e na pà mí.

¹⁶ Etomọṣo, Jehovah ma ko didẹ nuhahun he Satani hẹnwa lẹ. Eyin e ko wàmọ wẹ, e na dohia dọ Jiwheyẹwhe to godonọna gandudu Satani tọn, Ewọ ma ka gán wàmọ gbede. Humọ, enẹ na ko hẹn gbẹtọ lẹ yise dọ yé gán deanana yede po kọdetọn dagbe po. Ṣigba, lalo wẹ, podọ Jehovah ma na nọgodona linlẹn enẹ. E ma nọ dolalo gbede.—Heblu lẹ 6:18.

17, 18. Etẹwẹ Jehovah na wà gando nuhe Satani ko hẹngble lẹpo go?

¹⁷ Be Jehovah sọgan vọ́ nuhe atẹṣiṣi Satani po gbẹtọvi lẹ po tọn ko hẹngble lẹpo jlado ya? Mọwẹ. Nulẹpo wẹ yọnbasi na Jiwheyẹwhe. Jehovah yọ́n whenue e na họnwun dọ gblọndo ko yin nina na nukundiọsọmẹ Satani tọn to gigọ́ mẹ. Enẹgodo, e na diọ aigba zun paladisi, dile e ko te do dai. Mẹhe to “yọdò oflin tọn lẹ” mẹ lẹpo na yin finfọnsọnku. (Johanu 5:28, 29) Gbẹtọ lẹ ma nasọ jẹazọ̀n kavi kú ba. Jesu na vọ́ nuhe Satani ko hẹngble lẹpo jlado. Jehovah na yí Jesu zan “nado gbà azọ́n Lẹgba tọn lẹ.” (1 Johanu 3:8) Mí dopẹ́ dọ todin whẹ́, Jehovah to homẹfa hẹ mí, na mí nido sọgan plọn nado yọ́n ewọ bo dohia dọ ewọ wẹ mí de taidi Gandutọ mítọn. (Hia 2 Pita 3:9, 10.) Eyin mí tlẹ to yaji, e nọ gọalọna mí nado doakọnna.—Johanu 4:23; Hia 1 Kọlintinu lẹ 10:13.

¹⁸ Jehovah ma nọ hẹn mí po huhlọn po nado de ewọ taidi Gandutọ mítọn. E na míwu gbẹtọvi lẹ nunina mẹdekannujẹ nudide bibasi tọn. Gbọ mí ni pọ́n nuhe nunina họakuẹ ehe zẹẹmẹdo na mí.

19. Nunina jiawu tẹwẹ Jehovah na mí? Naegbọn mí dona dopẹ́ dọ e na mí nunina ehe?

¹⁹ Nunina jiawu mẹdekannujẹ nudide bibasi tọn he Jehovah na mí nọ hẹn mí gbọnvo pete na kanlin lẹ. Na taun tọn, nuyọnẹn jọwamọ tọn wẹ nọ deanana kanlin lẹ, amọ́ míwlẹ sọgan de lehe mí jlo na zan ogbẹ̀ mítọn gbọn bosọ de nado hẹn homẹhun Jehovah kavi lala. (Howhinwhẹn lẹ 30:24) Humọ, mí ma taidi maṣinu lẹ he ma nọ wà nudevo zẹ̀ nuhe yé yin awuwlena nado wà go. Mí vò nado de mẹhe nkọ mí jlo na yin, mẹhe nkọ mí jlo na jihọntọn hẹ lẹ po nuhe mí na yí gbẹzan mítọn do wà po. Jehovah jlo dọ mí ni duvivi ogbẹ̀ tọn.

20, 21. Etẹwẹ yin nudide dagbe hugan he a sọgan basi todin?

²⁰ Jehovah jlo dọ mí ni yiwanna emi. (Matiu 22:37, 38) Ewọ taidi otọ́ de he homẹ etọn nọ hùn eyin e sè bọ ovi etọn dọna ẹn sọn ahun mẹ wá dọ “N’yiwanna mì,” bọ e ma yin mẹde wẹ hẹn ovi lọ po huhlọn po nado wàmọ. Jehovah na mí mẹdekannujẹ nado de eyin mí na sẹ̀n ẹn kavi lala. Satani, Adam po Evi po de nado gbẹ́ Jehovah dai. Nawẹ hiẹ na yí mẹdekannujẹ nudide bibasi tọn he yin nina we zan gbọn?

²¹ Yí mẹdekannujẹ nudide bibasi tọn towe zan nado sẹ̀n Jehovah. Gbẹtọ livi susu devo lẹ ko de nado hẹn homẹhun Jiwheyẹwhe bo gbẹ́ Satani dai. (Howhinwhẹn lẹ 27:11) Etẹwẹ a sọgan wà din, na a nido tin to aihọn yọyọ Jiwheyẹwhe tọn mẹ to whenue ewọ na ko de yajiji lẹpo sẹ̀? Weta he bọdego na na gblọndo kanbiọ enẹ tọn.